Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2016

Mbela owu wete ngaa wa pumbwa okuninga ehumokomeho pambepo?

Mbela owu wete ngaa wa pumbwa okuninga ehumokomeho pambepo?

“Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu.”—1 TIM. 4:13.

OMAIMBILO: 45, 70

1, 2. (a) Jesaja 60:22 ota gwanithwa ngiini momasiku ngaka gokehulilo? (b) Ompumbwe yini yi li po mehangano lyaJehova lyokombanda yevi?

“AASHUUSHUKA yomune otaa ka ninga eyuvi, naashona otaa ningi oshigwana oshinankondo.” (Jes. 60:22) Oohapu ndhoka dhopahunganeko otadhi gwanithwa momasiku ngaka gahugunina. Momumvo gwiilonga 2015, aauvithi yUukwaniilwa 8 220 105 oya li yi ipyakidhila muukalele muuyuni awuhe. Oshitopolwa shahugunina shehunganeko ndyoka oshi na okuguma Omukriste kehe paumwene, molwaashoka Tate yetu gwomegulu ota ti: “Ongame Omuwa; otandi shi ningi methimbo lyo opala.” Ngaashi aafaalelwa ye li mohauto tayi hingililwa, osho wo natse tu wete nkene iilonga yokuninga aantu aalongwa tayi endelele. Mbela ohatu inyenge ngiini paumwene shi na ko nasha niilonga mbyoka ye endelela? Mbela ohatu ningi ngaa ashihe shoka tatu vulu tu li aauvithi yUukwaniilwa? Aamwatate naamwameme oyendji ohaya kutha uukwathelikokolindjila nenge uukokolindjila wondjigilile. Mbela inatu nyanyukwa sho pu na oyendji tayi inyenge keindilo ya ka longe hoka ku na ompumbwe onene nenge taya kutha ombinga miilonga yilwe yokulongela Jehova?

2 Otu wete kutya ngashingeyi opu na ompumbwe onene yaauvithi oyendji. Omumvo kehe ohapu totwa omagongalo 2 000 lwaampono. Ngele megongalo kehe epe omu na aakuluntugongalo 5, omumvo  kehe aayakuligongalo 10 000 oya pumbwa okuninga aakuluntugongalo. Shika otashi ti kutya aamwatate oyendji oya pumbwa okugwanitha po iitegelelwa mbyoka ya pumbiwa, opo ya vule okuninga aayakuligongalo. Kashi na nduno mbudhi kutya tse aamwatate nenge aamwameme, osha yela kutya otwa pumbwa okukala twi “ipyakidhila aluhe niilonga yOmuwa.”—1 Kor. 15:58.

OKUNINGA EHUMOKOMEHO OTAKU TI SHIKE ?

3, 4. Okuninga ehumokomeho pambepo otashi ti shike kungoye?

3 Lesha 1 Timoteus 3:1. Uutumbulilo “ehalo lyokuninga,” mboka wa longithwa mOmbiimbeli, owa tolokwa okuza koshityalonga shOshigreka shoka tashi gandja eityo lyokukala wa halelela oshinima nenge lyokwiiyeka wu shi adhe. Omuyapostoli Paulus sho a longitha oohapu ndhoka oku ulike kutya, opo omuntu a hume komeho pambepo okwa pumbwa okuninga oonkambadhala. Dhiladhila ando komumwatate ngoka ta lalakanene iinakugwanithwa megongalo. Ke shi natango omuyakuligongalo, ihe okwa mono kutya okwa pumbwa okukokeka omaukwatya gopambepo. Tango okwa lalakanene okuninga omuyakuligongalo. Mokweendela ko kwethimbo okwa lalakanene okukala a gwana okuninga omukuluntugongalo. Mompito kehe okwa longo nuudhiginini, opo a gwanithe po iitegelelwa mbyoka tayi mu petha oshinakugwanithwa sha gwedhwa po megongalo.

