Inda koshikalimo

Inda koshikalimo

Oonzapo dhaJehova

Hogolola elaka Oshindonga

Jehova oha wilike oshigwana she, shi ende mondjila ndjoka tayi fala komwenyo

Jehova oha wilike oshigwana she, shi ende mondjila ndjoka tayi fala komwenyo

“Ondjila oyo ndjika. Yi landuleni.” — JESAJA 30:21.

OMAIMBILO: 65, 48

1, 2. (a) Aantu oyendji oya hupa sho ya pulakene kelondodho lini? (Tala kethano lyopetameko.) (b) Ewiliko lini tali vulu okuhupitha oshigwana shaKalunga?

“THIKAMA, TALA, PULAKENA.” Oohapu ndhoka odha kala dha nyolwa uule womimvo dhi vulithe 100 komandhindhiliko omanene ge li mpoka hapu taagulukwa olutenda, muumbangalantu waAmerika. Mbela oge lile po shike? Oga tulwa po, opo iihauto kaayi ipume mumwe neshina lyokolutenda sho tayi taaguluka ondjila. Aantu mboka ya kala nokuvulika komandhindhiliko ngoka, oya hupitha oomwenyo dhawo.

2 Jehova ihe tu tulile po omandhindhiliko ge na ko nasha negameno. Oha wilike oshigwana she, opo kaashi iyadhe moshiponga noshi vule oku ka mona omwenyo gwaaluhe. Jehova okwa fa omusita omunahole ngoka ha wilike noha londodha oonzi dhe, dhi yande iiponga. — Lesha Jesaja 30:20, 21.

JEHOVA OKWA KALA HA WILIKE ALUHE OSHIGWANA SHE

3. Oshe ende ngiini, opo aantu ayehe ya ye mondjila ndjoka tayi fala meso?

3 Sho Jehova a shiti aantu, okwe ya pe omalombwelo gokondandalunde. Pashiholelwa, moshikunino shaEden, Jehova okwa li a gandja omalombwelo ga yela nawa ngoka ga li taga ka wilika aantu, opo ya vule okumona omwenyo gwaaluhe noya  kale ya nyanyukwa. (Genesis 2:15-17) Adam naEva kaya li ya vulika kewiliko ndyoka ya pewa kuHe omunahole, Jehova. Eva okwa li a pulakene komayele ngoka a pewa kuSatana okupitila meyoka. Adam okwa pulakene komukadhi, Eva. Oshizemo osha li shini? Ayehe yaali oya tameke okumona iihuna noya si kaaye na etegameno lyeyumuko. Okwaavulika kwawo okwa fala aantu ayehe mondjila ndjoka tayi fala meso.

4. (a) Omolwashike Jehova a li a gandja oshipango oshipe konima yeyelu? (b) Oshipango shoka oshipe oshu ulike ngiini nkene Jehova a tala ko omwenyo nombinzi?

4 Jehova okwa li a pe Noa omalombwelo ngoka ga li taga ka hupitha aantu. Konima yeyelu, Jehova okwa lombwelele aantu kaaya lye ombinzi nenge ye yi nwe. Omolwashike mbela? Omolwaashoka okwa li ta ka pitika aantu ya kale haya li onyama. Oya li ya pumbwa oshipango oshipe, molwaashoka onkalo oya li ya lunduluka. Jehova okwa ti: “Inamu lya onyama yi na ombinzi; otandi yi indike, oshoka omwenyo ogwa kala mombinzi.” (Genesis 9:1-4) Moshipango shoka otatu ilongo mo nkene Kalunga a tala ko omwenyo, oshoka oye Onzo yomwenyo. Oye Omushiti noye e tu pa omwenyo. Onkee ano, oku na uuthemba woku tu tulila po oompango dhankene tu na okutala ko omwenyo. Pashiholelwa, okwa li a gandja oshipango kutya inatu dhipaga aantu ooyakwetu. Shoka tashi ulike kutya okwa tala ko omwenyo nosho wo ombinzi yi li oshinima oshiyapuki. Ota ka geela kehe ngoka itaa vulika koshipango shoka. — Genesis 9:5, 6.

5. Oshike tatu ka konakona moshitopolwa shika, nomolwashike?

5 Konima yeso lyaNoa, Kalunga okwa li a tsikile nokuwilika oshigwana she. Moshitopolwa shika otatu ka tala iiholelwa yimwe yankene a kala noku shi wilika. Shoka otashi ka koleka etokolo lyetu lyokulandula ewiliko lyaJehova sigo omuuyuni uupe.

