Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo yokukonakonwa  |  Febuluali 2017

 ONDJOKONONA

Otwa mono esilohenda lyaKalunga momikalo odhindji

Otwa mono esilohenda lyaKalunga momikalo odhindji

ONDA valwa kutate Arthur. Sho a li omugundjuka, okwa li ha tila Kalunga nokwa li a hala okuninga omuwiliki mongeleka yaMetodiste. Ihe omadhiladhilo ge oga lunduluka sho a lesha oshileshomwa shaakonakonimbiimbeli e ta tameke okweendathana nayo. Okwa ninginithwa mo 1914 sho e na omimvo 17. Sho Iita Yotango yUuyuni ya tameke, okwa pulwa a ye miita. Sho a li inaa hala okukutha ombinga miita, okwa tokolelwa ondholongo yoomwedhi omulongo moKingston Penitentiary, mOntario, moKanada. Tate sho a mangululwa, okwa yi miilonga yethimbo lyu udha yuukokolindjila.

Momumvo 1926 Arthur Guest okwa hokana Hazel Wilkinson, ngoka yina a li i ilongo oshili mo 1908. Onda valwa mo 24 Apilili 1931. Otwa valwa tu li yane, ngame omutiyali kevalo. Okulongela Jehova okwa li oshinima sha simana maandjetu. Tate okwa li e hole Ombiimbeli nokwe yi simaneka. Okwe tu longo wo tu kale twe yi simaneka. Otwa li hatu uvitha aluhe egumbo negumbo tu li uukwanegumbo. —  Iil. 20:20.

INANDI KUTHA OMBINGA MIITA, IHE ONDA KOKOLA ONDJILA NDA FA TATE

Iita Iitiyali yUuyuni oya tameke mo 1939. Momumvo gwa ka landula ko iilonga yOonzapo dhaJehova oya li yi indikwa moKanada. Aanona koosikola oya li ye na okusalutila epandela nokwiimba eimbilo lyopashigwana. Ngame nomumwamemekadhona gwosheeli, Dorothy, otwa li hatu tidhwa mo mongulu pethimbo tali imbwa. Onda li nda kumwa sho esiku limwe omulongi gwetu a sitha ndje ohoni sho u ula ndje ekatalume. Osikola sho ya piti mo, aanasikola ooyakwetu oyendji oya li ya sheke ndje e taya dhenge ndje. Ihe shoka osha li owala sha koleke etokolotoko lyandje lyokukala handi ‘vulika kuKalunga, ihe hakaantu’ — Iil. 5:29.

MuJuli 1942, sho ndi na omimvo 11, onda ninginithilwa motenga yomeya pofaalama. Onda li ndi hole okukokola ondjila momafudho, (uukwathelikokolindjila). Omumvo gumwe onda yile pamwe naamwatate yatatu tu ka uvithile aantu mboka haya longo iilonga yokuteta  omiti, haya kala moshitopolwa shoka hashi longwa omalupita shi li muumbangalantu waOntario.

Onda ningi omukokolindjila me 1 Mei 1949. Molwaashoka oshitayimbela osha li shi ipyakidhila niilonga yokutunga, onda pulwa ndi ka kwathele hoka, nonda ningi oshilyo shuukwanegumbo waBetel moKanada me 1 Desemba. Onda li handi longo moshinyanyangidho nondi ilongo okulongitha eshina lyokupilinta. Iiwike yimwe onda li handi longo uusiku, tandi pilinta uufo mboka tawu popi kombinga yiimoniwa yomahepeko goshigwana shaJehova moKanada.   

Konima yethimbo, sho nda li tandi longo mOshikondo shIilonga, onda pulapula aakokolindjila mboka ya talele po oshitayimbelewa, taya ka longela koQuebec, hoka kwa li omapataneko ga kwata miiti. Gumwe gwomaatalelipo okwa li Mary Zazula, a za koEdmonton, Alberta. Molwaashoka ye nomumwayinamati omukuluntu, Joe, oya tindi okweetha po okukonakona Ombiimbeli, oya tidhwa mo megumbo kaavali yawo mboka ya li iilyo yongeleka yaOrthodox. Ayehe oya ninginithwa muJuni 1951, nokonima yoomwedhi hamano, oya tameke okukokola ondjila. Pethimbo lyomapulapulo, onda li nda kuminwa uupambepo waMary. Ondi ipopile nda ti: ‘Ngele inapu enda sha sha puka, nguno otashi vulika oye omukadhona tandi ka hokana.’ Otwa hokana konima yoomwedhi omugoyi mo 30 Januali 1954. Konima yoshiwike shimwe, otwa li twa hiwa tu ka dheulilwe iilonga yuutonatelishikandjo, nokonima yomimvo mbali dha ka landula otwa longo tu li aatonatelishikandjo muumbangalantu waOntario.

