“Otandi mu nongeke elongo lyo opala.”—OMAYEL. 4:2.

OMAIMBILO: 93, 96

1, 2. Omolwashike tu na okudheula yalwe ya vule okupewa iinakugwanithwa yopaKriste?

OKUUVITHA onkundana ombwanawa yUukwaniilwa oko kwa li oshilonga sha simanenena shaJesus. Ihe nando ongaaka, okwa li a longitha ethimbo lye okudheula yalwe ya kale aasita naalongi yokulitha oshigunda shaKalunga. (Mat. 10:5-7) Nonando Filippus okwa li ha kala i ipyakidhila e li omuuvithi gwevaangeli, kapu na omalimbililo kutya okwa li a kwathele oyanakadhona yane ya kale ye shi nawa okulonga yalwe Omanyolo. (Iil. 21:8, 9) Mbela edheulo ndyoka olya simana shi thike peni kunena?

2 Omwaalu gwaantu mboka taya taamba ko onkundana ombwanawa otagu ende tagu indjipala muuyuni awuhe. Aantu mboka aape inaaya ninginithwa natango oya pumbwa okuuva ko kutya osha simana okukala haya konakona Ombiimbeli paumwene. Oye na wo okulongwa okuuvithila yalwe onkundana ombwanawa noku ya longa oshili. Momagongalo getu, aamwatate oya pumbwa okuladhipikwa ya longe nuudhiginini, opo ya kale ya gwana okuninga aayakuligongalo nosho wo aakuluntugongalo. Aakriste ya pyokoka otaya vulu okukwathela mboka aape okupitila ‘melongo lyo opala’ ya hume komeho pambepo.—Omayel. 4:2.

 KWATHELA MBOKA AAPE YA MONE OONKONDO NUUNONGO MOOHAPU DHAKALUNGA

3, 4. (a) Paulus okwa kwatakanitha ngiini okukonakona Omanyolo nokupondola muukalele? (b) Manga inaatu ladhipika aakonakoni yetu ya konakone Ombiimbeli kuyo yene, oshike tu na okuninga?

3 Okukonakona Omanyolo paumwene okwa simana shi thike peni? Eyamukulo otatu li adha moohapu dhomuyapostoli Paulus ndhoka a li a nyolele Aakriste ooyakwawo yokuKolossa a ti: “Onkee ano tse ohatu mu galikanene aluhe okuza kesiku ndyoka tu uvu sha kombinga yeni. Tse otatu indile Kalunga, e mu udhithe Ombepo ye, ndjoka tayi mu pe ontseyo okutseya ehalo lye nuunongo auhe [waKalunga] noondunge. Nena otamu ka vula okukala ngashika Omuwa a hala mu kale, nokulonga aluhe shoka she mu opalela. Okukalamwenyo kweni otaku ka kala ihe kwa yambekwa miilonga ayihe iiwanawa, nontseyo yeni okutseya Kalunga otayi ka koka.” (Kol. 1:9, 10) Aakriste yokuKolossa oya li taya ka kwathelwa kontseyo ndjoka ya vule ‘okukala ngashika Omuwa a hala ya kale noya vule okulonga aluhe shoka she mu opalela.’ Shoka osha li tashi ke ya kwathela ya tsikile ‘okuyambekwa miilonga ayihe iiwanawa,’ unene tuu miilonga yokuuvitha onkundana ombwanawa. Opo omulongeli gwaJehova a kale te mu longele nomupondo, oku na okukala e na ondjigilile yokukonakona Ombiimbeli. Oshi li nawa tu kale hatu kwathele aakonakonimbiimbeli yetu yu uve ko nawa oshinima shika.

