Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2016

‘Okukala mewiliko lyombepo otashi eta omwenyo nombili’

‘Okukala mewiliko lyombepo otashi eta omwenyo nombili’

‘Mboka haa kala panyama, otaa dhiladhila shopanyama, ihe mboka haa kala pambepo, otaa dhiladhila shono shopambepo.’ — ROM. 8:5, OB-1954.

OMAIMBILO: 45, 36

1, 2. Omolwashike Aakriste aagwayekwa ye na ohokwe mAaroma ontopolwa 8?

SHI na ko nasha nedhimbuluko lyeso lyaJesus, mbela owa leshele nale Aaroma 8:15-17? Otashi vulika we ya lesha. Oovelise ndhoka otadhi yelitha nkene Aakriste aagwayekwa ye shi tseya kutya oya gwayekwa nombepo ondjapuki. Ovelise yopetameko montopolwa ndjoka otayi ya popi “ye li muukumwe naJesus Kristus.” Ihe mbela Aaroma ontopolwa 8 otayi popi owala kombinga yaagwayekwa? Nenge otayi popi wo kombinga yAakriste mboka ye na etegameno lyokukala kombanda yevi?

2 Ontopolwa ndjono otayi popi unene kombinga yAakriste aagwayekwa. Oya pewa ‘ombepo’ noya ‘tegelela, Kalunga e ya ninge oyana noku ya hupithe.’ (Rom. 8:23) Oye na etegameno lyoku ka kala megulu ye li oyana yaKalunga. Shoka otashi wapa, molwaashoka sho ya ninginithwa ye li Aakriste, Kalunga okwa dhimi po oondjo dhawo okupitila mekuliloyambo. Okwe ya ningi aayuuki koshipala she ye li oyanamati yopambepo. —  Rom. 3:23-26; 4:25; 8:30.

3. Omolwashike tatu vulu okuthika pehulithodhiladhilo kutya mboka ye na etegameno lyokukakala nomwenyo kombanda yevi oye na ohokwe mAaroma 8?

3 Mboka ye na etegameno lyokukakala nomwenyo kombanda yevi oye na wo ohokwe mAaroma ontopolwa 8, molwaashoka Kalunga okwe ya tala ko ye li aayuuki. Shoka otu shi iwetele mwaashoka sha nyolwa nale kuPaulus montumwafo ye. Montopolwa 4, okwa popi  kombinga yaAbraham. Omulumentu ngoka a li e na eitaalo, okwa kala ko nale manga Jehova inaa pa Aaisraeli ompango nomanga nokuli Jesus inaa sa omolwoondjo dhetu. Ihe nonando ongawo, Jehova okwa li natango a lenga eitaalo lyaAbraham nokwa li e mu tala ko omuyuuki koshipala she. (Lesha Aaroma 4:20-22.) Nokunena Jehova okwa tala ko Aakriste aadhiginini, mboka ye na etegameno lyi ikolelela kOmanyolo lyokukala nomwenyo sigo aluhe kombanda yevi ye li aayuuki. Onkee ano, nayo otaya vulu okumona mo uuwanawa momayele ngoka taga adhika mAaroma ontopolwa 8, ngoka ga nuninwa aayuuki.

4. Aaroma 8:21 otaye tu kwathele tu ipule epulo lini?

4 Aaroma 8:21 otaye tu shilipaleke kutya uuyuni uupe otawu ya shili. Ovelise ndjoka oyu uvaneka kutya ‘eshito alihe otali ka manguluka muupika weyonuuko, li ye memanguluko nomeadhimo lyaana yaKalunga.’ Kutya nduno otatu yi muuyuni uupe notatu ka mona ondjambi yini, mbela otu na ngaa einekelo kutya otatu yi mo shili? Aaroma ontopolwa 8 otayi gandja omayele ngoka tage ku kwathele wu kale wu na einekelo.

