Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2016

“Ino tila; otandi ku kwatha”

“Ino tila; otandi ku kwatha”

NATU tye ando oto ende mepandaanda uusiku. Opo wu li po, owu uvite pwa fa pu na omuntu te ende e ku landula. Sho to thikama, naye ota thikama. Sho to endelele, naye ote endelele. Owa tameke okumatuka, e to yi pegumbo lyakuume koye. Sho wa thiki po, okwe ku egulula e to yi megumbo. Mbela ito ka kala tuu wa pepelelwa!

Otashi vulika inoo iyadha nando onale monkalo ya tya ngawo, ihe otashi vulika iinima yilwe yonkalamwenyo yi ku ningithe wu kale wa tila. Pashiholelwa, mbela oto kondjo nuunkundi wontumba mboka wa hala okweetha po, ihe natango oto tsikile okuninga epuko olyo tuu ndyoka? Mbela owa kala ethimbo ele kuu na iilonga noto nyengwa oku yi mona nando owa ninga oonkambadhala? Mbela oto ipula niinima yomonakuyiwa, ngaashi uukulupe nokwaa na uukolele? Nenge mbela opu na sha shoka tashi ku etele uudhigu?

Kutya nduno owu na uupyakadhi wuni, mbela ito ke shi pandula ngele wu na gumwe ngoka to vulu okulombwela iimpwiyu yoye nota vulu oku ku kwathela uuna wa pumbwa ekwatho? Mbela owu na kuume kopothingo a tya ngawo? Eeno, owu na. Jehova oye kuume koye a tya ngawo, ngaashi naanaa a li kuume kaAbraham, ngaashi sha tumbulwa muJesaja 41:8-13. Movelise 10 nosho wo 13, Jehova ota lombwele aapiya ye ta ti: “Ino tila — ongame ndi li pungoye! Ongame Kalunga koye — ino limbililwa! Otandi ku kankameke e tandi ku kwatha; otandi ku gamene notandi ku hupitha. Oshoka ongame Omuwa Kalunga koye; otandi ku tsu omukumo te ti: ‘Ino tila; otandi ku kwatha.’”

“OTANDI KU KANKAMEKE E TANDI KU KWATHA”

Mbela oohapu ndhika itadhi ku hekeleke? Kambadhala okudhiladhila kwaashoka Jehova te tu uvanekele. Ovelise ndjika itayi popi ando to ende pamwe naJehova mwi ikwata miikaha, nonando pakudhiladhila otashi monika shi li nawa. Ando owa li to ende naJehova mwi ikwata miikaha, ando oshikaha she shokolulyo osha kwata oshikaha shoye shokolumoho. Pehala lyaashono, Jehova ote ku ‘gamene note ku hupitha,’ moku ku pa oshikaha she shokolulyo shuuyuuki note ku “tsu omukumo,” moku ku kwata moshikaha shokolulyo, a fa te ku hili mo monkalo ondhigu ndjoka wu li muyo. Sho te shi ningi, ote ku shilipaleke ta ti: “Ino tila; otandi ku kwatha.”

Mbela Jehova owe mu tala ko ngaa e li Ho omunahole nosho wo Kuume ngoka te ke ku kwatha uuna wu li muudhigu? Okwe ku hokwa, oku na ko nasha nonkalonawa yoye nokwa tokola oku ku kwathela. Uuna wu li muupyakadhi, Jehova okwa hala wu kale wu uvite wa gamenwa, molwaashoka oku ku hole unene. Okwi “ilongekidha aluhe okukwatha momathimbo guudhigu.”—Episalomi 46:1.

OKUKALA WU UVITE WU NA ONDJO OMOLWOMAPUKO GOYE GONALE

Aantu yamwe ohaya kala taya dhiladhila komapuko gawo gonale nohaya kala tayi ipula ngele Kalunga  okwe ya dhimina po ngaa. Ngele nangoye osho ho ningi, dhiladhila komulumentu omudhiginini Job, ngoka a zimine ‘omayono gomuugundjuka we.’ (Job 13:26) Omupisalomi David naye osho a li u uvite ngaaka e ti indile Jehova ta ti: “Dhimbulukwa ndje, Omuwa, omoluuwanawa nomolwohole yoye onene.” (Episalomi 25:7) Molwaashoka atuheni inatu gwanenena, otwa ‘yona nokatu na oonkondo dhoku tu hupitha.’—Aaroma 3:23.

