Inda koshikalimo

Inda koshikalimo

Oonzapo dhaJehova

Hogolola elaka Oshindonga

Konga Uukwaniilwa, ihe hamaliko

Konga Uukwaniilwa, ihe hamaliko

“Kongeni tango Oshilongo shaKalunga, nena mbika ayihe otamu yi gwedhelwa ko.”—LUKAS 12:31.

OMAIMBILO: 40, 98

1. Eyooloko lini li li pokati kaashoka twa pumbwa naashoka twa hala?

OHAKU tiwa kutya iinima mbyoka omuntu ha kala a pumbwa iishona, ihe mbyoka ha kala a hala oyindji. Aantu oyendji kaye shi eyooloko pokati kaashoka ya pumbwa naashoka ya hala. Eyooloko olini mbela? Shoka wa pumbwa, osho oshinima shoka wu na okukala wu na, oshoka owe shi pumbwa monkalamwenyo, ngaashi iikulya, oonguwo nehala lyokukala. Shoka wa hala, osho oshinima shoka wa hala okukala wu na, ihe ino shi pumbwa lela.

2. Iinima yimwe yini aantu haya kala ya hala?

2 Shoka aantu haya kala ya hala osha yoolokathana shi ikolelela miilongo moka ye li. Miilongo inaayi putuka, aantu oyendji otashi vulika ya kale owala ya hala iimaliwa oyindji ya lande oongodhi dhopeke, uupakapaka nenge ehala. Miilongo iiyamba, otashi vulika aantu ya kale ya hala oonguwo dhondilo, omagumbo omanene, nenge iihauto oyindji yondilo. Ihe oshiponga oshinene oshi li mpano kutya, okukala ya hala iinima oyindjiyindji, kutya nduno oye yi pumbwa nenge inaye yi pumbwa, kutya nduno otaya vulu oku yi landa nenge itaya vulu, otashi vulu oku ya fala momwigo gwokuhola omaliko.

 KOTOKELA OMWIGO GWOKUHOLA OMALIKO

3. Okuhola omaliko oshike?

3 Okuhola omaliko oshike? Oko okwiipula unene niinima yopamaliko pehala lyokwiipula niinima yopambepo. Okuhola omaliko ohaku etithwa komahalo gomuntu, kwaashoka a pititha komeho nokwaashoka ta gandja eitulomo kusho. Ohaku kokeke mutse ehalo lyokukala twa hala iinima oyindji. Omuntu ngoka e hole omaliko otashi vulika a kale kee na iimaliwa oyindji nenge ihaa vulu okulanda iinima yondilo. Nokuli naantu mboka ya hepa ohaya vulu okumangwa kohole yeliko e taye etha po okukonga tango Uukwaniilwa.—Aahebeli 13:5.

4. Satana oha longitha ngiini iinima “mbyoka aantu taye yi tala”?

4 Satana oha longitha oongeshefa dhi tu heke tu itaale kutya otwa pumbwa okukala tu na iinima oyindji, tu nyanyukilwe onkalamwenyo. Oku na uunkulungu wokuningitha okahalu komeho nenge iinima “mbyoka aantu taye yi tala” yi kale yihokitha. (1 Johannes 2:15-17; Genesis 3:6; Omayeletumbulo 27:20) Uuyuni ohawu gandja iinima yopamaliko yi ili noyi ili tayi hokitha, okuza ngaa kwaambyoka yi na oshilonga sigo okwaambyoka kaayi na oshilonga. Mbela owa landele nale oshinima shoka inoo pumbwa, molwaashoka owala she ku nana sho tashi tseyithwa miipindi nenge tashi ulikwa pomakende goositola? Mbela konima yethimbo owa ka mona kutya oto vulu okukala kuu shi na? Iinima mbyoka inaayi pumbiwa otayi nayipike owala onkalamwenyo yetu notayi tu lolodha. Otayi vulu oku tu yula nokupiyaganeka elandulathano lyetu lyiinima yopambepo, ngaashi okukonakona Ombiimbeli, okwiilongekidhila okugongala nokuya ko nosho wo okukutha ombinga muukalele. Omuyapostoli Johannes okwe tu londodha a ti: “Uuyuni niinima ayihe yi li mo mbyoka aantu ye yi hokwa, otayi hulu po.”