4 Manga inaatu kwathela yalwe ya mone uuwanawa mekonakonombiimbeli lyopaumwene, otu na okwiitaala tse yene kutya olya simana. Otwa pumbwa okukala tu na ondjigilile ombwanawa yokukonakona Ombiimbeli paumwene. Oto vulu okwiipula ngeyi: ‘Ngele aanegumbo oya popi sha itaashi tsu kumwe nOmanyolo nenge ya pula epulo edhigu, mbela otandi vulu ngaa okugandja eyamukulo lyi ikolelela kOmbiimbeli? Uuna tandi lesha kombinga yaJesus, Paulus nosho wo yalwe mboka ya li aadhiginini muukalele, mbela ohandi tedhatedha ngaa kunkene uudhiginini wawo wa guma iilonga yandje yokulongela Jehova?’ Atuheni otwa pumbwa ontseyo nomayele okuza mOohapu dhaKalunga. Uuna tatu lombwele yalwe uuwanawa mboka twa mona mekonakonombiimbeli lyopaumwene, otashi vulika tatu ya ladhipike ya mone wo uuwanawa mboka mokukala haya konakona Omanyolo nuukeka.

5. Gandja omaetopo gankene to vulu okukwathela mboka aape ya kale haya konakona paumwene Ombiimbeli pandjigilile.

5 Oto vulu okwiipula ngeyi: ‘Ongiini tandi vulu okudheula omukonakoni gwandje a kale ha konakona Ombiimbeli aluhe?’ Etameko ewanawa olyo oku mu ulukila nkene ho ilongekidhile ekonakono ndyoka ho ningi naye. Otashi vulika wu mu lombwele a leshe uutopolwa wiigwedhelwako yOmbiimbeli membo Omalongo gashili gOmbiimbeli ogeni naanaa? e ta kongo omanyolo ngoka ga tothwa mo. Mu kwathela a kale hi ilongekidhile okugongala nelalakano lyoku ka gandja omatyokosha. Mu ladhipika a kale ha lesha oshifo kehe shOshungolangelo nosho wo Awake! Ngele oha vulu okuya ko-Watchtower Library nenge KONGULUMAMBO MOINTANETA melaka  lye, oto vulu oku mu ulukila nkene hayi longithwa okuyamukula omapulo gOmbiimbeli. Oshizemo, otashi vulika omukonakonimbiimbeli gwoye a ka kale a nyanyukilwa okukonakona paumwene Oohapu dhaKalunga.

6. (a) Ongiini to vulu okukwathela omukonakoni gwoye a kokeke ohole ye yokuhola Ombiimbeli momutima gwe? (b) Omukonakonimbiimbeli otashi vulika a kale a hala okuninga shike, ngele okwa kokeke ohole yokuhola okulesha Omanyolo?

6 Odhoshili kutya katu na okuthininika omuntu a leshe nenge a konakone Ombiimbeli. Pehala lyaashono, otu na okulongitha iilongitho mbyoka twa pewa kehangano lyaJehova tu kwathele omukonakoni a kokeke ohole ye yokuhola Ombiimbeli. Konima yethimbo, omukonakoni ngoka e li nawa otashi vulika a kale u uvite ngaashi omupisalomi ngoka i imbi a ti: “Osho opalela ndje okukala popepi naKalunga. Omuwa Omupangeliawike onde mu ningi egameno lyandje.” (Eps. 73:28) Ombepo yaJehova otayi ka kwathela omukonakoni ngoka ha ningi oonkambadhala noha pandula.

DHEULA MBOKA AAPE YA KALE YE SHI OKUUVITHA NOKULONGA AANTU

7. Jesus okwa li a dheula ngiini aauvithi yonkundana ombwanawa? (Tala kethano lyopetameko.)

7 MuMateus ontopolwa 10, otatu adha mo omalombwelo ngoka Jesus a li a pe aayapostoli ye 12. Pehala lyokupopya iinima oyindji, okwa tumbula owala iitsa mbyoka ya simana. [1] Aayapostoli oya li ya pulakene sho Jesus te ya longo nkene ye na okukala hayu uvitha nomupondo. Opo nduno oya yi ye li ongundu muukalele. Sho ya mono Jesus ta longitha omikalo dha yoolokathana, nziya oya ningi aalongi aanekeka yOohapu dhaKalunga. (Mat. 11:1) Otatu vulu okudheula aakonakonimbiimbeli yetu ya kale aauvithi yonkundana ombwanawa ya pyokoka. Ngashingeyi natu taleni omikalo mbali ndhoka tadhi ya kwathele.