Etumwalaka ndyoka li li montopolwa 41 yaJesaja olya li lyu ukithwa unene koshigwana shaKalunga shonale. Osha li sha yona sha kwa miiti, shoka sha ningitha Jehova a tokole e shi geele mokweetha shi ye muukwatwa waBabilonia. (Jesaja 39:6, 7) Nonando ongawo, Jehova okwa li ta dhiladhila kethimbo lyokomeho sho ta ka hupitha mboka yi iyela ombedhi naamboka ya galukila kuye. (Jesaja 41:8, 9; 49:8) Kunena Jehova ohu ulukile mboka ya hala shili okukala ya hokiwa kuye esilohenda lye enene.—Episalomi 51:1.

Tala koshiholelwa shaTakuya, * ngoka a li a kambadhala okweetha po omukalondjigilile inaagu yogoka gwokutala omathano giipala nogwokwiidhana kiilyo yoluvalo. Omathimbo nomathimbo ohi iyadha ta ningi iinima mbyoka natango. Okwa li u uvite ngiini? Okwa ti: “Onda li ndu uvite kaandi na oshilonga nandonando, ihe uuna nda galikana Jehova, tandi mu indile a dhimine ndje po, okwa li ha kwathele ndje lela.” Jehova okwa li e mu kwathele ngiini? Aakuluntugongalo yomegongalo lyawo oya li ye mu lombwele e ya dhengele uuna i iyadha a ninga iinima mbyoka. Okwa ti: “Kasha li oshipu kungame oku ya dhengela, ihe ngele nde shi ningi, onda li handi kala nda tsuwa omukumo.” Opo nduno aakuluntugongalo oya ningi elongekidho, opo omutonatelishikandjo a talele po Takuya. Omutonatelishikandjo okwe mu lombwele a ti: “Inandi ya owala kungaye mwene. Onda tumwa kaakuluntugongalo ndi ye kungoye. Oye ku hogolola wu mone etalelopo lyuusita.” Takuya ota ti: “Ongame nda yono, ihe Jehova oye e ya a kwathele ndje okupitila maakuluntugongalo.” Takuya okwa ningi omahumokomeho sigo a ningi omukokolindjila gwondjigilile. Ngashingeyi oha longo koshitayimbelewa. Ngaashi naanaa Jehova e shi ningile omumwatate nguka, ota vulu oku ku kwathela monkalo kehe.

UUNA TO IPULA NUUHUPILO

Aantu oyendji ohayi ipula unene nokwaaniilonga. Yamwe ohaya kanitha iilonga nohashi kala oshidhigu okumona po yimwe. Dhiladhila kutya oto ka kala wu uvite ngiini, ngele kehe mpoka to kongo iilonga otaku tiwa owala kapu na sha. Monkalo ya tya ngawo, aantu yamwe ohayi iyekelele owala e taya kala kaaye na ko nasha. Jehova otashi vulika e ku kwathele ngiini? Otashi vulika itee ke ku pa nziya iilonga tayi opalele, ihe otashi vulika te ke ku kwathela wu dhimbulukwe oohapu dhaDavid ndhoka tadhi ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOmuwa, nenge oyana taa hehela iikulya.” (Episalomi 37:25) Jehova okwe ku tala ko wu na ondilo, ote ku ‘gamene note ku hupitha,’ moku ku pa oshikaha she shokolulyo shuuyuuki wu mone shoka wa pumbwa wu tsikile oku mu longela.

Mbela Jehova otashi vulika e ku kwathele ngiini uuna wa kanitha iilonga yoye?