4 Momukalo gwa faathana, aamwatate naamwameme mboka ya hala okuninga aakokolindjila, Aabetel, aaiyambi yokutunga Iinyanga yUukwaniilwa oye na okuhuma komeho, opo ya adhe omalalakano gawo. Natu taleni nkene Oohapu dhaKalunga tadhi tu kwathele tu ninge ehumokomeho melongelokalunga lyashili.

LALAKANENA OKUNINGA EHUMOKOMEHO PAMBEPO

5. Aagundjuka otaya vulu okulongitha ngiini oonkondo dhawo miilonga yUukwaniilwa?

5 Aagundjuka oye na oonkondo okuninga oshindji miilonga yaJehova. (Lesha Omayeletumbulo 20:29.) Aagundjuka yamwe ohaya kwathele okupilinta omambo noku ga tula kumwe koBetel. Aagundjuka oyendji ohaya kutha ombinga miilonga yokutunga noyokwoopaleka Iinyanga yUukwaniilwa. Uuna pwa holoka iiponga yopaunshitwe, ohaya kutha ombinga pamwe nOonzapo ndhoka dhi na ontseyo mokugandja omakwatho kwaamboka ya gumwa. Aagundjuka oyendji aakokolindjila ohayi ilongo omalaka galwe nenge ya ye komahala galwe ye ku uvithe onkundana ombwanawa.

6-8. (a) Omugundjuka gumwe okwa li a lundulula ngiini etaloko lye li na ko nasha niilonga yaJehova, nokwa li a mono omayambeko geni? (b) Ongiini tatu vulu ‘okukonakona nokumona nkene Jehova omwaanawa’?

6 Otashi vulika wa pandula Kalunga sho ho mu longele nomutima aguhe. Ihe mbela ongiini ngele owu uvite ngaashi omumwatate Aaron? Nonando okwa kokela muukwanegumbo hawu longele Jehova, okwa ti: “Onda kala kaandi hole okuya kokugongala nomiilonga yomomapya.” Okwa kala a hala okulongela Jehova nenyanyu, ihe okwa li ha kala ti ipula kutya omolwashike ihaa kala a nyanyukwa. Okwa ningi po shike mbela?

7 Aaron okwa li i itulile po omalalakano gopambepo ngoka ga kwatela mo okulesha Ombiimbeli, okwiilongekidhila okugongala nokukutha ombinga muko. Okwa tameke okukala ha galikana aluhe. Sho ohole ye yokuhola Jehova ye ende tayi koko, okwa tameke okuninga ehumokomeho pambepo. Okuza mpono, okwa kala ha nyanyukilwa uukokola ondjila, okulonga nayalwe mokukwathela mboka ya gumwa kiiponga yopaunshitwe nosho wo oku ka uvitha kiilongo yilwe. Ngashingeyi Aaron ota longo koBetel noku li omukuluntugongalo. Okwa li u uvitile ngiini omalunduluko ngoka a ningi? Ota ti: “Onda ‘konakona mwene e te mono nkene Jehova omwaanawa.’ Molwaashoka okwa laleka ndje nuuyamba, onda li nda pandula, noshi inyengitha ndje ndi ninge oshindji miilonga ye, naashika oshe etele ndje omayambeko ogendji.”

 8 Omupisalomi okwi imbi a ti: “Mboka haa vulika kOmuwa, oye na uukali auhe” (Lesha Episalomi 34:8-10.) Odhoshili kutya Jehova ihu uvitha nando nayi mboka haye mu longele nuudhiginini. Atuheni paumwene otatu vulu ‘okukonakona nokumona nkene Jehova omwaanawa,’ sho tatu ningi ngaashi tatu vulu miilonga ye. Ngele tatu longele Jehova nomwenyo aguhe, otatu vulu okumona enyanyu ndyoka itaali vulu okuyelekwa nasha.

DHIGININA INO LOLOKA

9, 10. Omolwashike sha simana wu kale ho ‘tegelele Omuwa’ e ku gwanithile omalalakano goye?

