Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2016

Omolwashike tu na okukala twa ‘tonata’?

Omolwashike tu na okukala twa ‘tonata’?

“Inamu tseya, esiku olini Omuwa gweni te ya.”—MATEUS 24:42.

OMAIMBILO: 136, 129

1. Gandja ethaneko tali ulike kutya omolwashike sha simana okukala tatu tala kethimbo nokwaashoka tashi ningwa po. (Tala kethano lyopetameko.)

OMINUTE odhi li pokupwa ko noshigongi oshi li pokutameka. Kehe gumwe oti ikongele omutumba gwe, opo a pulakene komusika ndjoka hayi tetekele omutumba. Ihe shoka sha simanenena, okulongekidha omitima dhetu nomadhiladhilo getu, tu pulakene kiipopiwa mbyoka twa longekidhilwa. Omunashipundi oku li komutuni, omusika oya tameka naapulakeni oya kuutumba. Ihe ongiini ngele yamwe kaye wete kutya oshigongi oshi li pokutameka, molwaashoka owala taye endaenda nenge taya popi nookuume kawo? Osha yela kutya oya ndopa okukala ya tonata, ano okutala kethimbo nokugandja eitulomo kwaashoka tashi ningwa po. Ethaneko ndika otali tu kwathele tu kaleke momadhiladhilo oshiningwanima sha simana shoka twa tegelela monakuyiwa yi li popepi. Oshiningwanima shoka oshinipo?

2. Omolwashike Jesus a lombwele aalongwa ye ya kale ya ‘tonata’?

2 Jesus Kristus sho a li ta popi kombinga ‘yehulilo lyuuyuni,’ okwa kumagidha aalongwa ye a ti: Kotokeni ano, ne mu tonate, oshoka inamu tseya kutya ethimbo otali thiki uunake.” Konima yaashoka Jesus okwe ya ladhipike ishewe lwiikando  a ti: “Tonateni.” (Mat. 24:3; lesha Markus 13:32-37.) Ehokololo lyaMateus ndyoka tali popi oshinima osho tuu shoka, olya popya wo kutya Jesus okwa li a londodha aalanduli ye ya kale ya tonata a ti: ‘Tonateni, oshoka inamu tseya, esiku olini Omuwa gweni te ya. Kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.’ Okwe ya lombwele ishewe a ti: “Kaleni ano mwa tonata, oshoka inamu tseya esiku notundi.”—Mateus 24:42-44; 25:13.

3. Omolwashike twa pumbwa okugandja eitulomo kelondodho lyaJesus?

3 Tu li Oonzapo dhaJehova, otwa taamba ko lela elondodho lyaJesus. Otu shi kutya otu li lela ‘pehulilo lyuuyuni’ nonokutya kaku na we ethimbo ele “uudhigu uunene” wu tameke. (Daniel 12:4; Mateus 24:21) Otu wete iita yilulila, oluhondelo lwi indjipala, okwaanompango, evundakano lyomalongelokalunga, ondjala, omalega nomakakamo gevi tayi ningwa muuyuni. Otu shi wo kutya iilonga ya simanenena yokuuvitha Uukwaniilwa otayi longwa koshigwana shaJehova kehe pamwe. (Mateus 24:7, 11, 12, 14; Lukas 21:11) Otwa tegelela nondjuulukwe sho Jesus te ke ya a gwanithe po elalakano lyaKalunga.—Markus 13:26, 27.

ETHIMBO OLYU UKA PEHULILO

4. (a) Omolwashike tatu vulu okwiitaala kutya Jesus oku shi kutya uunake Armagedon te ke ya? (b) Nonando katu shi kutya uunake uudhigu uunene tawu ya, oshike tatu vulu okukala tu na uushili musho?

4 Otu shi kutya oshigongi kehe oshi na ethimbo ndyoka hashi tameke. Ihe itatu vulu okutengeneka naanaa kutya uudhigu uunene otawu ka tameka omumvo guni, esiku lini nenge otundi yini. Sho Jesus a li kombanda yevi okwa tile: “Esiku notundi ndjoka kaku na ngoka e yi shi, nando aayengeli yomegulu nenge Omwana, Tate oye awike.” (Mateus 24:36) Ihe Kristus okwa li a pewa oonkondo dhokukondjitha Satana megulu. (Ehololo 19:11-16) Ano oshi li pandunge okuthika pehulithodhiladhilo kutya Jesus oku shi kutya uunake Armagedon te ke ya. Ihe tse katu shi shi. Otwa pumbwa okukala twa tonata sigo uudhigu uunene tawu ya. Jehova oku shi kutya uunake tawu ke ya. Okwa tokola nale kutya ehulilo otali ke ya naanaa uunake. Ota yalula ethimbo ndyoka lya hupa ko, opo uudhigu uunene wu tameke, ‘notashi ka ningwa’ shili. (Lesha Habakuk 2:1-3.) Ongiini tatu vulu okukala nuushili kutya shika otashi ka ningwa shili?

