Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2017

Kala wa lenga omagano goye gemanguluko lyokuninga omatokolo

Kala wa lenga omagano goye gemanguluko lyokuninga omatokolo

“Mpoka pu na Ombepo yOmuwa, opu na emanguluko.” — 2 KOR. 3:17.

OMAIMBILO: 40, 54

1, 2. (a) Aantu oye na omataloko ga yoolokathana geni ge na ko nasha nemanguluko lyokuninga omatokolo? (b) Ombiimbeli otayi tu longo shike kombinga yemanguluko lyetu lyokuninga omatokolo, nomapulo geni tatu ka kundathana?

SHO omukiintu gumwe a li e na okuninga etokolo, okwa li a lombwele kuume ke a ti: “Ino dhiladhilitha ndje, lombwela ndje owala shoka ndi na okuninga. Shoka osho oshipu kungaye.” Omukiintu ngoka okwa li e hole okulombwelwa kutya oshike e na okuninga, pehala lyokulongitha omagano ge ge na ondilo ngoka a pewa kOmushiti, ano, emanguluko lyokuninga omatokolo. Ongiini shi na ko nasha nangoye? Mbela owu hole okuninga omatokolo kungoye mwene, nenge owu hole oku ga ningilwa kuyalwe? Owa tala ko ngiini emanguluko lyokuninga omatokolo?

2 Aantu oya kala nokutsa oompata shi na ko nasha noshinima shika uule womimvo omathele. Yamwe oya kala taya ti kutya omuntu ke na emanguluko lyokuninga omatokolo, oshoka iilonga yetu ayihe oya nunwa nale kuKalunga. Yalwe ohaya ti kutya emanguluko lyashili lyokuninga omatokolo otali wapa owala ngele oya kala ya manguluka ka ko thiluthilu kuJehova. Ihe opo tu shi uve ko nawa, otu na okutala kutya Oohapu dhaKalunga, Ombiimbeli, otadhi ti shike. Omolwashike mbela? Omolwaashoka otadhi holola kutya Jehova okwe tu shita nemanguluko lyokuninga omatokolo gopandunge. (Lesha Josua 24:15.) Ombiimbeli otayi yamukula wo omapulo ngaashi: Ongiini tatu vulu okulongitha  emanguluko lyetu lyokuninga omatokolo? Mbela olya ngambekwa? Ongiini omukalo moka hatu li longitha tagu holola kutya otu hole Jehova shi thike peni? Ongiini tatu vulu okuulika kutya otwa simaneka omatokolo gayalwe?

OSHIKE TATU VULU OKWIILONGA KUJEHOVA NOKUJESUS?

3. Jehova okwe tu tulila po oshiholelwa shini mokulongitha emanguluko lye?

3 Jehova oye owala e na emanguluko lyolela lyokuninga omatokolo, ihe momukalo moka he li longitha otagu tu longo nkene tu na oku li longitha. Pashiholelwa, okwa li a hogolola oshigwana shaIsraeli shi kale sha yapulilwa edhina lye, “oshigwana she mwenelela.” (Deut. 7:6-8) Ehogololo ndika okwa li e li ningi nelalakano. Jehova okwa li a hala okugwanitha po euvaneko ndyoka a li u uvanekele kuume ke Abraham omimvo omathele dha ka pita. (Gen. 22:15-18) Oshikwawo Jehova oha longitha aluhe emanguluko lye ti inyengithwa kohole nokuuyuuki we. Shika otu shi iwetele momukalo moka a li u ungaunga nAaisraeli, mboka ya li ya thigi po lwiikando elongelokalunga lyashili. Sho yi iyele ombedhi tashi zi komutima, Jehova okwi inyengithwa kohole nokohenda ye e ta ti: “Otandi ka galulila aantu yandje kungame. Otandi kala ndi ya hole nomwenyo gwandje aguhe.” (Hos. 14:4) Kashi shi tuu oshiholelwa oshiwanawa shokulongitha emanguluko lye omolwuuwanawa wayalwe!

4, 5. (a) Oshishitwa shotango shini sha li sha pewa kuKalunga emanguluko lyokuninga omatokolo, nongiini sha li she ga longitha? (b) Epulo lini kehe gumwe gwomutse e na okwiipula?

