Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2017

Elalakano lyaJehova otali ka gwanithwa!

Elalakano lyaJehova otali ka gwanithwa!

‘Shoka Jehova a dhiladhila naashoka a popi, otashi otashi ka gwanithwa.’ — JES. 46:11.

OMAIMBILO: 25, 18

1, 2. (a) Jehova okwe tu hololela shike? (b) Euvaneko lini tali adhika muJesaja 46:10, 11; 55:11?

OOHAPU dhopetameko lyOmbiimbeli dha yela nawa nodha simana otadhi ti: “Petameko Kalunga okwa shiti egulu nevi.” (Gen. 1:1) Ohatu uvu ko owala iinima iishona mbyoka Kalunga a shita, ngaashi ewangandjo, uuyelele noonkondo dhevi. Otwa mona owala iinima iishona yomwaambyoka Jehova a shita. (Omuuv. 3:11) Ihe nonando ongawo, Jehova okwe tu hololela elalakano lye li na ko nasha nevi nosho wo naantu. Evi olya li li na okukala egumbo lyaalumentu naankiintu ya shitwa oshifetha shaKalunga. (Gen. 1:26) Oya li taya ka kala oyana yaJehova, na Jehova okwa li ta ka kala He yawo.

2 Ngaashi sha yelithwa montopolwa ontitatu yaGenesis, elalakano lyaJehova olya li lya piyaganekwa. (Gen. 3:1-7) Ihe kapu na uupyakadhi mboka Jehova itaa vulu okukandula po. Kapu na omuntu ta vulu okuya Jehova moshipala kaa gwanithe po elalakano lye. (Jes. 46:10, 11; 55:11) Onkee ano, otatu vulu okukala nuushili kutya elalakano lyaKalunga lyopetameko otali ka gwanithwa lela pethimbo.

3. (a) Oshili yini ya simana ye tu kwathela tu uve ko etumwalaka lyOmbiimbeli? (b) Omolwashike tatu kundathana omalongo ngoka ngashingeyi? (c) Omapulo geni tatu ka kundathana?

3 Kapu na omalimbililo kutya otu shi oshili kombinga yelalakano  lyaKalunga li na ko nasha nevi naantu nosho wo nonkandangala ndjoka Jesus Kristus ta dhana mulyo. Iinima mbika oyo oshili yopaMbiimbeli ya simanenena ndjoka tashi vulika twi ilonga tango sho twa tameka okukonakona Oohapu dhaKalunga. Natse otwa hala okukwathela aanamitima omiwanawa ya tseye omalongo ngaka ga simanenena. Sho tatu kundathana oshitopolwa shika tu li egongalo, otwa hala okuhiya aantu oyendji ngaashi tashi vulika kEdhimbuluko lyeso lyaKristus. (Luk. 22:19, 20) Mboka taya ka kala po otaye ki ilonga oshindji kombinga yelalakano lyaKalunga. Onkee ano, sho kwa hupa omasiku omashona edhimbuluko li ningwe, ndika olyo ethimbo ewanawa okudhiladhila komapulo gontumba ngoka tatu vulu okulongitha tu ladhipike aakonakonimbiimbeli yetu nosho wo yalwe ye ye ya kale po poshiningwanima shika sha simana. Otatu ka kundathana omapulo gatatu taga landula: Elalakano lyaKalunga lyopetameko li na ko nasha nevi nosho wo naantu olini? Epuko lini lya holoka po? Omolwashike ekuliloyambo lyaJesus lye shi ningi tashi wapa, opo elalakano lyaKalunga li gwanithwe?

ELALAKANO LYOMUSHITI LYOPETAMEKO OLYA LI LINI?