5. Oshike hashi ningilwa mboka haya longitha oonkondo dhawo, opo yi ikongele iinima oyindji yopamaliko?

5 Satana okwa hala tu longele omaliko pehala lyaJehova. (Mateus 6:24) Mboka haya longitha oonkondo dhawo mokwiikongela iinima yopamaliko, ohayi iyadha ye na onkalamwenyo itaayi ti sha, molwaashoka oya pititha komeho omahalo gawo yene. Shoka ohashi nkundipaleke uupambepo wawo nohashi ye etele eyeme. (1 Timoteus 6:9, 10; Ehololo 3:17) Onkalo ndjoka oya popiwa kuJesus meyele lye lyomukuni. Sho oombuto dhetumwalaka lyUukwaniilwa ‘dha kunwa moongwena nenge maantu, okahalu kehe oka yi muyo e taka thininike oohapu, yaa imike iiyimati.’—Markus 4:14, 18, 19.

6. Oshike tatu ilongo kuBaruk?

6 Dhiladhila kuBaruk, amushanga gwomupolofeti Jeremia. Sho Jerusalem sha li popepi nokuhanagulwa po ngaashi sha li sha hunganekwa, Baruk okwa tameke ‘okwiikongela iinima iinene.’ Okwa li ta lalakanene iinima mbyoka tayi hulu po nokaayi na oshilonga. Ihe oshinima shimwe shoka a li e na okukala e na etegameno musho, ooshoka Jehova e mu uvanekela sho a ti: “Ngoye oto ka hunuka mo, oto kala u na omwenyo.” (Jeremia 45:1-5) Osha yela kutya Kalunga ka li nando ta ka hupitha omaliko gomuntu moshilando shoka tashi ka hanagulwa po. (Jeremia 20:5) Sho tu uka pehulilo lyuuyuni mbuka, ngashingeyi halyo ethimbo lyokwiigongelela omaliko ogendji. Inatu tegelela nando omaliko ngoka tu na, kutya nduno oge na ongushu yi thike peni, ga ka hupithwe pamwe natse puudhigu uunene.—Omayeletumbulo 11:4; Mateus 24:21, 22; Lukas 12:15.

7. Otatu ka kundathana shike, nomolwashike?

7 Jesus okwe tu pe omayele omawanawa gankene tu na okwiikongela oompumbwe dhetu dhakehe esiku itaatu piyagenekwa kusha, inaatu kwatwa kohole yokuhola omaliko noitaatu ipula unene niinima kaayi na oshilonga. Okwa popi omayele ngaka mEuvitho lye  lyokOndundu. (Mateus 6:19-21) Natu lesheni nokukonakona shoka sha popiwa muMateus 6:25-34. Uuna tatu shi ningi otashi ke tu tompa kutya otu na ‘okukonga Oshilongo’ nenge Uukwaniilwa, ihe hamaliko.Lukas 12:31.

JEHOVA OHA SILE OOMPUMBWE DHETU OSHIMPWIYU

8, 9. (a) Omolwashike kaatu na okukala tatu ipula unene niinima mbyoka twa pumbwa? (b) Jesus okwa li e shi shike kombinga yaantu noyoompumbwe dhawo?

8 Lesha Mateus 6:25. Sho Jesus a lombwele aapulakeni ye ‘yaa se oshimpwiyu shokulya nokunwa, opo ya kale ye na omwenyo,’ okwa li te ya lombwele ye ethe okwiipula. Oya li tayi ipula niinima mbyoka kaaye na okwiipula nayo. Jesus okwa li e ya lombwele netompelo ewanawa ye ethe okwiipula. Okukala tu na iimpwiyu nenge tatu ipula unene, kutya nduno oniinima mbyoka yi na oshilonga, otashi vulu okupiyaganeka omadhiladhilo gomuntu e tashi mu imbi a gandje eitulomo kiinima yopambepo mbyoka oyo ya simanenena. Jesus okwa li ti ipula unene naalongwa ye nomolwaashono e ya londodha lwiikando ine kombinga yuupyakadhi mbuka meuvitho lye.—Mateus 6:27, 28, 31, 34.