Sara ngoka ha kala moColombia, okwa mona nkene Jehova e mu kwathela. Okwa li e na iilonga mehangano lya simana. Nonando oya li hayi mu pula  oshindji, okwa li ha futwa nawa. Molwaashono okwa li a hala okuninga oshindji miilonga yaJehova, okwe etha po iilonga e ta tameke okukokola ondjila. Okwa li ta kongo iilonga mbyoka hayi longwa omalupita, ihe ine yi mona nuupu. Okwa ningi po okasitola kokulanditha oaisklima, ihe oke ende taka mbangolota e taka pata. Sara ota ti: “Opwa pita oomvula ndatu ngashingeyi, ihe kekwatho lyaJehova, onda li nda vulu okwiidhidhimika.” Okwi ilongo kutya oshike naanaa a pumbwa nonkene e na okuyanda okukala e na oshimpwiyu shesiku lyangula. (Mateus 6:33, 34) Konima yethimbo omuhona gwe okwe mu dhengele, e mu lombwele e ye a tameke iilonga ye mbyoka a li ha longo nale. Okwe mu lombwele kutya ota ka taamba owala iilonga mbyoka hayi longwa omalupita, note ke yi taamba owala ngele tayi mu pe ethimbo lyiinima yopambepo. Nonando Sara iha mono oshimaliwa shi thike pwaashoka a li ha mono nale, okwa li a vulu okutsikila niilonga ye yuukokolindjila. Ota ti kutya moonkalo adhihe ndhoka oondhigu a piti, Jehova okwa kala pamwe naye.

UUNA TATU IPULA NUUKULUPE

Aantu oyendji ohaya kala tayi ipula nuukulupe nosho wo nokupenzelwa. Ohaya kala tayi ipula ngele otaya ka kala ngaa shili niimaliwa ya gwana methimbo ndyoka ye li momwenyo. Ohaya kala wo tayi ipula nuukolele mboka tashi vulika wu kale waa po sho taya koko. Otashi vulika David oye a li i indile Jehova ta ti: “Ino ekelahi ndje, sho ndaa na oonkondo.”—Episalomi 71:9, 18.

Ongiini nduno aapiya yaJehova taya vulu okukala yu uvite ya gamenwa methimbo lyuukulupe? Oya pumbwa okukokeka eitaalo muKalunga nokukala ye na einekelo kutya ote ke ya pa shoka ya pumbwa. Otashi vulika yamwe yi ikongela iinima yondilo sho ya li ye na iimaliwa oyindji, nokungawo otashi vulika ya pumbwa oku yi shonopeka nokukala ya gwanenwa niishona. Otashi vulika ya mone kutya “okulya ekaka lyomboga” oku li hwepo ku vule “okulya ontselela yondumetana yo ondoka” notashi vulu nokuli oku ye etela uukolele. (Omayeletumbulo 15:17) Ngele owa gandja eitulomo kokunyanyudha Jehova, ote ke ku pa kehe shoka wa pumbwa pethimbo lyuukulupe.

José naRose ye li naTony naWendy

Dhiladhila kuJosé naRose mboka ya longela Jehova ethimbo lyu udha uule womimvo dhi vulithe 65. Uule womimvo, oya kala taya sile he yaRose oshimpwiyu ngoka a li a pumbwa ekwatho ethimbo kehe. José okwa li wo i idhidhimikile etando lyokankela nosho wo okufikwa kwoosele dhokankela neshina. Mbela Jehova okwa li ngaa a kwathele aaihokani mbano aadhiginini? Eeno. Ngiini mbela? Okwa longitha aaihokani yalwe megongalo, Tony naWendy, mboka ye ya pe ehala lyokukala ndyoka ya kala ya hala okupa aakokolindjila oshali. Omimvo dhontumba manga Tony a li kosikola yopombanda, okwa li ha mono José naRose taya yi muukalele ethimbo kehe. Okwa kala e ya hole omolwuuladhi wawo, naashoka osha li she mu gumu noonkondo. Okutala aaihokani aakokele yi igandjela Jehova onkalamwenyo yawo ayihe, oshi inyengitha Tony naWendy ye ya pe okafuleta kawo. Uule womimvo 15 dha ka pita, oya kala nokukwathela José naRose, mboka ngashingeyi ye na omimvo 80 nasha. Aakokele mbaka oya tala ko ekwatho lyaaihokani mbaka aagundjuka li li omagano ga za kuJehova.

Jehova ote ku ‘gamene note ku hupitha,’ moku ku pa oshikaha she shokolulyo shuuyuuki. Mbela oto ka kwata ngaa moshikaha shopathaneko shaangoka te ku uvanekele ta ti: “Ino tila; otandi ku kwatha”?

^ okat. 11 Omadhina gamwe oga lundululwa.