4. Ongiini eshito tali holola esimano lyaJehova?

4 Jehova oye Omushiti a dhenga mbanda. Kehe shimwe shoka a shita oshiwanawa lela. (Gen. 1:31; Jer. 10:12) Oshike tatu vulu okwiilonga kuuwanawa nokelandulathano ndyoka tu wete meshito? Uuna tatu tala keshito, ohashi tu kumitha sho tu wete iinima mbyoka Jehova a shita, iishona niinene, hayi tu etele uuwanawa. Olye ihaa kuminwa ekitakano lyoosele dhomolutu lwomuntu, kokahanona opo ka valwa nenge kokuningina kwetango taku monika nawa? Otwa simaneka iishitwa mbika, molwaashoka Jehova okwe tu shita hatu vulu okumona shoka oshiwanawa lela. —  Lesha Episalomi 19:1; 104:24.

5. Jehova okwa ninga po shike, opo eshito lye alihe lyi longele kumwe nawa?

5 Omolwohole ye Jehova okwa tulila po ongamba kehe shimwe meshito lye. Jehova okwa tula po oompango dhopaunshitwe nodhopamikalo, opo a shilipaleke kutya iinima ayihe meshito otayi longele kumwe. (Eps. 19:7-9) Onkee ano, iinima ayihe mewangandjo oyi li pomahala gayo nohayi longo melandulathano ndyoka Jehova e yi tula. Jehova okwa tula po elandulathano nkene eshito lye li na okulongela kumwe. Ompango yoonkondo dhevi ohayi kaleke onkalombepo popepi nevi nosho wo nefuta. Ohayi kwathele wo iinima mbyoka yi li kombanda yevi yi kale yi na omwenyo. Iishitwa ayihe, mwa kwatelwa aantu ohayi inyenge nokulonga meni lyoongamba ndhika. Osha yela kutya elandulathano ndyoka li li meshito otali holola kutya Kalunga oku nine evi naantu elalakano lyasha. Mbela otatu vulu ngaa okupopya naantu muukalele kombinga yelandundulathano lyomeshito ndyoka ekumithi? —  Eh. 4:11.

6, 7. Omagano gamwe geni Jehova a li a pe Adam naEva?

6 Elalakano lyaJehova lyopetameko olya li aantu ya kale nomwenyo sigo aluhe kombanda yevi. (Gen. 1:28; Eps. 37:29) Kalunga okwa li a pe Adam naEva omagano gi ili nogi ili ga dhenga mbanda ngoka ge ya kwathele ya vule okunyanyukilwa onkalamwenyo. (Lesha Jakob 1:17.) Jehova okwe ya pe emanguluko lyokuninga omatokolo, okudhiladhila pandunge, okukala ye na ohole nokupanga uukuume. Omushiti okwa li a popi naAdam nokwe mu lombwele nkene ta vulu okuulika uudhiginini we. Adam okwa li wo i ilongo nkene ta vulu okusila oshimpwiyu oompumbwe dhe nankene ta vulu okusila oshimpwiyu iinamwenyo nosho wo evi. (Genesis 2:15-17, 19, 20) Jehova okwa li wo a shiti Adam naEva haya vulu okulola, okuguma, okumona, okuuva nosho wo okunika. Onkee ano, oya li taya vulu okunyanyukilwa  omwenyo sigo aluhe moparadisa ombwanawa. Aantu yotango, oya li ya nyanyukilwa iilonga yawo nosho wo okukonakona iinima iipe sigo aluhe.

7 Oshike ishewe sha li sha kwatelwa mo melalakano lyaKalunga? Jehova okwa li a shiti Adam naEva taya vulu okumona aanona ya gwanenena. Kalunga okwa li a hala oyana nayo ya mone aanona, sigo yu udha evi alihe. Okwa li a hala Adam, Eva naavali ayehe mboka ye ya landula ya kale ye hole oyana, ngaashi Jehova a li e hole oyana ya gwanenena yopetameko. Evi olya li li na okukala egumbo lyawo lyaaluhe mwa kwatelwa noonzo dhalyo. —  Eps. 115:16.

EPUKO LINI LYA HOLOKA PO?