“OKUKALA PAMADHILADHILO GUUNTU”

5. MAaroma 8:4-13, Paulus okwa li a popi shike sha kwata miiti?

5 Lesha Aaroma 8:4-13. Aaroma ontopolwa 8 otaya popi kombinga yaamboka haye “endithwa kuuntu” wawo okuyekelanitha naamboka ‘haa endithwa kombepo.’ Yamwe otashi vulika ya dhiladhile kutya oohapu ndhoka otadhi popi mboka ye li moshili naamboka kaaye li moshili nenge Aakriste naamboka kaaye shi Aakriste. Ihe Paulus oohapu ndhika okwe dhi nyolele Aakriste ‘ayehe yomuRoma kutya Kalunga oku ya hole, sho e ya ithana, ya ninge aantu ye mwene.’ (Rom. 1:7) Onkee ano, Paulus okwa li a yelekanitha Aakriste mboka haye ende pauntu wawo nAakriste mboka haye ende pambepo. Mbela oya li ya yoolokathana ngiini?

6, 7. (a) Oshitya ‘uuntu’ osha longithwa momikalo dhimwe dhini mOmbiimbeli? (b) Paulus okwa longitha ngiini oshitya ‘uuntu’ shoka sha popiwa mAaroma 8:4-13?

6 Natu taleni tango oshitya ‘uuntu.’ Mbela Paulus okwa li a hala okutya shike? Ombiimbeli ohayi longitha oshitya ‘uuntu’ momikala dha yoolokathana. Omathimbo gamwe, oshitya shoka ohayi shi longitha tayi ulike kolutu lwo lwenelwene lwomuntu. (Rom. 2:28; 1 Kor. 15:39, 50) Ohayi vulu wo oku shi longitha tayi ulike kekwatathano lyuupambele. Pashiholelwa, Ombiimbeli otayi popi kutya ‘pankalo yopantu, Jesus okwa zi moluvalo lwaDavid,’ Paulus naye okwa li a popi kutya Aajuda ‘aanezimo lye panyama.’ —  Rom. 1:3; 9:3, OB-1954.

7 Shoka Paulus a nyola montopolwa 7 otashi  tu ulukile kutya oshitya ‘uuntu’ shoka sha popiwa mAaroma 8:4-13 otashi ti shike. Paulus okwa li a yelekanitha ‘okulandula omadhiladhilo gawo yene nuuhalu wuulunde mboka wa kala tau longo muyo.’ (Rom. 7:5) Shika otashi yelitha eityo lyuutumbulilo mboka tawu popi kombinga yaantu “mboka haa kala pahalo lyuuntu wawo,” mboka Paulus a ti kutya “ohaa dhiladhila ngaashi uuntu wawo wa hala.” Okwa li ta popi kombinga yaantu mboka taya pangelwa komahalo gawo gopantu ye li aantu inaaya gwanenena. Aantu mboka ohaya landula uuhalu wawo wuulunde, mboka tashi vulika wa kwatela mo okuya momilalo nenge kehe tuu shoka ya hala okuninga.

8. Omolwashike sha li shu uka okulondodha nokuli nAakriste aagwayekwa kombinga yokweenda “pahalo lyuuntu wawo?”

8 Otashi vulika wi ipule kutya omolwashike Paulus a li a londodha unene tuu Aakriste aagwayekwa kutya osha nika oshiponga okukala “pahalo lyuuntu wawo.” Mbela oshinima shoka otashi vulu okukala sha nika wo oshiponga kAakriste yokunena, mboka Kalunga e ya taamba ko ye li ookuume ke nokwe ya tala ko ye li aayuuki? Shinikitha oluhodhi, Omukriste kehe ota vulu okutameka okukala te endithwa kuuhalu wuulunde. Pashiholelwa, Paulus okwa li a nyola kutya yamwe yomaamwahe yomuRoma oya li ya pikwa “komahalo gawo yene,” ngoka ga li ga vulu oku ya ningitha ya kale taya hondele nenge aafukedhi, oonkolwi nosho tuu. Yamwe yomuyo oya li haa ‘fundjaleke nokupukitha omadhiladhilo gaantu yaa na oondjo.’ (Rom. 16:17, 18; Fil. 3:18, 19; Jud. 4, 8, 12) Dhimbulukwa wo kutya omathimbo gamwe, omumwatate gumwe muKorinto okwa li ha “kala nomukiintu gwahe.” (1 Kor. 5:1) Ano oshi shi okuuviwa ko kutya omolwashike Kalunga a longitha Paulus a londodhe Aakriste shi na ko nasha ‘nokukala pamadhiladhilo guuntu.’ —  Rom. 8:5, 6.

