Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2016

Pandula Jehova e li Omuhongi gwetu

Pandula Jehova e li Omuhongi gwetu

‘Omuwa, ongoye tate. Ongoye omuhongi gwiiyuma. Owe tu shiti.’JESAJA 64:8.

OMAIMBILO: 89, 26

1. Omolwashike Jehova oye Omuhongi gwiiyuma kaaku na we?

MUNOVOMBA 2010, oshiyuma oshikulu sha hongwa kAachiina osha li sha landithwa po koodola 7 000 000 lwaampono, moIngilanda. Oshikumithi lela sho omuhongi gwiiyuma ha vulu okulongitha eloya ndyoka li li oshinima shanathangwa noshaa na ongushu, e te li hongo oshiyuma oshiwanawa noshi na ondilo. Omuhongi gwetu, Jehova, oku vule kokule aahongi yiiyuma yopantu. Ombiimbeli otayi ti kutya Jehova oku umbu omuntu a gwanenena ‘montsi yevi,’ sha hala okutya, meloya. (Genesis 2:7) Omuntu ngoka okwa li ‘Adam yaKalunga’ nenge omwana gwaKalunga. Okwa li a shitwa momukalo moka ta vulu okuholela omaukwatya gaKalunga.—Lukas 3:38.

2, 3. Ongiini tatu vulu okuholela iikala yAaisraeli mboka ya li yi iyela ombedhi?

2 Sho Adam a tsu ondumbo nOmushiti gwe, ina kala we omwana gwaKalunga. Ihe oyendji yomoyana oya hogolola Jehova Kalunga a kale Omupangeli gwawo. (Aahebeli 12:1) Oya vulika neifupipiko kOmushiti gwawo, opo yu ulike kutya oya hala oye a kale He nOmuhongi gwawo, ihe haSatana. (Johannes 8:44) Uudhiginini wawo kuJehova otawu tu dhimbulukitha  shoka Aaisraeli mboka ya li yi iyela ombedhi ya popi ya ti: “Omuwa, ongoye tate. Tse eloya, ngoye omuhongi gwiiyuma. Owe tu shiti.”—Jesaja 64:8.

3 Aalongeli yaJehova yashili kunena nayo ohaya ningi ngaashi taya vulu ya kale aaifupipiki nohaya vulika. Oye wete kutya oshi li uuthembahenda okwiithana Jehova, He noya hala a kale Omuhongi gwawo. Mbela otwa hala ngaa okukala eloya ndyoka Jehova Kalunga ta vulu okuma nuupu li ninge oshiyuma shondilo? Mbela ohatu kala ngaa tu wete kutya aamwatate naamwameme otaya tsikile natango okuzulwa kuJehova? Opo tu shi uve ko nawa, otatu ka kundathana nkene Jehova ha hogolola mboka ha zula, kutya omolwashike he ya zula nankene he shi ningi.

JEHOVA OHA HOGOLOLA MBOKA HA ZULA

4. Jehova oha hogolola ngiini mboka ha hilile kuye? Gandja iiholelwa.

4 Jehova iha tala ko aantu momukalo moka hatu ya tala ko. Pehala lyaashono, oha konakona omitima noha mono kutya otu li naanaa ngiini. (Lesha 1 Samuel 16:7b.) Shika okwe shi ulike sho a toto po egongalo lyopaKriste. Aantu oyendji mboka yalwe tashi vulika ye ya tala ko yanathangwa, okwe ya hilile kuye nokOmwana. (Johannes 6:44) Pashiholelwa, gumwe ngoka Jehova e mu hilile kuye, Omufarisayi gwedhina Saulus ngoka a li ‘ha popi nayi Aakriste, he ya tidhagana nohe ya sheke.’ (1 Timoteus 1:13) Ihe Jehova okwa konakona omutima gwaSaulus noka li u uvite kutya oku li eloya lyaa na oshilonga. (Omayeletumbulo 17:3) Pehala lyaashono, Jehova okwa mono kutya ota vulu okuzulwa a ninge oshiyuma sha ‘hogololwa,’ opo u uvithile “aapagani naakwaniilwa yawo nAaisraeli.” (Iilonga 9:15) Jehova okwa hogolola wo yalwe mboka ta vulu okuzula ya ninge ‘oshiyuma shi na ondilo,’ ngaashi mboka ya li nale oonkolwi, aahondeli naafuthi. (Aaroma 9:21; 1 Aakorinto 6:9-11) Sho aantu mboka ya konakona Ombiimbeli, oya koleke eitaalo lyawo muJehova noye mu pitike e ya zule.