Iilonga yokuuvitha sho ye ende tayi tamunuka mo, opwa li pwa pumbiwa aatumwa oyendji. Ngame naMary otwa dhiladhila kutya manga ngaa tatu vulu okwiidhidhimikila onkalo yombepo pethimbo lyuutalala noomwe pethimbo lyokwenye moKananda, otatu vulu okwiidhidhimikila onkalo kehe pamwe mpoka tatu tumwa. MuJuli 1956, otwa piti mongundu 27 yOsikola yaGilead. MuNovomba omumvo ogwo tuu ngono otwa tumwa tu ka longele koBrazilia.

IILONGA YUUTUMWA MOBRAZILIA

Sho twa thiki koshitayimbelewa moBrazilia, otwa tameke okwiilonga elaka lyOshiputu. Konima sho twi ilongo iitya mbyoka iipu yokutameka oonkundathana nokwiilonga momutse nkene tu na okugandja oshifo melaka ndyoka, otwa yi momapya. Otwa tokola kutya ngele otwa mono omuntu tu ulike ohokwe, otatu mu leshele omanyolo ngoka taga popi nkene onkalamwenyo tayi ka kala kohi yUukwaniilwa waKalunga. Esiku lyetu lyotango momapya, otwa tsakaneke omukiintu gumwe ta pulakene nawa. Otwe mu leshele Ehololo 21:3, 4. Opo tu li po, onda kambuka, molwaashoka olutu lwandje kalwa li lwi igilila onkalo ya pupyala noyamuka. Shika osha kala oshidhigu kungame.

Otwa longo tu li aatumwa moshilandopangelo Campos moka ngashingeyi mu na omagongalo 15. Sho twa thiki moshilandopangelo moka, kamwa li egongalo, ihe okangundu owala kaauvithi nosho wo egumbo lyaatumwa mu na omwaameme yane: Esther Tracy, Ramona Bauer, Luiza Schwarz naLorraine Brookes  (ngoka ngashingeyi hi ithanwa Wallen). Iilonga yandje megumbo lyaatumwa oya li okuyoga noku ka tyaya. Ongulohi yimwe yOmaandaha konima yekonakono lyetu lyOshungolangelo, otwa talelwa po komuyenda ngoka twa li inatu tegelela. Omukadha ndje okwa li ta thuwa po moshipundi shetyofa manga twa li tatu popi iilonga yesiku ndyoka nkene ye ende. Sho a yelutha ko omutse gwe koshigwilo, kohi yasho okwa zi eyoka ndyoka lya li tali homa muule sigo nde li dhipaga.

Sho nda mana okwiilonga Oshiputu muule womumvo gumwe, onda ningi omutonatelishikandjo. Momukunda moka twa kala, kaamu na olusheno, notwa li hatu lala pemate nohatu ende mokatemba taka hilwa koonkambe. Inatu kala tu na iinima oyindji yopamaliko. Uuna tu na oshikonga shokugandja uunzapo kiitopolwa mbyoka ihaayi longwa aluhe, ohatu yi neshina kondoolopa yi li koondundu notwa li hatu kala mondunda hayi futilwa yi li megumbo enene. Oshitayimbelewa osha li she tu tumine iifo 800 tu longithe muukalele. Otwa li twa yi kopoosa lwiikando oyindji tu ka tale iipakete yiifo mbyoka, opo tu yi ete kehala hoka twa kala.