5. Gandja oshiholelwa shoka tashi ulike kutya omahunganeko gaJehova ohaga gwanithwa aluhe pethimbo.

5 Omahunganeko gaJehova ohaga gwanithwa aluhe pethimbo. Tala nkene a li a hupitha Aaisraeli muEgipiti pethimbo. Moses okwa li a popi kombinga yo 14 Nisan 1513 K.E.N., a ti: “Mesiku ndyoka omimvo 430 sho dha tsakana, omazimo agehe goshigwana shOmuwa oga tembuka muEgipiti.” (Eksodus 12:40-42) “Omimvo 430” odha tameke sho ehangano ndyoka Jehova a ningi naAbraham lya yi miilonga mo 1943 K.E.N. (Aagalati 3:17, 18) Konima yethimbo Jehova okwa lombwele Abraham a ti: “Oluvalo lwoye otalu ka kala aakwiilongo moshilongo shuundjendi; otaa ka ninga aapika e taa hepekwa omimvo omathele gane.” (Genesis 15:13; Iilonga 7:6) “Omimvo omathele gane” dhokuhepekwa odha tameke naanaa mo 1913 K.E.N., sho Ismael a sheke Isak pethimbo lyokutoya kwe, nodha hulu sho Aaisraeli ya thigi po Egipiti mo 1513 K.E.N. (Genesis 21:8-10; Aagalati 4:22-29) Oshoshili kutya omimvo omathele gane manga inaashi gwanithwa, Jehova okwa li a tula po ethimbo lyokondandalunde ndyoka ta ka mangulula oshigwana she.

6. Omolwashike tatu vulu okukala nuushili kutya Jehova ota ka hupitha aantu ye?

 6 Josua, gumwe gwomwaamboka ya mangululwa muEgipiti, okwa dhimbulukitha Aaisraeli ayehe a ti: “Kehe gumwe gwomune oku shi shi momutima gwe nomomwenyo gwe kutya Omuwa Kalunga keni okwe mu pe iinima ayihe iiwanawa mbyoka e yi mu uvanekele. Okwa gwanitha euvaneko kehe e li uvaneke; kape na nando olimwe lya gwile pohi.” (Josua 23:2, 14) Otatu vulu okukala nuushili kutya euvaneko lyaJehova li na ko nasha nehupitho puudhigu unene otali ka gwanithwa. Ihe ngele otwa hala tu ka hupe pehanagulo lyuuyuni mbuno, otu na okukala twa tonata.

OSHA SIMANENENA OKUKALA TWA TONATA, OPO TU KA HUPE

7, 8. (a) Oshilonga shaalangeli pethimbo lyonale osha li shashike, notatu ilongo ko shike kuyo? (b) Gandja oshiholelwa kutya oshike tashi ka ningwa po ngele aalangeli oya kotha miilonga.

7 Otatu vulu okwiilonga oshiilongomwa kaantu yopethimbo lyonale kombinga yankene sha simana okukala twa tonata. Nale iilando iinene ngaashi Jerusalem oya li ya kundukwa komankolokuma omanene. Oga li haga gamene aantu kaatondi yawo, noga li wo ge na oontalelo oombwanawa, hadhi kwathele aantu ya mone ashihe shoka tashi inyenge momudhingoloko. Omutenya nuusiku, aalangeli oya li haya kala komankolokuma nopomiyelo. Oya li haya londodha aantu moshilando uuna pu na oshiponga shi li popepi. (Jesaja 62:6) Osha li lela sha simanenena aalangeli ya kale ya tonata ethimbo kehe, oshoka osha nika oshiponga ngele oya kotha.—Hesekiel 33:6.

8 Omunandjokonona Omujuda Josephus okwa ti kutya mo 70 E.N., etangakwiita lyaRoma olya li lya kwata ko oshungo yaAntonia ndjoka ya li ya tungilwa kumwe nenkolokuma lyaJerusalem. Osha ningwa pethimbo aalangeli ya li ya kotha. Etangakwiita lyaRoma olya ponokele otempeli e tali yi fike po. Shono osha li oshiningwanima shahugunina shuudhigu unene sha ningilwa Aajuda muJerusalem.

