Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2017

Oto vulu okukala omwiifupipiki, nonando oto makelwa

Oto vulu okukala omwiifupipiki, nonando oto makelwa

Kala muukumwe nomeifupipiko naKalunga ketu.’ MIKA 6:8.

OMAIMBILO: 48, 80

1-3. Omupolofeti gwokuJuda ngoka inaa tumbulwa kedhina okwa li a ndopa okuninga shike, noshizemo osha li shini? (Tala kethano lyopetameko.)

PETHIMBO omukwaniilwa Jeroboam ta pangele, Jehova okwa li a tumu omupolofeti okuza kuJuda a fale etumwalaka lyepangulo lya kwata miita komukwaniilwa omushunimonima Omwiisraeli. Omupolofeti omwiifupipiki nomudhiginini gwaJehova Kalunga okwa li a thikitha etumwalaka lyaKalunga, na Jehova okwa li e mu gamene kuJeroboam omukwanyanya. —  1 Aak. 13:1-10.

2 Sho omupolofeti u uka kegumbo, okwa tsakanene ombadhilila nomusamane omukulupe gwopopepi naBetel. Omusamane nguka okwa li i iti kutya oye omupolofeti gwaJehova. Okwa li a kengelele omulumentu omugundjuka kaa vulike kelombwelo lyaJehova ndyoka tali ti: ‘Ino lya nenge ino nwa sha noino shuna kegumbo nondjila ndjoka we ya nayo.’ Sho omupolofeti ngoka inaa vulika, Jehova ka li e shi nyanyukilwa. Konima yethimbo sho omupolofeti gwaJehova u uka kegumbo, okwa adhika konime mondjila, e tayi mu dhipaga. —  1 Aak. 13:11-24.

3 Omolwashike omupolofeti ngoka omwiifupipiki a kwatwa kuuntsa e ta yi pamwe nomusamane omukulupe? Ombiimbeli inayi shi  popya, ihe otashi vulika a li a dhimbwa kutya okwa li e na ‘okukala muukumwe nomeifupipiko naKalunga.’ (Lesha Mika 6:8.) MOmbiimbeli, okukala muukumwe naJehova otashi ti kutya okukala twe mu inekela, okuyambidhidha uunamapangelo we nosho wo okulandula omalombwelo ge. Omuntu omwiifupipiki oha kala e shi kutya ota vulu okukala ha popi ethimbo nethimbo natate gwe omunahole nomunankondo. Omupolofeti okwa li ta vulu okupula Jehova a yelithe elombwelo lye, ihe Omanyolo inage shi popya kutya okwe shi ninga. Omathimbo gamwe natse otashi vulika tu na okuninga omatokolo ga kwata miiti, ihe otashi vulika kaatu na naanaa uuyelele wa yela nawa. Ngele otwi ifupipike e tatu kongo ewiliko lyaJehova otashi ke tu kwathela tu yande omayono ga kwata miiti.

4. Oshike tatu ki ilonga moshitopolwa shika?

4 Moshitopolwa sha zi ko, otwa li twi ilongo kutya omolwashike eifupipiko lya simana kAakriste nonokutya olya kwatela mo shike. Mbela oonkalo dhini tashi vulika dhi tule eifupipiko lyetu memakelo? Ongiini tatu vulu okukokeka uukwatya mbuka, opo tu vule okukala aaifupipiki, nonando otu li moonkalo ondhigu? Omapulo ngaka otaga ka yamukulwa, sho tatu ka kundathana omikalo ndhoka dhi shiwike nawa, ndhoka hadhi vulu okutula eifupipiko lyetu memakelo. Otatu ka tala wo kunkene tatu vulu okukatuka pandunge monkalo kehe. —  Omayel. 11:2.

UUNA OONKALO DHETU DHA LUNDULUKA

5, 6. Barsillai okwa li u ulike ngiini eifupipiko?