9 Omolwashike Jesus e tu lombwele kaatu kale tatu ipula naashoka tu na okulya, okunwa nokuzala? Mbela iinima mbyoka hayo twa pumbwa monkalamwenyo? Eeno, oyo twa pumbwa. Ngele katu yi na, itatu ka kala tatu ipula nayo? Osha yela kutya otatu kala tatu ipula nayo, Jesus naye okwa li e shi shi. Okwa li e shi oompumbwe dhaantu dhakehe esiku. Kakele kaashono, okwa li e shi oonkalo oondhigu ndhoka tadhi ka taalela aalongwa ye mboka taya ka kala ko ‘pomasiku’ gahugunina ngoka taga ka kala ‘omathimbo omadhigu’ okukaliwa mugo. (2 Timoteus 3:1) Oonkalo ndhoka odha kwatela mo okwaaniilonga, elondo lyoondando, ompumbwe yiikulya noluhepo ndoka oyendji ye na. Ihe Jesus okwa li wo a tseya kutya ‘omwenyo ogu vule iikulya nolutu olu vule oonguwo.’

10. Sho Jesus a longo aapulakeni ye nkene ye na okugalikana, oshike shono a popi shi na okukala sha simanenena monkalamwenyo yawo?

10 Meuvitho lye Jesus okwa longo aapulakeni ye yi indile He gwomegulu e ya kwathele moompumbwe dhawo dhopalutu. Okwa ti kutya oye na okugalikana ngeyi: “Tu pa wo nena oshithima shetu shesiku kehe.” (Mateus 6:11) Oshikando shimwe okwa tile: “Tu pa wo nena oshithima shetu twe shi pumbwa.” (Lukas 11:3) Omayele ngoka itaga ti kutya iinima yopamaliko oyo natu kale tatu dhiladhila unene. Moshiholelwa shegalikano shoka, Jesus okwa li a popi kutya osha simana okukala hatu galikana Uukwaniilwa waKalunga wu ye. (Mateus 6:10; Lukas 11:2) Opo Jesus a kwathele aapulakeni ye ya kale ihaayi ipula unene, okwa tsu omuthindo kutya Jehova oye Omusilishimpwiyu gwawo.

11, 12. Oshike tatu ilongo momukalo moka Jehova ha sile oshimpwiyu oondhila dhokegulu? (Tala kethano lyopetameko.)

11 Lesha Mateus 6:26. Natu ‘tale koondhila dhokegulu.’ Nonando iishitwa mbyoka iishona, ohayi li iiyimati oyindji, oombuto, uupuka, nenge omazinyo. Nonando odhi na omalutu omashona, ohadhi li iikulya oyindji dhi vule aantu. Ihe ihadhi longo omapya nokukuna mo oombuto dhi mone iipalutha. Jehova ohe dhi pe ashihe shoka dha pumbwa. (Episalomi 147:9) Odhoshili kutya Jehova ihe dhi pe iikulya momakana. Odhi na okuya dhi ke yi konge, ihe iikulya oyi li po ya gwana.

12 Jesus okwa li e wete kutya itashi wapa He gwomegulu a gandje iikulya koondhila e ta kala ando itaa sile oompumbwe dhaantu oshimpwiyu. [1] (1 Petrus 5:6, 7) Jehova ite ke tu pa iikulya momakana, ihe ota vulu okuyambeka oonkambadhala dhetu dhokukuna oombuto, opo tu mone iipalutha nenge  dhokwiimonena iimaliwa yokulanda shoka twa pumbwa esiku kehe. Uuna pwa holoka ompumbwe, ota vulu okwiinyengitha yalwe ye tu pe mo mwaashoka ye na. Nonando Jesus ina popya kutya Jehova oha pe oondhila dhokegulu omahala gokukala, okwe dhi shita dhi na uunkulungu, oondunge dhokwiikongela omahala nodhokukonga shoka dha pumbwa, opo dhi iningile iihandhila. Sha faathana, Jehova ota vulu oku tu kwathela tu mone omahala gokukala pamwe noyaandjetu.

13. Oshike tashi ulike kutya otu vule oondhila dhokegulu?

13 Jesus okwa li a pula aapulakeni ye a ti: ‘Ano hane mboka mu vule oondhila dhokegulu?’ Osha yela kutya Jesus okwa li e shi kutya masiku ota ka gandja omwenyo gwe molwaantu. (Yelekanitha Lukas 12:6, 7.) Eyambo lyaKristus kalya li lya gandjwa omolwiishitwa yilwe. Jesus ka li a sile oondhila dhokegulu, ihe otse a sile, opo tu ka nyanyukilwe omwenyo gwaaluhe.—Mateus 20:28.