Inatu pangula aantu megongalo nenge mboka hatu uvithile moshitopolwa shetu

5, 6. Einekelo lyetu muJehova e li Omuhongi gwetu oli na okunwetha mo ngiini etaloko lyetu li na ko nasha (a) naantu mboka hatu uvithile moshitopolwa shetu? (b) naamwatate naamwameme?

5 Otwi inekela kutya Jehova ota vulu okuhogolola nokuhilila aantu aawanawa kuye, nomolwaashoka kaatu na okupangula aantu megongalo nenge mboka hatu uvithile moshitopolwa shetu. Katu na okukala tatu dhiladhila kutya omuntu gwontumba ke na siku a ninge Onzapo yaJehova. Pashiholelwa, natu tale nkene omulumentu gwedhina Michael a li hi inyenge uuna Oonzapo dhaJehova dhe mu talele po. Okwa ti: “Onda li owala handi pilamene ko e tandi dhi ipwililike nda fa kaandi dhi wete. Onda li nde dhi ihumbatele nayi noonkondo. Konima yethimbo, onda tsakanene naanegumbo yamwe mboka nda li nda hokwa omolwomikalo dhawo omiwanawa. Esiku limwe onda li nda kumwa noonkondo sho ndu uvu kutya aanegumbo mboka Oonzapo dhaJehova. Eihumbato lyawo olya kwathele ndje ndi ikonakone kutya omolwashike kaandi hole Oonzapo. Onda dhimbulula kutya kandi dhi hole omolwiikala  yandje yokwaa na ko nasha nomolwiinima kaayi shi yoshili mbyoka ndu uva kaantu kombinga yadho.” Michael okwa li a hala okwiilonga oshindji kombinga yOmbiimbeli nokwa taamba ko ekonakonombiimbeli. Konima okwa ninginithwa e ta yi miilonga yethimbo lyu udha.

6 Ngele otwa kala twa tala ko Jehova e li Omuhongi gwetu, etaloko lyetu li na ko nasha naamwatate naamwameme nalyo otali ka lunduluka. Otatu ka mona wo kutya kehe gumwe gwomuyo ota zulwa natango. Jehova naye osho e ya tala ko ngawo. Oha mono kutya oya tya ngiini noku shi shi kutya okwaagwanenena kwawo okwopakathimbo kowala. Oku shi shi wo kutya otaya vulu okukala aantu ya tya ngiini. (Episalomi 130:3) Otatu vulu okuholela Jehova ngele otwa kala tu na etaloko ewanawa li na ko nasha naamwatate. Otatu vulu nokuli okulonga pamwe nOmuhongi gwetu tu kwathele aamwatate naamwameme ya hume komeho. (1 Aatessalonika 5:14, 15) Aakuluntugongalo oye na okutula po oshiholelwa oshiwanawa moshinima shoka.—Aaefeso 4:8, 11-13.

OMOLWASHIKE JEHOVA HE TU ZULA?

7. Omolwashike wa pandula eputudho ndyoka Jehova he tu pe?

7 Aantu yamwe otashi vulike ya tye: ‘Kanda li nda pandula omukalo moka aavali yandje ya putudha ndje, onde ke gu pandula owala sho nda mono aanona yandje.’ Sho tatu ende tatu koko, ohatu kala twa pandula eputudho ndyoka twa pewa, oshoka otu wete kutya oli li euliko lyohole. (Lesha Aahebeli 12:5, 6, 11.) Jehova oku tu hole tu li oyana, nomolwaashoka he tu putudha nenge he tu zula neidhidhimiko. Okwa hala tu kale tu na oondunge, twa nyanyukwa notu mu hole e li Tate yetu. (Omayeletumbulo 23:15) Iha kala a nyanyukwa uuna e wete tatu mono iihuna, ye ina hala tu se tu li aalunde inaayi iyela ombedhi.—Aaefeso 2:2, 3.

