Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2016

Koleka eitaalo lyoye mwaashoka wa tegamena

Koleka eitaalo lyoye mwaashoka wa tegamena

“Okukala tu na eitaalo otashi ti okukala tu na einekelo lya kola miinima mbyoka twa tegamena.” — HEB. 11:1.

OMAIMBILO: 81, 134

1, 2. (a) Etegameno lyAakriste yashili olya yooloka ko ngiini kwaandyoka li niwe kaantu oyendji muuyuni? (b) Omapulo geni ga simana tatu ka kundathaneni?

AAKRISTE yashili kaye na tuu etegameno ewanawa! Atuheni kutya nduno aagwayekwa nenge ‘oonzi dhilwe,’ otu na etegameno lyoku ka mona nkene Jehova ta gwanitha po elalakano lye lyopetameko, naasho ta ka yapulitha edhina lye. (Joh. 10:16; Mat. 6:9, 10) Etegameno ndyoka olyo oshinima sha simanenena shoka omuntu kehe ta vulu okukala a lenga. Otwa halelela oku ka mona omwenyo gwaaluhe ngoka tu uvanekelwa kutya nduno otu li oshitopolwa ‘shegulu epe’ nenge ‘oshevi epe.’ (2 Pet. 3:13) Otwa halelela wo okumona nkene Jehova ta ka tsikila okuwilika nokwaambidhidha aapiya ye momasiku ngaka gahugunina.

2 Aantu oyendji muuyuni nayo oye na iinima mbyoka haya kala ya tegamena, ihe ohaya kala ya limbililwa ngele shoka ya tegamena onashi ka gwanithwe ngaa. Pashiholelwa, aantu omamiliyona mboka haya ndombola otashi vulika ya kale ya tegelela okusindana, ihe itaya vulu okukala nuushili kutya otaya ka sindana. Eitaalo lyashili olyo “okukala tu na einekelo lya kola” miinima mbyoka twa tegamena tu li Aakriste. (Heb. 11:1) Otashi vulika wu ipule kutya ongiini to vulu okukala neinekelo lya kola miinima mbyoka wa tegamena? Uuwanawa wuni to ka mona, ngele owa kala neitaalo lya kola miinima mbyoka wa tegamena?

3. Eitaalo lyashili oli ikolelela kuushili wuni?

 3 Eitaalo kali shi uukwatya mboka aantu aalunde haya valwa nalyo, noihali ya po kulyo lyene. Eitaalo lyopaKriste oli li oshiyimati shombepo ondjapuki yaKalunga ndjoka tayi longo maanamitima omiwanawa. (Gal 5:22, NW) Ombiimbeli inayi popya kutya Jehova oku na eitaalo nenge kutya okwe li pumbwa. Omolwashike mbela? Omolwaashoka Jehova oye omunankondoadhihe noku na uunongo wa shiga ko. Kapu na shoka tashi mu imbi a gwanithe po elalakano lye. Tate yetu gwomegulu oku na uushili kutya omauvaneko ge otaga ka gwanithwa po, oshoka kuye oga fa nale ga gwanithwa po. Onkee ano, okwa ti: “Sha gwanithwa!” (Lesha Ehololo 21:3-6.) Eitaalo lyopaKriste oli ikolelela kuushili mboka kutya Jehova oye Kalunga “omudhiginini,” ngoka ha gwanitha aluhe omauvaneko ge. — Deut. 7:9.

ILONGA SHA MIIHOLELWA YEITAALO YOPETHIMBO LYONALE

4. Etegameno lini aalumentu naakiintu aadhiginini yopethimbo lyonale ya li ya lenga?

4 Montopolwa 11 yAahebeli omwa tumbulwa omadhina 16 gaalumentu naakiintu mboka ya li ye na eitaalo. Omunyoli gwembo ndika okwa popi kombinga yawo nokombinga yayalwe oyendji mboka ‘ya pandulwa molweitaalo lyawo.’ (Heb. 11:39) Ayehe mboka oya li ye na “einekelo lya kola” kutya “oluvalo” ndoka lu uvanekwa kuJehova, otalu ka nyanyagula po aatondi ye mwa kwatelwa Satana, nokugwanitha po elalakano lyaJehova lyopetameko. (Gen. 3:15) Aalumentu naakiintu mboka aadhiginini oya si manga Jesus Kristus ngoka e li ‘oluvalo’ lu uvanekwa, inaa egulula ondjila yoku ka kala nomwenyo megulu. (Gal. 3:16) Nonando ongawo, otaya ka yumudhwa ya ka kale nomwenyo gwa gwanenena moparadisa kombanda yevi, oshoka omauvaneko gaJehova ihaga ponyo. — Eps. 37:11; Jes. 26:19; 1 Kor. 15:55.