Mo 1962, Osikola yUukalele wUukwaniilwa oya li ya ningwa miitopolwa yi ili noyi ili moBrazilia, ya ningilwa aamwatate naamwameme aatumwa. Onda tumwa ndi ka kwatele komeho oosikola dhi ili nodhi ili uule woomwedhi hamano, kaandi li nomukulukadhi gwandje Mary. Onda gandja ootundi dhoosikola ndhoka moManaus, Belém, Fortaleza, Recife nomoSalvador. Ondu unganeke oshigongi shoshitopolwa shoka sha li sha ningilwa mehala lyokudhanena iinyandwa lya tseyika nawa moManaus. Omvula onenenene oya li ya nyateke omeya gokunwa noye tu thigi kaatu na ehala ewanawa moka tamu lile aamwatate naamwameme pethimbo lyoshigongi. (Pethimbo mpono, piigongi opwa li hapu gandjwa iikulya.) Onda popi nomunambelewa gumwe omukuluntu gwaakwiita omunambili noku unganeke nawa, opo aantu ayehe poshigongi ya pewe omeya gokunwa e ta lombwele aakwiita ye tu dhikile po ootenda mbali oonene dhi kale elugo lyetu nosho wo ehala lyetu lyokulila.

Sho nda za po, Mary okwa li hu uvitha moshitopolwa shomalandithilo gAaputu, moka aantu ya li owala ye hole okupopya unene kombinga yiimaliwa. Ina vula okutameka oonkundathana dhOmbiimbeli nomuntu nando ogumwe, onkee ano, okwa li a lombwele Aabetel yamwe a ti: “Inandi hala nando okukala moPortugal.” Konima yokupopya oohapu ndhoka, otwa mono ontumwafo tayi tu hiya tu ka longele koPortugal. Pethimbo mpoka, iilonga yetu yokuuvitha oya li yi indikwa mo, ihe ehiyo otwe li taamba ko owala, nonando Mary okwa li a kumwa.

IILONGA YETU MOPORTUGAL

Otwa thiki moLisbon, moPortugal muAuguste 1964. Aamwatate oyo unene ya li haya hepekwa kaapolisi yomonanguwi moPortugal (PIDE). Omolwonkalo ndjono, otwa li twa hala kaatu hambelelwe sho tatu thiki mo, nokaatu ninge ekwatathana nOonzapo  dhamo. Otwa li hatu kala mondunda hayi futilwa yi li megumbo enene sho twa li twa tegelela oovisa dhetu. Konima sho twe dhi mono, otwa ka kala mehala hatu li futile. MuJanuali 1965, otwa li twa kwatathana noshitayimbelewa. Otwa li twa nyanyukwa sho twa li ishewe tatu vulu okuya kokungongala hoka twa ninga oomwedhi ntano inaatu ku mona.

Otwa mono kutya aapolisi oya li haye tu kongo esiku kehe momagumbo gaamwatate. Okugongala okwa li haku ningilwa momagumbo gopaumwene, molwaashoka Iinyanga yUukwaniilwa oya li ya patwa. Oonzapo odhindji odha li dha falwa kopolisi dhi ka pulapulwe. Aamwatate oyo unene ya li yu ungaungwa nayo nonyanya, opo ya popye omadhina gaamwatate mboka haya kwatele komeho okugongala. Oshizemo, opo aamwatate yi igamene, oye etha po okwiiyithana komadhina gawo ngaashi, José nenge Paulo, e taya kala owala taya longitha omadhina goohe. Atuhe osho twa li twa ningi.

Okugandja iikulya yopambepo kaamwatate oko kwa li oshinima sha simana kutse. Mary okwa li ha nyanyangidha Oshungolangelo yokukonakonwa nosho wo iileshomwa yilwe, ta longitha ombapila ndjoka ya li hayi longithwa okuningila aamwatate ookopi odhindji.

OKUPOPILA ONKUNDANA OMBWANAWA MOMPANGU

MuJuni 1966 moLisbon omwa li mwa ningwa oshipotha oshinenenene. Iilyo ayihe 49 yegongalo lyaFeijó oya pangulwa, molwaashoka ya li hayi ningile okugongala megumbo lyopaumwene, oshinima shoka sha li shi indikwa. Opo twi ilongekidhile omahepeko, onda li ndi iningitha nda fa ongame omutamaneki gwaamwatate. Otwa li tu shi kutya itatu ka sindana po oshipotha shoka, ihe otwa mono kutya otashi ka gandja uunzapo uunene. Ngoka e tu pangula okwa li a totha nokuli nuulaadhi moohapu dhaGamaliel gwomethelemimvo lyotango. (Iil. 5:33-39) Iikundaneki oya kundaneke oshikoya shoka, na aamwatate naamwameme oya li ya kalekwa mondjedhililo uule womasiku 45 sigo oomwedhi ntano netata. Otwa nyanyukwa okupopya kutya omupanguli ngoka a li te tu pangula okwa taamba ko nomwenyo aguhe ekonakonombiimbeli nokwa li ha kala pokugongala manga inaa sa.

