Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2016

Natu ‘Kaleni tu holathane, oshoka otse aamwayinathana muKristus.’

Natu ‘Kaleni tu holathane, oshoka otse aamwayinathana muKristus.’

“Kaleni mu holathane, oshoka one aamwayinathana muKristus.” — AAHEBELI 13:1.

OMAIMBILO: 72, 119

1, 2. Omolwashike omuyapostoli Paulus a nyolele Aakriste Aahebeli ontumwafo?

MOMUMVO 61, omagongalo muIsraeli ashihe oga li ge na ombili. Nonando pethimbo mpoka omuyapostoli Paulus okwa li mondholongo muRoma, okwa li a tegelela a mangululwe masiku. Timoteus, ngoka a li molweendo lwuutumwa pamwe naye, okwa adhika owala opo a mangululwa. Oya li taya dhiladhila ya ka talele po ooitaali ooyakwawo muJudea. (Aahebeli 13:23) Konima yoomvula ntano, Aakriste yomuJudea, unene tuu mboka ye li muJerusalem, oya li taya ka pumbwa okukatuka neendelelo. Omolwashike mbela? Jesus okwa li a lombwele aalanduli ye kutya uuna ya mono Jerusalem sha kondekwa kaakwiita, naya ye ontuku. — Lukas 21:20-24.

2 Shika osha ningwa konima yoomvula 28, okuza sho Jesus a londodha aalanduli ye. Muule wethimbo ndyoka, Aakriste muIsraeli oya kala aadhiginini nonando oya li ya taalelwa komahepeko nomatidhagano. (Aahebeli 10:32-34) Ihe omuyapostoli Paulus okwa li a hala oku ya longekidhila shoka tashi ka ningwa monakuyiwa. Eitaalo lyawo olya li popepi nokumakelwa keshongo enene lya shiga ko. (Mateus 24:20, 21; Aahebeli 12:4) Oya li ya pumbwa eidhidhimiko nosho wo eitaalo shi vulithe nale, opo ya  vule okuvulika koohapu dhaJesus ndhoka, ya hupithe oomwenyo dhawo. (Lesha Aahebeli 10:36-39.) Jehova okwa nwetha mo omuyapostoli Paulus a nyolele ooitaali ooyakwawo ontumwafo. Ontumwafo ndjoka ngashingeyi ohayi ithanwa ontumwafo ya nyolelwa Aahebeli. Elalakano lyayo oku ya tsa omukumo yi idhidhimikile shoka sha li tashi ka ningwa po.

3. Omolwashike twa pumbwa okukala tu na ohokwe membo lyAahebeli?

3 Tse aapiya yaKalunga kunena, natu kale tu na ohokwe membo ndyoka lyAahebeli. Omolwashike mbela? Omolwaashono natse wo otu li monkalo ya faathana naandjoka Aakriste muJudea ya li muyo. Otu li ‘momathimbo omadhigu,’ moka oyendji yi idhidhimikila omahepeko nomatidhagano. (2 Timoteus 3:1, 12) Ihe nando ongawo, oyendji yomutse otatu nyanyukilwa oonkalo dhi li nawa noitatu tidhaganwa twe ya fa. Onkee ano, ngaashi Aakriste yopethimbo lyaPaulus, natse otwa pumbwa okukala twa tonata. Omolwashike? Omolwaashono masiku eitaalo lyetu otali ka makelwa keshongo enene. — Lesha Lukas 21:34-36.

4. Enyolo lyomumvo 2016 olini, nomolwashike tali opalele?

4 Oshike tashi ke tu kwathela tu ilongekidhile shoka tashi ka ningwa monakuyiwa? Membo lyAahebeli, omuyapostoli Paulus okwa popya mo iinima oyindji mbyoka tayi ke tu kwathela tu koleke eitaalo lyetu. Shimwe shomuyo sha simana otashi adhika mAahebeli 13:1. Otayi tu ladhipike ngeyi: “Kaleni mu holathane, oshoka one aamwayinathana muKristus.” Ovelise ndjoka oya hogololwa yi kale enyolo lyomumvo 2016.

