Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2016

‘Omagano gaKalunga gaa shi kutumbulwa’ nage tu inyengithe

‘Omagano gaKalunga gaa shi kutumbulwa’ nage tu inyengithe

“Kalunga na hambelelwe omolwomagano ge gaa shi kutumbulwa.” — 2 AAKORINTO 9:15.

OMAIMBILO: 121, 63

1, 2. (a) Omagano gaKalunga “gaa shi kutumbulwa” oga kwatela mo shike? (b) Otatu ka kundathaneni omapulo geni moshileshwa shika?

JEHOVA okwe tu pe omagano ga shiga ko, ngoka taga holola kutya oku tu hole, sho a tumine Omwana, Jesus, kombanda yevi. (Johannes 3:16; 1 Johannes 4:9, 10) Omuyapostoli Paulus ota ti omagano ngaka ‘kage shi kutumbulwa.’ (2 Aakorinto 9:15) Omolwashike Paulus e ga popi ngawo?

2 Paulus okwa li e shi shi kutya eyambo lyaJesus otali shilipaleke kutya ashihe shoka Kalunga a uvaneka otashi ka gwanithwa. (Lesha 2 Aakorinto 1:20.) Shika otashi ti kutya omagano gaKalunga ngoka “gaa shi kutumbulwa” inaga kwatela mo owala eyambo lyaJesus. Oga kwatela mo wo uuwanawa awuhe nohole yaaluhe ndjoka Jehova he tu ulukile. Omagano ngoka itaga vulu okutumbulwa momukalo moka tatu vulu okuuva ko thiluthilu. Omagano ngaka gi ikalekelwa, oge na oku tu uvitha ngiini? Nongiini ge na oku tu inyengitha, sho tatu ilongekidhile Edhimbuluko lyeso lyaKristus, ndyoka tali ka kala ko mEtitatu, 23 Maalitsa 2016?

 OMAGANO GAKALUNGA GI IKALEKELWA

3, 4. (a) Oho kala wu uvite ngiini ngele owa pewa omagano? (b) Ongiini omagano gi ikalekelwa taga vulu okulundulula onkalamwenyo yoye?

3 Otu hole okupewa omagano. Ihe omagano gamwe otaga vulu okulundulula onkalamwenyo yomuntu, oshoka otaga ti sha nogi ikalekelwa. Pashiholelwa, natu tye ando owa taaguluka ompango, e to pewa egeelo lyeso. Ihe ohaluka omuntu gulwe ngoka waa shi, okwi igandja a geelwe peha lyoye. Oto ka kala wu uvitile ngiini omagano ngaka gi ikalekelwa?

4 Omagano gopahole ngoka gi ikalekelwa otage ke ku ningitha wu lundulule onkalamwenyo yoye. Otashi vulika tage ke ku inyengitha wo wu kale wa hala okugandja nokukala wu hole yalwe shi vulithe nale. Otashi ke ku inyengitha wo wu dhimine po yalwe, mboka ya kala noku ku yemateka. Onkalamwenyo yoye ayihe, oto ka ulika kutya owa pandula omagano ngoka.

5. Omolwashike ekulilo ndyoka Kalunga a gandja, itaali vulu okuyelekwa nomagano galwe?

5 Omagano ngoka ga popiwa moshiholelwa shoka shi li mokatendo ka tetekele, itaga adha mo momagano gekulilo. (1 Petrus 3:18) Dhimbulukwa kutya atuheni otwa thigulula uulunde kuAdam, negeelo lyuulunde mboka olyo eso. (Aaroma 5:12) Jehova okwi inyengithwa kohole a tume Jesus kombanda yevi, “a sile ayehe.” (Aahebeli 2:9) Ihe eyambo lyaJesus olya kwatela mo oshindji. Otali ka hanagula po eso sigo aluhe. (Jesaja 25:7, 8; 1 Aakorinto 15:22, 26) Ayehe mboka yi itaala Jesus otaya ka kala ya nyanyukwa noye na ombili sigo aluhe, kutya nduno oomboka taya ka pangela pamwe naKristus megulu nenge oomboka taya ka pangelwa kUukwaniilwa waKalunga kombanda yevi. (Aaroma 6:23; Ehololo 5:9, 10) Omayambeko ishewe geni ga kwatelwa mo momagano gaJehova?

6. (a) Owa tegelela oku ka mona omayambeko geni, omolwomagano gaJehova? (b) Omagano gaKalunga otage tu inyengitha tu ninge iinima itatu yini?