OSHIGWANA OSHIPE TASHI PEWA OOMPANGO OOMPE

6. Omolwashike oshigwana shaKalunga sha li sha pumbwa okuvulika koompango ndhoka dha gandjwa okupitila muMoses, nosha li sha pumbwa okukala niikala ya tya ngiini?

6 Pethimbo lyaMoses, Jehova okwa li a pe oshigwana she oompango dha yela kombinga yankene shi na okwiihumbata nonkene shi na oku mu longela. Omolwashike mbela? Omolwaashoka oonkalo odha li dha lunduluka ishewe. Uule womimvo dhi vulithe pomathele gaali, Aaisraeli oya kala aapika muEgipiti. Aantu yamo oya li haya galikana oonakusa, haya longele iikalunga nohaya ningi iinima mbyoka itaayi simanekitha Kalunga. Sho oshigwana shaKalunga sha mangululwa muEgipiti, osha li sha pumbwa ewiliko epe. Osha li tashi ka kala oshigwana shoka hashi landula owala Ompango yaJehova. Omambo gamwe otaga ti kutya oshitya shOshihebeli shoka sha tolokwa “ompango” osha faathana noshitya “lombwela, wilika nenge longa” omuntu. Ompango oya li ya gamene Aaisraeli koluhondelo nokenwethomo lyomalongelokalunga giifundja giigwana mbyoka ye ya kundukidha. Kalunga okwa li he ya laleke nuuyamba uuna ya pulakene kuye. Uuna ya tindi okuvulika kuye, oya li haya adhika kiilanduliko iiwinayi. — Lesha Deuteronomium 28:1, 2, 15.

7. (a) Omolwashike Jehova a li a pe Aaisraeli oompango oompe? (b) Ompango oya li ya wilike nenge ya putudha ngiini Aaisraeli?

7 Aaisraeli oya li ya pumbwa oompango oompe, omolwetompelo lilwe ishewe. Ompango oya li ye ya kwathele yi ilongekidhile oshiningwanima sha simana shi na ko nasha nokugwanithwa kwelalakano lyaJehova, ano okuya kwaMesiasa, ngoka e li Jesus Kristus. Ompango oya li hayi dhimbulukitha Aaisraeli kutya inaya gwanenena. Oya li wo ye ya kwathele yu uve ko kutya oya pumbwa  ekulilo ndyoka li li eyambo lya gwanenena. Eyambo ndyoka olya li tali ka theta po oondjo dhawo thiluthilu. (Aagalati 3:19; Aahebeli 10:1-10) Ompango oya li ya gamene ezimo moka mwa li tamu ka za Mesiasa noya kwathele Aaisraeli ya vule oku mu dhimbulula mo, ngele a holoka. Osha yela kutya Ompango oya li tayi ya wilike nenge yi li “omuputudhi” gwawo gwopakathimbo sigo Kristus e ya. — Aagalati 3:23, 24.

8. Omolwashike tu na okuwilikwa komakotampango ngoka ge li mOmpango yaMoses?

8 Tu li Aakriste kunena, otatu vulu okumona uuwanawa mOmpango ndjoka Jehova a li a pe Aaisraeli. Ngiini mbela? Omokukala hatu thikama e tatu tala komakotampango hoka Ompango ya li yi ikolelela. Nonando katu li we kohi yOmpango ndjoka, otayi vulu natango oku tu wilika miinima yimwe monkalamwenyo nomokulongela Jehova kwetu. Jehova okwa nyolitha Ompango ndjoka mOmbiimbeli, opo tu vule okwiilonga mo sha muyo notu wilikwe komakotampango gayo. Otwa pandula sho Jesus e tu longo oshinima shimwe shoka sha simana shi vule Ompango. Natu pulakene kwaashoka Jesus a popi, sho a ti: “One omu uvu kwa tiwa: ‘Ino hondela.’ Ihe ngame otandi mu lombwele: Okehe tuu ngoka ta tala omukiintu e mu haluka, oye okwe mu hondele momwenyo gwe.” Osha yela kutya katu na owala okuyanda oluhondelo, ihe otu na wo okukondjitha omahalo nomadhiladhilo inaaga yogoka. — Mateus 5:27, 28.

9. Onkalo yini ya ningitha Jehova a gandje omalombwelo omape?

9 Konima sho Jesus a ningi Mesiasa, Jehova okwa gandja omalombwelo omape. Omalombwelo ngoka oga li ga holola uuyelele owundji wu na ko nasha nelalakano Lye. Omolwashike mbela? Omolwaashoka momumvo 33, Jehova okwe ekelehi oshigwana shaIsraeli, e ta hogolola egongalo lyopaKriste li ninge oshigwana she. Sha hala okutya, onkalo yoshigwana shaJehova, oya lunduluka ishewe.

