Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Apilili 2017

Ombepo yoye yokwiiyamba nayi hambelelithe Jehova!

Ombepo yoye yokwiiyamba nayi hambelelithe Jehova!

‘Hambeleleni Omuwa! aantu oya zimine nenyanyu.’ —  AATOK. 5:2.

OMAIMBILO: 84, 75

1, 2. (a) Elifas naBildad oya popi shike kombinga yoonkambadhala dhetu dhokulongela Kalunga? (b) Jehova oku ulike ngiini nkene u uvite?

OMBIIMBELI otayi ti: “Omuntu ota vulu tuu okwoopalela Kalunga? Omunandunge ote mu kwatha tuu sha? Ngele ngoye omuyuuki, otashi kwatha shike Omunankondoawike? Ota likola po shike, oondjila dhoye ngele kadhi na oshipo?” (Job 22:1-3) Owi ipulile nale kombinga yomayamukulo gomapulo ngoka? Sho Elifas, Omuteman, e ga pula Job oshikando shotango, Elifas okwa li i itaala kutya eyamukulo oaawe. Kuume kaJob, Bildad, Omushuak, okwa li nokuli a ludhike kutya aantu itaya vulu okukala aayuuki koshipala shaKalunga. —  Lesha Job 25:4.

2 Aahekeleki yiifundja mbaka oya li taya ti kutya oonkambadhala dhetu dhokulongela Jehova kadhi na oshilonga kuye nonokutya okwe tu tala ko twa fa embilimbili, ezinyo nenge okapuka kowala. (Job 4:19; 25:6) Pakutala kwaashoka, otashi vulika tu thike pehulithodhiladhilo kutya Elifas naBildad oya li yu ulike eifupipiko. (Job 22:29) Ngele owa thikama kondungu yondundu ondeendeka nenge wa talele mekende lyondhila yi li mombanda, iilonga yaantu otashi vulika yi monike ya fa iishona. Mbela Jehova osho ngaa a tala ko oonkambadhala dhetu dhokwaambidhidha iilonga ye yUukwaniilwa,  sho te tu tala okuza megulu? Jehova oku ulike nkene u uvite, sho a geele Elifas, Bildad naSofar, omolwokupopya iifundja, ihe okwa li a hokwa Job nokwe mu ithana “omuntu gwandje.” (Job 42:7, 8) Shika otashi ulike lela kutya omuntu ota vulu “okwoopalela Kalunga.”

‘OTASHI KWATHA KALUNGA SHIKE?’

3. Elihu okwa ti shike kombinga yoonkambadhala dhetu dhokulongela Jehova, nokwa li a hala okutya ngiini?

3 Elihu ka li a pukululwa kuJehova, sho a pula ngeyi: “Ngele ngoye omuyuuki, otashi mu kwatha shike [Kalunga], nenge ota taamba shike moshikaha shoye?” (Job 35:7) Mbela Elihu okwa li a hala kutya oonkambadhala dhetu miilonga yaJehova kadhi na oshilonga? Aawe. Okwa li ta ti kutya Jehova ini ikolelela kiilonga mbyoka tatu mu longele. Jehova ina pumbwa sha. Itatu vulu oku mu ninga omuyamba nenge omunankondo. Mepingathano naashono, uuwanawa kehe, oshipewa kehe noonkondo ndhoka tu na, oyi li omagano ga za kuye noha tala nkene tatu ga longitha.

4. Jehova oha tala ko ngiini iilonga mbyoka tatu longele yalwe?

4 Iilonga mbyoka hatu longelathana, omolwohole yetu yuudhiginini, Jehova oha kala e wete oye te yi longelwa. Omayeletumbulo 19:17 otayi ti: “Ngoka ta sile ohepele ohenda, ota pungula kOmuwa, Omuwa ote ke mu futila iilonga ye iiwanawa.” Mbela enyolo ndika otali ti kutya Jehova oha kala e wete kehe oshilonga oshiwanawa tashi longelwa mboka aaifupipiki? Mbela otu na okuthika pehulithodhiladhilo kutya Omushiti gwaayihe oku uvite e na ongunga kaantu yowala, mboka taya longo iilonga yesilohenda? Mbela iilonga mbyoka okwe yi tala ko ya fa omikuli ndhoka ha futile po, mokukala e ya hokwa nomoku ya yambeka? Eeno. Shika osha kolekwa kOmwana. —  Lesha Lukas 14:13, 14.