6 Omolwomagano ngoka Kalunga a gandja, evi otali ka ninga oparadisa, aavu otaya ka aludhwa naasi otaya ka yumudhwa. (Jesaja 33:24; 35:5, 6; Johannes 5:28, 29) Otu hole Jehova nosho wo Omwana omuholike, ‘omolwomagano ngoka gaa shi kutumbulwa.’ Otage ke tu inyengitha tu ninge shike? Otage ke tu inyengitha (1) tu holele Jesus Kristus thiluthilu, (2) tu kale tu hole ooitaali ooyakwetu (3) notu dhimine po yalwe nomutima aguhe.

“OHOLE YAKRISTUS OTAYI TU PANGELE”

7, 8. Otu na okukala tu uvitile ngiini Kristus omolwohole ye, noyi na oku tu inyengitha tu ninge shike?

7 Shotango, otu na okwiinyengithwa tu longithe onkalamwenyo yetu mokusimanekitha Jesus. Omuyapostoli Paulus okwa ti: “Ohole yaKristus otayi tu pangele” nenge otayi tu inyengitha. (Lesha 2 Aakorinto 5:14, 15.) Paulus okwa li e shi shi kutya ngele otwa taamba ko ohole yaJesus, otayi ke tu pangela nenge yi tu inyengithe tu kale tu hole Jesus notwe mu simaneka. Ano ngele otu uvu ko nawa shoka Jehova e tu ningila, ohole ye otayi ke tu inyengitha tu simaneke Jesus. Otatu shi ningi ngiini?

8 Molwaashoka otu hole Jehova, ohole ndjoka ohayi tu inyengitha tu landule oshiholelwa shaJesus, twa landula oshinkoti she thiluthilu. (1 Petrus 2:21; 1 Johannes 2:6) Sho tatu vulika kuKalunga nokuKristus, otatu ulike kutya otu ya hole. Jesus okwa ti: “Kehe ngoka ta taamba omalombwelo gandje nota vulika kugo, oku hole ndje. Tate wo ota kala e hole ngoka e hole ndje, nangame otandi  kala ndi mu hole notandi mu ihololele.” — Johannes 14:21; 1 Johannes 5:3.

9. Ohatu thiminikwa tu ninge shike?

9 Moomwedhi dhEdhimbuluko, onawa tu dhiladhile muule kunkene tatu longitha onkalamwenyo yetu. Onkee ipula to ti: ‘Omiinima yini handi holele nale Jesus? Openi nda pumbwa okuhwepopala?’ Osha simana tu ipule omapulo ngaka, oshoka uuyuni owa hala tu kale twe wu fa. (Aaroma 12:2) Ngele inatu kotoka, otashi vulika tu kale tu uvite twa thiminikwa tu holele aalongi yomuuyuni mbuka, aanamadhina nomanyakwa gomaudhano. (Aakolossa 2:8; 1 Johannes 2:15-17) Ongiini tatu vulu okukondjitha omathiminiko ngoka?

10. Omapulo geni tatu vulu okwiipula moomwedhi dhEdhimbuluko, nomayamukulo gago oge na oku tu inyengitha tu ninge shike? (Tala kethano lyopetameko.)

10 Otashi ka kala shi li nawa ngele pethimbo lyEdhimbuluko otwa konakona oonguwo dhetu, oomuvi, oongalo dhetu nosho wo shoka shi li mookompiuta dhetu, moongodhi dhopeke nomuutableta wetu. Ipula to ti: ‘Ando Jesus opo a li mpano, e ta mono shoka nda zala, mbela otandi kala nda sa ohoni?’ (Lesha 1 Timoteus 2:9, 10.) ‘Mbela oonguwo dhandje otadhi ku ulika ngaa shili kutya ngame omulanduli gwaKristus? Mbela Jesus ota kala ngaa a hala okutala oomuvi ndhoka handi tala? Mbela ota hala ngaa okupulakena koongalo dhandje? Ngele Jesus okwi indile ndje ongodhi nenge okatableta kandje, mbela shoka ta adha mo otashi sitha ndje ohoni? Mbela otashi ka kala oshidhigu ndi yelithile Jesus kutya omolwashike ndi hole okudhana uudhano wontumba wuuvidio?’ Ohole yetu yokuhola Jehova nayi tu inyengithe tu ekelehi oshinima kehe shoka itaashi opalele Omukriste, kutya nduno otashi pula shike. (Iilonga 19:19, 20) Sho twi iyapulile Jehova, otwe mu uvanekele kutya otatu ka longitha onkalamwenyo yetu tu simanekithe Kristus. Onkee ano, inatu pitika nando osha shi tu imbe oku mu holela. — Mateus 5:29, 30; Aafilippi 4:8.

