Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2017

Gandja esimano kwaangoka a gwana oku li pewa

Gandja esimano kwaangoka a gwana oku li pewa

“Ehambelelo, esimano, eadhimo noonkondo kungoka a kuutumba koshipangelapundi nokOnzigona, aluhe sigo aluhe!” —  EH. 5:13.

OMAIMBILO: 10, 16

1. Omolwashike yamwe ya gwana okusimanekwa, noshike tatu ka kundathana ngashingeyi?

OKUSIMANEKA omuntu osha hala okutya oku mu pa eitulomo lyi ikalekelwa noku mu pa esimaneko. Omuntu ngoka a gwana okupewa eitulomo nesimano ndyoka, okwa tegelelwa a kale e li ilongela nenge te li pewa omolwondondo ndjoka e na. Onkee ano, otatu vulu okwiipula ngeyi: Olye tu na okusimaneka, nomolwashike tu na oku mu simaneka?

2, 3. (a) Omolwashike Jehova oye a gwana lela okusimanekwa? (Tala kethano lyopetameko.) (b) Olye Onzigona ndjoka tayi popiwa mEhololo 5:13, nomolwashike a gwana okusimanekwa?

2 Ngaashi Ehololo 5:13 lye shi popi, ‘ngoka a kuutumba koshipangelapundi nOnzigona’ oyo ya gwana shili okusimanekwa. Otwa ndhindhilika montopolwa 4 yembo lyEhololo kutya omolwashike Jehova a gwana okusimanekwa. Aayengeli megulu oya li ya hambelele Jehova ngoka “e na omwenyo sigo aluhe.” Oya popi ya ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!” —  Eh. 4:9-11.

 3 Jesus Kristus oye “Onzigona yaKalunga, tayi kutha po oondjo dhuuyuni.” (Joh. 1:29) Ombiimbeli otayi tu lombwele kutya oku vule kokule aantu ayehe mboka ye li nenge ya li aakwaniilwa. Otayi yelitha tayi ti: “Omukwaniilwa gwaakwaniilwa nOmuwa gwaawa. Oye awike ihaa si; a kala muuyelele itaau wapa okuyiwa. Kaku na nando omuntu e mu mona nokaku na nando omuntu ta vulu oku mu tala.” (1 Tim. 6:14-16) Mbela omukwaniilwa gulwe guni i iyambele a sile oondjo dhetu? Mbela ino inyengithwa wu kale wa hala okwiimba pamwe naayengeli omayovi mboka taya ti: “Onzigona ngoka a li a dhipagwa, oye a gwana okutaamba epangelo, uuyamba, uunongo noonkondo, esimano, eadhimo nehambelelo!” —  Eh. 5:12.

4. Omolwashike okusimaneka Jehova naKristus kaaku shi ehogololo?

4 Okusimaneka Jehova naKristus kaku shi ehogololo. Okumona omwenyo gwaaluhe kwetu okwi ikolelela koku ya simaneka. Oohapu dhaJesus ndhoka tatu lesha muJohannes 5:22, 23 otadhi tu kwathele tu mone kutya “He ita pangula nando ogumwe, ihe epangulo alihe okwe li gandja kOmwana, aantu ayehe opo ya simaneke Omwana, ngashika naanaa taa simaneke He. Oongoka itaa simaneke Omwana, ita vulu wo okusimaneka He, ngoka e mu tuma.” —  Lesha Episalomi 2:7, 11.

