Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2016

Konga sha shi na ongushu shi vule oshingoli

Konga sha shi na ongushu shi vule oshingoli

Mbela owa mona nale okamanya koshingoli? Aantu owala aashona ye ka mona. Ihe aantu omamiliyona oya mona sha shi na ongushu shi vule oshingoli. Oshinima shoka osho uunongo wopaKalunga, mboka ‘itaawu vulu okulandwa noshingolilela.’—Job 28:12, 15.

MOMIKALO dhimwe, aakonakonimbiimbeli mboka ye na omitima omiwanawa oya fa aakongi yoshingoli. Aakonakoni ya tya ngaaka oya pumbwa okulonga nuudhiginini nokutsikila okukonakona Omanyolo, opo ya mone uunongo wu na ondilo itaayi vulu okuyelekwa nasha. Shi na ko nasha naashika, oshike tatu vulu okwiilonga mokukonakona omikalo ndatu moka oshingoli tashi vulu okumonika?

OWA MONA OKAMANYA KOSHINGOLI

Natu tye ando oto ende pooha dhomulonga e to mono oshinima sha fa okamanya taka toshwa ketango. Oto ka toola po wa nyanyukwa noonkondo. Okashona ke vulike komutse gwokati kokapalwa noka pumba ke vulithe pokawe kongushu lela. Osha yela kutya oto talatala po, wu tale ngele oto mono po ishewe wulwe.

Sha faathana, otashi vulika to dhimbulukwa esiku limwe, sho omukalele gwaJehova a li e ya paayeni a hala a kundathane nangoye etumwalaka lyetegameno okuza mOmbiimbeli. Otashi vulika to dhimbulukwa oshikando shoye shotango wa mona okamanya koshingoli shopambepo, oku shi popya pathaneko. Shoka otashi vulika sha ningwa sho wa mono edhina lyaKalunga, Jehova, oshikando shotango mOmbiimbeli. (Ek. 15:3) Nenge sho wi ilongo kutya oto vulu okuninga kuume kaKalunga. (Jak. 2:23) Mbala owa mono kutya owa mona sha shi na ongushu shi vule oshingoli. Otashi vulika wa kala wa halelela okumona uumanya owundji wopambepo.

OTO TSIKILE OKUMONA OSHINGOLI OSHINDJI

Uupambu woshingoli omathimbo gamwe ohawu kala wa gongala pomatondokelo gomeya nomomilonga. Moomwedhi dhontumba, aakongi yoshingoli mboka haya longo nuudhiginini, ohashi vulika ya mone mo oodola omayovi omilongo musho.

Sho Onzapo yaJehova ya tameke okukonakona Ombiimbeli nangoye, otashi vulika wa li wu uvite wa fa omukongi gwoshingoli a mona oshingoli oshindji. Sho to dhiladhila koovelise dhOmbiimbeli otashi indjipaleke ontseyo yoye, oshinima shoka tashi koleke uupambepo woye. Sho wa kala to tedhatedha ooshili ndhomOmbiimbeli ndhoka dhi na ongushu, owi ilongo nkene to vulu okuhedha kuJehova nokwiikaleka mohole ye wa tegelela e ke ku pe omwenyo gwaaluhe.—Jak. 4:8; Jud. 20, 21.

Ngaashi naanaa omukongi gwoshingoli ha ningi oonkambadhala a mone oshingoli, mbela nangoye oho longo ngaa nuudhiginini wu mone oshili yOmbiimbeli yi na ongushu?

Ngaashi owala omukongi gwoshingoli ta kongo a mana mo a mone oshingoli shi na ongushu, nangoye  otashi vulika wa longa nuudhigini sho to kongo omaliko gopambepo. Konima yokwiilonga ooshili dhopetameko, otashi vulika wa li wa katuka oonkatu ndhoka dhe ku fala mokwiiyapulila Jehova nokuninginithwa.—Mat. 28:19, 20.

TSIKILA NOKUKONGA SHOKA SHI NA ONGUSHU

Omukongi gwoshingoli otashi vulika a adhe uupambu woshingoli memanya. Uupambu wumwe mboka wu li momamanya ngoka otashi vulika wu na oshingoli shi na ongushu lela shoka ta vulu okunyanyagula, opo a mone mo oshingoli oshindji. Petameko sho ta tala memanya, oshingoli otashi vulika a kale kee shi wete. Omolwashike mbela? Otashi vulika omamanya ngoka ge na ongushu ga kale ge na owala oograma 10. Kungawo, omukongi gwoshingoli oku na okuninga oonkambadhala e shi mone.

Oonkambadhala odha pumbiwa wo konima ngele omuntu a tseya ‘iilongwa yopetameko yomuukriste.’ (Heb. 6:1, 2) Owa pumbwa okulonga nuudhinginini wi ilonge iinima iipe niinima mbyoka yi na oshilonga pekonakonombiimbeli lyoye. Oshike to vulu okuninga, opo wu shilipaleke kutya ekonakonombiimbeli lyoye otali ti sha, nokuli nando otashi vulika wa kala ho konakona Omanyolo uule womimvo?

Kala wu na ehalo lyokwiilonga. Gandja eitulomo kuuyelele mboka to konakona. Tsikila okuninga oonkambadhala, noto ka mona kutya Ombiimbeli oyi na uunongo wopaKalunga newiliko li na ongushu lela. (Rom. 11:33) Opo ontseyo yoye yokutseya Omanyolo yi koke, longitha nawa iilongitho yokukonga uuyelele mbyoka yi li melaka lyoye. Konga neidhidhimiko ewiliko ndyoka wa pumbwa nosho wo omayamukulo gomapulo gOmbiimbeli. Pula yalwe kutya omanyolo geni niitopolwa yini ya mona tayi kwathele notayi ladhipike. Kundathana nayalwe iitsa ya simana mbyoka wa mona sho to konakona Oohapu dhaKalunga.

Odhoshili kutya elalakano lyoye kali shi owala okukala wu na ontseyo oyindji. Omuyapostoli Paulus okwe tu londodha a ti kutya “okutseya otaku fala omuntu meinenepeko.” (1 Kor. 8:1) Onkee ano, longa nuudhiginini, opo wu kale omwiifupipiki nowu kale wu na eitaalo lya kola. Elongelokalunga lyuukwanegumbo nekonakonombiimbeli otali ke ku kwathela wu kale metsokumwe nomithikampango dhaJehova notali ke ku inyengitha wu kwathele yalwe. Komeho gaayihe, oto ka kala wa nyanyukwa, molwaashoka owa mona sha shi na ongushu shi vule oshingoli.—Omayel. 3:13, 14.