5, 6. Abraham naanegumbo lye oya li ye na etegameno mushike, noya li ya kaleke ngiini eitaalo lyawo lya kola? (Tala kethano lyopetameko.)

5 Aahebeli 11:13 otayi hokolola aapiya yaJehova yamwe yopethimbo lyonale tayi ti: “Ootatekulu mbaka ayehe oya sile meitaalo. Oyo inaa mona iinima mbyoka Kalunga e yi ya uvanekela, ihe oye yi talele kokule noye yi nyanyukilwa.” Gumwe gwomuyo okwa li Abraham. Mbela okwa li ngaa a kaleke momadhiladhilo etegameno li nyanyudha lyomwenyo gwaaluhe kohi yepangelo ‘lyoluvalo’ ndoka lu uvanekwa? Jesus okwa li a gandja eyamukulo lya yela kepulo ndyoka, sho a lombwele aapataneki ye a ti: “Ho Abraham okwa nyanyukwa pombanda okumona esiku lyandje; okwe li mono nokwa nyanyukwa.” (Joh. 8:56) Sara, Isak, Jakob nosho wo yalwe oyendji nayo oya li ye na egetameno mUukwaniilwa womonakuyiwa, mboka ‘wa sindwa nowa tungwa kuKalunga mwene.’ — Heb. 11:8-11.

6 Abraham naanegumbo lye oya kaleke ngiini eitaalo lyawo lya kola? Otashi vulika yi ilongo kombinga yaKalunga mokupulakena kaakokele aadhiginini, okupitila momamoniko ngoka ya pewa kuKalunga nenge nokuli mokulesha omanyolo gopethimbo lyonale ngoka ge shi okwiinekelwa. Shoka sha simanenena, kaya li ya dhimbwa shoka yi ilongo, ihe oya kala ya lenga nokutedhatedha kombinga yomauvaneko gaKalunga niitegelelwa ye. Aalumentu naakiintu mbaka oya li yi ilongekidha okumona iihuna kwoludhi kehe nokukala aadhiginini kuKalunga, oshoka oya li ye na einekelo lya kola mwaashoka ya tegamena.

7. Jehova okwe tu pa omasiloshimpwiyu geni, opo tu kale neitaalo lya kola, noshike tu na okuninga?

7 Jehova okwe tu pa Oohapu dhe, Ombiimbeli, opo dhi tu kwathele tu koleke eitaalo lyetu. Otu na okukala hatu lesha Oohapu dhaKalunga esiku kehe, opo tu kale “aanelago” nenge twa nyanyukwa notu mone “eyambeko” nenge tu pondole. (Eps. 1:1-3; lesha Iilonga 17:11.) Ngaashi owala aalongeli yaJehova yopethimbo lyonale, natse otwa pumbwa okukala hatu tedhatedha komauvaneko ge nokukala hatu gwanitha po iitegelelwa ye. Jehova ohe tu pe wo iikulya yopambepo oyindji, okupitila ‘momupiya omudhiginini nomunandunge.’ (Mat. 24:45, NW) Onkee ano, ngele otwa kala twa lenga omasiloshimpwiyu  gopambepo ngoka Jehova he tu pe, otatu ka kala twa fa Aakriste yopethimbo lyonale, mboka ye li iiholelwa yeitaalo. Oya kala ye na “einekelo lya kola” mwaashoka Uukwaniilwa tawu ka ninga.

