Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2016

Aagundjuka, mbela omwi ilongekidha okuninginithwa?

Aagundjuka, mbela omwi ilongekidha okuninginithwa?

“Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni, ye a tale, ngele oku na iimaliwa ya gwana oku yi tunga sigo ya pu.” — LUKAS 14:28.

OMAIMBILO: 120, 64

Oshitopolwa shika naashoka tashi landula ko oya nuninwa aagundjuka mboka ya hala okuninginithwa

1, 2. (a) Oshike hashi nyanyudha aapiya yaKalunga kunena? (b) Ongiini aavali Aakriste naakuluntugongalo taya vulu okukwathela aagundjuka yu uve ko kutya eninginitho otali ti shike?

OMUKULUNTUGONGALO gumwe okwa li a lombwele Christopher, ngoka e na omimvo 12 a ti: “Onde ku tseya nale, oshoka sho to valwa omomeho gandje. Onda nyanyukwa okuuva kutya owa hala okuninginithwa, ihe mbela omolwashike wa hala okuninginithwa?” Omukuluntugongalo ngono oku na etompelo ewanawa okupula epulo ndyoka. Ohatu kala twa nyanyukwa okumona aagundjuka omayovi taya ninginithwa omumvo kehe. (Omuuvithi 12:1) Nonando ongawo, aavali Aakriste naakuluntugongalo ohaya kala ya hala okushilipaleka kutya aagundjuka oyo yene haya ningi etokolo ndyoka noyu uvite ko kutya eninginitho oshike.

2 MOmbiimbeli otwi ilonga mo kutya eiyapulo neninginitho etameko lyonkalamwenyo ompe yopaKriste. Onkalamwenyo  ya tya ngawo ohayi tu etele omalaleko nuuyamba taga zi kuJehova, ihe nonando ongawo, ohatu mono omapataneko okuza kuSatana. (Omayeletumbulo 10:22; 1 Petrus 5:8) Aavali Aakriste oye na okulonga aanona yawo kutya okukala omulongwa gwaKristus osha hala okutya shike. Aagundjuka mboka kaaye na aavali Aakriste, oye na okukwathelwa kaakuluntugongalo nohole, yu uve ko kutya okwiiyapulila Jehova nokuninginithwa otashi ti shike. (Lesha Lukas 14:27-30.) Ngaashi naanaa omuntu a pumbwa okwiilongekidha uuna a hala okutunga etungo, aagundjuka nayo oya pumbwa okwiilongekidha manga inaaya ninginithwa. Kungeyi, otaya ka vula okulongela Jehova nuudhiginini “sigo ehulilo.” (Mateus 24:13) Oshike tashi ka kwathela aagundjuka ya kale ya tokola toko okulongela Jehova sigo aluhe? Natu taleni keyamukulo.

3. (a) Oohapu dhaJesus naPetrus otadhi tu longo shike kombinga yesimano lyokuninginithwa? (Mateus 28:19, 20; 1 Petrus 3:21) (b) Omapulo geni tatu ka kundathana, nomolwashike?

3 Mbela owu li omugundjuka ngoka a hala okuninginithwa? Ngele osho, ndyoka elalakano ewanawa lela. Oshi li uuthembahenda uunene okukala Onzapo yaJehova ya ninginithwa. Omukriste kehe oku na okuninginithwa. Eninginitho olyo onkatu ya simana kwaayehe mboka taya ka hupithwa puudhigu uunene. (Mateus 28:19, 20; 1 Petrus 3:21) Uuna wa ninginithwa, oho ulike kutya owu uvaneka okulongela Jehova sigo aluhe. Oto ka kala wa hala okudhiginina euvaneko lyoye. Omapulo taga landula otage ke ku kwathela wu mone ngele owa gwana okuninginithwa: (1) Mbela onda gwana ngaa okuninginithwa? (2) Mbela onda hala ngaa shili okuninginithwa? (3)  Mbela ondu uvite ko ngaa kutya okwiiyapulila Jehova otaku ti shike? Natu kundathaneni omapulo ngaka.

UUNA WA KOKA LELA PAMBEPO

4, 5. (a) Omolwashike omuntu inaa pumbwa okukala omukuluntu, opo a ninginithwe? (b) Okukoka pambepo otashi ti shike?