9. Elondodho ndyoka Paulus a gandja mAaroma 8:6 inali kwatela mo shike?

9 Elondodho ndika otali longo nokunena. Otashi vulika Omukriste konima yokulongela Jehova uule womimvo odhindji a tameke ‘okudhiladhila ngaashi uuntu we wa hala.’ Shika itashi popi kombinga yOmukriste ngoka ha dhiladhila omathimbo nomathimbo kombinga yiikulya, yiilonga, yomainyanyudho nenge nokuli ha dhiladhila kombinga yohole yuukashike kookantu. Mbyoka iinima hayi dhiladhilwa kaapiya yaKalunga oyendji. Jesus okwa li ha nyanyukilwa iikulya nokwa li ha palutha aantu. Okwa li a mono kutya iikulya oya pumbiwa. Paulus okwa popi wo kutya ekwatathano lyopamilalo oshinima sha simana mondjokana.

Mbela okupopya kwoye otaku ulike kutya omadhiladhilo goye otaga wilikwa kombepo nenge oge li pauntu? (Tala okatendo 10, 11)

10. Uutumbulilo “okukala pamadhiladhilo guuntu” mboka tawu adhika mAaroma 8:5, 6 otawu ti shike?

10 Mbela Paulus okwa li ta popi kombinga  yashike sho a popi “okukala pamadhiladhilo guuntu”? Oshitya shOshigreka shoka Paulus a longitha otashi popi kombinga yomuntu ngoka ha kala u ukitha unene omadhiladhilo ge koshinima shontumba. Mboka haa kala pahalo lyuuntu wawo, onkalamwenyo yawo ohayi uthwa unene tuu kuuhalu wuulunde wawo. Omulongwantu gumwe okwa popi kombinga yoohapu ndhoka dhi li mAaroma 8:5 a ti: “Mboka haa kala pahalo lyuuntu wawo, ohaya kala unene ye na ohokwe miinima yopantu, ohaya popi aluhe kombinga yayo, ohaye yi ningi noye yi simaneka.”

11. Iinima yini tashi vulika tu kale twa pititha komeho monkalamwenyo yetu?

11 Aakriste yomuRoma oya li ye na okwiikonakona, opo ya mone kutya oshike naanaa ya pititha komeho monkalamwenyo yawo. Mbela oya li taya pangelwa unene ‘komahalo guuntu wawo’? Natse otwa pumbwa okwiikonakona tu mone kutya oshike naanaa twa pititha komeho monkalamwenyo yetu. Oshike unene tu na ohokwe musho shoka hatu kala tatu popi kombinga yasho? Oshike unene twa pititha komeho esiku nesiku? Yamwe otashi vulika haya kala taya dhiladhila kombinga yokuninga omaviinu gomaludhi gi ili nogi ili, yokukaleka omagumbo gawo taga monika nawa, yokwiikongela oonguwo oompe, yokwiikongela oshimaliwa, yokuya momalweendo noyiinima yilwe. Iinima mbyoka inayi puka; oyi li iinima yomonkalamwenyo yetu yakehe esiku. Pashiholelwa, oshikando shimwe Jesus okwa li a shitukitha omeya omaviinu, na Paulus okwa li a lombwele Timoteus a nwe “omaviinu omashona.” (1 Tim. 5:23; Joh. 2:3-11) Ihe mbela Jesus naPaulus oya li haya kala “aluhe taya popi kombinga yomaviinu, taye ga ningi noye ga simaneka?” Hasho nando. Ongiini mbela kombinga yetu? Oshike twa pititha komeho monkalamwenyo yetu?