Enyolo lyomumvo 2016: “Kaleni mu holathane, oshoka one aamwayinathana muKristus.” — Aahebeli 13:1

OHOLE YUUMWAYINATHANA OSHIKE?

5. Ohole yuumwayinathana oshike?

5 Ohole yuumwayinathana oshike? Oshitya shOshigreka shoka omuyapostoli Paulus a longitha otashi ti lelalela “okuhola omumwanyoko.” Ohole yuumwayinathana oyo ohole ya kola noya hwama ndjoka hayi kala pokati kaantu yomegumbo limwe nenge pokati kookuume kopothingo. (Johannes 11:36) Ihatu ifetha onga aamwayinathana, ihe tse aamwayinathana shili. (Mateus 23:8) Paulus okwa ti: “Kaleni mu na ohole yaamwayinathana, ne mu lalakanene okusimanekathana.” (Aaroma 12:10) Oohapu ndhoka otadhi ulike nkene ohole yetu yuumwayinathana ya kola. Ohole ndjika yuumwayinathana pamwe nohole ndjoka ya kankamena komakotampango gopaKriste, ohayi kwathele aapiya yaKalunga ya pange uukuume wopothingo noya hangane.

6. Aakriste yashili oyu uvite ko ngiini eityo lyohole yuumwayinathana?

6 Uutumbulilo “ohole yuumwayinathana” ohawu adhika unene miileshomwa yAakriste. Monakuziwa, oshitya “omumwanyoko” kAajuda osha li tashi ulike unene komukwanezimo nomathimbo gamwe okungoka kee li oshilyo shuukwanegumbo. Ihe kasha li sha kwatela mo nando omuntu ngoka kee shi Omujuda. Ihe kutse Aakriste yashili, “omumwameme” okehe gumwe ngoka e li Omukriste gwashili, kashi na nduno mbudhi kutya okwa zi koshilongo shini. (Aaroma 10:12) Jehova okwe tu longa tu holathane ngaashi aamwayinathana. (1 Aatessalonika 4:9) Ihe omolwashike sha simana tu tsikile okuulukilathana ohole yuumwayinathana?

OMOLWASHIKE SHA SIMANA TU KALE HATU ULUKILATHANA OHOLE YUUMWAYINATHANA?

7. (a) Etompelo lya simana lyokuulukilathana ohole yuumwayinathana olini? (b) Etompelo ishewe lini lya simana lyokukoleka ohole yetu yuumwayinathana?

7 Etompelo lya simana lyokuulukilathana ohole yuumwayinathana olyo kutya Jehova oye e tu lombwele tu shi ninge. Itatu vulu okukala tu hole Jehova, ngele katu hole ooitaali  ooyakwetu. (1 Johannes 4:7, 20, 21) Etompelo ekwawo olyo kutya otwa pumbwathana, unene tuu pethimbo tu li muudhigu. Sho omuyapostoli Paulus a nyolele Aakriste Aahebeli ontumwafo, okwa li e shi nongela kutya masiku aantu yamwe otaya ka thiga po omagumbo gawo nosho wo iinima yawo yopaumwene. Jesus okwa kala nokuyelitha nkene ethimbo ndyoka tali ka kala edhigu. (Markus 13:14-18; Lukas 21:21-23) Onkee ano, manga ethimbo ndyoka inaali ya, Aakriste mboka oye na okukoleka ohole yawo. — Aaroma 12:9.

