Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2016

“Jehova Kalunga ketu oye awike Jehova”

“Jehova Kalunga ketu oye awike Jehova”

“Israel, pulakena! Jehova Kalunga ketu oye awike Jehova.”—DEUTERONOMIUM 6:4, NW.

OMAIMBILO: 138, 112

1, 2. (a) Omolwashike oohapu ndhoka dhi li muDeuteronomium 6:4 dhi shiwike nawa? (b) Omolwashike Moses a li a popi oohapu ndhoka?

AAJUDA oya kala nokulongitha oohapu dhomuDeuteronomium 6:4 uule womimvo omathele, dhi li oshitopolwa shegalikano lyawo lyi ikalekelwa. Egalikano ndyoka ohali ithanwa Shema, shoka shi li oshitya shotango movelise ndjoka mOshihebeli. Aajuda oyendji ohaya galikana egalikano ndyoka esiku kehe ethimbo lyongula nokongulohi, opo yu ulike kutya otaya longele Kalunga shili.

2 Oohapu ndhoka odhi li oshitopolwa shahugunina shoshipopiwa shaMoses shoka a gandja koshigwana shaIsraeli. Momumvo 1473, manga Kristus inee ya, oshigwana osha li moshilongo shaMoab, tashi ilongekidha okutaaguluka omulonga gwaJordan, shi ye mEvi lyEuvaneko. (Deuteronomium 6:1) Moses okwa kala ta wilike oshigwana omimvo omilongo ne, nokwa li a hala shi kale shi na omukumo, opo shi vule okutaalela omaupyakadhi ngoka tage ke ya. Osha li shi na okukala shi inekela Jehova, Kalunga kasho, nokukala oshidhiginini kuye. Onkee ano, oohapu dhaMoses dhahugunina odha li dhe ya ladhipike ya ninge ngawo.  Konima sho Moses a popi Iipango Omulongo noompango dhilwe dhaJehova, okwa dhimbulukitha aantu oshinima sha simanenena tashi adhika muDeuteronomium 6:4, 5, NW. (Lesha.)

3. Omapulo geni tatu ka kundathana moshitopolwa shino?

3 Aaisraeli oya li ye shi shi kutya Jehova Kalunga kawo “oye awike Jehova.” Aaisraeli mboka aadhiginini oya li haya longele Kalunga gumwe, Kalunga koohekulu. Ano omolwashike Moses e ya dhimbulukitha kutya Jehova Kalunga kawo “oye awike Jehova”? Ekwatathano lini li li pokati koohapu ndhoka nokuhola Kalunga ketu nomutima aguhe, nomwenyo aguhe nonoonkondo adhihe? Oohapu ndhoka dhi li muDeuteronomium 6:4, 5 (NW) otadhi ti shike kutse kunena?

JEHOVA KALUNGA KETU “OYE AWIKE JEHOVA”

4, 5. (a) Uutumbulilo “oye awike Jehova” otawu ti shike? (b) Jehova okwa yooloka ko ngiini kookalunga yiigwana?

4 Jehova okwi ikalekelwa. Uutumbulilo “oye awike Jehova” otawu ti kutya Jehova okwi ikalekelwa, shoka tashi ulike kutya kapu na ngoka e mu fa nenge ta vulu okuyelekwa naye. Omolwashike Moses a longitha uutumbulilo mbono? Sho Moses a popi oohapu ndhoka ka li ta popi kombinga yelongo lyiifundja lyuukwatatu. Jehova oye Omushiti gwegulu nevi noye Omupangeli gweshito alihe. Oye awike Kalunga kashili, nokaku na Kalunga gulwe e mu fa. (2 Samuel 7:22) Oohapu dhaMoses odha li tadhi dhimbulukitha Aaisraeli kutya oye na okulongela Jehova awike. Kaye na okuholela aantu mboka ye ya kundukidha, mboka haya longele iikalunga niikalungakiintu oyindji. Aantu mboka oya li yi itaala kutya iikalunga yawo otayi vulu okupangela eshito.