Jehova oku tu hole tu li oyana, nomolwaashoka he tu putudha nenge he tu zula neidhidhimiko

8, 9. Jehova oha longitha shike shi tu kwathele tu zulwe kuye, nelongo ndika otali ka tsikila ngiini monakuyiwa?

8 Manga inaatu tseya Jehova, otashi vulika twa li tu na omaukwatya ogendji omawinayi. Ihe Jehova okwe tu zula nokwe tu kwathele tu lundulule. Ngashingeyi otu na omaukwatya gamwe omawanawa. (Jesaja 11:6-8; Aakolossa 3:9, 10) Otu li moparadisa yopambepo, ano, onkalo yi ikalekelwa ndjoka Jehova e tu pa pethimbo lyetu, yi tu kwathele tu zulwe kuye. Moparadisa ndjika ohatu kala tu uvite twa gamenwa, nonando uuyuni mboka we tu kundukidha owa kolokosha. Mboka inaayu ulukilwa ohole maandjawo manga ya li aashona, ngashingeyi ohayu ulukilwa ohole yashili kaamwatate naamwameme moparadisa ndjika yopambepo. (Johannes 13:35) Otwi ilonga wo okukala hatu ulukile yalwe ohole. Ihe shoka sha simanenena, otwa tseya Jehova notu wete ngashingeyi ohole ndjoka he tu ulukile e li Tate yetu.—Jakob 4:8.

9 Muuyuni uupe, otatu ka mona uuwanawa owundji moparadisa yopambepo. Otatu ka nyanyukilwa wo oparadisa  yo yeneyene ndjoka tayi ka kala kohi yepangelo lyUukwaniilwa waKalunga. Pethimbo mpoka Jehova ota ka tsikila oku tu zula noku tu longa momukalo moka inaatu mona nale. (Jesaja 11:9) Jehova ota ka ninga wo omadhiladhilo nomalutu getu ga gwanenena. Shika otashi ke tu ningila oshipu tu uve ko notu vulike thiluthilu komalombwelo ge. Onkee ano, natu tsikile okweetha Jehova e tu zule. Natu kale wo hatu mu ulukile kutya otwa pandula ohole ndjoka he tu ulukile moku tu zula.—Omayeletumbulo 3:11, 12.

NKENE JEHOVA HE TU ZULA

10. Jesus okwa li a holele ngiini eidhidhimiko nuunkulungu wOmuhongi Omunene?

10 Ngaashi omuhongi gwiiyuma onkulungu e shi nawa eloya ndyoka ta me, Omuhongi gwetu, Jehova oku tu shi nawa lela. Oku shi omaunkundi getu, omangambeko getu nehumokomeho ndyoka twa ninga. Ohe tu zula e na iinima mbyoka momadhiladhilo. (Lesha Episalomi 103:10-14.) Otatu vulu okwiilonga nkene Jehova he tu tala ko mokutala kunkene Jesus a li hi inyenge kokwaagwanenena kwaayapostoli ye. Poompito dhimwe, aayapostoli oya li haya patana kutya olye omunene mokati kawo. Ando opo wa li, ando owa kala wa tala ko ngiini eihumbato lyawo? Otashi vulika ando wa kala wu uvite kutya inaya fa eloya ndyoka hali vulu okumewa nuupu. Nonando ongawo, Jesus okwa kala e shi kutya otaya vulu okuzulwa ngele oya pulakene komayele ge gopahole nongele oya holele eifupipiko lye. (Mark 9:33-37; 10:37, 41-45; Luke 22:24-27) Konima sho Jesus a yumuka, aayapostoli oya pewa ombepo ondjapuki nokaya li we hayi ipula kutya olye omunene mokati kawo. Pehala lyaashono, oya gandja eitulomo kiilonga mbyoka Jesus e ya pe.—Iilonga 5:42.