Otwa pumbwa okukoleka ohole yetu yuumwayinathana ngashingeyi, oshoka otashi ke tu kwathela tu idhidhimikile kehe eshongo tashi vulika li tu adhe monakuyiwa

8. Tseni oshike tu na okuninga ngashingeyi manga uudhigu uunene inawu tameka?

8 Uudhigu uunene mondjokonona yaantu masiku otawu ya. (Markus 13:19; Ehololo 7:1-3) Otatu ka pumbwa okuvulika kelondodho ndyoka tali ti: “Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jesaja 26:20) “Momagumbo” moka tamu popiwa otashi vulika omagongalo getu. Hoka oko hatu ka longela Jehova tu li aamwayinathana. Ihe katu na owala okugongala pamwe pandjigilile, oshoka omuyapostoli Paulus okwa dhimbulutha Aakriste Aahebeli kutya naya ladhipikathane yu ulukilathane ohole nokuningilathana uuwanawa. (Aahebeli 10:24, 25) Otwa pumbwa okukoleka ohole yetu yuumwayinathana ngashingeyi, oshoka otashi ke tu kwathela tu idhidhimikile kehe eshongo tashi vulika li tu adhe monakuyiwa.

9. (a) Kunena oompito dhini tu na tu ulukilathane ohole yuumwayinathana? (b) Gandja iiholelwa yankene aapiya yaJehova haya ulukilathana ohole yuumwayinathana.

9 Kunena, otu na oompito odhindji tu ulukilathane ohole yuumwayinathana, manga uudhigu uunene inawu tameka. Aamwatate oyendji oya mona iihuna omolwomakakamo gevi, omafundja, oombepo dhiikungulu, ootsunami nenge iiponga yopaunshitwe. Yamwe oyi idhidhimikila omatidhagano. (Mateus 24:6-9) Opu na wo mboka taya hupu shokadhila, omolwuuyuni mbu tu li wa piyagana. (Ehololo 6:5, 6) Nonando ongawo, sho ngaa aamwatate ye li muupyakadhi, osho ngaa tatu mono oompito odhindji tu ya ulukile ohole. Nonando muuyuni mbuka kamu na ohole, tseni otwa pumbwa okutsikila okuulika ohole yuumwayinathana. (Mateus 24:12) [1] — Tala enyolo lyopehulilo.

ONGIINI TATU VULU OKUTSIKILA OKUULUKILATHANA OHOLE YUUMWAYINATHANA?

10. Otatu ka kundathana kombinga yashike ngashingeyi?

10 Nonando otu na uupyakadhi, ongiini tatu vulu okutsikila okuulukilathana ohole yuumwayinathana? Ongiini tatu vulu okuulika kutya otu na ohole ndjika yuumwayinathana? Konima sho omuyapostoli Paulus a ti “kaleni mu holathane, oshoka one aamwayinathana muKristus,” okwa totomona omikalo odhindji nkene Aakriste ye na oku shi ninga. Natu ka taleni kuhamano dhomudho.

11, 12. Okuyakula aayenda otashi ti ngiini? (Tala kethano lyopetameko.)

 11 “Inamu dhimbwa okutaamba aayenda momagumbo geni.” (Lesha Aahebeli 13:2.) Uutumbulilo “okutaamba aayenda” otawu ti shike? Oshitya shoka omuyapostoli Paulus a longitha otashi ti lelalela “okuulukila mboka kaatu shi olukeno.” Otashi vulika uutumbulilo mboka tawu tu dhimbulukitha Abraham naLot. Aalumentu mboka yaali oyu ulukile aayenda kaaye ya shi olukeno. Hugunina, Abraham naLot oye ke shi dhimbulula kutya aantu mboka oya li aayengeli. (Genesis 18:2-5; 19:1-3) Aakriste Aahebeli oya Ii ya tsuwa omukumo kiiholelwa mbika, opo nayo ya kale taya ulukilathana ohole yuumwayinathana uuna taya yakula aayenda.

12 Ongiini tatu vulu okuyakula yalwe? Otatu vulu okuhiya aamwatate naamwameme komagumbo getu tu lye pamwe nayo nenge tu ladhipikathane. Nonando otashi vulika kaatu shi nawa omutonatelishikandjo gwetu nomukulukadhi gwe, otatu vulu oku ya hiya uuna taya talele po egongalo lyetu. (3 Johannes 5-8) Inatu pumbwa okuteleka iikulya oyindji nenge tu longithe iimaliwa oyindji. Elalakano lyetu okuladhipikathana, ihe haku ya fuula. Natango katu na okuhiya owala mboka taya vulu oku tu galulila sha. (Lukas 10:42; 14:12-14) Shoka sha simanenena osho kutya inatu ipyakidhila unene e tatu dhimbwa okuyakula aayenda.