MuDesemba 1966 onda li nda langekwa po ndi li omutonateli gwoshitayimbelewa, nonda kala ethimbo olindji handi ungaunga niinima yopaveta. Otwa li twa ningi ngaashi tatu vulu, opo elongelokalunga lyOonzapo dhaJehova li totululwe. (Fil. 1:7) Mo 18 Desemba 1974, elongelokalunga lyOonzapo dhaJehova olya li lya pitikwa li kale po paveta. Omumwatate Nathan Knorr naFrederick Franz, ya za koombelewa oonene, oya li ya talele po moPortugal. Oya ningi oshigongi shoka kaashi shi okudhimbiwa moOporto nomoLisbon, nosha li sha kalwa kaantu 46 870.

Jehova okwa li a ningitha iilonga yokuuvitha yi tamunuke mo muutuntu owundji moka hamu popiwa Oshiputu ngaashi: Azores, Cape Verde, Madeira, São  Tomé nomoPríncipe. Sho omwaalu gwOonzapo gwe ende tagu koko opwa li pwa pumbiwa oshitayimbelewa oshinene, nosha tungwa 1988. Mo 23 Apilili 1988, omumwatate Milton Henschel, okwa gandja oshipopiwa sheyapulo, nopwa li pwa kalwa kaantu ye li 45 522. Osha li wo tashi nyanyudha okukala pamwe naamwatate naamwameme 20 mboka ya li nale aatumwa moPortugal poshiningwanima sha simanene mondjokonona.

OTWA MONA UUWANAWA MIIHOLELWA YUUDHIGININI YAAPIYA YAJEHOVA

Okweendathana naamwatate naamwameme aadhiginini uule womimvo odhindji dha ka pita, okwe tu etela enyanyu enene monkalamwenyo. Ondi ilonga iiyilongomwa ya simana sho nda li te kwathele omumwatate Theodore Jaracz manga a li ta talele po oshitayimbelewa. Oshitayimbelewa shoka twa li twa talele po osha li sha taalelwa kuupyakadhi uunene. Iilyo yOkomitiye yOshitayimbelewa oya li ya ningi ngaashi tayi vulu shi na ko nasha nuupyakadhi mboka. Omumwatate Jaracz okwa li e yi ladhipike a ti: “Ngaashingeyi etheni nduno ombepo ondjapuki yi longe iilonga yayo.” Ngame nanekulu lyandje sho twa li twa talele po koBrooklyn omimvo odhindji dha ka pita, ongulohi yimwe ngame naamwatate yalwe otwa tokelwa nomumwatate Franz. Sho a pulwa a tye sha kombinga yokulongela kwe Jehova omimvo odhindji, Omumwatate Franz okwa ti: “Otandi mu ladhipike owala kutya kaleni mehangano lyaJehova liwetike, momathimbo omawanawa nomawinayi. Olyo owala tali longo iilonga mbyoka Jesus a li a lombwele aalongwa ye ya longe, iilonga yokuuvitha onkundana ombwanawa yUukwaniilwa.”

Ngame nanekulu lyandje otwa li tu yi hole. Ohatu nyanyukilwa omatalelopo agehe ngoka twa li twa ningi miitayimbelewa nohatu ga dhimbulukwa. Omatalelopo ngoka ohage tu pe ompito tu ulike olupandu lwetu lwokulonga pamwe naagundjuka nosho wo naakokele miilonga yaJehova. Ohatu ya ladhipike wo ya tsikile niilonga yawo yokulongela Jehova.

Opwa pita omimvo odhindji, nongashingeyi otu na omimvo omilongo hetatu nasha. Mary ota kondjo nuupyakadhi owundji wu na ko nasha nuukolele. (2 Kor. 12:9) Uudhigu owa koleke eitaalo lyetu nowe tu kwathele tu kakatele uudhiginini wetu. Ngele tatu dhiladhila komimvo adhihe ndhoka twa kala tatu longele Jehova, otwa mona kutya Jehova okwe tu sila ohenda momikalo odhindjidhindji. *

^ okat. 29 Omumwatate Douglas Guest okwa si omudhiginini kuJehova, mo 25 Kotoba 2015, manga oshitopolwa shika sha li tashi longekidhwa.