9. Oshike shoka aantu oyendji kunena kaye shi kombinga yasho?

9 Miilongo oyindji kunena omu na ‘aalangeli,’ sha hala okutya, aantu mboka haya longo poongamba nomathano gokutala shoka aantu taya ningi. Ohaya kala taya tala aatondi nakehe shimwe tashi piyaganeke aantu moshitopolwa shawo. Ihe ‘aalangeli’ mboka ohaya vulu owala okumona omapiyagano ngoka tage ya ziilile komapangelo nokaantu. Kaye shi kutya megulu omu na epangelo lyaKalunga li li miikaha yaKristus nokaye shi shoka tali ningi. Kaye shi wo kutya olyo tali ke eta epangulo lyiigwana ayihe. (Jesaja 9:6, 7; 56:10; Dan. 2:44) Ngele otwa kala twi ilongekidha notwa tonata pambepo, otatu kala twe li tegelela ethimbo kehe.—Episalomi 130:6.

KOTOKA WAA IMBWE KUSHA OKUKALA WA TONATA

10, 11. (a) Otu na okukala twa kotokela shike, nomolwashike? (b) Oshike she ku tompa kutya Satana okwa pukitha aantu yi ipwililikile omahunganeko gOmbiimbeli?

10 Dhiladhila komulangeli ngoka a kala a tonata uusiku awuhe. Otashi vulika a tameke okukotha kominute dha hugunina sho e li pokuzimbuka. Sha faathana, sho ehulilo tali hedha popepi, oshidhigu kutse tu kale twa tonata. Mbela uupyakadhi otawu ka kala wu thike peni ngele otwa kala inaatu tonata? Natu kundathaneni iinima itatu mbyoka tayi vulu oku tu nwetha mo, ngele inatu kotoka, e tatu kala inaatu tonata.

11 Satana ota ningitha aantu kaaya kale ya tonata pambepo. Manga Jesus inaa sa, okwa li a londodha aalongwa ye lwiikando itatu kombinga ‘yomupangeli guuyuni  mbuka.’ (Johannes 12:31; 14:30; 16:11) Jesus okwa li e shi kutya Satana ota ka kaleka aantu momilema dhopambepo e taya kala kaaye wete kutya omahunganeko gaKalunga ge na ko nasha nonakuyiwa otaga gwanithwa. (Sefanja 1:14) Satana oha pukitha omadhiladhilo gaantu okupitila momalongelokalunga giifundja ngoka ge li muuyuni. Oshike mbela wa ndhindhilika uuna to popi naantu? Mbela Satana ina ‘pukitha omadhiladhilo gaamboka inaa itaala,’ opo kaaya mone kutya ehulilo lyuuyuni oli li pokuya nonokutya Kristus ota pangele e li Omukwaniilwa gwUukwaniilwa waKalunga? (2 Aakorinto 4:3-6) Mbela oho uvu iikando ingapi aantu taya ti kutya kaye na ohokwe? Olundji ihaya kala ye na ko nasha ngele tatu ya lombwele kutya uuyuni mbuka owu uka peni.

12. Omolwashike kaatu na okweetha Satana e tu pukithe?

12 Ino etha okwaa na ko nasha kwayalwe ku ku teye omukumo nenge ku ku imbe wu kale wa tonata. Paulus okwa nyolele ooitaali ooyakwawo a ti: “Omwa tseya nawa kutya esiku lyOmuwa otali ya.” Okwa gwedha ko a ti kutya otali ya “ongomufuthi te ende uusiku.” (Lesha 1 Aatessalonika 5:1-6.) Jesus okwe tu londodha a ti: “Kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.” (Lukas 12:39, 40) Masiku Satana ota ka pukitha oyendji ya kale yu uvite ya fa ye na ‘ombili negameno.’ Ote ke ya pukitha ya kale taya dhiladhila kutya iinima ayihe mbyoka tayi ningwa muuyuni otayi ende nawa. Ongiini kombinga yetu? Esiku lyepangulo inali pumbwa oku tu ‘adha ohaluka ngaashi omufuthi.’ Otu na owala okukala “twa tonata notu na eidhiliko.” Nomolwaashono twa pumbwa okulesha Oohapu dhaKalunga esiku kehe nokutedhatedha kwaashoka Jehova te tu lombwele.

13. Ombepo yuuyuni oya nwetha mo ngiini aantu, nongiini tatu vulu oku yi yanda?

13 Ombepo yuuyuni otayi ningitha aantu ya kale ya kotha pambepo. Aantu oyendji oya pwila unene miinima yopaumwene nomolwaashoka kaayu ‘uvite kutya yo oohepele koomwenyo.’ (Mateus 5:3) Oya pwila owala miinima yopamaliko mbyoka yi li muuyuni ngaashi “uuhalu wopantu okuhola mbyoka aantu taye yi tala.” (1 Johannes 2:16) Omainyanyudho ogendji oga ningitha  aantu ya kale ye “hole iihulo” nomahalo omawinayi otage ende taga nayipala omumvo kehe. (2 Timoteus 3:4) Nomolwaashoka Paulus a lombwele Aakriste kutya inaya “landula ehalo lyomuntu guulunde,” oshoka otashi vulu oku ya kotheka pambepo.—Aaroma 13:11-14.