5. Omolwashike tu na okusimaneka aantu ayehe momukalo gwontumba?

5 Aantu oya shitwa ‘oshifetha shaKalunga.’ (Gen. 1:27) Nonando aantu oyendji oya yoolokathana, ohaya vulu okuulika omaukwatya gamwe ga fa gaKalunga. Aantu oya shitwa haya vulu okuulukilathana ohole, olukeno nosho wo ohenda. Aantu oya shitwa ye na eiyuvo noondunge dhuuvalelwa mo, nonando omathimbo gamwe ihaye dhi longitha nawa ya mone kutya oshike shi li mondjila nenge sha puka noshike shi li pauyuuki nenge kaashi li pauyuuki. (Rom. 2:14, 15) Aantu oyendji oye hole iinima mbyoka ya yogoka niiwanawa. Oya hala okukala pamwe naantu aanambili. Kutya nduno aantu oye shi shi nenge kaye shi shi, ohayu ulike eadhimo lyaJehova momukalo gwontumba, nomolwaashono ya gwana okusimanekwa. —  Eps. 8:5.

SIMANEKA YALWE MOMUKALO GWE ELEKA

6, 7. Shi na ko nasha nokusimaneka aantu, Oonzapo dhaJehova odha yooloka ko ngiini kaantu oyendji?

6 Otwa pumbwa okukala nondjele mokutokola kutya esimano li thike peni tu na okupa aantu yalwe notu na oku shi ninga shi thike peni. Aantu oyendji inaaya gwanenena oya nwethwa mo nayi kombepo yuuyuni waSatana. Oya ninga aalumentu naakiintu yontumba iikalunga yawo, pehala lyoku ya simaneka owala momukalo gwe eleka. Ohaya simaneke aawiliki yomalongelokalunga noyopapolotika, mboka ya tseyika nawa momaudhano, omanyakwa momainyanyudho naanamadhina yalwe. Omathimbo gamwe, ohaye ya tala ko ya fa oyo ookalunga kawo. Aagundjuka naakokele ohaya holele omikalo dhawo, okuzala kwawo neihumbato lyawo.

7 Aakriste yashili kaye na okukala ye na etaloko ewinayi lya tya ngaaka lyokusimaneka aantu. Kristus oye owala omuntu a kala ko nale ngoka tatu vulu okutala ko e li oshiholelwa sha gwanenena. (1 Pet. 2:21) Kalunga ita ka kala e shi nyanyukilwa ngele otwa gandja esimano lya pitilila kaantu, ndyoka inaaya gwana oku li pewa. Otwa pumbwa okudhimbulukwa oshili ya simana ndjoka tayi ti: “Aantu ayehe oya yona, kaye na oonkondo dhoku ya hupitha.” (Rom. 3:23) Odhoshili kutya kaku na aantu ya gwana okusimanekwa momukalo ngoka tagu ya talitha ko ya fa iikalunga.

8, 9. (a) Oonzapo dhaJehova odha tala ko ngiini aakwanepangelo? (b) Aakwanepangelo otu na oku ya ambidhidha shi thike peni?

8 Muuyuni omu na aantu yamwe mboka ye li  poondondo dhokukala ye na oonkondopangelo. Ngaashi aakwanepangelo oya tegelelwa ya tule po oompango nomalandulathano, opo ya sile oshimpwiyu oompumbwe dhaantu miilongo yawo. Shika ohashi etele aantu ayehe uuwanawa. Omuyapostoli Paulus okwa li a ladhipike Aakriste ya kale taya vulika ‘kaapangeli’ yawo. Okwe ya lombwele a ti: ‘Peni ayehe shono mu na oku shi ya pa: oompale oongoka e na oku dhi pewa, esimano oongoka e na oku li pewa.’ —  Rom. 13:1, 7, OB-1954.

9 Oonzapo dhaJehova ohadhi simaneke nehalo ewanawa aakwanepangelo, nonando omukalo gwoku ya simaneka otashi vulika gu kale gwa yoolokathana miilongo niilongo. Ohatu vulika kuyo sho taya longo iilonga yawo. Nonando ongawo, oku ya simaneka noku ya ambidhidha kwetu oku na okukala pandjele nokwi ikolelela kOmanyolo. Katu na okukala nando itaatu vulika kuKalunga nenge tu yone po uudhiginini wetu. —  Lesha 1 Petrus. 2:13-17.