5 Pashiholelwa, Aaegipiti oya li haya longele oshikalunga shetango, hashi ithanwa Ra, oshikalungakiintu shegulu, hashi ithanwa Nut, oshikalunga shevi, hashi ithanwa Geb, oshikalunga shomulonga gwaNiili, hashi ithanwa Hapi nosho wo iinamwenyo oyindji. Jehova okwa li u ulike kutya oku vule iikalunga mbyoka yiifundja sho a tumu Omageelo omulongo. Baal oshikalunga shiifundja shoka sha li sha simanekwa unene kAakaanana, noya li yi itaala kutya osho she eta po omwenyo. Oya li wo yi itaala kutya Baal oshikalunga shiikogo, shomvula noshiikungulu. Momahala ogendji, aantu oya li yi inekela kutya Baal ota vulu oku ya gamene. (Numeri 25:3) Aaisraeli oya li ye na okudhimbulukwa kutya Jehova “oye Kalunga” kashili i ikalekelwa, ‘noye awike Jehova.’—Deuteronomium 4:35, 39, NW.

Jehova Kalunga gumwe awike, iha lunduluka, omunashili nomudhiginini

6, 7. Eityo limwe lyuutumbulilo Jehova Kalunga “oye awike Jehova” olini, nongiini u ulike kutya oye “awike Jehova”?

6 Jehova iha lunduluka nomudhiginini. Uutumbulilo “oye awike Jehova” otawu ti wo kutya omalalakano ge nomatokolo ge oge shi aluhe okwiinekelwa. Jehova Kalunga gumwe awike, iha lunduluka, omunashili nomudhiginini. Pashiholelwa, okwa li u uvanekele Abraham kutya oluvalo lwe otalu ka kala mEvi lyEuvaneko. Jehova okwa li a longo iikumithalonga oyindji, opo a gwanithe po euvaneko ndyoka. Nonando  opwa li pwa piti omimvo 430 konima sho Jehova a ningi euvaneko ndyoka, ka li a lundulula elalakano lye.—Genesis 12:1, 2, 7; Eksodus 12:40, 41.

7 Konima yomimvo omathele, Jehova okwa li i ithana Aaisraeli oonzapo dhe e te ya lombwele ta ti: “Kaku na Kalunga a li ndje komeho, nokaku na ta ka landula ndje.” Jehova okwa li wo e shi yelitha kutya elalakano lye kali na esiku li lunduluke, sho a gwedha ko ta ti: “Ongame Kalunga nosho te kala aluheluhe.” (Jesaja 43:10, 13; 44:6; 48:12) Kasha li tuu uuthembahenda uunene kAaisraeli okukala haya longele Kalunga ngoka ihaa lunduluka nomudhiginini! Natse kunena otu na uuthembahenda wa faathana.—Maleaki 3:6; Jakob 1:17.

8, 9. (a) Jehova okwa tegelela mboka haye mu longele ya ninge shike? (b) Jesus okwa tsu ngiini omuthindo esimano lyoohapu ndhoka dha popiwa kuMoses?

8 Moses okwa li a dhimbulukitha Aaisraeli kutya Jehova ke na nando esiku a kale kee ya hole nenge itee ya sile oshimpwiyu. Mepingathano naashono, Jehova okwa tegelela ye mu longele oye awike nokukala ye mu hole nomitima dhawo adhihe, noomwenyo dhawo adhihe nonoonkondo dhawo adhihe. Aavali oya li ye na okulonga oyana ethimbo kehe kombinga yaJehova, opo ya vule wo oku mu longela oye awike.—Deuteronomium 6:6-9.