5. Omapulo geni tatu ka kundathana ngashingeyi?

5 Jehova okwa li a hiya omuhunganeki Jesaja a popye peha Lye, opo u ulike kutya okwa hala aantu aadhiginini ya kuthe ombinga miilonga yokugwanitha po elalakano Lye. (Jes. 6:8-10) Jesaja okwa taamba ko ehiyo ndyoka nehalo ewanawa. Kunena, aantu omayovi otayu ulike ombepo ndjoka yokutya “otandi yi! Tuma ndje!” mokutaamba ko iinakugwanithwa iidhigu miilonga yaJehova. Natango, otashi vulika gumwe i ipule ta ti: ‘Mbela oonkambadhala dhandje odhi na ngaa oshilonga? Nonando Jehova okwa pitika ndje ndi iyambe nondi kuthe ombinga miilonga ye, mbela ita ka gandja ashihe shoka sha pumbiwa a gwanithe po elalakano lye kutya nduno ondi longe shi thike peni miilonga ye?’ Iiningwanima mbyoka ya li ya ningwa pethimbo lyaDebora naBarak, otayi tu kwathele tu yamukule omapulo ngoka.

OYA KWATWA KUUMBANDA, IHE KALUNGA OKWE YA NKONDOPALEKE

6. Eyooloko lini lya li pokati kAaisraeli netangakwiita lyaJabin?

6 Aaisraeli oya kala taya ‘tyakalekwa’ kuJabin, omukwaniilwa Omukaanani, uule womimvo 20. Oya li nokuli haya kala ya tila okuza mo momagumbo. Ngele tashi ya piita, oya li ye na omatati ganathangwa kutya nduno oongoka gokukondja nogokwiigamena, omanga aatondi yawo ye na omatembakwiita giiyela 900. —  Aatok. 4:1-3, 13; 5:6-8. *

7, 8. (a) Omalombwelo geni Jehova a li a pe Barak? (b) Aaisraeli oya li ya sindi ngiini etangakwiita lyaJabin? (Tala kethano lyopetameko.)

7 Jehova okwa li a pe Barak elombwelo lya yela okupitila momuhunganeki omukiintu, Debora, a ti: “Kutha aalumentu omayuvi  omulongo momazimo gaNaftali nogaSebulon, u ya fale kondundu Tabor. Otandi eta Sisera, ondjayi yetangakwiita lyaJabin, e ku kondjithe pomulonga Kishon. Ote ke ya nomatembakwiita giiyela naakwiita ye, ihe otandi mu gandja miikaha yoye.” —  Aatok. 4:4-7.

8 Elombwelo ndyoka olya taandele. Aalumentu mboka yi iyamba oya gongala pondundu Tabor. Barak ka li a mana po ethimbo, ihe okwa landula omalombwelo gaJehova. (Lesha Aatokolihapu 4:14-16.) Pethimbo lyolugodhi olunene ndoka lwa li muTaanak, opwi inyenge omipwalakato ombadhilila ndhoka dha vundakanitha aantu. Barak okwa tidha etangakwiita lyaSisera sigo okuHaroshet, ondjila ndjoka yi na oshinano shookilometa 24. Manga olugodhi lu li metifa, Sisera okwa thigi po etembakwiita lye e ta matukile kuZaanannim, popepi naKedesh. Okwa ka konga egameno motenda yaJael, mukadhaHeber Omukeni, nokwa yakulwa kuJael. Okwa li a tatuka ontulo komvulwe nokwa kwatwa koomposi. Kungeyi, osha li oshipu kuJael a katuke nuulaadhi a dhipage Sisera. (Aatok. 4:17-21) Omutondi gwaIsraeli okwa sindika! *

IIKALA YA YOOLOKATHANA YOKWIIYAMBA

9. MAatokolihapu 5:20, 21 omwa popiwa uuyelele wuni wu na ko nasha nokukondjitha Sisera?

9 Aatokolihapu ontopolwa 4 no 5 odhi na okukonakonwa pamwe, oshoka kehe yimwe oya popya uuyelele kaawu li montopolwa onkwawo. Pashiholelwa, Aatokolihapu 5:20, 21 otayi ti: “Oonyothi odha kondjo okuza kealelo, nkene dha taakana egulu, odha kondjitha Sisera. Efundja lyomuKishon olye ya kungulula po.” Mbela shika oshu ukitha kekwatho lyaayengeli nenge oonyothi dho dhene dha zi kegulu? Enyolo inali shi popya. Kakele kekwatho lyaKalunga, oshike ishewe tashi vulu okweetitha omvula yepoola ndjoka ya loko pethimbo nopehala lyo opala, opo omatembakwiita 900 ga tyuulile? MAatokolihapu 4:14, 15, esindano olya popiwa lyu ukithwa kuJehova, iikando itatu. Kapu na nando ogumwe gwomAaisraeli 10 000 a li ta vulu okwiitangela esindano ndyoka.

10, 11. “Meros” oshike, nomolwashike sha li sha thingwa?

