Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2016

Aagundjuka, ongiini tamu vulu okwiilongekidhila eninginitho?

Aagundjuka, ongiini tamu vulu okwiilongekidhila eninginitho?

“Kalunga kandje, ondi hole okugwanitha ehalo lyoye!” — EPISALOMI 40:8.

OMAIMBILO: 51, 58

1, 2. (a) Yelitha kutya omolwashike okuninginithwa ku li onkatu ya kwata miiti. (b) Owu na okushilipaleka shike manga inoo ninginithwa, nomolwashike?

MBELA owu li omugundjuka ngoka a hala okuninginithwa? Ngele osho, shoka osho uuthembahenda uunene mboka to vulu okukala wu na. Ngaashi sha popiwa moshitopolwa sha zi ko, okuninginithwa oku li etokolo lya kwata miiti. Oto ka ulukila yalwe kutya owi iyapulila Jehova, nowu uvaneka kutya oto ke mu longela sigo aluhe. Otashi ku ulika wo kutya okulonga ehalo lye osho oshinima sha simana monkalamwenyo yoye. Euvaneko ndika olya kwata miiti, nomolwaashoka wu na owala okuninginithwa uuna wa koka pambepo. Owu na owala oku shi ninga uuna wa hala shili okuninginithwa nuuna wu uvite ko kutya okwiiyapulila Jehova otaku ti shike.

2 Otashi vulika wu kale wu uvite kutya ino gwana natango okuninginithwa. Omathimbo gamwe otashi vulika wu kale wu uvite kutya owa gwana, ihe aavali yoye oyu uvite kutya owa pumbwa okukoka nokumona ontseyo oyindji. Mbela oto ki inyenga ngiini? Ino teka omukumo. Pehala lyaashono, longitha  ompito ndjoka wu ninge ehumokomeho, opo wu kale wa gwana okuninginithwa. Oto vulu okuninga ehumokomeho miinima ngaashi: (1) meitaalo lyoye, (2) miilonga yoye (3) nomokuulika olupandu.

EITAALO LYOYE

3, 4. Aagundjuka otaya vulu okwiilonga shike moshiholelwa shaTimoteus?

3 Tala nkene to yamukula omapulo ngano: Omolwashike ndi itaala kutya Kalunga oko e li? Omolwashike ndi na uushili kutya Ombiimbeli oya za kuKalunga? Omolwashike handi vulika kiipango yaKalunga pehala lyokuholela eihumbato ewinayi lyaantu muuyuni? Omapulo ngoka otage ku kwathele wu landule omayele gomuyapostoli Paulus. Omayele ngoka otaga ti kutya owu na “okutseya ehalo lyaKalunga naashoka oshiwanawa, she mu opalela nosha gwana.” (Aaroma 12:2) Mbela omolwashike wu na okuninga ngawo?

Timoteus okwa taamba ko oshili, molwaashoka okwa li a tompwa kwaashoka i ilonga nokwe shi itaala

4 Oshiholelwa shaTimoteus otashi vulu oku ku kwathela. Okwa li e shi nawa Omanyolo, molwaashono yina nayinakulu oya li ye ge mu longa. Paulus okwa li a lombwele Timoteus a ti: “Kala mwaambyoka yoshili, ngaashi we yi longwa nowe yi itaala.” (2 Timoteus 3:14, 15) ‘Okwiitaala’ otashi ti kutya okukala wa tompwa nowu na lela uushili moshinima shontumba. Timoteus okwa li a tompwa lela kutya oshili otayi adhika mOmanyolo. Okwe yi taamba ko, ihe hamolwaashono yina nayinakulu ye mu lombwele e shi ninge. Okwe shi ningi, molwaashono okwa li a tompwa kwaashoka i ilonga nokwe shi itaala. — Lesha Aahebeli 5:14.

5, 6. Omolwashike sha simana wi ilonge “okuyoolola shoka shu uka nenge sha puka” manga wu li omugundjuka?

5 Mbela nangoye owa tompwa kwaashoka wi ilonga nowe shi itaala? Otashi vulika wa kala wu shi oshili uule womimvo odhindji. Ngele osho, ipula kutya omolwashike wi itaala iinima mbyoka wi ilonga. Shono otashi ke ku kwathela wu koleke eitaalo lyoye nowu yande okuninga omatokolo ga puka. Otashi vulika wu ga ninge, molwaashoka to thiminikwa koomakula yoye, wa nwethwa mo ketaloko lyuuyuni waSatana nenge molwaashoka wu uvite kutya osho wu na okuninga.

