Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2016

Ilonga sha kaapiya yaJehova aadhiginini mboka ya li ko

Ilonga sha kaapiya yaJehova aadhiginini mboka ya li ko

“Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.” — MIKA 6:8.

OMAIMBILO: 63, 43

1, 2. David oku ulike ngiini kutya ye omudhiginini kuKalunga? (Tala kethano lyopetameko.)

SAUL naakwiita ye 3 000 oya li taya kongo David mombuga yaJudea, opo ye mu dhipage. Uusiku wumwe, David naakwiita ye oya li ye ya pehala mpoka Saul naakwiita ye ya yunga ontanda. Saul naakwiita ye ayehe oya adhika ye li mokati koomposi. David naAbisai oya ningi po shike? Oye ende tayi inyoweke mokati kaakwiita yaSaul, sigo ya thiki mpoka Saul a lala. Abisai okwa nongonene David a ti: “Nandi mu tse egonga, li tunukile mevi polumwe aluke —  ite pumbwa oku mu umpila lwaali.” David ina zimina Abisai a dhipage Saul. David okwa lombwele Abisai a ti: “Ino mu dhipaga, oshoka kape na ngoka ta gumitha oshikaha omukwaniilwa omugwayekwa kOmuwa ndee ta kala inaa geelwa.” David okwa ti ishewe: “Omuwa na keelele ndje, ndaa kambadhale okudhipaga omuntu ngoka a hogololwa kOmuwa, a ninge omukwaniilwa!” — 1 Samuel 26:8-12.

2 David okwa li e shi shi kutya okukala omudhiginini kuJehova osha kwatela mo shike. Okwa li e shi kutya oku na okukala a simaneka  Saul. Oshinima shono osha kwathele David, opo kaaha ningile Saul uuwinayi washa. David okwa li e na uushili kutya Jehova oye a gwayeka Saul a ninge omukwaniilwa gwaIsraeli. Jehova okwa hala aapiya ye ayehe ya kale aadhiginini kuye nokunena. Okwa hala wo ya kale ya simaneka mboka ye na oonkondopangelo. — Lesha Mika 6:8.

3. Oshike tashi ulike kutya Abisai okwa li omudhiginini kuDavid?

3 Abisai okwa li a simaneka David. Omolwashike mbela? Okwa li e shi kutya Kalunga okwa hogolola David a ka ninge omukwaniilwa monakuyiwa. Konima sho David a ningi omukwaniilwa, okwa yono eyono lya kwata miiti, sho a hondele naBatseba, omukulukadhi gwaUria. David okwa lombwele wo Joab a tule Uria mpa pu na olugodhi olululu, opo a dhipagwe nuupu. (2 Samuel 11:2-4, 14, 15; 1 Ondjalulo 2:16) Joab naAbisai aamwayina, na Abisai okwa li u uva shoka sha ningwa kuDavid, ihe nonando ongaaka, okwa kala e mu simaneka. Shimwe ishewe, Abisai oye a li ondjayi yetangakwiita lyaDavid. Okwa li ta vulu okulongitha oonkondopangelo dhe i ininge omukwaniilwa, ihe ine shi yelekela tuu nando. Pehala lyaashono, okwa kala ta longele David nuudhiginini noku mu gamena kaatondi ye. — 2 Samuel 10:10; 20:6; 21:15-17.

4. (a) David okwa tula po oshiholelwa shini shokukala omudhiginini kuKalunga? (b) Otatu ki ilonga iiholelwa yilwe yini moshitopolwa shino?