10 Shoka oshihokithi unene osho kutya sho Debora naBarak yi imbi eimbilo lyesindano, oya tanga Jehova, sho e ya pe esindano pashikumithalonga. Oyi imbi taya ti: “Omuyengeli gwOmuwa okwa ti: ‘Thingeni Meros, aantu yaahoka naa thingwe, naa thingwe. Yo inaye ya okukwatha Omuwa, okukondjela Omuwa mengathithi lye.’” —  Aatok. 5:23.

11 Meros osha li sha thingwa lela momukalo ngoka itaatu vulu okuhokolola. Mbela osha li oshilando shi na aakalimo mboka ya li inaaya hala okwiiyamba ya ye kolugodhi? Ngele osha li mondjila ndjoka Sisera a longitha, opo a fadhuke po, mbela aakalimo yasho oya li ye na ompito yoku mu kwata, ihe inaye shi ninga? Oshe ende ngiini ya kale inaayu uva ehiyo lyaJehova li na ko nasha naaiyambi? Aantu omayovi omulongo yomoshitopolwa shawo oya li ya gongelwa ya ye kolugodhi. Kala ando wa fa wu wete aakalimo yomuMeros ya tala omukwiita a omukolokoshi, ta matuka momapandaanda gawo oye awike ta kongo ekwatho. Mbela ndjika kaya li tuu ompito ombwanawa kuyo ya humithe komeho elalakano lyaJehova nokuyambekwa kuye? Pehala lyokulongitha ompito ndjoka ya ambidhidhe Jehova, oyu ulike okwaanakonasha. Iikala yawo oya li ya yooloka ko kuyaJael ngoka a katuka nuulaadhi ngaashi sha popiwa moovelise dha landula ko. —  Aatok. 5:24-27.

12. Eyooloko lini li li pokati kiikala yaantu mboka ya popiwa mAatokolihapu 5:9, 10, naashoka oshi na oku tu guma ngiini kunena?

12 MAatokolihapu 5:9, 10 otu wete mo eyooloko  pokati kiikala yaamboka ya yi kolugodhi naBarak noyaamboka inaaya ya ko. Debora naBarak oya pandula ‘aakwatelikomeho yalsraeli, mboka ya yi naantu mboka ya zimine nenyanyu.’ Kaya li tuu ya yooloka ko ‘kwaamboka ya londa kuusino uutokele,’ yi inenepeka noinayi iyamba, ‘kwaamboka ya kuutumba piithala’ ya panda onkalamwenyo yuuzeko ‘nokwaamboka taya lyanga akuhe’! Oya li taya nyanyukilwa onkalamwenyo, omanga yakwawo ye li kolugodhi pamwe naBarak moondjila dha silukila dhaTabor dhi na omamanya nomolusilu lwomulonga Kishon, ndoka lwa li lu na omatapa. Ayehe mboka ya li taya nyanyukilwa onkalamwenyo oya lombwelwa taku ti: “Shi hokololeni!” Oya li ya pumbwa okutedhatedha kompito ndjoka ya hunutha yokwaambidhidha iilonga yaJehova. Mboka taya longele Jehova nonyalo, nayo oya pumbwa okutedhatedha kombinga yaashoka.

13. Iikala yaantu yomezimo lyaReuben, lyaDan nolyaAser oya yooloka ko ngiini kwaambyoka yaantu yomezimo lyaSebulon nolyaNaftali?

13 Mboka yi iyamba, oya li ya mono nkene Jehova ha tumbalekitha uunamapangelo we. Oya li ye na oshindji okupopya, sho taya “hokolola omasindano gOmuwa.” (Aatok. 5:11) Kombinga onkawo, ezimo lyaReuben, lyaDan nolyaAser oga popiwa mAatokolihapu 5:15-17 kutya oga kala owala taga gandja unene eitulomo kiinima yawo yopaumwene, pehala lyokulonga iilonga yaJehova. Iinima mbyoka ongaashi iigunda yoonzi, oosikepa nomatulilo goosikepa. Mepingathano naashono, ezimo lyaSebulon nolyaNaftali oga “hupula oomwenyo dhawo,” opo ga ambidhidhe Debora naBarak. (Aatok. 5:18) Iikala yaantu ya yoolokathana yi na ko nasha niilonga yokwiiyamba otayi tu longo oshinima sha simana.

“HAMBELELENI OMUWA!”

14. Ohatu ambidhidha ngiini uunamapangelo waJehova kunena?

14 Kunena, ihatu kutha ombinga miita yo yeneyene, ihe otu na uuthembahenda wokuulika uulaadhi wetu miilonga yokuuvitha. Mehangano lyaJehova omu na ompumbwe onene yaaiyambi shi vulithe nale. Aamwatate naamwameme omamiliyona oyi iyamba ya  longe miilonga yi ili noyi ili yethimbo lyu udha ye li aakokolindjila, Aabetel naatungi yIinyanga yUukwaniilwa. Oyendji kutya nduno aakuluntu nenge aagundjuka, ohayi iyamba piigongi iishona niinene. Dhiladhila wo kaakuluntugongalo mboka ye na iinakugwanithwa iinene mOokomitiye dhOkukwatathana nIipangelo nosho wo mOshikondo shiigongi yoshitopolwa. Kala wu na uushili kutya Jehova okwa pandula noonkondo ombepo yoye yeiyambo nokapu na siku e yi dhimbwe. —  Heb. 6:10.