10. Oshigwana shaJehova shonale osha li hashi simaneke ngiini omapangelo naakwanepangelo?

10 Oshigwana shaJehova shonale osha li hashi simaneke omapangelo naakwanepangelo. Sho epangelo lyaRoma lya ti kutya aantu ayehe oye na oku ki inyolitha, Josef naMaria oya li ya vulika kelombwelo ndyoka. Oya yi kuBetlehem, nonando Maria okwa li e li pokumona okanona ke kotango. (Luk. 2:1-5) Konima sho Paulus a li a lundilwa kutya okwa ninga sha sha puka, okwi ipopile nesimaneko noku ulike esimano komukwaniilwa Herodes Agrippa nosho wo kuFestus, omupangeli Omuroma gwoshitopolwalongo shaJudea. —  Iil. 25:1-12; 26:1-3.

11, 12. (a) Omolwashike ihaatu ulukile aakwatelikomeho yomalongelokalunga esimaneko, ngaashi hatu shi ningile aakwanepangelo? (b) Oshizemo oshiwanawa shini sha holoka po sho Onzapo yimwe yokuAustria ya simaneke omunapolotika?

11 Oonzapo dhaJehova ihadhi simaneke aawiliki yomalongelokalunga momukalo gwi ikalekelwa, nonando oya tegelela osho ya ningilwe. Omalongelokalunga giifundja ihaga longo oshili kombinga yaKalunga noinaga simaneka Oohapu dhe. Ano otu na oku ya tala ko ngaashi aantu ooyakwetu, ihe katu na oku ya simaneka momukalo gwi ikalekelwa. Jesus okwa li a aneke pomutenya aalumentu ya tya ngaaka yopethimbo lye, sho e yi ithana aafudhime naakwatiketi aaposi. (Mat. 23:23, 24) Mepingathano naashoka, okusimaneka kwetu aakwanepangelo, omathimbo gamwe ohaku vulu okweeta iizemo iiwanawa mbyoka inaatu tegelela.

12 Leopold Engleitner ngoka a za koAustria, okwa li omulaadhi. Okwa li a kwatwa po kAanazi nokwa tumwa neshina lyokolutenda kokamba yoonkwatwa koBuchenwald. Meshina moka e ende omwa li wo omunandholongo Dr. Heinrich Gleissner ngoka a li omunapolotika Omuaustria. Aanazi kaya li we ye mu hokwa, molwaashono ka li we te ya ambidhidha. Manga ye li mondjila taya falwa kokamba, omumwatate Engleitner okwa li a yelithile nesimaneko Gleissner eitaalo lye, nokwa li a pulakene nawa. Konima yiita iitiyali yuuyuni, Gleissner okwa li a longitha oonkondo dhe dhopapolotika lwiikando a kwathele Oonzapo dhaJehova moAustria. Otashi vulika to dhimbulukwa iiholelwa yilwe yi na ko nasha niinima iiwanawa mbyoka ya ningwa, sho Oonzapo dha simaneke momukalo gu uka aakwanepangelo, moku ya pa esimano ndyoka Ombiimbeli tayi ti kutya Aakriste oye na oku ya pa.