11. Omomikalo dhini David a li a fa eloya ndyoka hali mewa nuupu, nongiini tatu vulu oku mu holela?

11 Kunena Jehova oha longitha Ombiimbeli, ombepo ondjapuki negongalo, opo e tu zule. Ongiini Ombiimbeli tayi vulu oku tu zula? Otwa pumbwa oku yi lesha, okutedhatedha kwaashoka twa lesha nokupula Jehova e tu kwathele tu shi tule miilonga. Omukwaniilwa David okwa nyola a ti: “Otandi ku dhimbulukwa mokukala kwandje; otandi ku dhiladhila miikako yuusiku.” (Episalomi 63:6) Okwa nyola wo a ti: “Ngame ote hambelele Omuwa, oshoka oye ha wilike ndje, nomuusiku eiyuvo lyandje ohali londodha ndje.” (Episalomi 16:7) Omukwaniilwa David okwa li ha tedhatedha komayele gaJehova nokwa li ha pitike ga zule omadhiladhilo ge nomaiyuvo ge gomuule, nuuna omayele ngoka kaaga li omapu okutaamba ko. (2 Samuel 12:1-13) David okwe tu tulila po oshiholelwa oshiwanawa sheifupipiko noshevuliko. Onkee ano, natu ipule ngeyi: ‘Uuna tandi lesha Ombiimbeli, ohandi tedhatedha ngaa kuyo nokweetha omayele gaKalunga ga gume omadhiladhilo nomaiyuvo gandje gomuule? Mbela otandi vulu oku shi ninga olundji shi vulithe nale?’—Episalomi 1:2, 3.

12, 13. Jehova oha longitha ngiini ombepo ondjapuki negongalo, opo e tu zule?

12 Ombepo ondjapuki otayi vulu oku tu zula momikalo dhi ili nodhi ili. Pashiholelwa, otayi vulu oku tu kwathela tu ilonge okuholela omaukwatya gaJesus, notu ulike iiyimati ya yoolokathana yombepo ondjapuki. (Aagalati 5:22, 23) Shimwe shomiiyimati mbyoka ohole. Otu hole Kalunga notwa hala okuvulika kuye. Otwa hala wo okuzulwa kuye, molwaashoka otu shi shi kutya iipango ye otayi tu etele uuwanawa. Ombepo ondjapuki otayi vulu oku tu koleka tu yande okuzulwa kuuyuni mbuka wa kolokosha. (Aaefeso 2:2) Sho  omuyapostoli Paulus a li omugundjuka, okwa li a nwethwa mo kaawiliki yelongelokalunga lyOshijuda mboka ye na uuntsa. Ihe ombepo ondjapuki oye mu kwathele a lundulule. Okwa nyola a ti: “Ngame otandi vulu shaa shoka, oshoka Kristus ota koleke ndje.” (Aafilippi 4:13) Natse otwa pumbwa okupula ombepo ondjapuki, tu na einekelo kutya Jehova ota ka yamukula omagalikano getu taga zi komutima.—Episalomi 10:17.

Jehova oha longitha aakuluntugongalo ye tu zule, ihe otu na okutula miilonga omayele gawo (Tala okatendo 12, 13)

13 Jehova oha longitha wo egongalo naakuluntugongalo ye tu zule. Pashiholelwa, ngele aakuluntugongalo oya mono kutya otu na uunkundi wontumba, ohaya kambadhala oku tu kwathela. Ihe ihaye tu pe omayele gi ikolelela komadhiladhilo gawo yene. (Aagalati 6:1) Pehala lyaashono, ohaya galikana kuJehova neifupipiko, opo e ya pe euvoko nowino. Konima yaashono, ohaya ningi omapekapeko taya longitha Ombiimbeli niileshomwa yetu yopaMbiimbeli, opo ya mone uuyelele mboka tawu tu kwathele. Ngele aakuluntugongalo oye ya kungoye e taye ku pe omayele gopahole, tashi vulika kombinga yomukalo moka ho zala, dhimbulukwa kutya omayele ngoka otagu ulike kutya Jehova oku ku hole. Ngele owe ga tula miilonga oto ka kala wa fa eloya ndyoka Jehova ta vulu okuma nuupu noto ka mona mo uuwanawa.