5 Omukalo moka hatu inyenge ngele oonkalo nenge iinakugwanithwa yetu ya lunduluka, otagu vulu okuulika ngele otu na ngaa eishonopeko. Omusamane omukulupe gwomimvo omilongo hetatu, Barsillai, okwa li a pulwa komukwaniilwa David e ye a kale muuwa we, shoka otashi ulike kutya okwa li a simanekwa lela. Okutaamba ko ehiyo lyomukwaniilwa David osha li tashi ke mu pa ompito yokunyanyukilwa eendathano naye, ihe nonando ongawo, Barsillai okwa li a tindi. Mbela omolwashike? Omolwaashoka okwa li e wete a kulupa, onkee, okwa li a lombwele David kutya ka li a hala oku mu pa omukundu. Onkee ano, okwa li e mu pe Kimham gumwe gwomoyanamati oye a ka kale mo pehala lye. —  2 Sam. 19:31-37.

6 Eifupipiko olya li lya kwathele Barsillai a ninge etokolo lyomondjila. Ka li a tindi ehiyo lyaDavid, molwaashoka a li inaa hala oshinakugwanithwa nenge molwaashoka a li a hala okukala kee na omaipyakidhilo gasha monkalamwenyo ye yuukulupe. Okwa li a mono kutya ita vulu we okuninga oshindji ngaashi shito omolwonkalo ye ndjoka ya lunduluka. Ka li a hala okutaamba ko iinakugwanithwa oyindji mbyoka itaa vulu oku yi gwanitha po. (Lesha Aagalati 6:4, 5.) Ngele otwa gandja eitulomo koondondo, kuuyamba nenge kesimano, otashi ka kokeka owala iikala yokwiihola mwene, ethigathanopo nenge okuuvithwa nayi. (Gal. 5:26) Eifupipiko ohali tu kwathele atuhe tu gandje eitulomo kwaashoka tatu vulu okuninga nohali tu kwathele tu ninge oonkambadhala dhokusimanekitha Kalunga nosho wo okuninga ngaashi tatu vulu, tu kwathele yalwe. —  1 Kor. 10:31.

7, 8. Eifupipiko otali vulu ngiini oku tu kwathela tu yande okwiiyinekela tse yene?

7 Iinakugwanithwa iinene olundji ohayi endele pamwe noonkondopangelo, naashoka otashi vulu okumakela eifupipiko lyetu. Nehemia sho u uvu kutya aantu muJelusalem oye li muudhigu, okwa galikana kuJehova tashi zi komutima. (Neh. 1:4, 11) Jehova okwa yambeke Nehemia sho omukwaniilwa Artakserkses e mu langeke po omunashikandjo gwoshikandjo. Nonando okwa li e na ondondo ya simana, omuyamba nokwa li e na oonkondopangelo, Nehemia ini inekela nando moonkondo dhe mwene. Okwa kala nokweenda pamwe naKalunga. Okwa tsikile okukonga ewiliko lyaJehova mokukala ha konakona  Ompango ye. (Neh. 8:1, 8, 9) Nehemia ina kala ta pangele yalwe, pehala lyaashono, okwa kala te ya kwathele niiniwe ye. —  Neh. 5:14-19.

8 Oshiholelwa shaNehemia oshe tu ulukila nkene eifupipiko tali vulu oku tu kwathela kaatu kale twi iyinikela tse yene uuna oshinakugwanithwa shetu sha lunduluka nenge twa pewa iinakugwanithwa ya gwedhwa po. Ngele omukuluntugongalo okwa kala owala i inekela moondunge dhe mwene, otashi vulika a tameke okuungaunga niinima yegongalo inaa galikana kuJehova. Yalwe otashi vulika ya ninge omatokolo, opo nduno taya galikana konima sho ye ga ninga nale. Mbela shono otashi ulike ngaa kutya otwi ifupipika? Omuntu ngoka i ifupipika oha dhiladhila tango kuKalunga nokwaashoka ta vulu okuninga miilonga yaKalunga. Shoka tatu vulu okuninga hasho sha simana. Unene tuu uuna twa taalelwa koonkalo ndhoka hatu iyadha mudho shito, otu na okukotoka twaa igameke koondunge dhetu yene. (Lesha Omayeletumbulo 3:5, 6.) Tu li iilyo yegumbo lyaKalunga, otwi ilonga okugwanitha po iinakugwanithwa yetu yuukwanegumbo nenge yomegongalo, pehala lyokukala twi ihalela pombanda. —  1 Tim. 3:15.