4 Sho Jehova a tameke niilonga ye yokushita okwa hogolola pahole okushita iishitwa ye iinandunge hayi vulu okuninga omatokolo. Oshishitwa shotango shoka sha li sha pewa emanguluko lyokuninga omatokolo osho omutango gwiishitwa ayihe, Omwana, ngoka e li “olupe lu wetike lwaKalunga.” (Kol. 1:15) Manga Jesus inee ya kombanda yevi, okwa kala omudhiginini kuHe noina landula nando okwaavulika kwaSatana. Konima yethimbo sho Jesus a li kombanda yevi okwa li a longitha emanguluko lye lyokuninga omatokolo a tinde okumakelwa komutondi omunene. (Mat. 4:10) Sho Jesus a li ta galikana nomutima aguhe ongulohi ndjoka ya tetekele eso lye, okwa li a tokola toko okulonga ehalo lyaHe. Okwa ti: “Tate, ngele oto shi pitika, oshitenga shika nashi pitilile ndje po. Ihe hamolwehalo lyandje, ihe olyoye li gwanithwe.” (Luk. 22:42) Ano natu holele Jesus nokulongitha emanguluko lyetu lyokuninga omatokolo mokusimanekitha Jehova nomokulonga ehalo lye. Mbela shika otashi wapa ngaa shili?

5 Eeno, otashi wapa okulandula oshiholelwa shaJesus, oshoka natse otwa shitwa oshifetha shaKalunga. (Gen. 1:26) Ihe nonando ongawo, otwa ngambekwa. Emanguluko lyetu inali fa ndyoka Jehova e na. Oohapu dhaKalunga otadhi yelitha kutya emanguluko lyetu olya ngambekwa nonokutya otu na okuvulika komangambeko tago opalele ngoka Jehova e tu tulila po. Pashiholelwa, aakulukadhi oye na okuvulika kaasamane yawo naanona oye na okuvulika kaavali yawo. (Ef. 5:22; 6:1) Ongiini mbela omangambeko ngaka taga gumu omukalo moka hatu longitha emanguluko lyetu lyokuninga omatokolo? Eyamukulo kepulo ndika olyo tali utha kutya onkalamwenyo yetu yomonakuyiwa otayi ka kala ya tya ngiini.

OKULONGITHA NAWA NOKULONGITHA NAYI EMANGULUKO LYOKUNINGA OMATOKOLO

6. Thaneka kutya omolwashike shi li mondjila emanguluko lyetu li kale lya ngambekwa.

6 Mbela emanguluko lyokuninga omatokolo lya ngambekwa, emanguluko ngaa lyolela? Eeno, olyolela. Omolwashike tatu tile ngawo? Omolwaashoka emanguluko lya ngambekwa otali vulu okugamena omuntu. Pashiholelwa, otatu vulu okulongitha emanguluko lyetu lyokuninga omatokolo tu hinge tu ye koshilando shokokule. Ihe mbela otatu ka kala ngaa tu uvite twa gamenwa okuhinga mondjila onene moka kaamu na oompango dhomoondjila, moka kehe gumwe ta hingi ondapo ndjoka a hala nenge kombinga hoka a hala? Hasho nando. Oompango odha pumbiwa, opo ayehe ya nyanyukilwe uuwanawa wemanguluko  lyashili. Opo tu yelithe nawa uunongo wemanguluko lyetu lyokuninga omatokolo metsokumwe noompango dhaJehova, natu taleni iiholelwa yimwe yOmbiimbeli.

7. (a) Emanguluko lyokuninga omatokolo olya yoolola ko ngiini Adam kiishitwa yilwe mbyoka ya li moshikunino shaEden? (b) Hokolola omukalo gumwe moka Adam a li a longitha emanguluko lye lyokuninga omatokolo.