9 Jehova iha lundulula omalalakano ge. Onkee ano, ke na esiku a lundulule shoka a tegelela aalongelikalunga yashili ya ninge. Ngele otwa hala Jehova a kale a hokwa omukalo moka hatu mu longele, otu na oku mu longela oye awike nokukala tu mu hole nomitima dhetu adhihe, noomwenyo dhetu adhihe nonoonkondo dhetu adhihe. Jesus okwa ti kutya oshipango shika osha simanenena. (Lesha Markus 12:28-31.) Ngashingeyi natu taleni nkene tatu vulu okuulika miilonga yetu kutya “Jehova Kalunga ketu oye awike Jehova.”

LONGELA JEHOVA OYE AWIKE

10, 11. (a) Omomukalo guni tu na okulongela Jehova oye awike? (b) Aagundjuka Aahebeli oya li yu ulike ngiini kutya ohaya longele Jehova oye awike?

10 Jehova oye awike Kalunga ketu. Uuna tatu mu longele, ohatu mu longele oye awike. Ihatu longele ookalunga yalwe nenge tu kwatele mo omadhiladhilo giifundja nenge iilonga inaayu uka uuna tatu mu longele. Ke shi owala oshikalunga shoka shi vule iikalunga yilwe nenge shi na oonkondo shi yi vule. Oye Kalunga kashili, noye awike tu na okulongela.—Lesha Ehololo 4:11.

11 Otatu lesha membo lyaDaniel kombinga yaalumentu aagundjuka Aahebeli, Daniel, Hanania, Mishael naAzaria. Oya li yu ulike kutya ohaya longele Jehova oye awike sho ya tindi okulya iikulya mbyoka inaayi yogoka kaalongeli yaJehova. Ookuume kaDaniel yatatu oya li ya tindi okwiisizimikila oshihongwathano shoshingoli shaNebukadnezzar. Oya li ya tokola okulongela Jehova oye awike noya li ya kakatele uudhiginini wawo kuye.—Daniel 1:1–3:30.

Jehova oye tu na okukala twa pititha komeho monkalamwenyo yetu

12. Oshike tu na okukala twa kotokela, opo tu vule okulongela Jehova oye awike?

12 Jehova oye tu na okukala twa pititha komeho monkalamwenyo yetu. Ngele otwa hala oku mu longela oye awike, otu na okukala twa kotoka, opo kaatu pitithe komeho iinima yilwe pehala lyoku mu longela. Iinima  mbyoka mbela otayi vulu okukala shike? Jehova okwa popi mIipango ye Omulongo kutya oshigwana she kashi na okulongela iikalunga nosho wo iimenka. (Deuteronomium 5:6-10) Kunena, oku na omikalo odhindji dhokulongela iikalunga, nadhimwe dhomudho otadhi vulu okukala omidhigu okudhimbulula. Ihe shoka Jehova a tegelela tu ninge inashi lunduluka. Oku li natango “oye awike Jehova” ngoka tu na okulongela. Natu taleni nkene tatu vulu okuyanda okulongela iikalunga kunena.

13. Oshike tashi vulika tu tameke okukala tu hole unene pehala lyokuhola Jehova?

13 Otatu lesha mAakolossa 3:5 (lesha) kombinga yiinima mbyoka tayi vulu okuyona po uukuume wetu wopothingo naJehova. Shimwe shomuyo osho olwiho ndoka lwa pambathana nokulongela iikalunga. Iinima mbyoka oya pambathana ngiini mbela? Ngele otwa kwatwa kokahalu kiimaliwa nenge kuuyamba, otaka vulu okukala taka pangele onkalamwenyo yetu, ngaashi oshikalunga shi na oonkondo. Iinima ayihe mbyoka ya popiwa mAakolossa 3:5 oya pambathana nolwiho, ndoka lu li omukalo gwokulongela iikalunga. Ano ngele otwa kokeke okahalu kiinima mbyoka, otatu vulu okutameka okukala tu yi hole noonkondo shi vulithe pokukala tu hole Kalunga. Kungawo Jehova ita ka kala we “oye awike Jehova” Kalunga ketu. Inatu hala nando shika shi tu ningilwe.