9 Sho to longo wu adhe omalalakano goye, kala wa ‘tegelela Omuwa’ e ge ku gwanithile. (Mika 7:7) Jehova oha yambidhidha aluhe aapiya ye aadhiginini, nonando poompito dhimwe otashi vulika e ethe ya tegelele ethimbo ele okupewa uuthembahenda nenge ya tegelele oonkalo dhi lunduluke. Okwa li u uvanekele Abraham okamati, ihe tatekulululwa ngono okwa li e na okukala e na eitaalo neidhidhimiko. (Heb. 6:12-15) Nonando Abraham okwa li a tegelele uule womimvo odhindji Isak a valwe, ina teka omukumo, na Jehova ine mu uvitha nayi.—Gen. 15:3, 4; 21:5.

10 Okutegelela kaku shi okupu. (Omayel. 13:12) Ngele otwa kala tatu ipula niinima mbyoka twa yematela, otashi ke tu teya omukumo. Pehala lyaashono, otashi kala shi li nawa tu longithe ethimbo lyetu mokuhwepopaleka uupambepo wetu. Tala komikalo ndatu moka to vulu oku shi ninga.

11. Omaukwatya geni gopambepo tatu vulu okukokeka, nomolwashike ga simana?

11 Kokeka omaukwatya gopaKriste. Uuna tatu lesha Ombiimbeli nokutedhatedha kuyo otatu kala tu na uunongo, euvoko, oondunge dhokuyoolola, ontseyo nohatu dhiladhila pandunge. Omaukwatya ngoka oga simanenena kwaamboka haya kwatele komeho melongelokalunga lyashili.  (Omayel. 1:1-4; Tit. 1:7-9) Uuna tatu lesha iileshomwa ya kankamena kOmbiimbeli, otatu vulu okumona nkene Kalunga ha dhiladhila miinima oyindji. Esiku kehe ohatu ungaunga niinima ya kwatela mo omainyanyudho, okuzala nokwiiyopaleka, okukwata nawa iimaliwa nosho wo okuungaunga nayalwe. Uuna tatu tula miilonga shoka twi ilonga mOmbiimbeli, otatu ka ninga omatokolo taga nyanyudha Jehova.

12. Ongiini iilyo yegongalo tayi vulu okuulika kutya oyi shi okwiinekelwa?

12 Kala wu shi okwiinekelwa. Kashi na nduno mbudhi kutya tse aamwatate nenge aamwameme, otwa pumbwa okuninga ngaashi tatu vulu miilonga yokulongela Kalunga mbyoka tatu pewa. Nehemia ngoka a li ngoloneya okwa li e na okulangeka po aalumentu yokusila oshimpwiyu iinakugwanithwa mokati koshigwana shaJehova. Okwa li a langeke po oolye? Oomboka haya tila Kalunga noye shi okwiinekelwa. (Neh. 7:2; 13:12, 13) Nokunena “omusilishimpwiyu kehe ota tegelelwa a kale omwiinekelwa.” (1 Kor. 4:2) Aalongi aawanawa ohaya vulu okudhimbululwa mo nuupu.—Lesha 1 Timoteus 5:25.

13. Ongiini to vulu okulandula oshiholelwa shaJosef ngele yalwe taye ku ningi nayi?

13 Etha Jehova e ku kwathele Oshike to vulu okuninga po ngele yalwe taye ku ningi nayi? Otashi vulika wu ya lombwele kutya owu shi uvitile ngiini. Ihe omathimbo gamwe ngele owa kambadhala okwiipopila oto nayipike owala onkalo. Josef okwa li ta ningwa nayi kaamwahe, ihe ine ya kwatela onkone. Konima yethimbo okwa li a lundilwa nokwa tulwa mondholongo shaa li pauyuuki. Onkee ano, okwe etha Jehova e mu wilike momathimbo omadhigu. Oshizemo osha li shike? Ombiimbeli otayi ti: “Oohapu dhOmuwa odhe shi koleke wo.” (Eps. 105:19) Sho uupyakadhi awuhe mbono wa piti po, Josef okwa li i inekelelwa oshinakugwanithwa shi ikalekelwa. (Gen. 41:37-44; 45:4-8) Ngele oto ungaunga nomaupyakadhi ga kwata miiti, galikana Jehova e ku pe uunongo, katuka nokupopya nombili e to mu pula e ku nkondopaleke. Jehova ote ke ku kwathela.—Lesha 1 Petrus 5:10.