7 Sho Kalunga a shiti omuntu gwotango, Adam, okwe mu pe emanguluko lyokuninga omatokolo lya fa ndyoka a li a pe iishitwa ye yotango iinandunge yomegulu. Shino osha ningitha Adam a kale a yooloka ko kiinamwenyo, molwaashoka yo ohayi wilikwa koondunge dhopaunshitwe. Natu taleni oshiholelwa shankene Adam a li a longitha emanguluko lye lyokuninga omatokolo momukalo gu uka. Iinamwenyo oyo ya li ya shitwa tango manga omuntu inaa shitwa. Nonando ongawo, Jehova okwa pe omwanamati gwotango gwopantu, ano Adam, oshilonga shokuluka iinamwenyo mbyoka omadhina. Kalunga “okwe yi eta komuntu a tale, nkene te yi luku omadhina.” Konima sho Adam a tala oshinamwenyo kehe, okwe shi luku edhina tali opalele. Jehova ka li nando ompinge naashoka sha ningwa kuAdam. Nokungawo, ‘iinamwenyo ayihe oya kala yi na omadhina gayo, ngaashi omuntu e yi luka.’ —  Gen. 2:19.

8. Adam okwa li a longitha ngiini emanguluko lye lyokuninga omatokolo, noshizemo osha li shini?

8 Shiyemateka, Adam ka li a gwanenwa koshilonga shoka a pewa kuKalunga shokulonga nokutonatela eviparadisa. Ka li wo a gwanenwa kelombwelo ndyoka a pewa kuKalunga tali ti: ‘Valathaneni, ne mu indjipale nokuudhitha evi alihe. Li tuleni mepangelo lyeni; pangeleni oohi noondhila niinamwenyo ayihe tayi inyenge kombanda yevi.’ (Gen. 1:28) Pehala lyaashono, Adam okwa taaguluka elombwelo ndyoka a pewa kuKalunga sho a li komuti gwi indikwa. Oluvalo lwe olwa kala talu mono iihuna uule womimvo odhindji, molwaashoka a longitha nayi emanguluko ndika. (Rom. 5:12) Okukala tu shi iilanduliko yetokolo lyaAdam otaku ke tu kwathela tu longithe emanguluko lyetu nawa notu taambe ko omangambeko galyo ngoka ga tulwa po kuJehova.

9. Ehogololo lini Jehova a li a pe oshigwana she, Israeli, nosha li shi inyenge ngiini?

9 Oluvalo lwaAdam naEva, olwa thigulula okwaagwanenena neso kaavali yalwo. Ihe nonando ongawo, olu na natango uuthemba wokulongitha emanguluko lyokuninga omatokolo. Shika oshi iwetikile momukalo moka Kalunga a li u ungaunga noshigwana shaIsraeli. Okupitila momupiya gwe, Moses, Jehova okwa li a pe aantu ehogololo lyokutaamba ko nenge lyokutinda ya ninge oshigwana she sha hogololwa. (Eks. 19:3-6) Mbela aantu oya li yi inyenge ngiini? Oya tokola ya ninge oshigwana sha lukilwa edhina lye, noya popi oshita ya ti: “Otatu gwanitha ashihe shoka Omuwa a popi.” (Eks. 19:8) Mupyamunene, konima yethimbo oshigwana osha li sha longitha nayi emanguluko ndyoka nosha yono euvaneko ndyoka sha li sha ninga. Natu kaleni hatu dhimbulukwa oshiholelwa shika tashi tu londodha nokukala twa lenga emanguluko lyetu lyokuninga omatokolo, mokukala nekwatathano lyopothingo naJehova e tatu vulika kiitegelelwa ye yi li pauyuuki. — 1 Kor. 10:11.

10. Iiholelwa yini tayi ulike kutya aantu inaaya gwanenena nayo otaya wapa okulongitha emanguluko lyawo lyokuninga omatokolo momukalo tagu simanekitha Kalunga? (Tala kethano lyopetameko.)

