Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2016

Tsikeni Jehova iimpwiyu yeni ayihe

Tsikeni Jehova iimpwiyu yeni ayihe

‘Tsikeni Jehova iimpwiyu yeni ayihe, oshoka oye omusilishimpwiyu gweni.’ —  1 PET. 5:7.

OMAIMBILO: 38, 7

1, 2. (a) Omolwashike kaashi na oku tu kumitha uuna twa gwililwa po kiimpwiyu? (Tala kethano lyopetameko.) (b) Otatu ka kunduthana shike moshitopolwa shika?

OTU li methimbo edhigu noonkondo. Satana Ondiyapoli okwa geya noonkondo ‘nohe tu kundukidha, ta ndunduma, a fa onime, ta kongo ngoka, te mu ninagula po.’ (1 Pet. 5:8; Eh. 12:17) Onkee ano, itashi kumitha sho omathimbo gamwe aapiya yaJehova hatu kala twa gwililwa po kiimpwiyu. Aapiya yaJehova yonale, ngaashi omukwaniilwa David, oshikando shimwe okwa li e na “iimpwiyu.” (Eps. 13:2) Dhimbulukwa kutya omuyapostoli Paulus naye okwa li a thiminikwa “koshimpwiyu shomagongalo agehe.” (2 Kor. 11:28) Mbela oshike tu na okuninga uuna twa gwililwa po kiimpwiyu?

2 Tate yetu gwomegulu omunahole okwa li a kwathele aapiya ye yonale, kunena natse ohe tu kwathele tu pepelelwe po kuudhigu nenge kiimpwiyu. Ombiimbeli otayi tu ladhipike tayi ti: “Mu tsikeni iimpwiyu yeni ayihe, oshoka oye omusilishimpwiyu gweni.” (1 Pet. 5:7) Ihe ongiini tatu vulu oku shi ninga? Natu taleni komikalo ne ndhoka tadhi tu kwathele kaatu kale tu na iimpwiyu oyindji. Omikalo ndhoka odho: egalikano tali zi komutima, okulesha Oohapu dhaKalunga nokutedhatedha kudho, okupopya nagumwe  ngoka wi inekela nokupula Jehova e ku pe ombepo ondjapuki. Sho tatu konakona omikalo ndhika ne, tala ngele oto mono po dhimwe ndhoka wa hala okutula miilonga.

“MU TSIKENI IIMPWIYU YENI AYIHE”

3. Ongiini to vulu okumbumbulila Jehova ‘uudhigu woye’ okupitila megalikano?

3 Onkatu yotango ndjoka tatu vulu okukatuka oyo okugalikana Jehova tashi zi komutima. Uuna wa taalelwa koonkalo dhiyemateka nenge ndhoka tadhi ku ningitha wu kale to ipula unene, mbumbulila omutima gwoye Tate gwoye gwomegulu omunahole. Omupisalomi David okwi indile Jehova a ti: “Kalunga, uva egalikano lyandje.” Mepisalomi olyo tuu ndyono okwa ti: “Uudhigu woye u fala kOmuwa, oye te ku popile.” (Eps. 55:1, 22) Uuna wa ningi ashihe shoka to vulu, opo wu kandule po uupyakadhi woye, egalikano tali zi komutima otali ke ku kwathela noonkondo. Ihe otali ke ku kwathela ngiini wu yande okukala wa gwililwa po komadhiladhilo nokuudhigu woye? — Eps. 94:18, 19.

4. Omolwashike egalikano lya simanenena uuna twa gwililwa po kiimpwiyu?

4 Lesha Aafilippi 4:6, 7Jehova ota vulu okuyamukula omagalikano getu taga zi komutima nogaa na ezimbuko. Ngiini mbela? Omoku tu pa ombili yokomutima ndjoka tayi vulu oku tu kaleka twa pepelelwa pamadhiladhilo nopamaiyuvo. Aantu oyendji otaya vulu oku shi koleka okupitila miimoniwa yawo. Nonando aapiya yaKalunga ohaya kala ye na iimpwiyu noya mbandapala, Kalunga ohe ya kwathele ya kale ye na ombili yokomutima ndjoka inaayi monika nando onale. Nangoye oto vulu okukala wu yi na. “Ombili yaKalunga” otayi vulu okusinda eshongo kehe tali ku adha. Oto vulu okukala wi inekela lela omauvaneko gaJehova ngoka taga ti: “Ongame Kalunga koye —  ino limbililwa! Otandi ku kankameke e tandi ku kwatha.” — Jes. 41:10.