8. Ompango ndjoka tayi adhika muGenesis 2:16, 17 oya li ya gandjwa nelalakano lyashike?

8 Iinima kaya li ye ende nawa ngaashi Kalunga a li a hala. Omolwashike mbela? Jehova okwa li a pe Adam naEva ompango ompu ndjoka tayi ya kwathele ya tseye kutya emanguluko lyawo olya hulila peni. Okwe ya lombwele a ti: ‘Lyeni komiti a dhihe meyana, kakele komuti gwokutseya uuwanawa nuuwinayi. Iiyimati yomuti ngoka inamu yi lya; ngele omwe shi ningi, otamu si shili.’ (Gen. 2:16, 17) Kasha li oshidhigu kuAdam naEva okuuva ko ompango ndjika, niishewe kasha li oshidhigu okuvulika kuyo, molwaashoka oya li ye na iikulya ya gwana.

9, 10. (a) Iifundja yini Satana a popi kombinga yaJehova? (b) Adam naEva oya li ya tokola okuninga shike? (Tala kethano lyopetameko.)

9 Satana Ondiyapoli, okwa li a longitha eyoka li pukithe Eva kaa vulike kuHe, Jehova. (Lesha Genesis 3:1-5; Eh. 12:9) Satana okwa li a pula ngele Adam naEva oya pitikwa okulya “komiti adhihe dhomeyana.” Satana okwa fa a li ta ti: ‘Tashi ti itamu vulu okuninga shoka mwa hala?’ Hugunina, okwa li a popi iifundja iitokele a ti: “Itamu si shili.” Opo ihe okwa li a kambadhala okwiitalitha Eva kutya ina pumbwa okupulakena kuKalunga, sho e mu lombwele a ti: “Kalunga okwa tseya kutya uuna tamu li ko, omeho geni otaga tonata.” Satana okwa li a ti kutya Jehova ina hala Adam naEva ya lye oshiyimati, molwaashoka ngele oye shi ningi omeho gawo otaga ka tonata. Niishewe, Satana okwa li a ningi euvaneko lyiifundja a ti: ‘Otamu fe Kalunga mokutseya uuwanawa nuuwinayi.’

10 Adam naEva oya li ye na okutokola shoka ye na okuninga. Mbela oya li taya ka vulika kuJehova, nenge oya li taya ka pulakena keyoka? Oya li ya tokola okwaavulika kuKalunga. Sho ye shi ningi, oya landula Satana. Oye ekelehi Jehova e li He yawo, kungawo oyi itopola ko kuye noina kala we e li omugameni gwawo. —  Gen. 3:6-13.

11. Omolwashike Jehova ini idhidhimikila okwaavulika kwaAdam naEva?

11 Adam naEva sho inaaya vulika kuJehova, oya kanitha egwaneneno. Okwaavulika kwawo okwe ya fala mokukala kaaye na ekwatathano naJehova, molwaashoka ‘omeho ge omayapuki unene nokutala uuwinayi.’ Onkee ano, Jehova ka li ta “vulu nando okwiidhidhimikila okutala aantu taa eta eyonuko.” (Hab. 1:13) Ando okwi idhidhimikilile uuwinayi, ando osha tula onkalonawa yiishitwa ye ayihe yomegulu noyokombanda yevi moshiponga. Oshikwawo, ando okwa li inaa ninga po sha, shi na ko nasha nuulunde waAdam naEva, ando iishitwa ye oya kala inaayi mu inekela we. Jehova oku li omudhiginini komithikampango dhe, noke na nando esiku e dhi yone. (Eps. 119:142) Ano emanguluko lyokuninga omatokolo kalya li lya pe Adam naEva uuthemba wokukala itaaya simaneke ompango yaKalunga. Sho inaya vulika kuJehova, oya si noya shuna montsi yevi moka ya zile. —  Gen. 3:19.