UUNA TO NINGWA NAYI NENGE TO PANDULWA

9, 10. Eifupipiko otali tu kwathele ngiini tu sinde okuningwa nayi?

9 Otashi vulika shi kale oshidhigu okupangela omaiyuvo getu uuna tatu ningwa nayi. Hanna okwa kala ha lili olundji, molwaashono Peninna, omukondjithi gwe, a kala he mu ehameke nohe mu sitha ohoni. Hanna okwa li e holike komusamane gwe, ihe ka li ha mono aanona. Konima yethimbo sho a li ta galikana motempeli, Omuyambimukuluntu Eli okwe mu lundile kutya okwa kolwa. Hanna okwa li ta vulu okugeya, ihe nonando ongawo, eifupipiko lye olye mu kwathele a kale a gundjila nokwa li e mu yamukula momukalo gwesimaneko. Egalikano lye tali gumu omutima olya nyolwa mOmbiimbeli. Olya li tali ulike kutya oku na lela eitaalo nokwa pandula. —  1 Sam. 1:5-7, 12-16; 2:1-10.

10 Eifupipiko otali vulu oku tu kwathela tu ‘sinde uuwinayi nuuwanawa.’ (Rom. 12:21) Onkalamwenyo muuyuni mbuka waSatana olundji  kayi li pauyuuki, notwa pumbwa okukondjitha okugeyithwa keihumbato lyaakolokoshi. (Eps. 37:1) Ohashi ehameke noonkondo uuna pokati ketu naamwatate nenge naamwameme yopambepo pwa holoka uupyakadhi. Ngele shoka osha ningwa, omuntu omwiifupipiki oha holele Jesus. Ombiimbeli otayi ti: ‘Ina tuka mboka ye mu tuku; ihe okwi inekele Kalunga, omupanguli omuyuuki.’ (1 Pet. 2:23) Jesus okwa li e shi kutya egeelo olyaJehova mwene. (Rom. 12:19) Aakriste nayo otaya ladhipikwa ya kale aaifupipiki nokaaya ‘shunithile uuwinayi ngoka te ya ningile uuwinayi.’ —  1 Pet. 3:8, 9.

11, 12. (a) Ongiini tatu vulu okukala aaifupipiki uuna tatu pandulwa sha pitilila? (b) Ongiini tatu vulu okuulika kutya otu na eifupipiko momukalo moka hatu zala nokwiiyopaleka nomeihumbato lyetu?

11 Okupandulwa sha pitilila otaku vulu oku tu ningitha tu kale kaatu na eishonopeko. Natu taleni nkene Ester a li i inyenge nawa sho a li a pewa esimano lya pitilila. Okwa li omwaanawa kaaku na we nokwa li o opalekwa nomagadhi gondilo uule womvula. Esiku kehe okwa li ha kala pamwe naakadhona oyendji aagundjuka ya za moshilongo shaPersia, mboka ya li pamwe naye methigathano lyokuhogololwa komukwaniilwa. Okwa kala e na esimaneko nokwa ngungumana. Ina kwatwa nando keinenepeko, nonado okwa li a hogololwa a ninge omukulukadhi gwomukwaniilwa. —  Est. 2:9, 12, 15, 17.