OMBILI YOKOMUTIMA OKUZA MOOHAPU DHAKALUNGA

5. Oohapu dhaKalunga otadhi vulu ngiini oku ku etela ombili yokomutima?

5 Omukalo omutiyali ngoka tagu ku kwathele wu kale wu na ombili yokomutima, okulesha omanyolo mOmbiimbeli nokutedhatedha kugo. Omolwashike shika sha simana? MOmbiimbeli omu na omanyolo taga longo ngoka taga vulu oku ku kwathela wu yande, wu shonopeke iimpwiyu yoye nenge wu ungaunge nayo. Ino kala wa tala ko Oohapu dhaKalunga ndhoka tadhi vulu oku ku kwathela noku ku pa epepelelo, inaadhi simana, molwaashoka odhi na uunongo mboka wa za kuye. Uuna to tedhatedha esiku kehe nokutala nkene to vulu okutula miilonga omayele gOmbiimbeli taga longo, otashi ke ku koleka. Jehova ote tu ladhipike tu ‘ikolelele notu kale nomukomo’ tse twaa ‘tile nokutyololoka.’ — Jos. 1:7-9.

6. Oohapu dhaJesus otadhi vulu oku ku kwathela ngiini?

6 MOohapu dhaKalunga otatu adha mo oohapu dhaJesus tadhi tsu omukumo. Oohapu dhaJesus odha li hadhi talaleke aapulakeni ye. Aantu oyendji oya li ye ya kuye, molwaashoka okwa li ha hekeleke mboka ye na omitima dha dhengwa pevi, ha nkondopaleke aankundi noha pe omayele mboka ya gwililwa po. (Lesha Mateus 11:28-30.) Okwa li hu ulike kutya oku na ko nasha nayalwe pambepo, pamaiyuvo nopalutu. (Mark. 6:30-32) Euvaneko lyaJesus lyoku tu kwatha otali longo nokunena. Otali vulu okukala lyoshili nokutse ngaashi naanaa lya li kaayapostoli mboka ya li haye ende pamwe naye. Inatu pumbwa okukala puye lelalela, opo tu mone mo uuwanawa muye. E li Omukwaniilwa gwomegulu, ohe tu ulukile natango ohole. Uuna wu na iimpwiyu, ‘ota vulu oku ku kwatha’ “pethimbo lyo opala.” Odhoshili kutya Jesus ota vulu oku ku kwathela wu ungaunge nuudhigu woye, nota vulu oku ku pa etegameno nomukumo. — Heb. 2:17, 18; 4:16.

 OMAUKWATYA GOPAKALUNGA NGOKA HAGE ETITHWA KEKWATHO LYOMBEPO YAKALUNGA

7. Uuwanawa washike to ka mona ngele Kalunga okwe ku pe ombepo ondjapuki?

7 Jesus oku uvaneka kutya Tate yetu gwomegulu ota ka gandja ombepo ondjapuki kwaamboka taye yi mu indile. (Luk. 11:10-13) Omukalo omutitatu ngoka tagu tu kwathele tu kale kaatu na iimpwiyu oyindji, ogwo okukokeka iiyimati yombepo. Oonkondo dhaKalunga tadhi longo nenge ombepo ye ondjapuki, otayi tu kwathele tu kokeke omaukwatya omawanawa ngoka Kalunga omunankondoadhihe e na. (Lesha Aagalati 5:22, 23; Kol. 3:10) Sho to imike iiyimati yombepo, ekwatathano lyoye nayalwe otali hwepopala. Nokungawo oto ka yanda oonkalo odhindji ndhoka tadhi vulu oku ku ningitha wu kale wu na iimpwiyu oyindji. Natu taleni nkene iiyimati yombepo tayi vulu oku ku kwathela.