NINGA EHUMOKOMEHO MUUKALELE

14, 15. (a) Omolwashike tu na okukala twa tonatela omukalo gwetu gwokuuvitha? (b) Ongiini to vulu okulundulula omikalo dhoye dhokuuvitha shi ikolelela koonkalo? (Tala kethano lyopetameko noshimpungu “ Mbela owu na ehalo okulongitha omikalo dhilwe?”)

14 Paulus okwa ladhipike Timoteus a ti: “Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu. Itonatela ano mwene nosho wo elongo lyoye.” (1 Tim. 4:13, 16) Timoteus okwa adhika nale omuuvithi gwUukwaniilwa a pyokoka. Ihe uukalele we owa li tawu ka kala owala tawu ti sha ngele okwa kala a ‘tonatela’ elongo lye. Ke na okudhiladhila kutya ina pumbwa okuhwepopaleka omukalo gwe gwokulonga aantu. Opo a adhe omitima dhawo, oku na okulundulula omikalo dhe dhoku ya longa. Tu li aauvithi yUukwaniilwa, otwa pumbwa okuninga sha faathana.

15 Olundji momagumbo ihatu adha mo aantu sho tatu uvitha egumbo negumbo. Miitopolwa yimwe, ihatu vulu okuya momagumbo ngoka ga tungwa ge li kumwe nosho wo momahala moka ihaamu yiwa nuupu. Ngele osho shi li ngawo moshitopolwa sheni, omolwashike itoo kongo omikalo dhilwe wu uvithe onkundana ombwanawa?

16. Ongiini uunzapo womontaneho tawu vulu okukala tawu ti sha?

16 Uunzapo womontaneho owo omukalo gumwe gwa dhenga mbanda gwokuuvitha onkundana ombwanawa. Oonzapo odhindji otadhi pondola notadhi mono iizemo iiwanawa mokukutha ombinga miilonga mbyoka. Ohadhi ka uvitha poosasiona dhomashina, pomathikameno goombesa, pomalandithilo, pooparka nopomahala gaayehe galwe. Onzapo ngele oya longitha oondunge dhokuyoolola, otayi vulu okutameka oonkundathana nagumwe, tayi popi kombinga yoonkundana oontalala, tayi pandula aanona yomupulakeni nenge yi mu pule epulo kombinga yiilonga ye. Sho oonkundathana  tadhi yi komeho, omuuvithi ota vulu okutumbula enyolo mOmbiimbeli e te mu pula kutya ota ti ngiini. Olundji shoka omuntu ta yamukula ohashi fala moonkundathana dhopaMbiimbeli.

17, 18. (a) Oshike tashi ku kwathele wu kale wu na omukumo mokugandja uunzapo womontaneho? (b) Omolwashike ho mono oshiholelwa shaDavid shokutanga Jehova oshiwanawa sho to kutha ombinga muukalele?

17 Ngele oho mono oshidhigu okuuvitha montaneho, ino sholola. Eddie, omukokolindjila koNew York City, okwa li ha kakadhala okutameka oonkundathana naantu montaneho. Ihe mokweendela ko kwethimbo, okwa kala e na omukumo. Oshike she mu kwathele? Ota ti: “Pethimbo lyekonakonombiimbeli lyuukwanegumbo wetu, ngame nomukulukadhi gwandje otwa kongo uuyelele wankene tatu vulu okuyamukula mboka taye tu pataneke nosho wo shoka aantu haya pula. Otwa pula wo Oonzapo dhilwe dhi tu kwathele.” Ngashingeyi Eddie oku hole okugandja uunzapo womontaneho.