8. Egalikano otali vulu ngiini okukoleka eitaalo lyetu?

8 Egalikano nalyo olya li lya dhana onkandangala ya simana mokukoleka eitaalo lyAakriste yonale. Sho Kalunga a kala ta yamukula omagalikano gawo, osha li sha koleke eitaalo lyawo. (Neh. 1:4, 11; Eps. 34:4, 15, 17; Dan. 9:19-21) Natse wo otatu vulu okumbumbulila Jehova iimpwiyu yetu, tu na einekelo kutya ota ka pulakena komagalikano getu noku tu nkondopaleka tu idhidhimike notu kale twa nyanyukwa. Uuna omagalikano getu taga yamukulwa, eitaalo lyetu ohali kolo. (Lesha 1 Johannes 5:14, 15.) Molwaashoka eitaalo oshiyimati shombepo, otwa pumbwa okukala hatu ‘indile’ ombepo yaKalunga, ngaashi Jesus e tu ladhipika tu ninge. — Luk. 11:9, 13.

9. Oolye tu na okukwatela momagalikano getu?

9 Uuna tatu galikana inatu pumbwa owala okukala tatu pula Jehova e tu kwathele miinima yopaumwene. Otu na wo oku mu pandula noku mu hambelela esiku kehe, ‘omolwuuwanawa owindji mboka itaatu vulu oku wu tumbula auhe, molwaashoka owindji unene.’ (Eps. 40:5) Natango, uuna tatu galikana otu na ‘okudhimbulukwa mboka ye li moondholongo, tu kale twa fa tu li nayo.’ Otu na wo okugalikanena aamwatate muuyuni awuhe, unene tuu ‘aawiliki yetu.’ Omitima dhetu ohadhi kala dha nyanyukwa, uuna tatu mono nkene Jehova ta yamukula omagalikano getu. — Heb. 13:3, 7.

OYA TINDI OKWEETHA PO EITAALO LYAWO

10. Iiholelwa yini tu na yaapiya yaKalunga mboka ya tindi okweetha po uudhiginini wawo, noshike she ya pe oonkondo ye shi ninge?

10 MAahebeli ontopolwa 11, omuyapostoli Paulus okwa popi omahepeko ngoka ga li gi idhidhimikilwa kaapiya yaKalunga oyendji mboka inaaya tumbulwa komadhina. Pashiholelwa, omuyapostoli okwa tumbula aakiintu aadhiginini mboka ya li ya silwa oyana, ihe konima oye ke ya mona, sho ya yumudhwa. Okwa tumbula wo yalwe mboka “ya tindi okutaamba emangululo, oshoka oya li taa tegelele okufalwa momwenyo omupe.” (Heb. 11:35) Nonando katu shi lela kutya Paulus okwa li ta popi kombinga yoolye, yamwe ngaashi Nabot naSakaria oya li ya dhipagwa nomamanya, omolwokuvulika kwawo kuKalunga nokulonga ehalo lye. (1 Aak. 21:3, 15; 2 Ondjal. 24:20, 21) Daniel pamwe nookuume ke yatatu oya li ye na ompito ‘yokutaamba emangululo,’ mokweetha po uudhiginini wawo. Ihe eitaalo lyawo moonkondo dhaKalunga, olye ya kwathele ‘ya mutike omakana goonime’ ‘noya dhime omaziko gomililo dha hanya.’ — Heb. 11:33, 34; Dan. 3:16-18, 20, 28; 6:13, 16, 21-23.

11. Aahunganeki yamwe oya li yi idhidhimikile omahepeko geni, omolweitaalo lyawo?

11 Aahunganeki ngaashi Mikaia naJeremia ‘oya li ya shekwa, ya dhengwa noongola nokutulwa moondholongo, omolweitaalo lyawo.’ Omanga yalwe ngaashi Elia “oya li taa alaala moombuga nomoondundu noya kala momakololo nomoombogo dhevi.” Ayehe oya li yi idhidhimike, oshoka oya li ye na ‘einekelo lya kola miinima mbyoka ya tegamena.’ — Heb. 11:1, 36-38; 1 Aak. 18:13; 22:24-27; Jer. 20:1, 2; 28:10, 11; 32:2.

12. Olye e tu tulila po oshiholelwa sha dhenga mbanda shokwiidhidhimikila omahepeko, noshike sha li she mu kwathele e shi ninge?