Mbela okuzala nokwiiyopaleka kwetu otaku simanekitha Jehova nosho wo yalwe nenge otaku ulike okwaa na eifupipiko? (Tala okatendo 12)

12 Eifupipiko ohali tu kwathele aluhe twi iyopaleke notu zale oonguuwo dhi shi okutalwa notwi ihumbate momukalo omwaanawa. Pehala lyokukala twa hala tu fuule aantu nokukala tatu itanga, natu ulike ‘ombepo yi na ombili noya ngungumana.’ (Lesha 1 Petrus 3:3, 4; Jer. 9:23, 24) Otashi vulika tu ulike iikala yuuntsa miilonga yetu nomokupopya kwetu. Pashiholelwa, otashi vulika tu yi ulike omolwiinakugwanithwa yi ikalekelwa mbyoka tu na, molwuuyelele wontumba mboka tu shi nenge molwekwatathano ndyoka tu na naamwatate ye na iinakugwanithwa. Nenge tashi vulika tu yelithe iinima momikalo moka twa fa otse yene twe yi dhiladhila, nonando yalwe nayo oye eta po omadhiladhilo gawo. Jesus okwe tu tulila po oshiholelwa oshiwanawa, olundji okwa li ha popi ta totha mOmanyolo gOshihebeli. Okwa li ha popi momukalo gweifupipiko, opo aapulakeni ye ya tseye kutya shoka a popi inashi za muunongo we mwene, ihe osha za kuJehova. —  Joh. 8:28.

UUNA TO UNGAUNGA NOONKALO OONDHIGU

13, 14. Eifupipiko otali vulu ngiini oku tu kwathela tu ninge omatokolo ge li mondjila?

13 Omukalo gumwe moka eifupipiko lyetu tashi vulika li makelwe, omokuninga omatokolo. Sho omuyapostoli Paulus a li muKesarea, omuhunganeki Agabus okwa li e mu lombwele kutya ngele okwa yi kuJelusalem, ota ka mangwa po. Okwa ti wo kutya otashi vulika a dhipagwe nokuli. Molwaashoka aamwatate oya li ya tila, oye mu ladhipike kaa ye ko. Nonando ongawo, Paulus ina teka omukumo, noka li a mbandapala nenge i iyinekela ye mwene. Okwa li i inekela thiluthilu muJehova nokwi ilongekidha okugwanitha po oshinakugwanithwa she, kutya nduno Jehova ote mu tumu peni. Aamwatate sho yu uvu kutya Paulus okwa tokola okuya kuJerusalem, omolweifupipiko lyawo, oye mu etha a ye. —  Iil. 21:10-14.

14 Eifupipiko otali vulu wo oku tu kwathela tu ninge omatokolo omawanawa, nonando katu shi ashihe shoka sha kwatelwa mo nokatu shi kutya iinima otayi ke tu endela ngiini. Pashiholelwa, uuna tatu dhiladhila okuya miilonga yethimbo lyu udha, mbela ohatu ipula kutya oshike tashi ka ningwa po uuna tatu ehama? Mbela ohatu kala tatu ipula kutya oshike tatu ka ninga po, ngele aavali yetu oya kulupa noya pumbwa ekwatho lyetu? Mbela ohatu kala wo tatu ipula kutya otatu ki isila oshimpwiyu ngiini ngele otwa kulupa? Nonando otu galikane shi thike peni nenge tu konge uuyelele, itatu ka mona omayamukulo gothaathaa gomapulo  ngoka. (Omuuv. 8:16, 17) Einekelo lyetu muJehova itali ke tu kwathela owala tu tseye omangambeko getu, ihe otali ke tu kwathela wo tu ga taambe ko. Konima ngele twa kongo uuyelele, twa pula omayele kuyalwe notwa galikana kuJehova e tu wilike, natu katuke metsokumwe newiliko lyombepo yaKalunga. (Lesha Omuuvithi 11:4-6.) Jehova ote ke tu yambeka note ke tu kwathela tu lundulule omalalakano getu. —  Omayel. 16:3, 9.

KOKEKA UUKWATYA WEIFUPIPIKO

15. Okudhiladhila kombinga yaJehova otaku tu kwathele ngiini tu ifupipike?

15 Molwaashono eifupipiko oli na omauwanawa ogendji, ongiini tatu vulu oku li kokeka lelalela? Natu taleni komikalo dhi li ne. Gwotango, otu na okukokeka eifupipiko nokusimaneka Jehova, mokukala tatu ulike uukwatya we wa dhenga mbanda nokudhiladhila kutya ye omunene e tu vule. (Jes. 8:13) Dhimbulukwa kutya itatu ende pamwe nomuyengeli nenge nomuntu, ihe otatu ende pamwe nOmunankondoadhihe, Kalunga. Okukala tu shi kutya otatu ende pamwe naKalunga otashi ke tu kwathela tu ‘ishonopeke kohi yoshikaha shoonkondo shaKalunga.’ —  1 Pet. 5:6.