8, 9. (a) Jesus okwa li ha tameke oonkundathana ngiini naantu muukalele? (b) Ongiini tatu vulu okukwathela aauvithi aape ya tameke oonkundathana naantu ngaashi Jesus a li ha ningi?

8 Kala ho popi naantu. Olundji Jesus okwa li ha popi naantu kombinga yUukwaniilwa. Pashiholelwa, okwa li a ningi oonkundathana tadhi ti sha notadhi tungu nomukiintu poluthithiya lwaJakob, popepi noshilando Sikar. (Joh. 4:5-30) Okwa li wo a popi naMateus, omufendelithi, ngoka hi ithanwa Levi. Omavaangeli oga popi owala kashona kombinga yoonkundathana ndhoka, ihe Mateus okwa li a taamba ko ehiyo lyaJesus lyokuninga omulanduli gwe. Jesus okwa li wo a popi naantu oyendji pethimbo lyoshituthi shoka sha li megumbo lyaMateus.—Mat. 9:9; Luk. 5:27-39.

9 Pompito yimwe, Jesus okwa li a popi momukalo gwombili naNatanael, ngoka a li kee hole aantu yokuNasaret. Ihe okupopya kwaJesus okwa li kwe mu inyengitha a lundulule omadhiladhilo ge. Okwa li a tokola okwiilonga oshindji kombinga yaashoka Jesus, omulumentu gwokuNasaret, a li ta longo aantu. (Joh. 1:46-51) Onkee ano, otu na etompelo ewanawa okudheula aauvithi aape ya kale haya vulu okukundathana naantu momukalo omwaanawa noya ngungumana. [2] Mboka tatu kwathele momukalo nguka otashi vulika ya ka kale ya nyanyukwa okumona nkene aanamitima omiwanawa tayi inyenge kokunakonasha kwawo nokoohapu dhawo oombwanawa.

10-12. (a) Jesus okwa kokeke ngiini ohokwe mwaamboka ya li ye na ehalo okupulakena onkundana ombwanawa? (b) Ongiini tatu vulu okukwathela aauvithi aape ya hwepopaleke uunkulungu wawo wokulonga aantu Ombiimbeli?

10 Kokeka ohokwe maantu mboka ya hala okupulakena. Jesus okwa li e na ethimbo efupi okugwanitha po uukalele we. Ihe nonando ongaaka, okwa li a longitha ethimbo lye okukokeka ohokwe maantu mboka ye na ehalo okupulakena onkundana ombwanawa. Pashiholelwa, Jesus okwa li a longo oongundu dhaantu a londa mowato. Oshikando shono, okwa li a kwathele pashikumithalonga Petrus a kwate oohi odhindji e te mu lombwele ta ti: “Okuza ngashingeyi oto ningi omuyuli gwaantu.” Mbela aantu oya li yi inyenge ngiini koohapu dhaJesus ndhoka niilonga ye? Petrus nooyakwawo “oya dhugile oowato dhawo komunkulo noya thigi po iinima ayihe e taa landula Jesus.”—Luk. 5:1-11.

 11 Nikodemus ngoka a li oshilyo shOsanhedrin, oku ulike ohokwe melongo lyaJesus. Okwa li a hala okwiilonga oshindji, ihe okwa li a tila kutya yalwe otaya ka tya ngiini ngele oye mu mono ta popi naJesus montaneho. Jesus okwa li ha tifuka noha yamba po ethimbo lye; okwa li a tsakanene naNikodemus uusiku palwe, yi ilile oyo ayeke. (Joh. 3:1, 2) Oshike tatu ilongo momahokololo ngaka? Omwana gwaKalunga okwa li ha kongo ethimbo a tunge eitaalo lyayalwe. Mbela katu na okukala tu na ehalo lyokuninga omaishunoko nomakonakonombiimbeli naamboka ye na ohokwe?