Manga inoo ninga etokolo, tala kutya otali ka guma ngiini aanegumbo lyoye negongalo (Tala okatendo 15)

15. Oshike tashi vulu oku tu kwathela tu mone kutya katu na iikala yokwaanakonasha, ngele tashi ya piilonga yaJehova?

15 Onawa kehe gumwe i ipule ngeyi: ‘Mbela ohandi ethele po owala yalwe oyo ya longe oshindji miilonga yaJehova? Mbela ohandi gandja eitulomo unene komaliko, shoka tashi imbi ndje ndi ulike ombepo yeiyambo? Mbela ondi na eitaalo nuulaadhi ndi longithe kehe shoka ndi na, opo ndi vulike kelombwelo lyaJehova lya yela, ngaashi Barak, Debora, Jael naaiyambi 10 000 ya ningile? Ngele otandi dhiladhila okutembukila koshilando nenge koshilongo shilwe hoka tandi ka mona uuhupilo wu li nawa, mbela ohandi galikana ngaa ndi mone kutya otashi ka guma ngiini aanegumbo yandje negongalo?’ *

16. Oshike tatu vulu oku pa Jehova shoka kee na nale?

16 Jehova okwe tu lenga, sho e tu pitika tu ambidhidhe uunamapangelo we. Okuza ngaa petameko, Satana okwa heke aantu ya ambidhidhe epangelo lye ewinayi, ihe ngele tatu ambidhidha epangelo lyaJehova, otatu ulike kutya otwa gama kuye. Oha kala a nyanyukwa, uuna eitaalo nuudhiginini tayi tu inyengitha tu ulike ombepo yeiyambo. (Omayel. 23:15, 16) Uuna tatu mu ambidhidha, ota vulu okuyamukula Satana ngoka te mu sitha ohoni. (Omayel. 27:11) Onkee ano, mokukala hatu vulika nuudhiginini, otatu pe Jehova oshinima shoka a tala ko shi na ondilo, shoka hashi mu nyanyudha.

17. Aatokolihapu 5:31 otayi ti shike kombinga yonakuyiwa?

17 Masiku evi otali ka kala lyu udha aantu mboka haya ambidhidha owala uunamapangelo waJehova. Otwa tegelela esiku ndyoka nondjuulukwe! Otatu imbi ngaashi Debora naBarak tatu ti: “Omuwa, aatondi yoye ayehe naa se ngaaka, ihe aaholike yoye naa yele ongetango tali piti.” (Aatok. 5:31) Oohapu ndhika otadhi ka gwanithwa, sho Jehova ta ka hanagula po uuyuni waSatana wa kolokosha. Ngele iita yaArmagedon ya tameke, itapu ka pumbwiwa aantu ya kondjithe omutondi. Pethimbo ndyoka otatu ka ‘thikama owala twa tegelela, twa tala nkene Omuwa te tu pe esindano.’ (2 Ondjal. 20:17) Manga twa tegelela ethimbo ndyoka, otu na oompito odhindji dhokwaambidhidha iilonga yaJehova tu na omukumo nuulaadhi.

18. Ombepo yoye yeiyambo oyi na okuguma ngiini aantu mboka haya mono mo uuwanawa muyo?

18 Debora naBarak oyi imbile ya ti: ‘Hambeleleni Omuwa! Aantu oya zimine nenyanyu.’ Osho ya li ya tameke eimbilo lyesindano ngawo, taya tanga Omukombandambanda, ihe haishitwa yontumba. (Aatok. 5:1, 2) Sha faathana kunena, ombepo yoye yeiyambo nayi inyengithe ayehe mboka haya mono mo uuwanawa, ya ‘hambelele Omuwa!’

^ okat. 6 Omatembakwiita ngoka oga li ge na omagongamwele ga honga, omale nomathimbo gamwe oga ngolyoka ga homekwa mooakisa dhomatemba. Olye ta vulu okukondjitha etangakwiita li na omatemba omanene nomatilithi ga tya ngawo?

^ okat. 8 Uuyelele wa gwedhwa po kombinga yehokololo ndika ehokithi, ‘Owu uluka ko ngaashi yina yaIsraeli’ owu li mOshungolangelo ye 1 Septemba 2015.

^ okat. 15 Tala oshitopolwa “Anxiety About Money” mOshungolangelo ye 1 Januali 2015.