12, 13. Omolwashike shoka tatu gandja eitulomo kusho shi li oshinima sha kwata miiti?

12 Okwiikonakona mwene okwa simana. Omolwashike mbela? Omolwaashoka Paulus okwa nyola a ti: “Okukala pamadhiladhilo guuntu otashi eta eso.” (Rom. 8:6) Oshinima shika osha kwata miiti, molwaashoka otashi eta eso lyopambepo ngashingeyi nomonakuyiwa, eso lyo lyenelyene lyopalutu. Niishewe, Paulus ina tya kutya omuntu ngele okwa tameke “okukala pamadhiladhilo guuntu,” okwa sa ngawo. Omuntu ngoka ohashi vulika a lundulule iikala ye. Dhiladhila komulumentu gumwe megongalo lyomuKorinto ngoka a li “pamadhiladhilo guuntu” e ta kondwa mo. Konima yethimbo, okwa lundulula iikala ye. Okwe etha po okweenda pauntu e tu ukitha oondjila dhe. —  2 Kor. 2:6-8.

13 Ngele omulumentu gwomuKorinto okwa li a vulu okulundulula iikala ye, nokunena Omukriste kehe ota vulu okulundulula iikala ye. Elondodho lyaPaulus li na ko nasha noshilanduliko shomuntu ngoka ha kala “pamadhiladhilo guuntu” oli na okwiinyengitha Aakriste ya ninge omalundulu ga pumbiwa.

“OKUKALA MEWILIKO LYOMBEPO”

14, 15. (a) Oshike tu na okuyanda, opo ‘kaatu kale pamadhiladhilo guuntu’? (b) “Okukala mewiliko lyOmbepo” itaku ti shike?

14 Sho omuyapostoli Paulus e tu londodha ‘kaatu kale pamadhiladhilo guuntu,’ okwe tu shilipaleke nomayele taga tungu taga ti: “Okukala mewiliko lyOmbepo otashi eta omwenyo nombili.” Okukala tu na omwenyo nombili kashi shi tuu ondjambi ombwanawa! Ongiini tatu vulu okumona ondjambi ndjoka?

15 “Okukala mewiliko lyOmbepo” itashi ti kutya omuntu oku na owala okukala ta popi iinima yopambepo. Itashi ti kutya omuntu oku na owala okukala ta popi nenge ta dhiladhila kombinga yOmbiimbeli nenge yohole ye yokuhola Kalunga nosho wo kombinga yetegameno lye lyomonakuyiwa. Natu dhimbulukwe kutya Paulus nosho wo yalwe yomethelemimvo lyotango mboka ya li ya hokiwa kuKalunga oya li ye na onkalamwenyo ya fa yaantu ayehe. Oya li haya nyanyukilwa iikulya nokunwa.  Oyendji oya li haya hokana noye na omaukwanegumbo, haya longo, opo yi ikwathele. —  Mark. 6:3; 1 Tes. 2:9.

16. Nonando Paulus okwa li ha longo iilonga oyindji mbyoka hayi longwa kaantu ayehe monkalamwenyo, okwa li ha gandja naanaa eitulomo kushike?

16 Aapiya yaKalunga mboka kaya li haye etha iinima mbyoka yi kale oyo tayi pangele onkalamwenyo yawo. Konima sho ontumwafo ya popi kutya Paulus okwa li omutungi gwootenda, ondjokonona oyu ulike kutya oshike a li a pititha komeho monkalamwenyo ye. Okwa li ha gandja aluhe eitulomo kiilonga yokuuvitha noyokulonga aantu. (Lesha Iilonga 18:2-4; 20:20, 21, 34, 35.) Iilonga mbyono oyo a li a ladhipikile aamwahe yomuRoma. Okwa li a pititha komeho monkalamwenyo ye iinima yopambepo. Aaroma oya li ye na oku mu holela natse osho tu na okuninga. —  Rom. 15:15, 16.