4 Ombiimbeli inayi popya kutya omuntu oku na okukala e na omimvo ngapi, opo a ninginithwe nenge kutya oku na owala okukala omukuluntu. Omayeletumbulo 20:11 otayi ti: “Nokuli okamati otaki iholola miilonga yako, ngele omikalo dhako omiwanawa nodhu uka.” Omuntu nando oku kale okanona ota vulu okukala u uvite ko kutya okulonga shoka shi li mondjila nokwiiyapulila Omushiti osha hala okutya shike. Eninginitho oli li onkatu ya simana notayi opalele komugundjuka ngoka u ulika kutya okwa koka pambepo nokwiiyapulila Jehova. — Omayeletumbulo 20:7.

5 Okukoka pambepo otashi ti shike? Ngele taku popiwa omuntu a koka itashi  ulike aluhe kokukoka moomvula nenge palutu. Ombiimbeli otayi ti kutya aantu mboka ya koka pambepo oyo “mboka yi ilonga noyi igilila okuyoolola” shoka shi li mondjila naashoka sha puka. (Aahebeli 5:14) Omuntu ngoka a koka pambepo oku shi shoka shi li mondjila noha kala a tokola oku shi ninga. Iha nwethwa mo nuupu a longe shoka sha puka. Iha kala aluhe a tegelela gumwe e mu lombwele a ninge shoka shi li mondjila. Aagundjuka mboka ya ninginithwa oya tegelelwa ya longe shoka shi li mondjila, nonando kaye li naavali yawo nenge naakuluntu yalwe. — Yelekanitha Aafilippi 2:12.

6, 7. (a) Daniel okwa li a taalelwa komashongo geni sho a li muBabilonia? (b) Okwa li u ulike ngiini kutya okwa koka pambepo?

6 Mbela omugundjuka ota vulu ngaa okuulika kutya okwa koka pambepo? Natu taleni oshiholelwa shaDaniel. Otashi vulika a li omugundjuka, sho a kuthwa paavali ye e ta falwa kuBabilonia. Okwa li mokati kaantu mboka ihaaya longele Jehova. Natu taleni kashona konkalo ye pethimbo mpoka. Daniel okwa li a yelwayelwa muBabilonia. Okwa li gumwe gwomaagundjuka mboka ya hogololwa ya yakule omukwaniilwa. (Daniel 1:3-5, 13) Otashi vulika Daniel a li e na ondondo ombwanawa muBabilonia yi vule ndjoka a li e na muIsraeli.

7 Mbela Daniel okwa li i inyenge ngiini? Mbela okwa li e etha aantu yomuBabilonia ya lundulule iikala ye nenge ya nkundipaleke eitaalo lye? Hasho nando. Ombiimbeli otayi ti kutya Daniel sho a li muBabilonia, okwa tokola kii “inyateke,” shono otashi ulike kutya okwa li a tokola kaa longele iikalunga. (Daniel  1:8) Otashi ulike wo kutya okwa li a koka pambepo lela.

Omugundjuka ngoka a koka pambepo, iha kala owala kuume kaKalunga pOshinyanga shUukwaniilwa, ye kosikola ta kala kuume kuuyuni (Tala okatendo 8)

8. Oshike tatu vulu okwiilonga moshiholelwa shaDaniel?

8 Oshike tatu vulu okwiilonga moshiholelwa shaDaniel? Omugundjuka ngoka a koka pambepo ota vulu okukala a dhiginina eitaalo lye, nonando oku li moonkalo oondhigu. Ita ka kala a fa thimbithimbi ngoka ha lundulula olwaala lwe shi ikolelela pehala mpoka e li. Omugundjuka ngoka iha kala owala kuume kaKalunga pOshinyanga shUukwaniilwa, ye kosikola ta kala kuume kuuyuni. Pehala lyaashono, oha kala omudhiginini nonando ota makelwa. — Lesha Aaefeso 4:14, 15.

Omugundjuka ngoka a koka pambepo ota vulu okukala a dhiginina eitaalo lye, nonando oku li moonkalo oondhigu

9, 10. (a) Omugundjuka ota vulu ngiini okumona uuwanawa mokudhiladhila kunkene hi inyenge uuna ta makelwa? (b) Eninginitho otali ti shike?

