Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2017

Ekulilo — “omagano ga gwana ga pwa” ga za kuTate

Ekulilo — “omagano ga gwana ga pwa” ga za kuTate

“Oshipewa kehe oshiwanawa nomagano kehe ga gwana ga pwa ohaga zi kuKalunga.” — JAK. 1:17.

OMAIMBILO: 20, 15

1. Elongekidho lyekulilo otali tu etele omayambeko geni?

EKULILOYAMBO lyaJesus Kristus olye shi ninga tashi wapa tu mone omayambeko ogendji. Olya palela ondjila oyana yaAdam ayehe mboka ye hole uuyuuki, ya ka kale yamwe yomuukwanegumbo waKalunga monakuyiwa. Ekulilo olye shi ninga wo tashi wapa tu mone ompito yokukala nomwenyo sigo aluhe twa nyanyukwa. Natango ekulilo lyaKristus otali ti sha oshindji kaashi shi owala okweetela aantu mboka haya vulika omayambeko gomonakuyiwa. Sho Jesus a si nehalo ewanawa a kakatela uudhiginini we kuuyuuki waJehova, okwa gandja eyamukulo kompata ya simana meshito alihe. —  Heb. 1:8, 9.

2. (a) Iinima yini ya simanenena ya popiwa megalikano lyaJesus? (Tala kethano lyopetameko.) (b) Oshike tatu ka kundathana moshitopolwa shino?

2 Omimvo mbali lwaampono manga Jesus inaa sa nomanga inaa gandja ekuliloyambo, okwa li a longo aalongwa ye ya galikane taya ti: ‘Tate yetu, ngu u li megulu: Edhina lyoye nali yapulwe, Uukwaniilwa woye nawu ye, Ehalo lyoye nali gwanithwe kombanda  yevi wo ngaashi megulu.’ (Mat. 6:9, 10, Yelekanitha NW.) Opo tu ulike kutya otwa pandula lela ekulilo, natu taleni nkene lya pambathana nokuyapulitha edhina lyaJehova, epangelo lyUukwaniilwa we nosho wo nokugwanithwa kwelalakano lye.

“EDHINA LYOYE NALI YAPULWE”

3. Edhina lyaJehova olya kwatela mo shike, nongiini Satana a li e li popile muuwinayi?

3 Oshinima shotango shoka Jesus a li a popi moshiholelwa she shegalikano, okuyapulitha edhina lyaKalunga. Edhina lyaJehova olya kwatela mo uuwanawa, esimano nuuyapuki we. Megalikano lilwe, Jesus okwa li a popi Jehova e li ‘He Omuyapuki.’ (Joh. 17:11) Molwaashoka Jehova omuyapuki, omakotampango ge agehe noompango dhe oondjapuki. Moshikunino shaEden Satana okwa longitha omakoto, opo a tule momalimbililo uuthemba waKalunga wokutulila po aantu omithikampango. Satana okwa popile muuwinayi edhina lyaJehova Kalunga eyapuki, sho a popi iifundja kombinga ye. —  Gen. 3:1-5.

4. Jesus okwa li a yapulitha ngiini edhina lyaKalunga?

4 Jesus okwa li e hole lela edhina lyaJehova. (Joh. 17:25, 26) Okwa li e li yapulitha. (Lesha Episalomi 40:8-10.) Sho a li kombanda yevi, oku ulike kutya oshi li pandunge noshi li pauyuuki Jehova a tulile po iishitwa ye iinandunge omithikampango. Jesus okwa kala omudhiginini thiluthilu kuHe gwomegulu, nonando Satana okwa li e mu hepekitha noku mu etela eso tali uvitha omwenyo omutoye. Mokukala omudhiginini, Jesus oku ulike kutya omuntu a gwanenena ota vulu okuvulika lela komithikampango dhaKalunga dhuuyuuki.

5. Ongiini tatu vulu okuulika kutya ohatu yapulitha edhina lyaJehova?

5 Ongiini tatu vulu okuulika kutya otu hole edhina lyaJehova? Okupitila meihumbato lyetu. Jehova okwa tegelela tu kale aayapuki. (Lesha 1 Petrus 1:15, 16.) Shika otashi ti kutya otu na owala okulongela Jehova nokuvulika kuye nomitima dhetu adhihe. Nonando otatu hepekwa, otatu ka ninga ngaashi tatu vulu tu kale metsokumwe nomakotampango nonoompango dhe dhuuyuuki. Uuna tatu longo uuyuuki, uuyelele wetu otawu yele, naashika otashi ka simanekitha edhina lyaJehova. (Mat. 5:14-16) Tu li aayapuki, otatu ku ulika mokukalamwenyo kwetu kutya oompango dhaJehova oombwanawa nomapopyo gaSatana ogiifundja. Uuna twa ninga epuko, natu iyele ombedhi shili e tatu etha iilonga mbyoka itaayi simanekitha Jehova. —  Eps. 79:9.