17. Ngele ‘omadhiladhilo getu oga kala mewiliko lyombepo,’ onkalamwenyo yetu otayi ka kala ngiini?

17 Oshizemo shini tatu ka mona ngele otwa kala tatu gandja eitulomo kokulongela Jehova? Aaroma 8:6 otaye tu pe eyamukulo lya yela sho taya ti: “Okukala mewiliko lyOmbepo otashi eta omwenyo nombili.” Shoka otashi ti kutya otu na okweetha omadhiladhilo getu ga nwethwe mo noga pangelwe kombepo ondjapuki. Otu na wo okukala metsokumwe nehalo lyaKalunga nokudhiladhila ngaashi ha dhiladhila. Otatu vulu okukala neinekelo kutya ngele tatu etha ‘ombepo’ ye yi tu wilike, otatu ka kala tu na onkalamwenyo yi li nawa notayi ti sha ngashingeyi. Hugunina otatu ka mona omwenyo gwaaluhe, kutya nduno omegulu nenge okombanda yevi.

18. Ongiini tatu vulu okukala tu na ombili ngele ‘omadhiladhilo getu oge li mewiliko lyombepo’?

18 Natu dhimbulukweni kutya ngele ‘omadhiladhilo getu oga kala mewiliko lyombepo, otashi eta ombili.’ Aantu oyendji otaya kondjitha okumona ombili yopamadhiladhilo. Tse otatu yi nyanyukilwa nale, ihe yo opo taye yi kongo noye yi halelela. Opo tu mone ombili ndjoka, otwa pumbwa okuninga oonkambadhala dhokukala tu na ombili noyaandjetu nosho wo naantu yomegongalo. Otu na okudhimbulukwa kutya tse nosho wo aamwatate naamwameme inatu gwanenena. Omaupyakadhi ohaga vulu okuholoka po omathimbo nomathimbo omolwokwaagwanenena, nongele osha ningwa, otwa longwa kutya otu na okulandula omayele gaJesus ngoka taga ti: ‘Paathaneni ombili namukweni.’ (Mat. 5:24) Shika otashi ke shi ninga oshipu noonkondo uuna tatu dhimbulukwa kutya omumwatate nenge omumwameme gulwe naye ota longele ‘Kalunga, oluthithiya lwombili.’ —  Rom. 15:33; 16:20.

19. Otatu ka nyanyukilwa mbili yi ikalekelwa yini shi ikolelela kwaashoka tatu dhiladhila?

19 Ngele ‘otwa kala mewiliko lyombepo,’ otatu ka kala wo tu na ombili lela naKalunga. Omupolofeti Jesaja okwa li a popi oohapu ndhoka dha li tadhi ti sha pethimbo lye notadhi gwanithwa nokuli ngashingeyi, tadhi ti: “Omuwa, oho gandja ombililela kumboka ihaa tenguka noye ku inekela.” —  Jes. 26:3; lesha Aaroma 5:1.

20. Omolwashike wa pandula omayele ngoka ge li mAaroma ontopolwa 8?

20 Kutya nduno tse aagwayekwa nenge otu na etegameno lyokukala nomwenyo sigo aluhe meviparadisa, otatu vulu okukala twa pandula sho tu na omayele ga nwethwa mo ngoka taga adhika mAaroma ontopolwa 8. Inatu pandula tuu sho tatu ladhipikwa kaatu ethe ‘uuntu’ wu kale oshinima sha simana monkalamwenyo yetu! Pehala lyaashono, otu wete kutya otatu ka kala tu na uunongo ngele otwa kala metsokumwe noohapu dha nwethwa mo ndhoka tadhi ti: “Okukala mewiliko lyOmbepo otashi eta omwenyo nombili.” Ngele otwe shi ningi, otatu ka pewa ondjambi yomwenyo gwaaluhe, oshoka Paulus okwa ti: “Eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” —  Rom. 6:23.