14. Elondodho lini omuyapostoli Johannes e tu pa li na ko nasha nohole yetu yokuhola Kalunga?

14 Omuyapostoli Johannes okwa tsu omuthindo oshinima sha faathana. Okwe tu londodha kutya ngele oku na ngoka e hole iinima mbyoka yi li muuyuni, sha hala okutya, “uuhalu wopantu okuhola mbyoka aantu taye yi tala notaye yi itangele,” nena ‘ohole yokuhola Tate kayi mo muye.’ (1 Johannes 2:15, 16) Onkee ano, otwa pumbwa okwiikonakona aluhe tu tale ngele otu hole iinima yomuuyuni. Otashi vulika tu mone kutya otwa tameka okuhokwa omainyanyudho, aantu nosho wo omikalo dhokuzala nodhokwiiyopaleka dhuuyuni mbuka. Nenge otashi vulika tu kale twa hala okumona “iinima iinene” okupitila melongo lyopombanda. (Jeremia 45:4, 5) Uuyuni uupe owu li lela popepi nokuya. Onkee ano, otwa pumbwa okudhimbulukwa oohapu dhaMoses dha simana. Ngele otwa kala tu uvite ko notwi itaala shili kutya “Jehova Kalunga ketu oye awike Jehova,” otatu ke mu longela oye awike momukalo ngoka a hala.—Aahebeli 12:28, 29.

KALEKA PO UUKUMWE WOPAKRISTE

15. Omolwashike Paulus a li a dhimbulukitha Aakriste kutya Kalunga “oye awike Jehova”?

15 Uutumbulilo “oye awike Jehova” otawu tu kwathele tu uve ko kutya Jehova okwa hala aalongeli ye ya kale ya hangana noya kale ye na elalakano limwe. Megongalo lyopaKriste lyonale omwa li Aajuda, Aagreka, Aaroma nosho wo aantu yomiigwana yilwe. Aantu ayehe mboka oya li ya za momaputuko ga yoolokathana, oya li ye na omikalondjigilile dha yoolokathana noye hole iinima ya yoolokathana. Osha li oshidhigu kuyamwe yomuyo okutaamba ko omukalo omupe gwokulongela Kalunga nenge okweetha po iinima mbyoka ya li haya ningi nale, molwaashoka oya li ya yoolokathana. Onkee ano, Paulus okwa  li e wete sha pumbiwa oku ya dhimbulukitha kutya Aakriste oye na Kalunga gumwe awike, Jehova.—Lesha 1 Aakorinto 8:5, 6.

Jehova okwa hala aalongeli ye ya kale ya hangana noya kale ye na elalakano limwe

16, 17. (a) Ehunganeko lini tali gwanithwa pethimbo lyetu, noshizemo oshini? (b) Oshike tashi vulu okuteya po uukumwe wetu?

16 Ongiini kombinga yegongalo lyopaKriste kunena? Omuhunganeki Jesaja okwa ti kutya “momasiku tage ke ya,” aantu okuza miigwana ayihe otaye ke ya pamwe ya longele Jehova. Otaya ka tya: “Ote ke tu nongeka shoka a hala tu longe; otatu ke enda momapola e ga hogolola.” (Jesaja 2:2, 3) Otwa nyanyukwa okumona ehunganeko ndika tali gwanithwa kunena. Tu li aamwatate naamwameme otwa za komahala ga yoolokathana, ohatu popi omalaka ga yoolokathana notwa za momaputuko ga yoolokathana. Nando ongaaka, otwa hangana mokulongela Jehova. Ihe omathimbo gamwe otashi vulika pu holoke uupyakadhi, molwaashoka otwa yoolokathana.