6. Omolwashike Jehova ta vulu oku tu tala ko aayuuki, nonando inatu gwanenena?

6 Kekankameno lyeyambo lyaKristus, Jehova oha dhimi po oondjo dhaamboka ye na eitaalo. Oha taamba ko aalongeli ye mboka ye mu igandjela. Jehova okwa ninga Aakriste aagwayekwa aayuuki ye li oyanamati nokwa ninga wo ‘oonzi dhilwe’ ookuume ke aayuuki. (Joh. 10:16; Rom. 5:1, 2; Jak. 2:21-25) Nongashingeyi, ekulilo olye shi ninga tashi wapa tu kale tu na ekwatathano ewanawa naTate yetu nokuyapulitha edhina lye.

‘UUKWANIILWA WOYE NAWU YE’

7. Omalalekonuuyamba geni taga ka monika okupitila mekulilo uuna Uukwaniilwa waKalunga tawu pangele?

7 Jesus moshiholelwa shegalikano, okwa li i indile ishewe Kalunga a ti: “Oshilongo shoye nashi ye” nenge Uukwaniilwa woye nawu ye. Ekulilo oli na ekwatathano lyashike nUukwaniilwa waKalunga? Ekulilo olye shi ninga tashi wapa, opo aantu 144 000 ya longe ye li aakwaniilwa naasaaseli pamwe naKristus megulu. (Eh. 5:9, 10; 14:1) Jesus naapangeli ooyakwawo  mboka taya pangele mUukwaniilwa waKalunga, otaye ke etela aantu ayehe aavuliki uuwanawa mboka we ya po okupitila mekulilo, konima yomimvo eyovi limwe. Evi otali ka ninga oparadisa, aantu ayehe aadhiginini otaya ka kala ya gwanenena, nuukwanegumbo waKalunga womegulu nowokombanda yevi otawu ka kala wa hangana thiluthilu. (Eh. 5:13; 20:6) Jesus ota ka nyanyagula omutse gweyoka nota ka kutha po omaupyakadhi ngoka hage etithwa kuSatana. — Gen. 3:15.

8. (a) Jesus okwa li a kwathele ngiini aalongwa ye ya mone esimano lyUukwaniilwa waKalunga? (b) Kunena ohatu ulike ngiini kutya ohatu ambidhidha iilonga yUukwaniilwa?

8 Jesus sho a li kombanda yevi, okwa kwathele aalongwa ye ya mone esimano lyUukwaniilwa waKalunga. Mbala konima sho a ninginithwa, okwa tameke okuuvitha “elaka etoye lyOshilongo shaKalunga” kooha nooha dhuuyuni. (Luk. 4:43) Jesus manga inaa shuna megulu, moohapu dhe dhahugunina okwa li a lombwele aalongwa ye ya ninge oonzapo dhoku mu hokolola ‘miilongo ayihe yokombanda yevi.’ (Iil. 1:6-8) Okupitila miilonga yokuuvitha Uukwaniilwa, aantu muuyuni awuhe otaya ka kala ye na ompito yokwiilonga kombinga yekulilo nokukala aalelwa yUukwaniilwa waKalunga. Kunena, ohatu ambidhidha Uukwaniilwa mokukwathela aamwahe yaKristus kombanda yevi sho tayu uvitha onkundana ombwanawa yUukwaniilwa muuyuni awuhe. —  Mat. 24:14; 25:40.

“EHALO LYOYE NALI GWANITHWE”

9. Omolwashike tatu vulu okukala neinekelo kutya Jehova ota ka gwanitha po elalakano lye li na ko nasha naantu?

9 Jesus okwa li a hala okutya shike sho a ti: “Ehalo lyoye nali gwanithwe”? Jehova oye Omushiti. Uuna a popi kutya ota ka ninga sha, ohe shi ningi. (Jes. 55:11) Jehova ita ka etha Satana a piyaganeke elalakano Lye li na ko nasha naantu. Okuza petameko, Jehova okwa kala a hala evi li udhithwe oluvalo lwaAdam naEva lwa gwanenena. (Gen. 1:28) Ando Adam naEva oya sile kaaye na aanona, ando elalakano lyaKalunga li na ko nasha nokuudhitha evi noluvalo lwawo, olya kala inaali gwanithwa. Konima sho ya yono, Jehova okwe ye etha ya mone aanona. Okupitila mekulilo, Kalunga ota ka gandja ompito yokuthika megwaneneno noku ka kala nomwenyo sigo aluhe kwaayehe mboka ye na eitaalo tali longo. Jehova aantu oku ya hole nokwa hala aantu aavuliki ya kale nonkalamwenyo ndjoka e ya halela.