4 David okwa kala omudhiginini kuJehova onkalamwenyo ye ayihe. Sho e li metifa lyuugundjuka we, okwa dhipaga omutongolume Goliat, ngoka a li ta sheke Jehova nosho wo oshigwana shaIsraeli. (1 Samuel 17:23, 26, 48-51) Sho omukwaniilwa David a yono, Jehova okwe mu tumine omupolofeti gwe, Natan, e ke mu pukulule. David okwa zimine nziya eyono lye, e ti iyele ombedhi. (2 Samuel 12:1-5, 13) Pethimbo lyuukulupe we, David oye tuu ngono okwa li wo a gandja iinima oyindji yi na ongushu yi longithwe mokutungila Jehova otempeli. (1 Ondjalulo 29:1-5) Osha yela kutya nonando David okwa li a yi momapuko omanene monkalamwenyo ye, okwa kala owala omudhiginini kuJehova. (Episalomi 51:4, 10; 86:2) Oshike tatu ka kundathana moshitopolwa shino? Otatu ki ilonga kombinga yoshiholelwa shaDavid noshaapiya yaJehova yalwe mboka ya li ko nale. Otatu ki ilonga wo nkene tatu vulu okukala aadhiginini kuJehova, shi vulithe iinima yilwe. Otatu ka kundathana wo omaukwatya galwe, ngoka tage tu kwathele tu shi ninge.

OTO KALA NGAA OMUDHIGININI KUJEHOVA?

5. Oshike tatu ilongo mepuko ndyoka Abisai a ale a ye mulyo?

5 Sho Abisai a li a hala okudhipaga Saul, okwa li ta kambadhala okukala omudhiginini kuDavid. Mbela David okwa li a popile oshinima shono? Aawe, okwa li a nukile pomutenya. Okwa li e shi kutya osha puka lela okweehameka ngoka e li “omugwayekwa kOmuwa.” Onkee ano, David ina pitika Abisai a dhipage Saul. (1 Samuel 26:8-11) Oshike tatu ilongo moshinima shino? Osho kutya manga inaatu tokola kutya okulye tu na okukala aadhiginini unene, otwa pumbwa okudhiladhila kutya omakotampango geni taga vulu oku tu kwathela monkalo moka tu li.

Osha simanenena okukala aadhiginini kuJehova, ihe hakomuntu ngoka a thiga po oshili

6. Nonando oshi li paunshitwe okukala aadhiginini kaantu yaandjetu nokookuume ketu, omolwashike tu na okukala twa kotoka?

6 Oshipu okukala aadhiginini kungoka tu hole, ngaashi kookuume ketu nokaantu  yaandjetu. Omathimbo gamwe omadhiladhilo gomomitima dhetu ohage tu hongolola, molwaashoka inatu gwanenena. (Jeremia 17:9) Uuna gumwe ngoka tu hole a yono e ta thigi po oshili, natu dhimbulukwe kutya osha simanenena okukala aadhiginini kuJehova, ihe hakomuntu ngoka a thiga po oshili. — Lesha Mateus 22:37.

7. Omumwameme gumwe okwa kala omudhiginini kuJehova ngiini sho a li monkalo ondhigu?

7 Ngele opu na omuntu gumwe gwaandjeni a kondwa mo megongalo, natango oto vulu okuulika kutya owu li omudhiginini kuJehova. Natu tale koshiholelwa shomumwameme Anne, ngoka yina a li a kondwa. Yina okwa li e mu dhengele ongodhi te mu lombwele kutya okwa hala oku mu talela po. [1] (Tala enyolo lyopehulilo.) Yina yomumwameme Anne okwe shi popi kutya oshe mu uvitha nayi sho yaandjawo ya tindi okupopya naye. Oshinima shino osha li wo sha yemateke Anne, noku uvanekele yina kutya ote ke mu nyolela ombapila. Manga inaa nyola, Anne okwa tedhatedha kombinga yomakotampango gamwe gOmbiimbeli. (1 Aakorinto 5:11; 2 Johannes 9-11) Okwa yelithile yina mombapila kutya oye e na epuko, molwaashoka oye a thigi po aanegumbo lye konima sho a yono e ta tindi okwiiyela ombedhi. Anne okwa yelithile yina kutya ngele okwa hala a kale a nyanyukwa ishewe na galukile kuJehova. — Jakob 4:8.

8. Omaukwatya geni tage tu kwathele tu kale aadhiginini kuJehova?

8 Aapiya aadhiginini yaKalunga yo pethimbo lyaDavid oya li aaifupipiki, aanahenda noye na uulaadhi. Natu ka tale nkene omaukwatya ngoka tage tu kwathele tu kale aadhiginini kuJehova.