6 Ilonga “okuyoolola shoka shu uka nenge sha puka” manga wu li omugundjuka. Otashi ke ku kwathela wu vule okuyamukula omapulo goomakula yoye ngaashi: Owu shi shi ngiini kutya Kalunga oko e li? Ngele Kalunga oku tu hole, omolwashike he etha iinima iiwinayi yi ningwe? Owu shi shi ngiini kutya Kalunga oko a kala nale? Ngele owa kala wi ilongekidha nawa, omapulo ngono itage ke ku ningitha wu kale wa limbililwa, ihe otage ke ku inyengitha wu konakone Ombiimbeli.

7-9. Yelitha kutya ongiini iitopolwa mbyoka yi li kointaneta, “What Does the Bible Really Teach?” (“Ombiimbeli otayi longo lela shike?”) tayi vulu oku ku kwathela wu koleke eitaalo lyoye.

7 Okukonakona Ombiimbeli nuukeka otaku ke ku kwathela wu tseye nkene wu na okuyamukula omapulo, waa kale wa limbililwa notashi ka koleka eitaalo lyoye. (Iilonga 17:11) Otu na iileshomwa oyindji  mbyoka tayi vulu oku ku kwathela. Aantu oyendji oya mona uuwanawa sho ya konakona okambo The Origin of Life — Five Questions Worth Asking nosho wo okambo Is There a Creator Who Cares About You? Aagundjuka oyendji oya mona uuwanawa miitopolwa, “What Does the Bible Really Teach?” (“Ombiimbeli otayi longo lela shike?”) mbyoka yi li kepandja lyetu lyokointaneta, jw.org, lyOshiingilisa. Otayi adhika mpoka pwa nyolwa BIBLE TEACHINGS. Omapulo ngoka ge li miitopolwa moka oga nuninwa okukoleka eitaalo lyoye.

8 Wu li omukonakoni gwOmbiimbeli, otashi vulika wu shi nale omayamukulo gomapulo gamwe ngoka taga adhika miitopolwa mbyoka. Mbela owi itaala ngaa kutya omayamukulo goye oge li mondjila? Omapulo ngoka otage ke ku kwathela wu dhiladhile nawa kombinga yomanyolo gontumba. Otage ke ku kwathela wo wu nyole kutya omolwashike wi itaala iinima mbyoka wi ilonga. Shoka otashi ke ku kwathela wu kale wu shi okuyelithila yalwe eitaalo lyoye. Ngele oho vulu okumona iitopolwa mbyoka yi li kohi yoshipalanyolo “Ombiimbeli otayi longo lela shike?” mbyoka yi li kointaneta, oto vulu oku yi longitha pekonakono lyoye lyopaumwene wu koleke eitaalo lyoye.

9 Kala wa tompwa kutya ndjika oyo oshili. Shoka otashi ke ku kwathela wi ilongekidhile okuninginithwa. Omumwameme gumwe omugundjuka okwa ti: “Manga inaandi ninginithwa, onda li nda konakona Ombiimbeli e tandi mono shili kutya ndika olyo elongelokalunga lyashili. Esiku kehe eitaalo lyandje ohali kolekwa.”

IILONGA YOYE

10. Omolwashike Omukriste ngoka a ninginithwa e na okuulika eitaalo lye miilonga ye?

10 Ombiimbeli otayi ti: ‘Ngele eitaalo olyowala nolyaa na iilonga, nena eitaalo lya tya ngaaka olya sa.’ (Jakob 2:17) Ngele owu na eitaalo lya kola, oto ke shi ulika miilonga yoye. Oto ki ‘iyapulila Kalunga noku mu igandjela.’ — Lesha 2 Petrus 3:11.