8-12. Ongiini iiyimati yombepo ondjapuki yaKalunga tayi vulu oku ku kwathela wu yande oonkalo ndhoka tadhi ku etele iimpwiyu?

8 “Ohole, enyanyu, ombili.” Ngele owa kambadhala wu ungaunge nesimaneko nayalwe, oto ka mona kutya oto vulu okuungaunga nomaiyuvo goye omawinayi. Ngiini mbela? Sho tu ulike ohole yuumwayinathana, ohenda nesimaneko, oto ka yanda oonkalo ndhoka tadhi ku ningitha wu kale wu na iimpwiyu. — Rom. 12:10.

9 Eidhidhimiko, uukuume, uuwanawa.” Oto ka kala wu na ekwatathano ewanawa nayalwe ngele owa vulika kekumagidho ndyoka tali ti: “Kalathaneni mu na uukuume nolukeno. Silathaneni ohenda nokudhiminathana po oondjo.” (Ef. 4:32) Uuna to shi ningi, oto ka yanda oonkalo ndhoka tadhi vulu oku ku etela iimpwiyu oyindji. Oto ka vula wo okuungaunga nomupondo noonkalo ndhoka tadhi holoka po omolwokwaagwanenena.

10 Eitaalo.” (NW) Kunena ohatu kala tu na iimpwiyu, molwaashono olundji ohatu kala tatu ipula niimaliwa nosho wo nomaliko. (Omayel. 18:11) Onkee ano, okukala wu na eitaalo lya kola mesiloshimpwiyu lyaJehova lyopahole otashi ke ku kwathela wu yande iimpwiyu oyindji. Ngiini mbela? Oto ka yanda iimpwiyu oyindji mokutula miilonga omayele gomuyapostoli Paulus ga nwethwa mo ngoka taga ti kutya “kaleni mwa gwana naashoka mu na.” Paulus okwa gwedha ko a ti: “Oshoka Kalunga okwa ti: ‘Itandi ku etha nando; itandi ku thigi po.’ Onkee ano tu kaleni tu na omukumo, tse tu tye: ‘Omuwa oye omukwathi gwandje, itandi tila sha. Omuntu ota ningi ndje shike?’” — Heb. 13:5, 6.

11 “Eifupipiko neikwatonawa.” Dhiladhila kunkene to vulu okuulika omaukwatya ngoka. Oto ka yanda oonkalo ndhoka tadhi vulu oku ku ningitha wu kale wu na iimpwiyu notashi ke ku etela uuwanawa ngele owa yanda “ondjahi nonkone, omakudhilo nenge omatukano.” —  Ef. 4:31.

12 Owa pumbwa okukokeka uukwatya weifupipiko, opo wu kale wi inekela ‘moshikaha shoonkondo shaKalunga’ nowu ‘mu tsike iimpwiyu yoye ayihe.’ (1 Pet. 5:6, 7) Sho to kokeke uukwatya weifupipiko, oto ka kala wa hokiwa kuJehova note ke ku yambidhidha. (Mika 6:8) Ngele owi inekele Jehova nomutima aguhe, pehala lyokwiinekela mungoye mwene, oto ka kala kuu na iimpwiyu oyindji.

‘INAMU KALA MU NA OSHIMPWIYU’