EWILIKO NDYOKA LYA LI LYA PEWA ISRAELI YAKALUNGA

10. Omolwashike egongalo lyopaKriste lya li lya pewa oompango oompe, nodha li dha yooloka ko ngiini kOmpango yaMoses?

10 Jehova okwa li a pe Aaisraeli Ompango yaMoses yi ya longe nkene ye na okwiihumbata nankene ye na oku mu longela. Petameko lyomimvo 2 000 dha ka pita, oshigwana shaKalunga kasha li owala shi na aantu ya za moshigwana shimwe. Osha li shi na aantu ya za miigwana nomomaputuko ogendji. Aantu mboka ohayi ithanwa Israeli yaKalunga. Oya toto po egongalo lyopaKriste noya li ye li kohi yehangano epe. Jehova okwe ya pe omalombwelo omape gankene ye na okwiihumbata nankene ye na oku mu longela. Ombiimbeli oye shi koleke tayi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba.” (Iilonga 10:34, 35) Aantu mboka ohaya landula “ompango yaKristus,” ndjoka yi ikolelela unene komakotampango ngoka ga nyolwa momitima dhawo, ihe hakomamanya. Ompango ndjika oya li tayi ka wilika nokweetela Aakriste ayehe uuwanawa, kehe mpoka ye li. — Aagalati 6:2.

11. ‘Mompango yaKristus’ omwa li mwa kwatelwa iipango iyali yini?

11 Israeli yaKalunga osha li sha mono uuwanawa owundji mewiliko ndyoka sha pewa kuKalunga okupitila muJesus. Manga Kalunga inaa ninga ehangano epe nasho, Jesus okwa li e shi pe iipango iyali ya simana. Oshipango shimwe otashi popi kombinga yiilonga yokuuvitha. Oshikwawo otashi popi kombinga yankene Aakriste ye na okwiihumbata nankene ye na okukala nayakwawo.  Omalombwelo ngaka oga li ga nuninwa Aakriste ayehe. Onkee ano, otaga longo nokutse kunena, kutya nduno otu na etegameno lyoku ka kala nomwenyo sigo aluhe megulu nenge kombanda yevi.

12. Iilonga yokuuvitha oya li ya tamunuka mo ngiini?

12 Nale aantu yomiigwana yilwe oya li haye ya kuIsraeli ya longele Jehova. (1 Aakwaniilwa 8:41-43) Konima Jesus okwa ka gandja elombwelo ndyoka tali adhika muMateus 28:19, 20. (Lesha.) Okwa li a lombwele aalongwa ye a ti: “Indeni ano, ka ningeni aantu ayehe aalongwa yandje.” POpentekoste yomomumvo 33, Jehova okwa li u ulike kutya okwa hala onkundana ombwanawa yi uvithilwe aantu ayehe muuyuni. Esiku ndyoka aantu 120 yomegongalo epe oya li yu udhithwa ombepo ondjapuki e taya tameke okupopya nAajuda nosho wo naapagani omalaka omakwiilongo. (Iilonga 2:4-11) Konima yethimbo, oya tameke okuuvithila Aasamaria. Momumvo 36, Aajuda mboka inaaya pita etanda nayo oya tameke okuuvithilwa. Kungawo, iilonga yokuuvitha oya tamunuka mo sho Aakriste ya li tayu uvithile kehe gumwe.

13, 14. (a) Oshike sha kwatelwa ‘mOshipango oshipe’ shoka Jesus a gandja? (b) Oshike tatu ilongo moshiholelwa shoka Jesus e tu tulila po?

13 Jesus okwa li wo a gandja “oshipango oshipe” shankene tu na okuungaunga naamwatate naamwameme. (Lesha Johannes 13:34, 35.) Otu na oku yu ulukila ohole esiku kehe, notu na wo okukala tu na ehalo lyokuhupula oomwenyo dhetu omolwawo. Oshinima shoka kasha li tashi dhengele mOmpango yaMoses. — Mateus 22:39; 1 Johannes 3:16.

14 Jesus okwe tu tulila po oshiholelwa sha dhenga mbanda shokuulika ohole yashili. Okwa kala e hole aalongwa ye noonkondo nokwa si nehalo ewanawa pehala lyawo. Shoka osho a tegelela aalanduli ye ayehe ya ninge. Onkee ano, otu na okukala hatu idhidhimikile omaudhigu notu na okukala nehalo lyokusa pehala lyaamwatate naamwameme. — 1 Aatessalonika 2:8.

OMALOMBWELO NGOKA TATU PEWA KUNENA NAANGOKA TATU KA PEWA MONAKUYIWA

15, 16. Oonkalo dhetu odha lunduluka ngiini?