11. Yelitha kutya “okwiiyapulila Kalunga” otaku ti shike.

 11 “Okwiiyapulila Kalunga” otaku ti shike? Ngele iilonga yoye oya yogoka, otashi ti kutya owu na omikalo omiwanawa. Pashiholelwa, dhiladhila kombinga yomatokolo ngoka wa li wa ningi oomwedhi hamano dha ka pita. Sho wa li wa makelwa wu ninge sha sha puka, mbela owa li ngaa wa dhiladhila muule kombinga yaashoka shi li mondjila naashoka sha puka? (Aahebeli 5:14) Mbela oto dhimbulukwa oshikando shontumba wa li wa kondjitha emakelo lyoomakula yoye? Mbela owu li ngaa oshiholelwa oshiwanawa kuyalwe kosikola? Mbela oho kala ngaa omudhiginini kuJehova, nenge oho kambadhala okwoopalela aanasikola ooyakweni, opo kaaye ku sheke? (1 Petrus 4:3, 4) Odhoshili kutya kapu na omuntu a gwanenena. Omathimbo gamwe, naamboka ya longela Jehova omimvo odhindji otashi vulika ya kale ya tila okuuvitha nenge shi kale oshidhigu kuyo oku shi ninga. Omuntu ngoka i iyapulila Kalunga oha kala u uvite etumba okukala Onzapo yaJehova, nohe shi ulike meihumbato lye ewanawa.

12. Uutumbulilo “noku mu igandjela” owa kwatela mo shike, nowe wu tala ko ngiini?

12 Uutumbulilo “noku mu igandjela” otawu ti shike? Owa kwatela mo iinima ayihe mbyoka ho ningi ngaashi okuya kokugongala nokuuvitha. Owa kwatela mo wo iinima mbyoka yalwe itaaya vulu okumona, ngaashi omagalikano goye nosho wo ekonakono lyopaumwene. Omuntu ngoka i iyapulila Jehova iha tala ko iinima mbyoka yi li omutengi. Oha kala u uvite ngaashi omukwaniilwa David ngoka a ti: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” — Episalomi 40:8.

Oho galikana kombinga yashike? Omagalikano goye otagu ulike shike kombinga yohole yoye yokuhola Jehova?

13, 14. Omapulo geni taga vulu oku ku kwathela wi “igandjele” Kalunga, naagundjuka yamwe oya mono uuwanawa wuni sho yi ipula omapulo ngoka?

13 Membo Questions Young People Ask — Answers That Work, Embo 2, pepandja 308 nosho wo 309, opu na omapulo ngoka tage ku kwathele wi itulile po omalalakano. Omapulo ngoka ongaashi: “Oho galikana kombinga yashike?” “Omagalikano goye otagu ulike shike kombinga yohole yoye yokuhola Jehova?” “Oho konakona shike mekonakono lyoye lyopaumwene?” “Mbela oho yi ngaa muukalele, nonando aavali yoye itaya yi mo?” Pevi lyomapulo ngoka opu na ehala mpoka to vulu okunyola omayamukulo goye. Oto vulu wo okunyola po omalalakano kehe ngoka wa hala okwiitulila po ge na ko nasha nomagalikano goye, ekonakono lyopaumwene nokuuvitha.

14 Aagundjuka oyendji mboka ya hala okuninginithwa oya mona kutya omapulo ngoka oga simana. Omumwameme omugundjuka Tilda okwa ti: “Onda li nda longitha omapulo ngoka ndi itulile po omalalakano. Kashona nakashona onde ende tandi gwanitha po omalalakano gandje, nokonima yomumvo gumwe onda li nda gwana okuninginithwa.”  Omumwatate omugundjuka Patrick naye okwa li a ningi sha faathana. Okwa ti: “Onda li ndi shi kutya omalalakano gandje ogeni, ihe oku ga nyola okwa kwathela ndje ndi longe nuudhiginini, opo ndi ga gwanithe po.”

Mbela oto ka tsikila okulongela Jehova, nonando aavali yoye itaye mu longele? (Tala okatendo 15)

15. Yelitha kutya omolwashike eiyapulo li na okukala etokolo lyomuntu mwene.

15 Epulo limwe ishewe to vulu okwiipula ongaashi: “Mbela oto ka tsikila ngaa okulongela Jehova, nonando aavali yoye nosho wo ookuume koye oye etha po oku mu longela?” Ngele owi iyapulile Jehova e to ninginithwa, oto ka kala wu na ekwatathano lyopothingo naJehova. Shoka to ningile Jehova kashi na okukala shi ikolelela kaavali yoye nenge kaantu yalwe. Ngele owi iyapulila Kalunga nowe mu igandjela oto ulike kutya owa tompwa kutya owa mona oshili nowa hala okulandula omithikampango dhe. Kungawo, oto ka kala wa gwana okuninginithwa.

