Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2016

Omapulo ga za kaaleshi

Omapulo ga za kaaleshi

Uutumbulilo iipilangi iyali ya kwatelwa kumwe mboka wa popiwa muHesekiel ontopolwa 37 otawu ti shike?

Jehova okwa pe Hesekiel etumwalaka lyetegameno, tu uvaneke kutya ota ka hanganitha oshigwana shaIsraeli konima ngele sha galukile kEvi lyEuvaneko. Etumwalaka ndyoka otali hunganeke wo ehanganitho lyoshigwana shaKalunga ndyoka lya tameke pomasiku gahugunina.

Jehova okwa li a lombwele omupolofeti Hesekiel a nyole kiipilangi iyali. Koshipilangi shimwe okwa li e na okunyola ko “Juda noonakweendathana naye Aaisrael.” (OB-1954) Koshikwawo okwa li e na okunyola ko ‘Josef; oshiti shaEfraim noshoonakweendathana naye yomegumbo lyaIsrael.’ (OB-1954) Iipilangi iyali oya li yi na okukala “ya fa oshipilangi shimwe” miikaha yaHesekiel.—Hesekiel 37:15-17.

Uutumbulilo ‘Efraim’ otawu thaneke shike? Omukwaniilwa gwotango gwomazimo omulongo gokuumbangalantu, Jerobeam, okwa  li a za mezimo lyaEfraim ndyoka lya li tali dhana onkandangala momazimo ngoka. (Deuteronomium 33:13, 17; 1 Aakwaniilwa 11:26) Ezimo ndyoka olya za momwana gwaJosef, Efraim. (Numeri 1:32, 33) Josef okwa li a mono eyambeko lyi ikalekelwa okuza kuhe Jakob. Onkee ano, oshe eleka sho oshipilangi shoka tashi thaneke omazimo omulongo guukwaniilwa tashi ithanwa oshipilangi “shaEfraim.” Pethimbo Hesekiel a ka nyola ehunganeko tali popi kombinga yiipilangi iyali, omazimo omulongo guukwaniilwa waIsraeli oga adhika nale ga tulwa muupongekwa ethimbo ele kAayassur mo 740 K.E.N. (2 Aakwaniilwa 17:6) Onkee ano, oyendji yomAaisraeli pethimbo mpoka oya li yi ihanena mepangelo lyaBabilonia, ndyoka lya li lya pingena po epangelo lyAayassur.

Mo 607 K.E.N., uukwaniilwa womazimo gaali gokuumbugantu owa li wa falwa muupongekwa waBabilonia, tashi vulika pamwe naamboka ya hupile po sho uukwaniilwa wokuumbangalantu wa yi muupongekwa. Aakwaniilwa yomezimo lyaJuda oya li taya pangele omazimo ngaka gaali naayambi oya kala pamwe nago, oshoka oya li haya longo motempeli muJerusalem. (2 Ondjalulo 11:13, 14; 34:30) Onkee ano, oshe eleka sho uukwaniilwa womazimo gaali tawu thanekwa koshipilangi ‘shaJuda.’

Iipilangi mbyoka iyali yopathaneko oya li ya tulwa kumwe uunake? Oya li ya tulwa kumwe sho Aaisraeli ya galukile kuJerusalem ya tungulule otempeli mo 537 K.E.N. Aakalelipo yuukwaniilwa womazimo gaali noyuukwaniilwa womazimo omulongo oya zi mo oshita muupongekwa. Aaisraeli kaya li we ya topoka. (Hesekiel 37:21, 22) Oya li ishewe taya longele Jehova ya hangana. Ehanganitho ndika olya li wo lya hunganekwa komupolofeti Jesaja nosho wo Jeremia.—Jesaja 11:12, 13; Jeremia 31:1, 6, 31.

Oshili ya simana yini kombinga yelongelokalunga lyashili ya tsuwa omuthindo kehunganeko ndino? Oyo ndjoka tayi ti: Jehova ota ka ninga aalongeli ye “oshipilangi shimwe.” (Hesekiel 37:18, 19) Mbela euvaneko ndino lyokuhanganitha olya gwanithwa pethimbo lyetu? Eeno. Tango ehunganeko ndika olya tameke okugwanithwa mo 1919, sho oshigwana shaKalunga shu unganekwa nosha hanganithwa ishewe kashona nakashona. Oonkambadhala dhaSatana dhoku shi topola sigo aluhe odha ponyo.

Pethimbo mpoka, aantu oyendji mboka ya hanganithwa ishewe oya li ye na etegameno lyokuninga aakwaniilwa naayambi megulu pamwe naJesus. (Ehololo 20:6) Pathaneko, oya li ya fa oshipilangi shaJuda. Ihe sho ethimbo lye ende tali humu komeho oyendji mboka ye na etegameno lyoku ka kala kombanda yevi oya tameke okweenda pamwe nAajuda yopambepo. (Sakaria 8:23) Oya fa oshipilangi shaJosef, nokaye na etegameno lyoku ka pangela pamwe naKristus.

Kunena oongundu adhihe mbali otadhi longele kumwe dha hangana dhi li oshigwana shaJehova kohi yOmukwaniilwa gumwe, Jesus Kristus, ngoka a popiwa pahunganeko e li “David.” (Hesekiel 37:24, 25) Jesus okwa li a galikana, opo aalanduli ye ayehe, “ya ninge omuntu gumwe. Tate, naa kale mutse, ongaashi ngoye u li mungame nangame ndi li mungoye.” * (Johannes 17:20, 21) Jesus okwa li a hunganeke wo kutya oshigunda she oshishona shaalanduli ye aagwayekwa nasho otashi “ka ninga oshigunda shimwe” ‘noonzi dhilwe.’ Ayehe otaya ka kala ye na “omusita gumwe.” (Johannes 10:16) Jesus ina hokolola tuu nawa uukumwe wopambepo waapiya yaJehova kunena, kutya nduno oye na etegameno lini lyonakuyiwa!

^ okat. 6 Oshihokithi okutala kelandulathano ndyoka Jesus a longitha sho a popi omathaneko ngoka ga ka ninga oshitopolwa shendhindhiliko lyokukala po kwe. Tango okwa popi kombinga ‘yomumati omwiinekelwa nomunandunge’ nenge yomupiya omudhiginini nomunandunge, okangundu okashona kaagwayekwa mboka taya ka kwatela komeho. (Mateus 24:45-47) Konima okwa gandja omathaneko ngoka taga popi unene kombinga yaamboka ye na etegameno lyokuya megulu. (Mateus 25:1-30) Hugunina okwa popi kombinga yaamboka ye na etegameno lyoku ka kala kombanda yevi, mboka taya ka yambidhidha aamwahe yaKristus. (Mateus 25:31-46) Sha faathana, egwanitho lyehunganeko lyaHesekiel kunena olya tsa omuthindo tango shoka tashi ka ningilwa mboka ye na etegameno lyomegulu. Nonando uukwaniilwa womazimo omulongo itawu thaneke mboka ye na etegameno lyoku ka kala kombanda yevi, ehanganitho ndyoka lya popiwa mehunganeko ndika otali tu dhimbulukitha uukumwe mboka wu li pokati kaamboka ye na etegameno lyoku ka kala kombanda yevi naamboka ye na etegameno lyoku ka kala megulu..