NATU KALENI AAIFUPIPIKI

9. Omolwashike Abner a li ta kambadhala okudhipaga David?

9 Abner, ondjayi yetangakwiita lyaIsraeli nosho wo omwanamati gwaSaul, Jonatan, opo ya li sho David e eta omutse gwaGoliat komukwaniilwa Saul. Jonatan okwa ningi kuume kaDavid, nokwa kala omudhiginini kuye. (1 Samuel 17:57–18:3) Abner ka li omudhiginini kuDavid. Lwanima Abner osho nokuli a ka gama kombinga yaSaul, ngoka a li a hala okudhipaga David. (1 Samuel 26:1-5; Episalomi 54:3) Jonatan naAbner oya li ye shi shi kutya Kalunga okwa hala David oye a landule Saul muukwaniilwa. Sho Saul a si, Abner ka li a gama kuDavid. Pehala lyaashono, okwa kambadhala a ninge  omwana gwaSaul, Ishboshet, omukwaniilwa. Abner otashi vulika a li a hala oye a ninge omukwaniilwa. Shono otashi vulika osho sha li she mu ningitha a lale naRizpa, ohonda yaSaul. (2 Samuel 2:8-10; 3:6-11) Omolwashike Jonatan naAbner ya li ye na etaloko lya yoolokathana shi nasha naDavid? Omolwaashono Jonatan okwa li omudhiginini kuJehova nomwiifupipiki, ihe Abner ka li ngawo.

10. Omolwashike Absalom kaa li omudhiginini kuKalunga?

10 Absalom, omwanamati gwaDavid, ka li omudhiginini kuKalunga, noka li omwiifupipiki. Okwa li a hala oye a ninge omukwaniilwa, nomolwaashono a li i ikongele “etembakwiita nuukambe, osho wo ongundu yaamati aathindikili omilongo ntano.” (2 Samuel 15:1) Okwa li a kwata ko Aaisraeli oyendji omolwomakoto ge. Okwa kambadhala okudhipaga he, David, nonando oku shi kutya Jehova oye a hogolola a ninge omukwaniilwa gwaIsraeli. — 2 Samuel 15:13, 14; 17:1-4.

11. Uuwanawa washike tatu mono momahokololo gOmbiimbeli ngoka taga popi Abner, Absalom naBaruk?

11 Ngele omuntu ke shi omwiifupipiki nokwa hala okukala e na oonkondopangelo dha gwedhwa po, oshidhigu kuye a kale omudhiginini kuKalunga. Otu hole Jehova noinatu hala okukala tu ihole tse yene, nokukala tu na omitima omiwinayi twa fa Abner naAbsalom. Otu na okukala twa kotokela ohole yokuhola iimaliwa nosho wo okulalakanena oondondo dha simana. Omolwashike mbela? Oku shi ninga otaku ka yona po owala ekwatathano lyetu naJehova. Pompito yimwe, Baruk, amushanga gwaJeremia, okwa li ta lalakanene iinima iinene. Shoka oshe mu imbi a longele Jehova nenyanyu. Jehova okwa lombwele Baruk a ti: “Ihe ngame, Omuwa, otandi ka kumuna po shoka nda tungu, notandi ka tudha mo shoka nda tsike. Shika otandi ke shi ninga noshilongo ashihe. Oto ikongele iinima iinene? Ino yi konga.” (Jeremia 45:4, 5) Baruk okwa pulakene kuJehova. Onkee ano, natse wo natu kale hatu pulakene kuJehova, molwaashono ota ka hanagula po uuyuni mbuka wa yonana.