13. Jesus okwa li a hala okutya shike sho a ti: ‘Inamu kala mu na oshimpwiyu’?

13 MuMateus 6:34 (lesha), otatu adha mo omayele omawanawa gaJesus ngoka taga ti: ‘Inamu kala mu na oshimpwiyu.’ Otashi vulika shi kale sha fa oshidhigu okulandula omayele ngoka. Jesus okwa li a hala okutya shike sho a ti: ‘Inamu kala mu na oshimpwiyu’? Osha yela kutya Jesus ka li nando a hala okutya omupiya gwaKalunga ke na esiku a gwililwe po kiimpwiyu monkalamwenyo ye; otwa mona wo kutya David naPaulus nayo oya li ya gwililwa po kiimpwiyu. Ihe Jesus okwa li ta  kwathele aalongwa ye ya dhimbulukwe kutya okukala tayi ipula niinima kaayi na shilonga, itashi ka kandula po uupyakadhi. Esiku kehe oli na uudhigu walyo, onkee ano, Aakriste inaya pumbwa okukala tayi ipula nomaupyakadhi gomonakuziwa nenge gomonakuyiwa. Ongiini to vulu okutula miilonga omayele gaJesus ngono tage ku kwathela wu kale kuu na iimpwiyu oyindji?

14. Ongiini wu na okuungaunga niimpwiyu yomapuko ngoka wa ninga monakuziwa?

14 Iimpwiyu yimwe otashi vulika yi etithwe komapuko ngoka twa ninga monakuziwa. Omuntu otashi vulika a kale ti ipe uusama kombinga yoshinima shontumba shoka a ninga monakuziwa, nonando opwa pita omimvo odhindji. Oshikando shimwe omukwaniilwa David okwa li u uvite ‘ta sile meyelu lyoondjo dhe.’ Okwe shi zimine a ti: “Otandi tongo kuuwehame momutima gwandje.” (Eps. 38:3, 4, 8, 18) David okwa li a ningi etokolo ewanawa lini monkalo ndjono? Okwa li i inekele mohenda yaJehova nomedhiminopo lye. Okwa popi e na uushili a ti: “Aanelago oomboka oondjo dhawo dha dhimwa po.” — Lesha Episalomi 32:1-3, 5.

15. (a) Omolwashike inoo pumbwa okwiipula nonkalamwenyo yongashingeyi? (b) Oonkantu dhini to vulu okukatuka, opo waa kale wu na iimpwiyu oyindji? (Tala oshimpungu “ Omikalo dhimwe ndhoka tadhi vulu oku ku kwathela waa kale wu na iimpwiyu oyindji.”)

15 Omathimbo gamwe otashi vulika wu kale twi ipula nonkalamwenyo yongashingeyi. Pashiholelwa, sho David a nyola Episalomi 55 okwa li ti ipula nonkalamwenyo ye. (Eps. 55:2-5) Ihe nonando ongawo, ine etha iimpwiyu ye yi yone po einekelo lye muJehova. David okwi indile Jehova e mu kwathe omolwuupyakadhi we, okwa li wo e shi kutya osha simana lela a katuke oonkantu, opo u ungaunge nuupyakadhi we. (2 Sam. 15:30-34) Otatu vulu okwiilonga oshiilongomwa kuDavid. Pehala lyokweetha iimpwiyu yi ku gwilile po, ninga ngaashi to vulu wu ungaunge nuupyakadhi woye e to ethele iinima miikaha yaJehova.

16. Eityo lyedhina lyaKalunga otali vulu ngiini okukoleka eitaalo lyoye?

16 Olundji Aakriste yamwe ohaya kala tayi ipula nuupyakadhi mboka tashi vulika wu holoke po monakuyiwa. Ihe nonando ongawo, ino pumbwa okukala to ipula niinima mbyoka kuu shi kutya onayi ka ningwe. Omolwashike mbela? Molwaashoka omathimbo gamwe iinima ihayi ke enda nayi ngaashi twa dhiladhila. Onkee ano, Kalunga ngoka tatu vulu okuundulila iimpwiyu yetu iha nyengwa kusha. Edhina lye otali ti kutya “Oha Ningitha.” (Eks. 3:14, NW) Eityo lyedhina lye otali tu shilipaleke kutya elalakano lye li na ko nasha naantu otali ka gwanithwa po. Oto vulu okukala nuushili kutya Kalunga ota ka yambeka aapiya ye aadhiginini note ke ya kwathela yu ungaunge niimpwiyu yomapuko ngoka ya ninga monakuziwa, yonkalamwenyo yongashingeyi noyomonakuyiwa.