Mbela oho longo ngaa nuudhiginini, opo wu kaleke egongalo lyopaKriste lya hangana? (Tala okatendo 16-19)

17 Pashiholelwa, owu uvitile ngiini aamwatate naamwameme mboka ya za momaputuko galwe? Elaka lyawo, omizalo dhawo niikulya mbyoka haya li otashi vulika ya yooloka ko kuyoye. Mbela oho kala kokule nayo e to kala owala ho kala naamboka haya ningi iinima ya fa mbyoka wu hole  okuninga? Owu uvitile ngiini aakuluntugongalo yomoshitopolwa sheni mboka aagundjuka kungoye nenge mboka ya za momihoko dhilwe nenge meputuko lilwe? Ngele inatu kotoka, otashi vulika tu ethe omayoolokathano ngoka ge tu nwethe mo e taga teya po uukumwe wetu.

18, 19. (a) Omayele geni ga popiwa mAaefeso 4:1-3? (b) Oshike tatu vulu okuninga, opo tu kale twa hangana megongalo?

18 Ongiini mbela tatu vulu okuyanda uupyakadhi wa tya ngaaka? Paulus okwa li a gandja omayele ge na oshilonga kAakriste yomuEfeso, oshilando oshiyamba moka mwa li mu na aantu ya za momaputuko ogendji ga yoolokathana. (Lesha Aaefeso 4:1-3.) Okwa li a popi kombinga yomaukwatya ngaashi: eifupipiko, eidhidhimiko, ontalanteni nohole. Omaukwatya ngoka oga fa ekankameno lya kola hoka kwa tungilwa egumbo. Ihe opo omuntu a kaleke egumbo monkalo ombwanawa, okwa pumbwa okulonga nuudhiginini. Paulus okwa li a hala Aakriste yomuEfeso ya longe nuudhiginini, opo ya ‘koleke uukumwe wawo womombepo ondjapuki.’

19 Atuheni otu na okuninga ngaashi tatu vulu, opo tu kaleke egongalo lya hangana. Ongiini mbela tatu vulu oku shi ninga? Tango, otu na okukokeka nokuulika omaukwatya ngoka ga popiwa kuPaulus ngaashi: eifupipiko, eidhidhimiko, ontalanteni nohole. Oshitiyali, otwa pumbwa okulonga nuudhiginini, opo tu humithe komeho ‘ombili ndjoka tayi tu mangele kumwe.’ Okwaauvathana oko oshinima shoka tashi vulu okuteya po uukumwe wetu nuupu. Onkee ano, otwa pumbwa okulonga nuudhiginini tu kandule po okwaauvathana kehe, opo tu kale tu na ombili nuukumwe mokati ketu.

20. Ongiini tatu vulu okuulika kutya otu uvite ko oohapu ndhoka tadhi ti “Jehova Kalunga ketu oye awike Jehova”?

20 “Jehova Kalunga ketu oye awike Jehova.” Ndhika oohapu dha simana lela. Ekotampango ndika olya lya li lya koleke eitaalo lyAaisraeli ya vule okwiidhidhimikila omaupyakadhi ngoka ya tsakaneke sho ya yi mEvi lyEuvaneko noye li lala. Oohapu ndhoka otadhi vulu wo okukoleka eitaalo lyetu, opo tu vule okupita muudhigu uunene noku tu fala moparadisa ndjoka tayi ke ya. Natu tsikileni ano okulongela Jehova oye awike. Otwa pumbwa okukala tu mu hole nohatu mu longele nomutima gwetu aguhe, nomadhiladhilo getu agehe nonoonkondo dhetu adhihe. Otwa pumbwa wo okulonga nuudhiginini, opo tu kale tu na ombili nuukumwe naamwatate. Ngele otwa tsikile okuninga iinima mbyoka, Jesus ote ke tu tala ko tu li oonzi notatu ka mona nkene oohapu dhe tadhi gwanithwa ndhoka tadhi ti: “Ileni, mu ka thigulule oshilongo mwe shi longekidhilwa okuza keshito lyuuyuni.”—Mateus 25:34.