Uuna to lombwele omumwaho a ye kaakuluntugongalo ye ke mu kwathele, otashi ulike kutya owu mu nine olukeno nowu li omudhiginini kuJehova

12. Omolwashike okukala tu ihole tse yene, tashi tu imbi okukala aadhiginini kuKalunga? Gandja oshiholelwa.

12 Omumwatate Daniel, gwokoMeksiko, okwa li e na okutokola kutya okulye e na okukala omudhiginini. Okwa li a hala okuhokana okakadhona hoka ihaa ka longele Jehova. Daniel okwa ti: “Onda tsikile oku ka nyolela, nokonima nokuli sho ndi li omukokolindjila.”  Okwe ke shi dhimbulula mo kutya oku ihole ye mwene sho ta gwanitha po owala ehalo lye. Ka li omudhiginini kuJehova nokwa li a pumbwa okukala omwiifupipiki. Okwa lombwele omukuluntugongalo gumwe kombinga yokakadhona hoka. Daniel ota hokolola ta ti: “Omukuluntugongalo okwa kwathele ndje ndi mone kutya ngele onda hala okukala omudhiginini kuKalunga, onda pumbwa okweetha po oku ka nyolela. Onda galikana olundji tandi lili, nokonima osho nda ningi. Konima owala yaashono, onda kala tandi nyanyukilwa uukalele wandje noonkondo.” Ngashingeyi Daniel omutonatelishikandjo nokwa hokana omukulukadhi ngoka e hole Jehova.

OKUKALA AADHIGININI KUKALUNGA OTAKU TU KWATHELE TU KALE NOHENDA

Uuna wa mono kutya kuume koye kopothingo okwa yona eyono lya kwata miiti, mu lombwela a ka pule ekwatho kaakuluntugongalo, ngele ite shi ningi, inda ko kuyo (Tala okatendo 14)

13. Natan okwa kala ngiini omudhiginini kuKalunga nokuDavid ngoka a yona?

13 Ngele otwa kala aadhiginini kuJehova, otatu vulu wo okukala aadhiginini kuyalwe noku ya kwathela momukalo gwa dhenga mbanda. Omupolofeti Natan okwa kala omudhiginini kuJehova nokuDavid. Konima owala sho David a lala naBatseba, nokudhipagitha omusamane gwe Uria, Jehova okwa tumu Natan a ka kumagidhe David. Natan okwa li omulaadhi noha vulika kuJehova. Okwa li a katuka pandunge nokupopya naDavid momukalo omwaanawa. Elalakano lye olya li okukwathela David a mone nkene eyono lye lya kwata miiti. Okwa hokololele David kombinga yomulumentu omuyamba, ngoka a kutha po okanzi kamwe komuthigona hono oko akeke a li e na. Sho David e shi u uvu okwa geyele noonkondo omulumentu ngoka omuyamba. Opo nduno Natan okwa ti: “Omulumentu ngoka ongoye.” David okwe shi dhimbulula mo kutya okwa yona kuJehova. — 2 Samuel 12:1-7, 13.

14. Ongiini to vulu okukala omudhiginini kuJehova, kookuume koye nosho wo kaakwanezimo?

14 Nangoye oto vulu okukala omudhiginini kuJehova. Oto vulu wo okukala omudhiginini kuyalwe moku ya kenukila. Pashiholelwa, otashi vulika wu na uushili kutya omumwatate gwontumba okwa yona eyono lya kwata miiti. Ngele oku li kuume koye kopothingo nenge gwaandjeni, otashi vulika wu mwenene oshinima shoka. Owu shi wo kutya shoka sha simanenena okukala omudhiginini kuJehova. Ngaashi owala Natan, kenukila omumwaho ngoka, ihe kala omudhiginini kuJehova. Owu na okulombwela omumwaho ngoka a ka hokololele aakuluntugongalo oshinima shoka nziyanziya, opo a kwathelwe. Ngele ye ita yi ko, nena ongoye wu ya ko wu ke ya lombwele. Shono otashi ulike kutya owu li omudhiginini kuJehova. Shimwe ishewe, otashi ulike kutya owu na olukeno nomumwaho, molwaashoka aakuluntugongalo otaye ke mu kwathela a kale e na natango ekwatathano ewanawa naJehova. Otaye ke shi ninga momukalo gombili taya popi nelaka etalala. — Lesha Levitikus 5:1; Aagalati 6:1.