14. Nonando Jehova oye Omuhongi gwetu Omunene, ohu ulike ngiini kutya okwa simaneka uuthemba wetu wokuninga omatokolo?

14 Ngele otwa tseya nkene Jehova he tu zula, otashi ke tu kwathela tu kale tu na ekwatathano ewanawa naamwatate naamwameme. Otatu ka kala wo tu na etaloko ewanawa li na ko nasha naantu mboka hatu uvithile moshitopolwa shetu, mwa kwatela aakonakonimbiimbeli yetu. Pethimbo lyOmbiimbeli, manga omuhongi gwiiyuma inaa ma eloya, okwa pumbwa oku li opaleka nokukutha mo omamanya niinima yilwe. Omuhongi Omunene, Jehova, oha kwathele aantu mboka ya hala okuzulwa kuye. Ihe ya kondjitha ya ninge omalunduluko,  ihe ohe yu ulukile omithikampango dhe dha yogoka. Opo nduno taya tokola ngele otaya ka ninga omalunduluko ngoka ga pumbiwa.

15, 16. Aakonakonimbiimbeli ohayu ulike ngiini kutya oya hala okuzulwa kuJehova? Gandja oshiholelwa.

15 Tala kwaashoka sha ningilwa omumwameme Tessie gwokoAustralia. Osha li oshipu kuye okwiilonga shoka Ombiimbeli tayi ti. Ihe ka li a ningi lela ehumokomeho noka li ha yi kokugongala. Omumwameme ngoka ha konakona naye okwa galikana kuJehova nokwa li a tokola nokuli a kale ihaa konakona we naye. Manga inee shi ninga, opwa ningwa oshinima shimwe oshikumithi. Esiku limwe manga taya konakona, Tessie okwa lombwele omumwameme kutya omolwashike itaa ningi ehumokomeho. Okwa popi kutya oha kala a sa ohoni, oshoka oku hole okundombola. Ihe ngashingeyi okwa tokola e ku ethe po.

16 Tessie okwa tameke okuya kokugongala nokwa tameke okuulika omaukwatya gopaKriste, nonando yamwe yomookuume ke yonale oya li ye mu sheke. Konima yethimbo, Tessie okwa ninginithwa e ta ningi omukokolindjila gwondjigilile, nonando okwa li e na aanona aashona. Osha yela kutya uuna aakonakonimbiimbeli ya tameke okuninga omalunduluko ya nyanyudhe Jehova, Jehova ota ka hedha popepi nayo note ke ya ma ya ninge iiyuma yi na ondilo.

17. (a) Omolwashike twa nyanyukwa sho Jehova e li Omuhongi gwetu? (b) Omapulo geni taga ka yamukulwa moshitopolwa tashi landula?

17 Kunena, aahongi yamwe yiiyuma ohaya me eloya niikaha yawo li ninge oshiyuma oshiwanawa. Sha faathana, Jehova ohe tu zula neidhidhimiko ta longitha omayele ge, noha tala nkene tatu ki inyenga. (Lesha Episalomi 32:8.) Mbela owu wete ngaa kutya Jehova oku na ko nasha nangoye? Owu wete ngaa nkene he ku zula nuukeka? Ngele osho, omaukwatya geni tage ke ku kwathela wu kale ngaashi eloya ndyoka Jehova ta vulu okuma nuupu? Iikala yini wu na okuyanda, opo kuu kale eloya ndyoka itaali vulu okumewa nandonando? Aavali otaya vulu ngiini okulonga pamwe naJehova mokuzula oyana? Oshitopolwa tashi landula otashi ka yamukula omapulo ngoka.