12 Aauvithi aape otashi vulika ya hwepopaleke uunkulungu wawo wokulonga aantu Ombiimbeli ngele otwa kala hatu longo pamwe nayo muukalele. Otatu vulu oku ya kwathela ya dhimbulukwe mboka yu ulika ohokwe nando onshona. Otatu vulu okupula aauvithi aape ya ye pamwe natse komaishunoko nokomakonakonombiimbeli getu. Ngele otwa dheula nokuladhipika aauvithi aape mboka ye na owino onshona, otashi vulika ya kale ya hala okukokeka ohokwe yayalwe nosho wo okuninga omakonakonombiimbeli kuyo yene. Otaye ki ilonga wo okukala ihaaya teka omukumo nziya, ihe ya kale hayi idhidhimike naadhiginini muukalele.—Gal. 5:22; tala oshimpungu “Osha simana noonkondo okukala omudhiginini.”

DHEULA MBOKA AAPE YA KWATHELE OOITAALI OOYAKWAWO

13, 14. (a) Oto ti ngiingi kombinga yiiholelwa yopaMbiimbeli yaamboka ya ninga omaiyambo omanene omolwayalwe? (b) Omomikalo dhini tadhi longo to vulu okudheula aauvithi aape nosho wo aagundjuka ya kale ye hole aamwatate naamwameme?

13 Omahokololo gOmbiimbeli otaga tsu omuthindo uuthembahenda mboka tu na wokuulukila ‘ooitaali ooyakwetu ohole’ noku ya kwatha. (Lesha 1 Petrus 1:22; Lukas 22:24-27.) Omwana gwaKalunga okwa li a gandja po kehe shimwe, mwa kwatelwa omwenyo gwe, mokuyakula yalwe. (Mat. 20:28) Dorkas “okwa kala aluhe ta longo uuwanawa nota kwatha oohepele.” (Iil. 9:36, 39) Omumwameme gwedhina Maria, gwokuRoma, okwa li i “ihepekele noonkondo” aantu yomegongalo lyawo. (Rom. 16:6) Ongiini tatu vulu okukwathela aauvithi aape yu uve ko kutya osha simana okukwathela aamwatate naamwameme?

Dheula aauvithi aape yu ulike ohole yawo yokuhola ooitaali ooyakwawo (Tala okatendo 13, 14)

14 Oonzapo ndhoka dha pyokoka otadhi vulu opula aauvithi aape ya ka talele po pamwe nayo mboka taye ehama naamboka aakokele. Ngele otashi wapa, aavali otaya vulu oku ka talela po aantu mboka pamwe aanona yawo. Aakuluntugongalo otaya vulu okulonga pamwe nayalwe mokukala haya shilipaleke ngele aamwatate aakokele oye na ngaa iikulya yi li nawa nongele omagumbo gawo oge li ngaa monkalo yi li nawa. Momikalo ndhino, aagundjuka naamboka aape haye endathana nayo otayi ilongo okulongela yalwe iilonga iiwanawa. Omukuluntugongalo gumwe okwa li e hole okutalela po Oonzapo ndhoka dha kala moshitopolwa shokuushayi shoka haya longo, a tale nkene dhi li po. Omumwatate gumwe omugundjuka ngoka e hole olundji oku ka longa pamwe naye okwa mono kutya ayehe megongalo oye na okukala yu uvite ye holike.—Rom. 12:10.

15. Omolwashike sha simana aakuluntugongalo ya kale ye na ohokwe mehumokomeho lyaamwatate megongalo?

15 Molwaashoka Jehova oha longitha aalumentu ya longe aantu megongalo, osha simana aamwatate ya kale ye na uunkulungu wokupopya. Wu li omukuluntugongalo, mbela ito vulu okupulakena komuyakuligongalo sho ti idheula oshipopiwa she? Kekwatho lyoye, ota vulu okuhwepopaleka uunkulungu we wokulonga aantu Oohapu dhaKalunga.—Neh. 8:8. [3]

16, 17. (a) Paulus oku ulike ngiini kutya oku na ohokwe mehumokomeho lyaTimoteus? (b) Aakuluntugongalo otaya vulu ngiini okudheula nomupondo mboka taya ka ninga aakuluntugongalo yomonakuyiwa?