13, 14. Ongiini tatu vulu okudhimbulukwa “mboka ye li moondholongo”?

13 “Dhimbulukweni mboka ye li moondholongo.” (Lesha Aahebeli 13:3.) Sho omuyapostoli Paulus a nyola ngeyi, okwa li ta popi kombinga yaamwatate mboka ya li mondholongo omolweitaalo lyawo. Paulus okwa pandula egongalo, oshoka olya li lya “hepekwa pamwe noonkwatwa.” (Aahebeli 10:34) Aamwatate yamwe oya li ya kwathele Paulus muule woomvula ndhoka a kala mondholongo, ihe yalwe oya li komahala gokokule. Ongiini ya li taya vulu okukwathela Paulus? Omoku mu kwatela momagalikano gawo. —  Aafilippi 1:12-14; Aahebeli 13:18, 19.

Otatu vulu okugalikanena aamwatate, aamwameme nokuli naanona mboka ye li mondjedhililo muEritrea

14 Kunena, Oonzapo odhindji odhi li mondjedhililo omolweitaalo lyadho. Aamwatate naamwameme mboka haya zi popepi otaya vulu oku ya kwathela moompumbwe dhawo. Ihe yamwe yomutse otu li komahala gokokule noondjedhililo ndhoka. Ihe ongiini tatu vulu oku ya kwathela noku ya dhimbulukwa? Ohole yuumwayinathana otayi tu inyengitha tu ya galikanene twa mana mo. Pashiholelwa, otatu vulu okugalikanena aamwatate, aamwameme nokuli naanona mboka ye li mondjedhililo muEritrea, mwa kwatelwa aamwatate ngaashi Paulos Eyassu, Isaac Mogos nosho wo Negede Teklemariam, mboka ye li natango mondjedhililo pwa pita ngashingeyi oomvula 20.

15. Ongiini tatu vulu okusimaneka ondjokana?

15 “Oondjokana nadhi simanekwe kaantu ayehe.” (Lesha Aahebeli 13:4.) Otatu vulu wo okuulika ohole yuumwayinathana ngele otwa yogoka pamikalo. (1 Timoteus 5:1, 2) Pashiholelwa, ngele otwa hondele nomumwatate nenge nomumwameme, otatu ke mu  ehameka nosho wo aakwanezimo ye. Kungawo, einekelo ndyoka lyi li mokati ketu otali ka yonwa po. (1 Aatessalonika 4:3-8) Dhiladhila wo kombinga yankene omukulukadhi ta ka kala u uvite, ngele okwe shi mono kutya omusamane gwe oha tala omathano giipala. Mbela ota kala ngaa u uvite kutya omusamane gwe oku mu hole nokwa simaneka ondjokana? — Mateus 5:28.

16. Okukala twa gwanenwa otaku tu kwathele ngiini tu ulike ohole yuumwayinathana?

16 Natu kaleni ‘twa gwana naashoka tu na.’ (Lesha Aahebeli 13:5.) Okukala twi inekela Jehova otashi ke tu kwathela tu kale twa gwana naashoka tu na. Ongiini shika tashi vulu oku tu kwathela tu ulike ohole yuumwayinathana? Ngele otwa kala twa gwanenwa kwaashoka tu na, otashi tu kwathele tu kale tu wete kutya Aakriste ooyakwetu oya simana ye vule iimaliwa nenge omaliko. (1 Timoteus 6:6-8) Itatu ka konenena omapuko gawo nenge tu nyenyete kombinga yoonkalo ndhoka tu li mudho. Itatu ke ya sila ondumbo nenge tu kale aanalwiho. Pehala lyaashono, ngele otwa kala twa gwanenwa kwaashoka tu na, otatu kala hatu gandja nehalo ewanawa. — 1 Timoteus 6:17-19.