11. (a) Ongiini ohole yetu yokuhola Jehova naJesus tayi tu inyengitha miilonga yokuuvitha? (b) Ohole yetu oyi na oku tu inyengitha ngiini tu kwathele yalwe megongalo?

11 Ohole yetu yokuhola Jesus ohayi tu inyengitha tu uvithe notu longe aantu nuulaadhi. (Mateus 28:19, 20; Lukas 4:43) Mbela ito vulu okuunganeka onkalamwenyo yoye, opo wu kuthe uukwathelikokolindjila moomwedhi dhEdhimbuluko? Oto vulu okulonga oowili 30 nenge 50. Omulumentu gwomimvo 84, ngoka a silwa omukadhi, okwa li e shi ita vulu okukutha uukwathelikokolindjila, omolwoomvula dhe nosho wo uukolele. Ihe aakokolindjila yomoshitopolwa shawo oya li ya hala oku mu kwathela. Oya li haye mu pe olefa, noye mu hogololele oshitopolwa tashi opalele moka ta vulu okulonga. Kungeyi okwa vulu okugwanitha po oowili dhe 30. Mbela ito vulu okukwathela omuntu megongalo lyeni a kuthe uukwathelikokolindjila muMaalitsa nenge muApilili? Eeno, haantu ayehe taya vulu okukokola ondjila, ihe atuhe otatu vulu okulongitha ethimbo lyetu noonkondo dhetu tu longele Jehova shi vulithe nale. Ngele otwe shi ningi, otatu ulike kutya otatu inyengithwa kohole yaJesus, ngaashi Paulus. Ohole yaKalunga otayi tu inyengitha tu ninge ishewe shike?

OTU NA OKUHOLATHANA

12. Ohole yaKalunga otayi tu inyengitha tu ninge shike?

12 Oshitiyali, ohole yaKalunga oyi na oku tu inyengitha tu kale tu hole ooitaali ooyakwetu. Omuyapostoli Johannes okwa nyola a ti: “Ookuume aaholike, Kalunga ngele osho e tu  hole ngeyi, nena natse wo otu na okuholathana.” (1 Johannes 4:7-11) Onkee ngele otwa taamba ko ohole yaKalunga, otu na okuhola ooitaali ooyakwetu. (1 Johannes 3:16) Otatu shi ningi ngiini?

13. Jesus okwe tu tulila po oshiholelwa shini shokuhola ooyakwetu?

13 Oshiholelwa shaJesus otashi tu kwathele tu mone nkene tu na okuhola ooyakwetu. Sho a li kombanda yevi okwa li ha kwathele aantu, unene tuu mboka aaishonopeki. Okwa aludha aavu, iilema, aaposi, oombolo naathitawi. (Mateus 11:4, 5) Jesus ka li a fa aawiliki yomalongelokalunga, oshoka okwa li e hole okulonga aantu mboka ya hala okutseya Kalunga. (Johannes 7:49) Okwa li e hole aantu mboka yi ishonopeka nokwa li a longo nuudhiginini, opo e ya kwathele. — Mateus 20:28.

Ito vulu okukwathela omumwatate nenge omumwameme omukokele muukalele? (Tala okatendo 14)

14. Opo wu ulukile aamwatate ohole, oshike wu na okuninga?

14 Ethimbo lyEdhimbuluko olyo wo ethimbo ewanawa okudhiladhila kombinga yankene to vulu okukwathela aamwatate naamwameme megongalo lyeni, unene tuu mboka aakokele. Mbela ito vulu oku ya talela po? Mbela ito vulu oku ya etela sha shokulya, oku ya kwathela niilonga yomegumbo, oku ya faalela kokugongala nenge okulonga nayo momapya? (Lesha Lukas 14:12-14.) Natu pitike ohole yaKalunga yi tu inyengithe tu ulukile aamwatate ohole.

ULUKILA AAMWATATE NAAMWAMEME OLUKENO

15. Oshike tu na okuzimina?

15 Oshititatu, ohole yaJehova ohayi tu inyengitha tu dhimine po aamwatate naamwameme. Atuheni otwa thigulula uulunde neso kuAdam. Onkee, kapu na ngoka ta vulu okutya “inandi pumbwa ekulilo.” Aapiya yaKalunga aadhiginini nayo oya pumbwa ekulilo. Atuheni otwa dhiminwa po oongunga dhetu. Omolwashike sha simana oku shi zimina? Eyamukulo otatu li adha mulimwe lyomomathaneko gaJesus.