OTWA PUMBWA UULAADHI, OPO TU KALE AADHIGININI KUKALUNGA

15, 16. Omolwashike Hushai a li a pumbwa uulaadhi, opo a kale omudhiginini kuKalunga?

15 Hushai okwa li kuume kopothingo komukwaniilwa David. Sho Aaisraeli ya li ya hala okuninga Absalom omukwaniilwa, Hushai okwa li a pumbwa uulaadhi, opo a kale omudhiginini kuDavid nosho wo kuKalunga. Hushai  okwa li e shi kutya Absalom netangakwiita lye oye ya muJerusalem. Okwa li wo e shi kutya David okwa ya ontuku. (2 Samuel 15:13; 16:15) Hushai okwa li a ningi po shike? Mbela okwa li i iteka David a ka ambidhidhe Absalom? Aawe. Okwa kala a gama kuDavid, molwaashoka oku shi shi kutya Jehova oye e mu gwayeka a kale omukwaniilwa. Pethimbo ndyoka David okwa li a kulupa, yo aantu oyendji oya li ya hala oku mu dhipaga. Hushai okwa ningi po shike? Okwa yi kOndundu yooholivi a ka tsakaneke David. — 2 Samuel 15:30, 32.

16 David okwa lombwele Hushai a shune kuJerusalem, e ti iningi a fa kuume kaAbsalom. Kungawo Hushai ota ka vula okutompa, Absalom a pulakene komayele ge, pehala lyokupulakena kuAhitofel. Opo Hushai a vulike kuDavid nokukala omudhiginini kuJehova, okwa li a pumbwa uulaadhi nokwi ihupula. David okwa li a galikana Jehova a kwathele Hushai, naashono osho sha ningwa. Absalom okwa pulakene kuHushai, pehala lyokupulakena kuAhitofel. — 2 Samuel 15:31; 17:14.

17. Omolwashike twa pumbwa uulaadhi, opo tu kale aadhiginini?

17 Otwa pumbwa uulaadhi, opo tu kale aadhiginini kuJehova nokuvulika kuye. Katu na okuninga shoka yaandjetu, aaniilonga pamwe natse, nenge mboka ye na oonkondopangelo ya hala tu longe, ngele oshi li ompinge nehalo lyaJehova. Pashiholelwa, Taro, gwokoJapan, okwa kala ha vulika kaavali ye okuza ngaa sho a li okamatyona. Okwa kala wo omudhiginini kuyo. Shoka ine shi ninga kethiminiko, ihe okwe shi ningi molwaashoka e ya hole. Sho a tameke okukonakona Ombiimbeli nOonzapo dhaJehova, aavali ye oya li ya hala a hulithe po ekonakono lye. Taro okwa li a yemata. Osha li oshidhigu kuye a lombwele aavali ye kutya ye ota kala owala ha yi kokugongala kwOonzapo dhaJehova. Ota hokolola ta ti: “Oya li ya pindjala nayi, noyi indike ndje kaandi ya talele po uule womimvo dhontumba pegumbo lyawo. Onda galikana kuJehova, opo a pe ndje uulaadhi ndi tsikile nokukonakona. Ngashingeyi aavali yandje oya lundulula iikala yawo, nohandi ya talele po olundji.” — Lesha Omayeletumbulo 29:25.

18. Uuwanawa washike wa mona moshitopolwa shino?

18 Ngaashi owala David, Jonatan, Natan nosho wo Hushai, natse otatu vulu okumona ombili ndjoka hayi zi mokukala aadhiginini kuJehova. Inatu landula nando oshiholelwa shaAbner naAbsalom mboka ya li kaaye shi aadhiginini. Eeno, odhoshili kutya inatu gwanenena nohatu ningi omapuko. Onkee ano, natu ulike kutya otwa lenga okukala aadhiginini kuJehova monkalamwenyo yetu.

^ [1] (okatendo 7) Omadhina gamwe oga lundululwa.