9 Odhoshili kutya kapu na omuntu a gwanenena. Aagundjuka naakuluntu omathimbo gamwe ohaya ningi omapuko. (Omuuvithi 7:20) Ngele owa hala okuninginithwa, otashi ka kala pandunge wu mone ngele owa tokola ngaa shili okukala ho vulika koompango dhaJehova. Ipula to ti: ‘Mbela onda kala nokuvulika kuJehova ethimbo li thike peni?’ Dhiladhila kutya owa li wi inyenge ngiini oshikando shahugunina sho wa li to makelwa. Mbela owa li wa vulu okutokola okuninga shoka shi li mondjila? Ngaashi Daniel, mbela opu na gumwe a li e ku ladhipike wu longithe uunongo woye muuyuni waSatana? Mbela uuna wi iyadha momamakelo ga tya ngawo, oho vulu ngaa okudhimbulula kutya Jehova okwa hala wu ninge shike? — Aaefeso 5:17.

10 Omolwashike sha simana okutseya omayamukulo komapulo ngoka? Omolwaashoka otage ku kwathele wu mone kutya eninginitho oshinima sha kwata miiti. Eninginitho otali ulukile aantu kutya owa ninga euvaneko lya simana kuJehova. Owu uvaneka kutya oto ka kala wu mu hole noto ke mu longela nomutima aguhe sigo aluhe. (Markus 12:30) Kehe ngoka ta ninginithwa oku na okukala a tokola toko okudhiginina euvaneko lye kuJehova. — Lesha Omuuvithi 5:4, 5.

MBELA OWU NA EHALO LYOKUNINGINITHWA?

11, 12. (a) Ngele owa hala okuninginithwa owu na okushilipaleka shike? (b) Oshike tashi ku kwathele wu kale wa tala ko eninginitho ngaashi Jehova he li tala ko?

11 Ombiimbeli otayi ti kutya aapiya ayehe yaJehova, kutya nduno aagundjuka, otaya vulu oku mu longela “nenyanyu.” (Episalomi 110:3, OB-1954) Ngele owa hala okuninginithwa owa pumbwa okushilipaleka kutya owu na ehalo lyokuninginithwa shili. Shono otashi pula wi ikonakone nawa, unene tuu ngele owa putudhwa kaavali ye li moshili.

12 Okuza kuunona woye, otashi vulika wa mona aantu oyendji taya ninginithwa. Yamwe yomuyo ookuume koye nenge aamwanyoko. Nonando ongawo, kotoka opo kuu kale owala wa hala  okuninginithwa, molwaashoka wa adha omimvo dhontumba nenge molwaashoka aantu oyendji taya ninginithwa. Ongiini to vulu okushilipaleka kutya owa tala ko eninginitho ngaashi Jehova he li tala ko? Kutha ethimbo wu dhiladhile kutya omolwashike eninginitho lya simana. Moshitopolwa shika naashoka tashi landula ko, otamu kundathanwa omatompelo ogendji omawanawa kutya omolwashike eninginitho lya simana.

13. Oshike tashi vulu oku ku kwathela wu mone ngele etokolo lyoye lyokuninginithwa ngaa olya za komutima?

13 Oshike tashi vulu oku ku kwathela wu mone ngele etokolo lyoye lyokuninginithwa olya za ngaa komutima? Okukala ho konakona omagalikano goye. Oho galikana lungapi kuJehova? Oho popi ngaa iinima yokondandalunde uuna to galikana? Omayamukulo goye komapulo ngoka, otage ku kwathele wu mone kutya ekwatathano lyoye naJehova olya kola shi thike peni. (Episalomi 25:4) Jehova oha yamukula olundji omagalikano getu okupitila mOmbiimbeli. Oshike ishewe tashi vulu oku ku kwathela wu mone ngele owa hala okuhedha popepyeelela naJehova noku mu longela tashi zi komutima? Okutala nawa omukalo moka ho konakona Ombiimbeli. (Josua 1:8) Ipula to ti: ‘Ohandi konakona ngaa pandjigilile Ombiimbeli paumwene? Ohandi kutha ngaa ombinga melongelokalunga lyetu lyuukwanegumbo?’ Omayamukulo goye komapulo ngoka, otage ke ku kwathela wu mone ngele etokolo lyoye lyokuninginithwa olya za ngaa komutima.

EIYAPULO OTALI TI SHIKE?

14. Yelitha eyooloko pokati keiyapulo neninginitho.

14 Aagundjuka yamwe otashi vulika kaaye shi eyooloko pokati keiyapulo neninginitho. Yamwe otashi vulika ya popye kutya oyi iyapulila nale Jehova, ihe inayi ilongekidha okuninginithwa. Mbela shoka otashi wapa ngaa shili? Uuna to iyapulile Jehova, oho mu uvanekele megalikano kutya oto ke mu longela sigo aluhe. Omanga uuna to ninginithwa, oho ulukile aantu kutya owi iyapulila Jehova. Onkee ano, manga inoo ninginithwa, owu na okuuva ko kutya okwiiyapulila Jehova otaku ti shike.