ULIKA OLUPANDU LWOYE

16, 17. (a) Oshike shi na okwiinyengitha omuntu, opo a ninge Omukriste? (b) Ongiini to vulu okuulika kutya owa pandula ekulilo? Shi thaneka.

16 Esiku limwe, omulumentu gumwe ngoka e shi nawa Ompango yaMoses, okwa li a pula Jesus a ti: “Oshipango oshinene shomompango oshini po?” Jesus  okwa yamukula a ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mateus 22:35-37) Jesus okwa yelitha kutya ohole yokuhola Jehova oyo yi na okwiinyengitha omuntu a kale a hala okuninginithwa nokuninga Omukriste. Omukalo gumwe to vulu okukoleka ohole yoye yokuhola Jehova, okudhiladhila muule kombinga yekulilo ndyoka li li omagano ge na ondilo ngoka twa pewa kuYe. (Lesha 2 Aakorinto 5:14, 15; 1 Johannes 4:9, 19.) Ngele owe shi ningi, oto ka kala wa hala okuulika olupandu lwoye omolwomagano ngoka.

17 Okuulika olupandu lwoye omolwekulilo otaku vulu okuthanekwa ngeyi: Dhiladhila ando to hala okusa omeya, ihe omuntu gumwe okwe ku hupitha. Mbela oto yi owala kegumbo e to dhimbwa shoka e ku ningile? Aawe. Oto ka kala wa hala oku mu pandula. Sha faathana, otu na okupandula Jehova naJesus sho ye tu ulukile ohole. Oye tu hupitha muulunde nomeso okupitila mekulilo. Ngashingeyi otu na etegameno lyoku ka kala mOparadisa kombanda yevi.

18, 19. (a) Omolwashike kuu na okukala wa tila okwiiyapulila Jehova? (b) Oto ka kala wu na onkalamwenyo ya tya ngiini ngele oto longele Jehova?

18 Mbela owa pandula ngaa shoka Jehova e ku ningila? Ngele osho, okwiiyapulila Jehova nokuninginithwa oshinima oshiwanawa okuninga. Okwiiyapulila Kalunga oku li euvaneko kutya oto ka longa ehalo lye sigo aluhe. Mbela owu na okukala wa tila okuninga euvaneko ndyoka? Hasho nando. Jehova okwe ku halela shoka oshiwanawa, nota ka yambeka mboka taya longo ehalo lye. (Aahebeli 11:6) Ngele owi iyapulile Jehova e to ninginithwa, onkalamwenyo yoye itayi ka kala nando ombwinayi, ihe otayi ka kala ombwanawa. Omumwatate gwomimvo 24 ngoka a ninginithwa manga inaa thika methimbo lyuugundjuka, okwa ti: “Ando onda tegelelele ndi koke, opo ndi ninginithwe, ando otashi vulika ndi na ontseyo yomuule, ihe sho nda ningi etokolo ndi iyapulile Jehova osha gamena ndje kaandi landule uuyuni.” 

Satana okwi ihole mwene, ye ke na ko nasha nangoye

19 Jehova okwe ku halela onkalamwenyo ombwanawa. Satana okwi ihole mwene, ye ke na ko nasha nangoye. Ke na sho te ku pe oshiwanawa ngele owe mu landula. Ongiini ta vulu oku ku pa shoka kee na? Ke na onkundana ombwanawa yasha noke na etegameno lyasha. Ota vulu owala oku ku pa onakuyiwa ombwinayi, oshoka oyo owala e na. — Ehololo 20:10.

20. Omugundjuka ota vulu okuninga shike, opo a kale a gwana okwiiyapulila Jehova nokuninginithwa? (Tala wo oshimpungu “Shoka tashi ku kwathele wu ninge ehumokomeho.”)

20 Okwiiyapulila Jehova etokolo ewanawa kaaku na we. Mbela owi ilongekidha oku shi ninga? Ngele osho, ino kala wa tila okuninga etokolo ndyoka. Ngele owu uvite kutya ino gwana natango, longitha omaetopo ngoka ge li moshitopolwa shika, opo wu ninge ehumokomeho. Paulus okwa li a lombwele aamwatate yomuFilippi ya tsikile okuninga ehumokomeho. (Aafilippi 3:16) Ngele owa landula omayele ngono, oto ka kala wa hala okwiiyapulila Jehova nokuninginithwa.