12 Konima yokupopya kombinga yaalumentu naakiintu aadhiginini yi ili noyi ili, Paulus okwa tsu omuthindo oshiholelwa shOmuwa gwetu Jesus Kristus, shoka sha dhenga mbanda kwaayihe. Aahebeli 12:2, (NW), otayi ti: “Ihe omolwenyanyu ndyoka lya li lye mu tegelela okwi idhidhimikile esheko nokwa si eso lyokomuti gwomahepeko. Ngashingeyi okwa kuutumba kolulyo lwoshipangelapundi shaKalunga.” Onkee ano, otu na ‘okudhiladhila’ koshiholelwa shaJesus sheitaalo, uuna twa taalela omahepeko omadhigu. (Lesha Aahebeli 12:3.) Aakriste mboka ya sila eitaalo lyawo, ngaashi omulongwa Antipas, oya li ya tindi okweetha po uudhinginini wawo, ngaashi Jesus a li e shi ningi.  (Eh. 2:13) Aakriste mboka oya mona nale ondjambi yawo yomwenyo gwaaluhe megulu, inaya fa aapiya yaKalunga yopethimbo lyonale mboka ya tegelela ya ka yumudhilwe “momwenyo omupe” kombanda yevi. (Heb. 11:35) Konima sho Uukwaniilwa wa dhikwa po megulu mo 1914, Aakriste aagwayekwa aadhiginini ayehe mboka ya li ya sa, oya yumudhilwa momwenyo gwopambepo megulu, opo ya pangele aantu kombanda yevi pamwe naJesus. — Eh. 20:4.

IIHOLELWA YEITAALO YOPETHIMBO LYETU

13, 14. Omumwatate Rudolf Graichen okwa li a tsakaneke omashongo geni, noshike sha li she mu kwathele a vule okwiidhidhimika?

13 Aalongelikalunga omamiliyona yopethimbo lyetu ohaya landula oshiholelwa shaJesus, mokukaleka aluhe momadhilahilo etegameno lyawo noihaya etha omahepeko ga nkundipaleke eitaalo lyawo. Tala koshiholelwa shomumwatate Rudolf Graichen, ngoka a valelwa moNdowishi mo 1925. Ota dhimbulukwa omathano giiningwanima yomOmbiimbeli ngoka a li a tsilika megumbo lye. Okwa nyola a ti: “Ethano limwe olya li li na embungu nokanzigona, ongwe nokakombwena nosho wo okatana nokankoshona. Ayihe oya li yi na ombili notayi lithwa kokamati okashona. . . . Omathano ngoka oga li ga guma ndje noonkondo.” (Jes. 11:6-9) Omumwatate Rudolf okwa kala i itaala moparadisa ndjoka tayi ka kala kombanda yevi, nonando okwa kala ta hepekwa noonkondo uule womimvo  odhindji. Okwa li a hepekwa tango kaapolisi yaNazi nokonima okaaniilonga yUusekuliti wEpangelo lyaNdowishi lyokUuzilo.

14 Omumwatate Rudolf okwa li a taalele ishewe omashongo gamwe. Sho meme gwe a li mokamba yoonkwatwa yedhina Ravensbrück, okwa li a kwatwa komukithi gwotifus, ngoka hagu etwa koombakiteli, e ta si. Okwa li wo a mono nkene eitaalo lyahe lye ende tali nkundipala sigo e ya ponkatu yokushaina ondokumende ndjoka tayi ulike kutya ke shi we Onzapo yaJehova. Konima sho omumwatate Rudolf a mangululwa mondjedhililo, okwa li a nyanyukilwa uuthembahenda wokulonga e li omutonatelishikandjo nokonima okwi ithanwa a ka hite Osikola yaGilead. Okwa tuminwa koChile e li omutumwa, hoka a ka ninga ishewe omutonatelishikandjo. Nonando ongawo, omashongo gomumwatate Rudolf kaga li ga hula. Okwa hokana omutumwa omukwawo, omumwameme Patsy, naasho pwa piti owala omumvo gumwe, ko okamwanakadhona kawo otaka hulitha. Konima yethimbo omukulukadhi gwe naye okwa mana oondjenda, mepipi lyomimvo 43. Omumwatate Rudolf okwi idhidhimikile omashongo agehe ngoka. Nonando okwa li a kulupa nokee na we uukolele, okwa li ta longo e li omukokolindjila nosho wo omukuluntugongalo, sho ondjokonona ye ya holoka mOshungolangelo yOshiingilisa, ye 1 Auguste 1997, pepandja 20-25. [1]