10. Ekulilo otali etele ngiini aantu mboka ya sa nale uuwanawa?

10 Ongiini kombinga yaantu oyendjiyendji mboka ya sa inaaya tseya Jehova? Ekulilo olye shi ninga tashi wapa ya yumudhwe. Tate yetu gwomegulu omunahole, ote ke ya yumudha noku ya pa ompito yi ilonge kombinga yelalakano lye noya mone omwenyo gwaaluhe. (Iil. 24:15) Jehova ina hala aantu ya se, ihe oya kale nomwenyo. E li Onzo yomwenyo, ota ka kala He yakehe ngoka ta yumudha. (Eps. 36:9) Ano oshe eleka sho Jesus e tu longa tu galikane tatu ti: “Tate yetu, ngu u li megulu.” (Mat. 6:9) Jehova okwa pa Jesus oshinakugwanithwa sha simana shokuyumudha aasi. (Joh. 6:40, 44) Jesus ota ka gwanitha po oshinakugwanithwa she moparadisa e li “eyumuko nomwenyo.” —  Joh. 11:25.

11. Kalunga okwa hala “ongundu onene” yi ninge shike?

11 Jehova okwa gandja ekulilo kaantu ayehe, molwaashoka Jesus okwa ti: “Kehe tuu ngoka ta gwanitha ehalo lyaKalunga, oye omumwameme omulumentu nomumwameme omukiintu nameme.” (Mark. 3:35) Kalunga  okwa hala “ongundu onene” (OB-1954) yaantu ya nyengana okuyalula ya za miigwana ayihe, momihoko adhihe nomomalaka agehe ya ninge aalongeli ye. Mboka ye na eitaalo mekulilo lyaKristus naamboka haya longo ehalo lyaKalunga, otaya ka ninga yamwe yomwaamboka tayi igidha taya ti: “Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!” —  Eh. 7:9, 10.

12. Elalakano lyaJehova li na ko nasha naantu aavuliki olya popiwa ngiini moshiholelwa shegalikano?

12 Elalakano lyaJehova li na ko nasha naantu aavuliki olya popiwa momaindilo ngoka taga adhika moshiholelwa shegalikano lyaJesus. Metsokumwe negalikano ndyoka, otwa hala okuninga ngaashi tatu vulu, opo tu yapulithe edhina lyaJehova. (Jes. 8:13) Edhina lyaJesus otali ti “Jehova Ehupitho,” nokuhupithwa kwetu okupitila mekulilo otaku simanekitha edhina lyaJehova. Uukwaniilwa waKalunga owo tawu ka longithwa okweetela aantu aavuliki uuwanawa wekulilo. Oshiholelwa shegalikano otashi tu shilipaleke kutya kapu na sha tashi ki imba ehalo lyaKalunga li gwanithwe. —  Eps. 135:6; Jes. 46:9, 10.

ULIKA KUTYA OWA PANDULA EKULILO

13. Okuninginithwa kwetu otaku ulike shike?

13 Omukalo gumwe gwa simana moka tatu vulu okuulika kutya otwa pandula ekulilo, omokwiiyapulila Jehova shi ikolelela keitaalo lyetu mekulilo nomokuninginithwa. Okuninginithwa kwetu otaku ulike kutya ‘tse oyOmuwa.’ (Rom. 14:8) Otaku ulike kutya otwa pula Kalunga e tu pe eiyuvo ewanawa. (1 Pet. 3:21) Ombinzi yeyambo yaKristus ya yela oye shi ninga tashi wapa, opo Jehova a yamukule omaindilo getu. Otu na lela einekelo kutya ote ke tu pa ashihe shoka e tu uvanekela. — Rom. 8:32.