16. Okudhiladhila kohole yaKalunga otaku tu kwathele ngiini tu kale tu na eifupipiko?

16 Oshitiyali, uuna tatu dhiladhila kohole yaJehova otashi ke tu kwathela tu kale tu na eifupipiko. Omuyapostoli Paulus okwa nyola kutya Jehova okwa “gandja esimano” kiilyo yolutu mbyoka ya talika ko ya fa yaa na esimano. (1 Kor. 12:23, 24) Sha faathana, Jehova oku na ko nasha nakehe gumwe gwomutse, nonando otu na omangambeko ga yoolokathana. Jehova ihe tu yelekanitha nayalwe nenge ando a kale kee tu hole we uuna twa ningi epuko. Omolwohole ye natu kale tu uvite twa gamenwa kehe mpoka tatu mu longele megumbo lye.

17. Uuwanawa washike tatu ka mona ngele otwa kala hatu tala kuuwanawa wayalwe?

17 Oshititatu, okukala tu na olupandu lwaashoka tatu ningi miilonga yaJehova otashi ke tu kwathela tu mu holele mokukala hatu tala kuuwanawa wayalwe. Pehala lyokutala komapuko gawo nenge okwiidhopa miinima yawo, otatu ku ulika eifupipiko mokupula omayele kuyalwe nokutaamba ko omaetopo gawo. (Omayel. 13:10) Otatu ka nyanyukwa pamwe nayo uuna ya mono iinakugwanithwa notatu ka hambelela Jehova sho tu wete ta yambeke ‘ooitaali ooyakwetu yomuuyuni awuhe.’ —  1 Pet. 5:9.

18. Ongiini tatu vulu okudheula eiyuvo lyetu tu kale tu na oondunge dhokuyoolola?

18 Oshitine, otatu ka kala tu na eifupipiko lela ngele otwa longitha omakotampango gOmbiimbeli tu dheule eiyuvo lyetu. Eifupipiko otali ke tu kwathela tu kale tu na oondunge dhokuyoolola nokukala hatu tala ko iinima ngaashi Jehova he yi tala ko. Uuna tatu konakona aluhe, tatu galikana nokutula miilonga shoka tatu ilongo otatu ka kala tu na eiyuvo ewanawa. (1 Tim. 1:5) Ngele otwa kala twa tala ko yalwe ye tu vule, Jehova okwe tu uvanekela kutya ‘ote ke tu longekidha,’ note tu kwathele wo tu kokeke eishonopeko nosho wo omaukwatya galwe omawanawa. —  1 Pet. 5:10.

19. Oshike tashi ke tu kwathela tu kale tu na eifupipiko sigo aluhe?

19 Iilonga yuuntsa oya li ya ningitha omupolofeti inaa tumbulwa kedhina gwokuJuda a kale inaa hokiwa we kuKalunga noye mu kanithitha omwenyo gwe. Onkee ano, osha pumbiwa okukala aaifupipiki, nonando otatu makelwa. Aapiya yaKalunga aadhiginini yonale noyopethimbo lyetu oyu ulika kutya otatu vulu okukala aaifipipiki. Mpoka ngaa pu thike tatu ende pamwe naJehova, opo ngaa pu thike eifupipiko lyetu tali kolo. (Omayel. 8:13) Kutya nduno otu na oshinakugwanithwa shashike ngashingeyi, okweenda pamwe naJehova oshinima oshiwanawa noshi li uuthembahenda itaawu vulu okuyelekwa nasha. Kala wa lenga uuthembahenda mboka, e to tsikile okuninga ngaashi to vulu wu ende meifupipiko pamwe naJehova sigo aluhe.