15. Okwiiyapulila Jehova otaku ti shike?

15 Ngele to iyapulile Jehova, oto mu lombwele kutya owa ninga gwe. Oto mu uvanekele kutya oku mu longela, oko taku ka kala oshinima sha simanenena monkalamwenyo yoye. (Lesha Mateus 16:24.) Euvaneko ndyoka olya kwata miiti. (Mateus 5:33) Ongiini to vulu okuulika kutya owa ninga gwaJehova? — Aaroma 14:8.

16, 17. (a) Yelitha kutya okwiidhimbwa mwene otashi ti shike. (b) Omuntu ngoka ti iyapulile Jehova, oha lombwele Jehova shike?

16 Natu tale koshiholelwa. Dhiladhila ando kuume koye e ku pa ohauto omagano. Okwe ku pe oombapila dhayo e ta ti: “Ohauto ndjika oyoye.” Opo nduno okwe ku lombwele ta ti: “Oshipatululo otandi kala nasho, oshoka ongame tandi kala tandi yi hingi, hangoye.” Oto ka kala wu uvitile ngiini omagano ngoka? Kuume koye oto ka kala wu mu uvitile ngiini?

17 Ngele omuntu ti iyapulile Jehova, ohe mu lombwele ta ti: “Otandi ku pe onkalamwenyo yandje. Ngashingeyi onda ninga gwoye.” Jehova oha kala a tegelela omuntu ngoka a gwanithe po euvaneko ndyoka. Ongiini ngele omuntu  ngoka okwa tameke okweendelathana monanguwi nagumwe ngoka ihaa longele Jehova? Mbela otu ulike ngaa kutya oha vulika kuJehova? Mbela otashi ka kala ngiini ngele okwa taamba ko iilonga mbyoka tayi mu imbi okuya muukalele nenge okuthika pokugongala? Shono otashi ulike kutya omuntu ngoka ita gwanitha po euvaneko lye kuJehova. Osha faathana owala nomuntu ngoka a gandja ohauto, ihe ina gandja oshipatululo. Ngele omuntu ti iyapulile Jehova, ohe mu lombwele ta ti: “Onkalamwenyo yandje oya ninga yoye.” Otu na aluhe okukala hatu ningi shoka Jehova a hala, nonando hasho twa hala. Natu holeleni Jesus ngoka a ti: “Ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.” — Johannes 6:38.

Eninginitho etokolo lya kwata miiti noli li uuthembahenda

18, 19. (a) Oshiholelwa shaRose noshaChristopher otashi ulike ngiini kutya okuninginithwa oku li uuthembahenda mboka hawu eta omayambeko? (b) Owu uvite ngiini sho wa ninginithwa?

18 Osha yela kutya eninginitho etokolo lya kwata miiti. Oshi li uuthembahenda uunene okwiiyapulila Jehova nokuninginithwa. Aagundjuka mboka ye hole Jehova noyu uvite ko kutya eiyapulo oshike, ihaya kwatakwata okwiiyapulila Jehova nokuninginithwa. Ihayi ipe uusama molwetokolo ndyoka. Omugundjuka Rose okwa ti: “Ondi hole Jehova, nohandi nyanyukilwa oku mu longela. Inandi ninga nale etokolo ewanawa monkalamwenyo yandje lya fa etokolo lyandje lyokuninginithwa.”

19 Christopher ngoka a tumbulwa metetekelo, okwa li u uvite ngiini sho a ninginithwa e na omimvo 12? Okwa ti kutya okwa nyanyukwa unene sho a ningi etokolo ndyoka. Okwa tameke uukokolindjila wondjigilile sho e na omimvo 17. Okwa ningi omuyakuligongalo sho e na omimvo 18, nongashingeyi ota longo koBetel. Okwa ti: “Etokolo lyandje lyokuninginithwa olya li ewanawa. Ohandi nyanyukilwa okulongela Jehova nehangano lye.” Ngele owa hala okuninginithwa, ongiini to vulu oku kwi ilongekidhila? Epulo ndyoka otali ka yamukulwa moshitopolwa tashi landula.