14. Elondodho lini tali adhika muLukas 21:34, 35?

14 Pehala lyokunwethwa mo kombepo yuuyuni, otu na okweetha onkalamwenyo yetu yi nwethwe mo kombepo yaKalunga ndjoka Jehova e tu pa yi tu kwathele tu uve ko iinima mbyoka tayi ka ningwa monakuyiwa. [1] (1 Aakorinto 2:12) Inatu tegelela pu ningwe sha oshinene, osho ando shi tu ningithe tu kothe pambepo, ihe niinima iishona otayi vulu yi tu kotheke pambepo, ngele otwe etha yi mane po ethimbo lyetu lyokuninga iinima yopambepo. (Lesha Lukas 21:34, 35.) Yamwe otaye ke tu sheka molwaashoka twa tonata, ihe inashi tu ethitha po okukala twa tonata. (2 Petrus 3:3-7) Pehala lyaashono, natu kale hatu endathana nAakriste ooyakwetu uuna tu li pokugongala, mpoka pu na ombepo yaKalunga.

Mbela oto ningi ngaashi to vulu, opo wu kale wa tonata pambepo? (Tala okatendo 11-16)

15. Oshike sha li sha ningilwa Petrus, Jakob naJohannes, nongiini natse tashi vulu oku tu ningilwa?

15 Okwaagwanenena otaku vulu oku shi ninga oshidhigu kutse okukala twa tonata. Jesus okwa li e shi kutya aantu inaaya gwanenena oye na egamo lyokwiigandja komaunkundi gonyama yawo. Tala kwaashoka sha ningilwe uusiku mboka wa tetekele okudhipagwa kwaJesus. Okwa li a galikana He gwomegulu e mu nkondopaleke, opo a kale omudhiginini. Jesus okwa pula Petrus, Jakob naJohannes ya kale ya ‘tonata’ manga ta galikana. Ihe kaya li ye shi oshinima sha kwata miiti shoka sha li tashi ka ningwa po. Onkee ano, pehala lyokukala ya tonatela Mwene gwawo, oyi igandja kuunkundi wonyama yawo e taya kotha. Nonando Jesus okwa li a vulwa, okwa kala a tonata sho ta galikana nuudhiginini kuHe. Aalongwa ye nayo osho ya li ye na okuninga.—Markus 14:32-41.

16. Jesus okwe tu lombwele ngiini tu kale twa ‘tonata’ muLukas 21:36?

16 Okukala twa ‘tonata’ pambepo okwa kwatela mo oshindji kaashi shi owala okukala twa hala okulonga shoka oshiwanawa. Omasiku gontumba manga oshiningwanima shoka sha ningilwe meyana lyaGetsemane inaashi ningwa, Jesus okwa lombwele aalongwa oyo tuu mboka ya galikane kuJehova. (Lesha Lukas 21:36.) Onkee ano, opo tu kale twa tonata pambepo, natse otwa pumbwa okugalikana.—1 Petrus 4:7.

KALA WA TONANATA SHI VULITHE NALE

17. Ongiini tatu vulu okushilipaleka kutya otwi ilongekidhila shoka tashi ka ningwa monakuyiwa yi li popepi?

17 Molwaashoka Jesus okwa ti kutya ehulilo otali ya ‘pethimbo tuu ndyoka inaatu li tegelela,’ ndika halyo ethimbo lyokukotha pambepo. Halyo ethimbo lyokulalakanena iinima iihokithi mbyoka Satana nuuyuni we tawu gandja lyo halyo ethimbo lyokwiigandja komahalo getu gopanyama. (Mateus 24:44) Jehova naJesus oye tu lombwela okupitila mOmbiimbeli shoka taye ke tu pa monakuyiwa yi li popepi nankene tatu vulu okukala twa tonata. Otu na okugandja eitulomo kuupambepo wetu, kekwatathano lyetu naJehova nokiinima yi na ko nasha nUukwaniilwa. Natu kaleke momadhiladhilo ethimbo niiningwanima mbyoka tayi ningwa, opo twi ilongekidhile shoka tashi ka ningwa po masiku. (Ehololo 22:20) Omwenyo gwetu ogu li moshiponga.

^ [1] (okatendo 14) Tala ontopolwa 21 yembo Uukwaniilwa wakalunga otawu pangele!