12. Oshike sha li sha ningilwa oyana yaAdam?

12 Sho Adam naEva ya li oshiyimati, oyi itula yo yene pondondo mpoka itaaya vulu we okukala ye li iilyo yuukwanegumbo waKalunga  womeshito alihe. Kalunga okwe ya tidha mo muEden, nokaya li we ye na etegameno lyokushuna mo. (Gen. 3:23, 24) Jehova sho e ya tidha mo, okwe etha ya mone iilanduliko yetokolo lyawo. (Lesha Deuteronomium 32:4, 5.) Oya kala inaaya gwanenena we nokaya li we taya vulu okukala ye na omaukwatya ga fa gaKalunga thiluthilu. Adam ka li owala i ikanithile ye mwene onakuyiwa ombwanawa, ihe okwa taambekidha wo okwaagwanenena, uulunde neso koyana. (Rom. 5:12) Okwi imbi oluvalo lwe lu kale nonkalamwenyo yaa na ehulilo. Niishewe, Adam naEva nosho wo oyana kaya li we taya vulu okumona aanona ya gwanenena. Okuza sho Adam naEva ya pilamene Kalunga, Satana Ondiyapoli okwa tsikile okukala ta pukitha aantu sigo okunena. —  Joh. 8:44.

EKULILOYAMBO OLYE SHI NINGI TASHI WAPA TU KALE TU NA UUKUUME NAKALUNGA

13. Jehova okwa hala aantu ya ninge shike?

13 Kalunga aantu oku ya hole natango. Kakele kokwaavulika kwaAdam naEva, Jehova okwa hala aantu ya nyanyukilwe ekwatathano ewanawa naye. Ina hala nando ogumwe gwomuyo a se. (2 Pet. 3:9) Onkee ano, konima owala yokwaavulika hoka, Kalunga okwa ningi po elongekidho, opo aantu ya vule okukala ishewe ye na uukuume naye notaya dhiginine omithikampango dhe dhi li pauyuuki. Mbela shoka okwa li e shi ningi ngiini?

14. (a) PaJohannes 3:16, Kalunga okwa ningi po elongekidho lini, opo aantu ya vule okumona omwenyo gwaaluhe? (b) Epulo lini tashi vulika tu kundathane naamboka ye na ohokwe?

14 Lesha Johannes 3:16. Yamwe mboka hatu hiya kEdhimbuluko otashi vulika ye shi ovelise ndjika momutse. Ihe opu na epulo ndika: Ekuliloyambo lyaJesus olye shi ningi ngiini tashi wapa, opo aantu ya vule okumona omwenyo gwaaluhe? Oshikonga shokuhiya aantu kEdhimbuluko, Edhimbuluko lyo lyene nosho wo omaishunoko ngoka tatu ka ninga kwaamboka ya li pulyo, otashi vulika tayi tu pe ompito yokukwathela mboka taya kongo oshili yu uve ko eyamukulo lyepulo ndyoka lya simana. Aantu ya tya ngaaka otashi vulika taya ka kala ya kumwa uuna taya tameke okuuva ko nawa kutya oshe ende ngiini, opo Jehova u ulike ohole nuunongo we okupitila mekuliloyambo. Iitsa yini yi na ko nasha nekuliloyambo tatu vulu okukundathana nayo?

15. Jesus okwa li a yooloka ko ngiini kuAdam?

15 Jehova okwa gandja omuntu a gwanenena ngoka a vulu okugandja omwenyo gwe gu ninge ekuliloyambo. Omuntu nguka okwa li e na okukala omudhiginini kuJehova nokukala e na ehalo okugandja omwenyo gwe omolwetu. (Rom. 5:17-19) Jehova okwa tumu omushitwa gwe gwotango okuza megulu e ye kombanda yevi. (Joh. 1:14) Kungawo, Jesus okwa ningi omuntu gwopanyama a gwanenena, ngaashi naanaa Adam a li. Ihe Jesus ka li a fa Adam, molwaashono okwa li ha vulika komithikampango dhaJehova ngaashi osho sha tegelelwa omuntu a gwanenena a kale. Jesus ina yona nando oompango dhaKalunga nokuli nuuna a li momamakelo omanenenene.