15 Jesus okwa li a langeke po “omumati omwiinekelwa nomunandunge” nenge omupiya omudhiginini nomunandunge a pe aalanduli Ye ‘iikulya yopambepo pethimbo lyayo.’ (Mateus 24:45-47) Iikulya mbyoka oya kwatela mo omalombwelo ngoka haga pewa oshigwana shaKalunga uuna oonkalo dha lunduluka. Oonkalo dhetu odha lunduluka ngiini?

16 Otu li ‘momasiku’ gahugunina, notu li pokuya muudhigu unene mboka inaawu monika nale. (2 Timoteus 3:1; Markus 13:19) Oshikwawo, Satana noompwidhuli dhe oyu umbwa mo megulu noyu umbilwa kombanda yevi. Otaya monitha aantu iihuna noonkondo. (Ehololo 12:9, 12) Mepingathano naashono, ohatu vulika kelombwelo lyaJesus lyokuuvithila aantu oyendji muuyuni awuhe nomomalaka agehe shi vulithe nale.

17, 18. Otu na okwiinyenga ngiini komalombwelo ngoka hatu pewa?

17 Ehangano lyaKalunga ohali tu pe iilongitho oyindji mbyoka hayi tu kwathele miilonga yokuuvitha. Oho yi longitha ngaa? Pokugongala kwetu ohatu pewa omalombwelo gankene tu na okulongitha iilongitho mbyoka momukalo omwaanawa. Mbela oho ga tala ko ngaa kutya oga za kuKalunga?

18 Opo tu yambekwe kuKalunga, otwa pumbwa okupulakena komalombwelo agehe ngoka he tu pe okupitila megongalo. Ngele ohatu vulika kugo ngashingeyi, otashi ka kala oshipu oku ga landula pethimbo  ‘lyuudhigu uunene,’ sho uuyuni waSatana tawu ka hanagulwa po. (Mateus 24:21) Kakele kaashono, otatu ka kala twa pumbwa omalombwelo ge na ko nasha nankene tu na okukala muuyuni uupe wuuyuuki mboka tawu ka kala inaawu nwethwa mo kuSatana.

Muuyuni uupe, otatu ka pewa omambo ge na omalombwelo omape gankene tu na oku ka kala mOparadisa (Tala okatendo 19, 20)

19, 20. Omambo geni taga ka pandjwa, nomolwashike?

19 Pethimbo lyaMoses, oshigwana shaIsraeli osha li sha pumbwa omalombwelo omape. Onkee ano, Kalunga okwa li e shi pe Ompango. Konima yethimbo egongalo lyopaKriste olya li li na okulandula “ompango yaKristus.” Sha faathana, Ombiimbeli otayi tu lombwele kutya muuyuni uupe, otatu ka pewa omambo ge na omalombwelo omape. (Lesha Ehololo 20:12.) Otashi vulika omambo ngoka taga ka yelitha shoka Jehova a hala aantu ya longe pethimbo ndyoka. Sho tatu ka konakona omambo ngoka, aantu ayehe mwa kwatelwa mboka taya ka yumudhwa, otaya ka tseya shoka Kalunga a hala ya ninge. Omambo otage ke tu kwathela tu ilonge oshindji kombinga yankene Jehova ha dhiladhila. Otatu ku uva ko wo Ombiimbeli nawa. Onkee ano, mOparadisa otatu ka kala tu holathane, twa simanekathana notwa lenga ooyakwetu. (Jesaja 26:9) Otatu ki ilonga iinima oyindji noku yi longa aantu tatu wilikwa kOmukwaniilwa gwetu, Jesus Kristus.

20 Muuyuni uupe otatu ka pumbwa okukala hatu landula omalombwelo ngoka ga “nyolwa membo,” nokukala aadhiginini kuJehova memakelo lyahugunina. Ngele otwe shi ningi, Jehova ota ka nyola omadhina getu sigo aluhe ‘membo lyaanamwenyo,’ notatu ka mona omwenyo gwaaluhe. Onkee ano, otwa pumbwa OKUTHIKAMA, opo tu leshe shoka tashi popiwa mOmbiimbeli. Otu na OKUTALA, opo tu uve ko shoka tayi tu lombwele. Otwa pumbwa wo OKUPULAKENA kuyo mokukala hatu vulika kewiliko lyaKalunga ngashingeyi. Ngele otwe shi ningi, otatu ka hupa puudhigu uunene. Otatu ka nyanyukilwa wo okwiilonga kombinga yaKalunga ketu omunandunge nomunahole, Jehova, sigo aluhe. — Omuuvithi 3:11; Aaroma 11:33.