17. Okukala “tu na omukumo” ohaku tu kwathele ngiini tu ulike ohole yuumwayinathana?

17 “Tu kaleni tu na omukumo.” (Lesha Aahebeli 13:6.) Ngele otwi inekela Jehova otashi tu kwathele tu kale tu na omukumo okwiidhidhimikila omashongo omadhigu. Omukumo ohagu tu kwathele wo tu kale tu na etaloko ewanawa. Naashika ohashi tu kwathele tu ulike ohole yuumwayinathana, tu tse ooitaali ooyakwetu omukumo noku ya hekeleka. (1 Aatessalonika 5:14, 15) Nokuli nopethimbo lyuudhigu uunene, otatu ka vula oku ka kala nomukumo, oshoka otu shi shi kutya  ehupitho lyetu olya hedha popepi. — Lukas 21:25-28.

Otatu ka vula oku ka kala nomukumo, oshoka otu shi shi kutya ehupitho lyetu olya hedha popepi

18. Ongiini tatu vulu okukoleka ohole yetu yokuhola aakuluntugongalo?

18 “Dhimbulukweni aawiliki yeni.” (Lesha Aahebeli 13:7, 17.) Aakuluntugongalo ohaya longitha ethimbo lyawo, taya longo nuudhiginini ye tu kwathele. Uuna tatu dhiladhila kwaashoka haya ningi, ohole yetu otayi koko notatu kala twe ya lenga. Inatu hala nando oku ya yemateka nenge oku ya ningitha ya kale ya lulilwa omolwiilonga yetu. Pehala lyaashono, otwa hala okuvulika kuyo nehalo ewanawa. Kungeyi otatu ulike kutya otwe ‘ya simaneka notu ya hole, omolwoshilonga shoka taye shi longo.’ — 1 Aatessalonika 5:13.

Mbela owa lenga ngaa iilonga mbyoka aakuluntugongalo haye tu longele? (Tala okatendo 18)

SHI NINGENI SHI VULITHE NALE

19, 20. Ongiini tatu vulu okuulika ohole yuumwayinathana shi vulithe nale?

19 Oshigwana shaJehova osha tseyikila ohole yawo yuumwayinathana. Shika osho wo sha li nopethimbo lyaPaulus. Ihe nando ongaaka, okwa tsu ooitaali ooyakwawo omukumo ye shi ninge shi vulithe nale. Okwa ti: “Otatu mu indile, mu shi ninge mu vule shito.” (1 Aatessalonika 4:9, 10) Osha yela kutya aluhe otu na mpoka twa pumbwa okuhwepopala.

20 Onkee ano, oshikando kehe tatu lesha enyolo lyokomumvo mIinyanga yetu yUukwaniilwa omumvo nguka, natu dhiladhile muule komapulo taga landula: Ongiini tandi vulu okuyakula aayenda shi vulithe nale? Ongiini tandi vulu okukwathela ooitaali mboka ye li moondholongo? Mbela onda simaneka ngaa ondjokana? Oshike tashi vulu okukwathela ndje ndi kale nda gwanenwa lela naashoka ndi na? Ongiini tandi vulu okwiinekela Jehova shi vulithe nale? Ongiini tandi vulu okuvulika kwaamboka taya wilike shi vulithe nale? Ngele otwa kambadhala okuhwepopala momikalo ndhika hamano, otashi ti enyolo lyokomumvo itali ka kala osima yowala. Otali ke tu dhimbulukitha tu vulike koohapu dhaPaulus ndhoka tadhi ti: “Kaleni mu holathane, oshoka one aamwayinathana muKristus.” — Aahebeli 13:1.

^ [1] (okatendo 9) Opo wu mone iiholelwa yankene Oonzapo dhaJehova hadhi ulike ohole yuumwayinathana uuna pwa holoka oshiponga, tala okavidio “Ooitaali ooyakwetu yomuuyuni awuhe.”