Omomikalo dhini tatu vulu okuulika kutya otwa pandula ekulilo? (Tala okatendo 13, 14)

14. Omolwashike tatu ladhipikwa tu kale tu hole ooyakwetu?

 14 Omomukalo gulwe ishewe guni tatu vulu okuulika kutya otwa pandula ekulilo? Molwaashoka kehe shimwe Jehova ta ningi ohe shi ningi ti inyengithwa kohole, okwa hala aalongeli ye ayehe yu ulike kutya ohole oyo uukwatya wawo wa dhenga mbanda. (1 Joh. 4:8-11) Ohatu ulike kutya otwa hala okuninga ‘aana yaTate yetu yomegulu’ mokukala tu hole yakwetu. (Mat. 5:43-48) Oshipango shotango osho okuhola Jehova noshitiyali osho okuhola aantu ooyakwetu. (Mat. 22:37-40) Omukalo gumwe gwa simana gwokuulukila ooyakwetu ohole, ogwo oku ya uvithila onkundana ombwanawa yUukwaniilwa waKalunga. Sho tatu ulukile yalwe ohole, otatu simanekitha Kalunga. Oshikwawo, ohole yaKalunga otayi kala “yu udha mutse” ngele otwa vulika koshipango shokukala tu hole yalwe, unene tuu ooyitaali ooyakwetu. —  1 Joh. 4:12, 20.

EKULILO OHALI TU “ETELE OMATHIMBO GOONKONDO OOMPE” OKUZA KUJEHOVA

15. (a) Omalaleko nuuyamba geni tatu mono ngashingeyi okuza kuJehova? (b)  Omalaleko nuuyamba geni twa tegelela oku ka mona?

15 Jehova okwi ilongekidha oku tu dhimina po uuna tu na eitaalo tali longo mekulilo. Oohapu dhaKalunga otadhi tu shilipaleke kutya otatu vulu ‘okudhiminwa po’ oondjo dhetu. (Lesha Iilonga 3:19-21.) Ngaashi twa kundathana petameko, pakankameno lyekulilo, Jehova okwa ninga aapiya ye aagwayekwa oyana. (Rom. 8:15-17) Jehova ota hiya wo ‘oonzi dhilwe’ dhi kale oshitopolwa shuukwanegumbo we wokombanda yevi. Konima ngele aantu mboka tayi ithanwa ‘oonzi dhilwe’ oya thiki megwaneneno, e taya piti mo memakelo lyahugunina, Jehova ote ke ya ninga oyana ye yokombanda yevi. (Rom. 8:20, 21; Eh. 20:7-9) Ohole yaJehova yokuhola oyana otayi kala sigo aluhe. Uuwanawa wekulilo otawu kala sigo aluhe. (Heb. 9:12) Omagano gekulilo kage na esiku ga ze ongushu. Kapu na omuntu nenge oonkondo dhasha, tadhi vulu oku tu kutha omagano ngoka.   

16. Ekulilo olye shi ningi ngiini tashi wapa tu kale twa manguluka shili?

16 Kapu na sha shoka Satana ta vulu okuninga, opo i imbe ayehe mboka yi iyela ombedhi shili ya ninge oshitopolwa shuukwanegumbo waJehova. Jesus okwe ya kombanda yevi nokwa si “lumwe aluke,” kungawo ekulilo olya futwa sigo aluhe. (Heb. 9:24-26) Okwe tu mangulula thiluthilu muupika wuulunde neso mboka twa thigulula kuAdam. Otwa pandula eyambo lyaKristus, molwaashoka otwa mangululwa muupika wuuyuni mbuka wu li kohi yepangelo lyaSatana notwa mangululwa kuumbanda wokutila eso. —  Heb. 2:14, 15.

17. Ohole yaJehova otayi ti shike kungoye?

17 Omauvaneko gaKalunga oge shi shili okwiinekelwa. Ngaashi owala oompango dheshito lye ihaadhi ponyo, Jehova ke na nando esiku limwe a kale inaa gwanitha shoka u uvaneka. Iha lunduluka. (Mal. 3:6) Jehova ohe tu pe oshindji kaashi shi owala omagano gomwenyo. Ohe tu ulukile ohole ye. “Otwa tseya ohole ndjoka Kalunga e yi na oku tu hola notwe yi itaala. Kalunga oye ohole.” (1 Joh. 4:16) Evi alihe otali ka ninga oparadisa ombwanawa yi na aantu ya nyanyukwa, na kehe gumwe kombanda yevi ota ka kala e hole Kalunga. Onkee ano, natu imbeni pamwe niishitwa iidhiginini yomegulu mbyoka tayi ti: “Ehambelelo, eadhimo, uunongo, epandulo, esimano, epangelo noonkondo oyaKalunga ketu aluhe sigo aluhe! Amen!” — Eh. 7:12.