14. Oshike omuntu ngoka hi ipula unene itaa vulu okuninga?

14 Lesha Mateus 6:27. Omolwashike Jesus a ti kutya omuntu ita vulu nando okugwedha ko noshimpwiyu she kuule womasiku gokukalamwenyo kwe? Omolwaashoka okwiipula kombinga yoompumbwe dhetu dhesiku kehe itaku tu kwathele tu lelepeke onkalamwenyo yetu. Pehala lyaashono, otaku yi fupipaleke owala.

15, 16. (a) Oshike tatu ilongo momukalo moka Jehova ha sile oshimpwiyu oongala dhokelundu? (Tala kethano lyopetameko.) (b) Omapulo geni tashi vulika tu ipule, nomolwashike?

15 Lesha Mateus 6:28-30. Olye mbela inaa hala okuzala oonguwo oombwanawa, unene tuu ngele tayi muukalele nenge ta yi kokugongala nokoshigongi? Nonando ongawo,  mbela otwa pumbwa ngaa okukala tu na “oshimpwiyu shoonguwo”? Jesus otu ukitha ishewe eitulomo lyetu kiilonga yaJehova. Moshinima shika, otatu vulu okwiilonga oshindji kunkene “oongala dhokelundu” hadhi monika. Jesus otashi vulika a li ta dhiladhila koongala dhi ili nodhi ili ndhoka hadhi mene melundu. Adhihe oombwanawa momikalo dha yoolokathana. Oongala ndhika ihadhi yogoha nokwiihondjela onguwo dho dhene. Ohashi kala shihokitha oku dhi tala sho tadhi sheneke. Ovelise oya ti: “NaSalomo meopalo lye alihe ina zala a fe yimwe yadho.”

16 Jesus okwa popi ishewe a ti: ‘Ano Kalunga ngele oha zaleke omwiidhi gwokelundu, ne mboka yeitaalo enkundi ite shi mu ningile ando?’ Ote ke shi mu ningila. Ihe aalongwa yaJesus oya li ya fa kaaye na eitaalo. (Mateus 8:26; 14:31; 16:8; 17:20) Oya li ya pumbwa eitaalo lya kola nokukala yi inekela Jehova. Ongiini kombinga yetu? Mbela otu na ngaa eitaalo lya kola kutya Jehova okwa hala oku tu sila oshimpwiyu nota vulu oku shi ninga?

17. Oshike tashi vulu okuyona po ekwatathano lyetu naJehova?

17 Lesha Mateus 6:31, 32. Inatu holela ‘aapagani,’ mboka kaaye na eitaalo muTate yetu gwomegulu omunahole ngoka ha sile oshimpwiyu mboka haya pititha komeho Uukwaniilwa we. Okwiigongelela iinima ‘ayihe mbyoka tayi lalakanenwa kaapagani’ otaku ka yona po ekwatathano lyetu naJehova. Pehala lyaashono, otatu vulu okukala neinekelo kutya ngele otwa pititha komeho iinima yopambepo monkalamwenyo, Jehova ita ka kala inee tu pa shoka oshiwanawa. “Uukriste” nenge etilokalunga lyetu oli na oku tu ningitha tu kale twa gwana ngele ‘tu na iikulya,  omizalo’ nehala lyokukala.—1 Timoteus 6:6-8.

MBELA UUKWANIILWA WAKALUNGA OWO WA PITITHA KOMEHO?

18. Oshike Jehova e shi kombinga yetu, noshike te ke tu ningila?

18 Lesha Mateus 6:33. Aalongwa yaKristus oye na aluhe okupititha komeho Uukwaniilwa. Ngele otwe shi ningi, Jesus okwa ti kutya iinima ‘ayihe otatu yi gwedhelwa ko.’ Omolwashike a ti ngawo? Okwe shi yelitha movelise ya tetekele a ti: “Ho yeni yomegulu oku shi shi kutya omwa pumbwa mbika ayihe,” ano oku shi oompumbwe dhetu. Jehova oku shi nale kutya otwa pumbwa iikulya, oonguwo nehala lyokukala, nokuli nomanga tse inaatu shi tseya. (Aafilippi 4:19) Oku shi kutya onguwo yetu yini yi li pokukulupa. Oku shi kutya otwa pumbwa iikulya nonokutya otwa pumbwa ehala li thike peni noyaandjetu. Jehova ota ka sa oshimpwiyu tu kale tu na shoka twa pumbwa.