16. Omolwashike ekuliloyambo li li omagano ge na ongushu?

16 Jesus e li omuntu a gwanenena, okwa si peha lyaantu, opo e ya hupithe muulunde neso. Omuntu ngoka a gwanenena, Jesus, omwenyo gwe ogwa li naanaa gu na ongushu yi thike pomwenyo gwaAdam. Jesus okwa li omudhiginini noha vulika kuKalunga. (1 Tim. 2:6) Okwa ningi ekuliloyambo ndyoka lye egululile aalumentu, aakiintu naanona “oyendji” ondjila ndjoka tayi fala komwenyo gwaaluhe. (Mat. 20:28) Ekuliloyambo olyo oshinima sha simanenena mokugwanitha po elalakano lyaKalunga lyopetameko. (2 Kor. 1:19, 20) Otali pe aantu  ayehe aadhiginini etegameno lyoku ka mona omwenyo gwaaluhe.

JEHOVA OKWE TU EGULULILA ONDJILA TU GALUKILE KUYE

17. Ekuliloyambo olya ningi shike tashi wapa?

17 Jehova okwa gandja ekuliloyambo ndyoka lye mu pula oshindji. (1 Pet. 1:19) Okwa lenga noonkondo ongushu yomuntu, nomolwaashono a kala e na ehalo lyokugandja Omwana, omuvalwa awike, a se omolwawo. (1 Joh. 4:9, 10) Jesus okwa pingene po tate yetu gwotango, Adam. (1 Kor. 15:45) Kungawo, Jesus okwa galulile aantu oyendji momwenyo, sho e tu pe ompito yokugalukila muukwanegumbo waKalunga. Kekankameno lyeyambo lyaJesus, Jehova ota vulu okutaamba ko aantu mboka taya galukile muukwanegumbo we shampa owala taya vulika koompango dhe dhi li pauyuuki. Mbela itashi nyanyudha omitima okudhiladhila ethimbo ndyono aantu ayehe aadhiginini taya ka kala ya gwanenena? Pokati kuukwanegumbo we womegulu naamboka wokombanda yevi otapu ka kala thiluthilu uukumwe. Atuheni otatu ka kala lela oyana yaKalunga. —  Rom. 8:21.

18. Uunake Jehova ta ka ninga “oye awike omupangeli gwaayihe”?

18 Okwaavulika kwaSatana inaku imba Jehova u ulukile aantu ohole, noitaku vulu okukeelela nokuli aantu mboka inaaya gwanene ya kale aadhiginini kuYe. Jehova ota ka kwathela oyana ayehe okupitila mekuliloyambo ya kale aayuuki thiluthilu. Dhiladhila nkene onkalamwenyo tayi ka kala yi li sho kehe gumwe ngoka ta “mono Omwana note mu itaale” ta ka mona omwenyo gwaaluhe. (Joh. 6:40) Jehova molwohole ye onene nomolwuunongo we, ote ke eta uukwanegumbo we wopantu megwaneneno, opo a gwanithe po elalakano lye lyopetameko. Opo nduno Tate yetu, Jehova, ota ka ninga “oye awike omupangeli gwaayihe.” —  1 Kor. 15:28.

19. (a) Olupandu lwokupandula ekuliloyambo olu na oku tu inyengitha tu ninge shike? ( Tala oshimpungu “Natu kaleni nokukonga mboka ya gwana.”) (b) Oshike tatu ka kundathana moshitopolwa tashi landula kombinga yekuliloyambo?

19 Olupandu lwokupandula ekuliloyambo oli na oku tu inyengitha tu ninge kehe shoka tatu vulu okuninga, opo yalwe ya tseye kutya otaya vulu okumona uuwanawa momagano ngoka ge na ondilo. Aantu oya pumbwa okutseya kutya Jehova ota ka pa aantu ayehe pahole etegameno lyokumona omwenyo gwaaluhe, okupitila mekuliloyambo. Ihe ekuliloyambo otali ka ninga oshindji shi vulithe po mpoka. Oshitopolwa tashi landula otashi ka kundathana kombinga yankene eyambo lyaJesus tali ka kandula po ompata ndjoka ya li ya penduthwa kuSatana moshikunino shaEdeni.