AANTU YALWE MBOKA YA GWANA OKUSIMANEKWA

13. Oolye ya gwana okusimanekwa momukalo gwi ikalekelwa, nomolwashike?

13 Ooitaali ooyakwetu oya gwana wo okupewa esimaneko, unene tuu aakuluntugongalo mboka haya kwatele komeho. (Lesha 1 Timoteus 5:17.) Ohatu simaneke aamwatate  mbaka nokaapu na okutala kuukwashigwana wawo, elongo nondondo yawo nenge omahupilo gawo. Ombiimbeli otayi ya popi ye li “omagano” nohaya sile oshimpwiyu oompumbwe dhoshingwana shaKalunga. (Ef. 4:8) Dhiladhila kaakuluntugongalo, aatonatelishikandjo, Iilyo yOokomitiye dhIitayimbelewa nosho wo iilyo yOlutuwiliki. Aamwatate naamwameme yomethelemimvo lyotango oya li ya simaneke aantu mboka ya langekwa po ya kwatele komeho, natse otu na okuninga sha faathana kunena. Katu na okutala ko aakalelipo yegongalo lyopaKriste mboka ye shiwike nawa, ya fa ookalunga nenge tu ya tale ko ya fa aayengeli ye li mokati ketu. Ano otu na okukala hatu simaneke aamwatate mboka omolwokulonga kwawo nuudhiginini nomolweifupipiko lyawo. —  Lesha 2 Aakorinto 1:24; Ehololo 19:10.

14, 15. Popya eyooloko ndyoka li li pokati kaankuluntugongalo Aakriste naamboka hayi iti kutya aawiliki yomalongelokalunga.

14 Aakuluntugongalo mboka oya talika ko ye li aasita yokulitha oshigunda shaKalunga aaifupipiki. Omolweifupipiko lyawo, ihaya pitike okuungaungwa nayo ya fa aanamadhina. Oya yooloka ko thiluthilu kaawiliki yomalongelokalunga yokunena nokwaamboka yomethelemimvo lyotango ya popiwa kuJesus a ti: “Oye hole pomahala gaakuluntu miituthi nokiipundi ya simana moosinagoga. Oye hole okukundilwa pokuma hapu gongala aantu nokwiithanwa kaantu omuhongi.” —  Mat. 23:6, 7.   

15 Aakuluntugongalo aaifupipiki ohaya vulika koohapu dhaJesus ndhoka tadhi ti: “Ne inamu zimina, mu ithanwe omuhongi, oshoka one amuhe aamwayinathana nomu na Omuhongi gumwe awike. Inamu ithana nando olye gwokombanda yevi ‘ho’, oshoka one mu naHo gumwe awike, oonguka gwomegulu. Inamu pitika, mu ithanwe ‘omuwiliki’, oshoka omuwiliki gweni gumwe awike oKristus. Omunene gwomokati keni na ninge omuyakuli gweni. Oshoka ngoka ti inenepeke, ota shonopekwa, naangoka ti ishonopeke, ota nenepekwa.” (Mat. 23:8-12) Otatu vulu oku shi uva ko kutya omolwashike aakuluntugongalo momagongalo agehe ye holike nohaya simanekwa kooitaali ooyakwawo.

Uuna aakuluntugongalo taya longo neifupipiko, otatu ka kala tu ya hole notwe ya simaneka (Tala okatendo 13-15)

16. Omolwashike twa pumbwa okutsikila okuninga oonkambadhala tu uve ko notu tule miilonga shoka Ombiimbeli tayi ti shi na ko na sha nokusimaneka yalwe?

16 Otashi vulika shi kuthe ethimbo, opo tu kale tu na etaloko li li pandjele li na ko nasha naamboka tu na okusimaneka nosho wo nkene tu na oku shi ninga. Osha li wo sha kutha ethimbo kAakriste yopethimbo lyonale. (Iil. 10:22-26; 3 Joh. 9, 10) Otashi pula lela oonkambadhala  okuninga shoka Ombiimbeli tayi ti shi na ko nasha nokusimaneka yalwe. Uuna tatu shi ningi otatu ka mona omayambeko ogendji.