19. Omolwashike kaatu na okukala tatu ipula unene naashoka tashi ka ningwa monakuyiwa?

19 Lesha Mateus 6:34. Ndhindhilika kutya Jesus okwa popi oshikando oshitiyali a ti: “Inamu sila esiku lyanofu oshimpwiyu.” Jesus okwa hala tu kale hatu ungaunga niimpwiyu yetu yonkalamwenyo yesiku nesiku, tu na einekelo kutya Jehova ote tu kwathele. Ngele omuntu oha kala ti ipula unene kombinga yaashoka tashi ka ningwa monakuyiwa, otashi vulika a tameke okukala i iyinekela mwene, pehala lyokwiinekela Jehova. Shoka otashi ka guma nayi ekwatathano lye naJehova.—Omayeletumbulo 3:5, 6; Aafilippi 4:6, 7.

KONGA UUKWANIILWA TANGO, NA JEHOVA OTE KE KU GWEDHELAKO AYIHE

Mbela oto vulu okweetha po iinima mbyoka tayi ku imbi wu konge tango Uukwaniilwa, opo wu gandje eitulomo olindji kuwo? (Tala okatendo 20)

20. (a) Elalakano lini to vulu okwiitulila po miilonga yaJehova? (b) Oshike to vulu okuninga, opo wu imangulule ko kiimpwiyu yoye yimwe?

20 Itashi tu etele uuwanawa washa ngele otwe etha po okukonga tango Uukwaniilwa, opo tu lalakanene iinima yopamaliko. Pehala lyaashono, natu lalakanene iinima yopambepo. Pashiholelwa, mbela oto vulu okutembukila kegongalo hoka ku na ompumbwe onene yaauvithi yUukwaniilwa? Mbela oto vulu okukokolondjila? Ngele owu li omukokolindjila, oho dhiladhila ngaa okuninga eindilo lyokuya kOsikola yAauvithi yUukwaniilwa? Mbela oto vulu okukala ho longo omalupita, tashi vulika ho kwathele koBetel nenge koombelewa dhokutoloka? Mbela oto vulu okuninga omwiiyambi miilonga yokutunga, tashi vulika wu kale ho longo omalupita miilonga yokutunga Iinyanga yUukwaniilwa? Dhiladhila kwaashoka to vulu okuninga, opo wu imangulule ko kiimpwiyu yoye yimwe, wu vule okwiipyakidhila niilonga yUukwaniilwa. Tala pamwe negalikano oshimpungu “ Nkene to vulu okweetha po iinima mbyoka tayi ku imbi wu konge tango Uukwaniilwa,” e to tameke okukatuka oonkatu ndhoka dha pumbiwa, opo wu adhe elalakano lyoye.

21. Oshike tashi ke tu kwathela tu hedhe popepi naJehova?

21 Jesus okwe tu longa netompelo ewanawa tu konge Uukwaniilwa, ihe hamaliko. Ngele otwe shi ningi, itatu ka kala nando tatu ipula unene noompumbwe dhetu. Ohatu hedha popepyeelela naJehova mokukala twe mu inekela nomokukala ihaatu kambadhala okukwiikongela iinima yondilo nenge okwiilandela kehe shimwe shoka uuyuni tawu gandja, nonando otu na iimaliwa yoku shi landa. Okweetha po iinima mbyoka tayi tu imbi tu konge tango Uukwaniilwa, otaku tu kwathele tu ki ‘imonene okukalamwenyo kwashili’ monakuyiwa.—1 Timoteus 6:19.

^ [1] (okatendo 12) Opo tu uve ko kutya omolwashike omathimbo gamwe Jehova he etha Omukriste a kale kee na iikulya ya gwana, tala “Omapulo ga za kaaleshi” mOshungolangelo yo 15 Septemba 2014, epandja 22.