16 Megongalo lyopaKriste omu na ompumbwe onene yokuninga etalelopo lyuusita, onkee ano, mboka taya ka longa oshilonga sha tya ngawo monakuyiwa, oya pumbwa edheulo tali tsikile. Paulus okwa popi iinima ya simana kombinga yankene edheulo li na okugandjwa  sho a lombwele Timoteus a ti: ‘Mumwandje, ikolelela mesilohenda ndyoka tu li na muukumwe naKristus Jesus. Dhiginina oohapu ndhoka u uvu tandi dhi uvitha montaneho yoonzapo oyendji. Dhi gandja kaantu ye shi kwiinekelwa, mboka taa vulu oku dhi longa yakwawo.’ (2 Tim. 2:1, 2) Timoteus okwi ilongo iinima oyindji mokulonga pamwe nomuyapostoli Paulus, ngoka a li omukokele. Okwa tula miilonga shoka a longwa kuPaulus muukalele we nomiilonga yilwe iiyapuki.—2 Tim. 3:10-12.

17 Paulus ine etha okudheula Timoteus. Okwa kala he ende pamwe naye aluhe. (Iil. 16:1-5) Aakuluntugongalo otaya vulu okulandula oshiholelwa shaPaulus mokukala haya yi pamwe naayakuligongalo mboka ya pyokoka komatelelopo guusita mpoka sha pumbiwa. Aakuluntugongalo otaya vulu okupa aamwatate aagundjuka ompito ya mone kutya oya pumbwa edheulo, eitaalo, eidhidhimiko nohole, omaukwatya ngoka omutonateli Omukriste a tegelwa a kale e na. Omulandu nguka otagu dheula ‘aasita yoshigunda shaKalunga’ yomonakuyiwa.—1 Pet. 5:2.

ESIMANO LYOKUDHEULA YALWE

18. Omolwashike okudheulila yalwe iilonga yaJehova ku li oshinima sha simana kutse?

18 Okudheula yalwe okwa simanenena, molwaashoka opu na ompumbwe onene nosho wo oompito odhindji dhokulongela Jehova. Iiholelwa yokudheula yalwe mbyoka ya gandjwa kuJesus naPaulus oyi na natango oshilonga. Jehova okwa hala aapiya ye yokunena ya dheulilwe nawa iilonga yopaKalunga. Kalunga okwe tu pa uuthembahenda wokukwathela mboka kaaye na naanaa owino ya kokeke uunkulungu wawo wokulonga iilonga mbyoka ya pumbiwa megongalo. Sho oonkalo otadhi ende tadhi ningi oondhigu muuyuni, otapu holoka oompito oompe dhokuuvitha, nedheula otali ende tali ningi oshinima sha simana noshe endelela.

19. Omolwashike wu na okukala nuushili kutya oonkambadhala ndhoka to ningi nuudhiginini dhokudheulila yalwe iilonga yaJehova otadhi ka pondola?

19 Odhoshili kutya okudheula aantu ohaku kutha ethimbo ele nohaku pula oonkambadhala. Ihe Jehova nOmwana omuholike otaye ke tu yambidhidha noku tu pa uunongo tu vule okugandja edheulo lya tya ngaaka. Otatu ka nyanukilwa okumona mboka hatu kwathele taya tsikile ‘okukondjela shoka tatu shi ihepekele.’ (1 Tim. 4:10) Onkee ano, natu tsikile okuninga ehumokomeho pambepo mokulongela Jehova iilonga iiyapuki.

^ [1] (okatendo 7) Yimwe yomiinima mbyoka Jesus a popi oombika tayi landula mpaka: (1) Okuuvitha etumwalaka li li mondjila. (2) Okukala wa gwanenwa kwaashoka Kalunga e ku pa. (3) Okuyanda okutompathana naanegumbo. (4) Okwiinekela muKalunga uuna wa taalela omapataneko. (5) Okukala waa na uumbanda.

^ [2] (okatendo 9) Membo Mona ouwa mOfikola yOukalele woPauteokratika, ep. 62-64, omu na omaetopo omawanawa ge na ko nasha nankene tu na okutameka oonkundathana naantu muukalele.

^ [3] (okatendo 15) Embo Mona ouwa mOfikola yOukalele woPauteokratika, epandja 52-61, otali yelitha iitsa ya simana yi na ko nasha nokukala omupopi omwaanawa montaneho.