16, 17. (a) Oshike tatu ilongo methaneko lyaJesus lyomukwaniilwa naapiya ye? (b) Sho wa dhiladhila muule kethaneko lyaJesus, owa tokola okuninga shike?

16 Jesus okwa gandja ethaneko kombinga yomukwaniilwa ngoka a dhimina po omupiya gwe oongunga odhindji dhi thike poondenari 60 000 000. Ihe konima omupiya ngoka ina dhimina po omupiya omukwawo ngoka e mu lila oongunga dhi thike owala poondenari 100. Okwa li e na okwiinyengithwa kolukeno ndoka u ulukilwa komukwaniilwa, a vule okudhimina po omupiya omukwawo. Omukwaniilwa sho e shi uvu, oshe mu uvitha nayi sho inaa dhimina po omukwawo oongunga ndhono oonshona. Okwa ti: “Mumati ngoye omwiinayi, oongunga dhoye adhihe onde dhi ku dhimine po, sho wa hehela ndje. Nangoye wo owa li wu na okusila omumati omukweni ohenda, ngaashi ngame nde ku sile ohenda.” (Mateus 18:23-35) Ngaashi omukwaniilwa, Jehova okwe tu dhimina po oongunga odhindji. Ohole nolukeno lwaJehova,  oyi na oku tu inyengitha tu ninge shike?

17 Sho tatu ilongekidhile Edhimbuluko, otashi vulika tu ipule kutya: ‘Mbela ope na omumwatate u uvitha ndje nayi? Mbela oshidhigu kungame oku mu dhimina po?’ Ngele osho, ndjika oyo ompito tayi opalele tu holele Jehova, ngoka i ilongekidha ‘okudhimina po.’ (Nehemia 9:17; Episalomi 86:5) Ngele otwa pandula Jehova omolwolukeno lwe, otatu ka ulukila yalwe olukeno noku ya dhimina po tashi zi komutima. Ngele katu na ohole noitatu dhimine po aamwatate, inatu tegelela Jehova a kale e tu hole nenge e tu dhimine po. (Mateus 6:14, 15) Ngele otatu dhimine po yalwe, itashi ti ando kutya inaye tu yemateka, ihe otashi tu kwathele tu kale twa nyanyukwa monakuyiwa.

18. Ongiini ohole yaKalunga ya kwathele omumwameme gumwe i idhidhimikile okwaagwanenena komumwameme omukwawo?

18 Otashi vulika shi kale oshidhigu okwiidhidhimikila aamwatate naamwameme omolwokwaagwanenena kwawo. (Lesha Aaefeso 4:32; Aakolossa 3:13, 14.) Shika osha ningwa komumwameme Lily. [1] (Tala enyolo lyopehulilo.) Okwa kala ta kwathele omuselekadhi gwedhina Carol. Pashiholelwa, okwa li he mu fala kehe hoka a hala, oku ke mu landela shoka a pumbwa noku mu ningila wo iinima yilwe. Nonando Lily okwe mu ningile ashihe shono, okwa li aluhe ha pewa oombedhi kuCarol, nokasha li oshipu kuye omathimbo gamwe oku mu kwathela. Ihe Lily okwa kala owala a tala komaukwatya omawanawa gaCarol nokwe mu kwathele uule woomvula dhontumba sigo oosho a kwatwa kuuwehame nokwa hulitha. Nonando kasha li oshipu kuLily sho ta kwathele Carol, okwa ti: “Onda tegelela oku ka mona Carol sho ta ka yumuka. Onda hala oku mu tseya uuna a gwanenena.” Osha yela kutya ohole ndjoka Kalunga e tu hole nayo otayi vulu oku tu inyengitha tu idhidhimikile aamwatate naamwameme nokutegamena ethimbo ndjoka uuna okwaagwanenena taku ka hula po sigo aluhe.

19. ‘Omagano gaKalunga kaage shi kutumbulwa’ otage ku inyengitha wu ninge shike?

19 Odhoshili kutya Jehova okwe tu pa ‘omagano kaage shi kutumbulwa.’ Natu kale twe ga lenga aluhe. Ethimbo lyEdhimbuluko olyo ethimbo ewanawa okutedhatedha kiinima ayihe mbyoka Jehova naJesus ye tu ningila. Onkee onawa ohole yawo yi tu inyengithe tu holele Jesus, tu kale tu hole aamwatate noku ya dhimina po tashi zi komutima.

^ [1] (okatendo 18) Omadhina gamwe moshileshwa shika hago gawo.