15. Gandja iiholelwa yokunena yaamwatate naamwameme mboka taya longele Jehova nenyanyu, nonando otaya hepekwa.

15 Oonzapo dhaJehova otadhi tsikile okunyanyukilwa etegameno lyadho, nonando odha taalela omahepeko omanene ngoka taga tsikile. Pashiholelwa, aamwatate naamwameme oyendji oya tulwa moondjedhililo miilongo ngaashi Eritrea, Singapore na South Korea. Oya tulwa mondholongo, unene tuu molwaashoka ya katuka metsokumwe nelombwelo lyaJesus, ndyoka tali ti kutya inaya longitha egongamwele. (Mat. 26:52) Mokati kaamwatate oyendji mboka ya tulwa moondholongo omwa kwatelwa aamwatate ngaashi Isaac, Negede naPaulos, mboka ya kala mokamba yoonkwatwa moEritrea, uule womimvo dhi vulithe 20. Muule womimvo adhihe ndhoka, aamwatate mbaka inaya vula okuhokana nosho wo okusila oshimpwiyu aavali yawo aakokele. Nonando oya kala tayu ungaungwa nayo nonyanya, natango oye li aadhiginini. Enyanyu ndyoka li li kiipala yawo ngaashi tu shi wete kepandja lyetu lyokointaneta, jw.org, otali ulike kutya oya kaleka eitaalo lyawo lya kola. Nokuli naatonateli yondholongo oye ya simaneka.

Oho mono mo ngaa uuwanawa miiholelwa iiwanawa yeitaalo yaamboka ye li megongalo lyeni? (Tala okatendo 15, 16)

16. Eitaalo lya kola otali vulu ngiini oku ku gamena?

16 Aapiya yaJehova oyendji inayi idhidhimikila nale omahepeko omadhigu, neitaalo lyawo ohali yelekwa momikalo dha yoolokathana. Oyendji oya kala nokwiidhidhimikila oluhepo nenge ya mona iihuna, omolwiita yopashigwana nenge molwiiponga yopaunshitwe. Yalwe oye etha po onkalamwenyo yuuzeko muuyuni mbuka nosho wo esimano, ngaashi naanaa Moses naapiya yaJehova yopethimbo lyonale ya li ya ningi. Ohaya kondjo ya mana mo, opo kaaya yulwe kohole yokuhola iinima yopamaliko nokaaya kale yi ihole yo yene. Oshike hashi ya kwathele ya kondjithe iinima mbyoka? Ohole yawo yokuhola Jehova nosho wo eitaalo lyawo lya kola momauvaneko ge kutya ota ka kutha po okwaanuuyuuki akuhe. Oyi itaala wo kutya Jehova ota ka pa aapiya ye aadhiginini omwenyo gwaaluhe muuyuni uupe wuuyuuki. — Lesha Episalomi 37:5, 7, 9, 29.

17. Owa tokola toko okuninga shike, noshike tatu ka kundathaneni moshitopolwa tashi landula?

17 Moshitopolwa shika otwa mono nkene okutedhatedha komauvaneko gaKalunga nokugalikana pandjigilile taku vulu okukoleka eitaalo lyetu. Shoka otashi ke tu kwathela tu idhidhimikile omashongo ngoka haga yeleke eitaalo lyetu, sho twa tala ketegameno lyetu lyopaKriste “tu na einekelo lya kola.” Shoka Ombiimbeli tayi popi kombinga yeitaalo osha kwatela mo oshindji, ngaashi tatu ke shi mona moshitopolwa tashi landula.

^ [1] (okatendo 14) Lesha wo ondjokonona yomumwatate Andrej Hanák, gwokoSlovakia, moshitopolwa “Despite Trials, My Hope Has Remained Bright” (Onda kala ndi na etegameno, nonando onda kala nda taalelwa komashongo) mo-Awake!, yo 22 Apilili 2002.