UUWANAWA MBOKA HAWU ZI MOKUSIMANEKA YALWE MOMUKALO GU UKA

17. Uuwanawa wumwe wuni hawu zi mokusimaneka mboka ye na oonkondopangelo?

17 Uuna tatu simaneke mboka ye na oonkondopangelo, otashi vulika ya ka popile uuthemba wetu wokuuvitha twa manguluka. Otashi vulika wo ya kale ye na etaloko ewanawa li na ko nasha niilonga yetu yokuuvitha. Omimvo dhontumba dha pita, omumwameme Birgit, omukokolindjila moNdowishi okwa li e ya a kale po esiku aanasikola ya pewa oonzapo, mboka muyo mwa li mwa kwatelwa okamwanakadhona. Aalongi oya li ye mu lombwele kutya oye shi nyanyukilwa okukala ye na aanona yOonzapo posikola yawo uule womimvo. Oya ti kutya osha li oshiwanawa noonkondo okukala pamwe nayo. Birgit okwe ya lombwele a ti: “Uunona wetu ohawu longwa nkene wu na okulandula omithikampango dhOmbiimbeli ndhoka dha kwatela mo okusimaneka aalongi.” Omulongi gumwe okwa ti: “Ando uunona awuhe owa li wa fa weni, ando aalongi otatu kala twa fa tu li moparadisa.” Konima yiiwike yontumba, yamwe yoomalongi mboka oya li ya kala poshigongi shoshitopolwa moLeipzig.

18, 19. Omolwashike okusimaneka aakuluntugongalo momukalo gu uka kwa simana?

18 Uuna tatu simaneke aakuluntugongalo momukalo gu uka, otatu ulike kutya otatu wilikwa komakotampango ga gwanenena ngoka taga adhika mOohapu dhaKalunga. (Lesha Aahebeli 13:7, 17.) Otatu vulu oku ya pandula sho haya longo nuudhiginini naasho haya kambadhala okulandula omalombwelo ngoka taya gandja. Uuna tatu shi ningi, otashi ke ya kwathela ya tsikile okugwanitha po iinakugwanithwa yawo nenyanyu. Itashi ti kutya otu na okuholela aakuluntugongalo lelalela momukalo moka haya zala nokwiiyopaleka, haya popi nenge haya longo aantu. Ngele otwe ya holele, otashi vulu okugandja etaloko lya puka. Katu na okudhimbwa kutya nayo oye li aantu inaaya gwanenena. Kristus oye oshiholelwa shoka tu na okulandula nokuholela.

19 Uuna tatu simaneke aakuluntugongalo momukalo gu uka, nopwaahe na okuungaunga nayo ya fa aanamadhina, kungawo otatu ya kwathele. Otatu shi ningi wo oshipu kuyo kaaya kwatwe kuuntsa wokukala yu uvite ya simana ye vule yalwe nenge yi ishi uuyuuki unene.

20. Okusimaneka yalwe otaku tu kwathele ngiini?

20 Okusimaneka yalwe mboka ya gwana okusimanekwa otaku tu kwathele tu kale kaatu ihole tse yene. Otaku tu kwathele wo tu yande omadhiladhilo omawinayi uuna yalwe taye tu simaneke. Otashi tu kaleke wo metsokumwe nehangano lyaJehova, ndyoka itaali popile okusimaneka aantu sha pitilila, kutya nduno ooitaali ooyakwetu nenge omboka kaaye shi ooitaali. Uunongo otawu tu kwathele tu yande okupundukithwa ngele aantu yamwe mboka hatu simaneke taye tu yemateke.

21. Oshike sha simana noonkondo shi na ko nasha nokusimaneka yalwe momukalo gu uka?

21 Shoka sha simana noonkondo shi na ko nasha nokusimaneka yalwe momukalo gu uka, osho okunyanyudha Kalunga. Uuna tatu katuka metsokumwe naashoka a hala tu ninge, otatu ka kala aadhiginini kuye. Shoka otashi ka kwathela wo Kalunga a yamukule ngoka ta kambadhala oku mu sitha ohoni. (Omayel. 27:11) Uuyuni mbuka owu udha aantu kaaye shi nkene ye na okusimaneka yalwe momukalo gu uka. Inatu pandula tuu sho tu shi nkene tu na okusimaneka yalwe momukalo moka Jehova a hokwa!