OKUPOPYA TASHI ZI KOMUTIMA

17, 18. Okupopya nagumwe wa manguluka otaku ku kwathele ngiini wu ungaunge niimpwiyu yoye?

17 Omukalo omutine ngoka tagu vulu oku ku kwathela wu ungaunge niimpwiyu, okupopya  nkene wu uvite nagumwe ngoka wi inekela. Kuume koye kopandjokana, kuume koye kopothingo nenge omukuluntugongalo otaya vulu oku ku kwathela wu kale wu na etaloko li li nawa li na ko nasha niimpwiyu yoye. “Oshimpwiyu shomomutima gwomuntu otashi mu thindile pohi, ihe oohapu dhuukuume ohadhi gu nyanyudha.” (Omayel. 12:25) Okupopya wa manguluka nagumwe ngoka wi inekela nokupopya oshili otaku vulu oku ku kwathela wu uve ko onkalo yoye nowu ugaunge nomaupyakadhi goye. Ombiimbeli otayi tu lombwele tayi ti: “Omadhiladhilo inaaga kundathanwa nawa otaga ponyo, ihe otaga tompola sha mpoka pe na aagandjindunge oyendji.” — Omayel. 15:22.

18 Jehova oha kwathele wo Aakriste yu ungaunge niimpwiyu yawo okupitila mokugongala kwomokati koshiwike. Kokugongala oto vulu okweendathana nAakriste ooyakweni mboka ye na ko nasha nangoye naamboka ya hala okutsa yalwe omukumo. (Heb. 10:24, 25) ‘Etsomukumo’ ndyoka otali ke ku nkondopaleka pambepo notali shi ningi oshipu wu ungaunge nuupyakadhi woye. — Rom. 1:12.

EKWATATHANO LYOYE NAKALUNGA OTALI KU NKONDOPALEKE LELA

19. Omolwashike to vulu okukala nuushili kutya ekwatathano lyoye naKalunga otali vulu oku ku kwathela?

19 Natu taleni nkene omukuluntugongalo gumwe moKanada ngoka e li omulongisikola nomugandjimayele gwaanasikola a li a mono kutya osha simana okuundulila iimpwiyu ye ayihe kuJehova. Iilonga mbyoka oya li ye mu gwilila po noonkondo, nokwa li tu ungaunga wo nuuvu wa kwata miiti mboka we etithwa kiimpwiyu. Mbela okwe shi pondola ngiini? Okwe shi yelitha a ti: “Onda mono kutya okulonga nuudhiginini ndi koleke ekwatathano lyandje naJehova, ohaku nkondopaleke ndje ndi vule okuungaunga nuupyakadhi wandje. Ookuume kashili nosho wo aamwatate naamwameme oye li ekwatho enene pethimbo lyuudhigu wandje. Ohandi lombwele omukulukadhi gwandje oshili nda manguluka kombinga yomaiyuvo gandje. Aakuluntugongalo ooyakwetu nomutonatelishikandjo oya kwathele ndje ndi tale ko iinima ngaashi Jehova he yi tala ko. Onda mono wo ekwatho lyopaunamiti, ndyoka lya kwathele ndje ndi lundulule elandulathano lyandje lyiilonga, ndi mone ethimbo lyokuthuwa po nondi kale handi ningi omadhewo. Kashonanakashona onda tameke okupangela onkalo yandje nomaiyuvo gandje. Ngele opu na iinima yimwe mbyoka itaandi vulu okuungaunga nayo, ohandi yi ethele momake gaJehova.”

20. (a) Ongiini tatu vulu okutsika Kalunga iimpwiyu yetu? (b) Otatu ka kundathana shike moshitopolwa tashi landula?

20 Moshitopolwa shika, otwi ilongo nkene sha simana okutsika Jehova iimpwiyu yetu mokukala hatu galikana tashi zi komutima, mokulesha Oohapu dhe nokutedhatedha kudho. Otwi ilongo wo nkene sha simana okwiimika iiyimati yombepo, okupopya nagumwe ngoka wi inekela nosho wo okukala pokugongala kwopaKriste. — Heb. 11:6.