18 Sho ontseyo yoye tayi ende tayi indjipala nowu na omukumo mokuuvitha onkundana ombwanawa, okuhuma kwoye komeho otaku ki imonikila kwaayehe. (Lesha 1 Timoteus 4:15.) Kapu na omalimbililo kutya oto ka tanga Tate yetu gwomegulu ngaashi David ngoka i imbi a ti: “Onda hala aluhe okupandula Omuwa; itandi hulitha oku mu hambelela. Otandi mu hambelelele iilonga ye; aathiminikwa ayehe naa pulakene e taa nyanyukwa.” (Eps. 34:1, 2) Otashi vulika uukalele woye wu etithe mboka ye na omitima omiwanawa melongelokalunga lyashili.

SIMANEKITHA KALUNGA MOKUNINGA EHUMOKOMEHO PAMBEPO

19. Omolwashike omulongeli gwaJehova omudhiginini ta vulu okukala a nyanyukwa, nonando oku li moonkalo oondhigu?

19 David okwi imbi ishewe a ti: “Omuwa, eshito lyoye alihe otali ku simaneke; aantu yoye otaye ku tanga. Otaa hokolola esimano lyepangelo lyoye notaa uvitha oonkondo dhoye, opo aantu ya tseye iilongankondo yoye nesimano lyoshilongo shoye.” (Eps. 145:10-12) Osha yela kutya oohapu ndhoka otadhi ulike iikala yOonzapo dhaJehova adhihe oondhiginini. Ihe ongiini ngele uukolele nenge uukulupe itawu ku pitike we wu longe oshindji muukalele? Aluhe dhimbulukwa kutya sho to kutha ombinga mokuuvithila onkundana ombwanawa aaniilonga yomoshipangelo nosho wo yalwe, oto longo iilonga iiyapuki mbyoka tayi simanekitha Kalunga ketu omukumithi. Ngele owu li mondholongo molweitaalo lyoye, oto vulu okupopya kombinga yoshili, poompito ndhoka tadhi opalele, naashoka otashi nyanyudha omutima gwaJehova. (Omayel. 27:11) Naangoka e li muukwanegumbo wa topoka palongelokalunga, ota ka nyanyudha Jehova ngele okwa kala a dhiginina omaipyakidhilo ge gopambepo. (1 Pet. 3:1-4) Nokuli nando owu li moonkalo oondhigu, oto vulu okutanga Jehova nokuninga ehumokomeho pambepo.

20, 21. Ngele owi inekelelwa iilonga oyindji mehangano lyaJehova, ongiini to vulu okukala elalekonuuyamba kuyalwe?

20 Jehova ote ke ku yambeka ngele owa tsikile okuninga ehumokomeho pambepo. Otashi vulika ngele owa ningi omalunduluko gontumba monkalamwenyo yoye, to ka vula okukutha ombinga mokuuvithila aantu oshili yaKalunga yi na ondilo. Okuhuma komeho kwoye pambepo nosho wo ombepo yoye yeiyambo otayi vulu okweetela ooitaali ooyakweni uuwanawa kaawu shi okuyelekwa nasha. Oto ka kala wu holike kwaamboka ye hole Jehova megongalo, otaye ke ku pandula notaye ke ku yambidhidha wo omolwoonkambadhala ndhoka ho ningi neifupipiko.

21 Kutya nduno otwa kala tatu longele Jehova omimvo odhindji nenge oomwedhi dhontumba, atuheni otatu vulu okuninga ehumokomeho moku mu longela. Ihe ongiini Aakriste mboka ya pyokoka pambepo taya vulu okukwathela mboka aape ya hume komeho pambepo? Shika otatu ke shi kundathana moshitopolwa tashi landula.