10 MAahebeli ontopolwa 11, otatu adha mo omadhina gaapiya yaKalunga 16, mboka ya li ya tokola okulongitha emanguluko lyawo lyokuninga omatokolo shi ikolela koompango ndhoka ya li ya tulilwa po kuJehova. Oshilanduliko, oya li ya lalekwa nuuyamba owundji noya li ye na etegameno ewanawa lyonakuyiwa. Pashiholelwa, Noa okwa li e na eitaalo lya kola nokwa li a vulika komalombwelo gaKalunga ge na ko nasha nokutunga onguluwato, opo ye nuukwanegumbo we nosho wo oshigwana shomonakuyiwa ya hupithwe. (Heb. 11:7) Abraham naSara oya li ya vulika nehalo ewanawa kewiliko lyaKalunga okuya kevi lyeuvaneko. Nokuli nonando konima yethimbo oya li ye na ‘ompito yokushuna’ koshilando oshiyamba shaUr, oya kala owala ya tala nomeho geitaalo ‘kiinima mbyoka Kalunga e yi ya uvanekela.’ Oya li “ya yuulukwa koshilongo shoka oshiwanawa.”  (Heb. 11:8, 13, 15, 16) Moses okwa pilamene uuyamba waEgipiti, e ta ‘hogolola okuhepekwa pamwe naantu yaKalunga, ye ina zimina uutoye wuulunde wokathimbo kowala.’ (Heb. 11:24-26) Ano natu holeleni eitaalo lyaantu mboka yonale, mokukala twa lenga emanguluko lyokuninga omatokolo noku li longitha mokulonga ehalo lyaKalunga.

11. (a) Eyambeko lini hali etithwa kemanguluko lyokuninga omatokolo? (b) Oshike hashi ku inyengitha wu longithe nawa emanguluko lyoye lyokuninga omatokolo?

11 Nando otashi vulika tu wete sha fa oshipu okuningilwa omatokolo kugumwe, oku ga ningilwa itashi tu etele eyambeko. Eyambeko ndyoka olya popiwa muDeuteronomium 30:19, 20. (Lesha.) Ovelise 19 otayi popi ehogololo ndyoka Kalunga a li a pa Aaisraeli. Movelise 20 otatu ilongo mo kutya Jehova okwa li e ya pe ompito ombwanawa ye mu ulukile kutya oshike shi li momitima dhawo. Natse otatu vulu okutokola okulongela Jehova. Otu na ompito ombwanawa yokulongitha emanguluko ndyoka twa pewa kuJehova, tu ulike kutya otu mu hole notwe mu simaneka.

YANDA OKULONGITHA NAYI OMAGANO GEMANGULUKO LYOKUNINGA OMATOKOLO

12. Oshike shono kaatu na okuninga nando nemanguluko lyetu lyokuninga omatokolo?

12 Natu tye ando owa gandja omagano gongushu kukuume koye. Ito ka kala tuu wa yemata ngele owa mono kutya okwe ge ekelahi mondoloma yiiyagaya, nenge wa mono kutya okwe ga longitha okweehameka gumwe, oshinima shoka oshiwinayi noonkondo! Dhiladhila nkene Jehova ha kala u uvite uuna ta tala aantu oyendjiyendji taya longitha nayi emanguluko lyawo lyokuninga omatokolo monkalamwenyo yawo, tashi vulika nokuli taye ehameke yalwe. Ngaashi Ombiimbeli ye shi popya, pethimbo ‘lyomasiku gahugunina,’ (NW) aantu otaya ka kala “ihaa pandula.” (2 Tim. 3:1, 2) Inatu longitha nando nayi omagano ngaka ge na ondilo twa pewa kuJehova nenge tu ga kwate nayi. Ihe ongiini tatu vulu okukala itaatu longitha nayi emanguluko lyetu lyokuninga omatokolo?

13. Omomukalo gumwe guni tatu vulu okuyanda okulongitha nayi emanguluko lyetu lyokuninga omatokolo?

13 Atuheni otu na emanguluko lyokuninga omatokolo shi na ko nasha naamboka tu na okweendathana nayo, nomikalo dhokuzala nokwiiyopaleka nosho wo nomainyanyudho. Ihe emanguluko lyetu otali vulu “okusiikila uukolokoshi” ngele otwa hogolola okukala aapika yuuhalu wetu nenge ngele otwa taamba ko iikala yisitha ohoni yuuyuni. (Lesha 1 Petrus 2:16.) Pehala lyokulongitha emanguluko lyetu “li ninge ompito yuuhalu wopantu,” otwa hala okukala twa tokola toko okuninga omatokolo ngoka tage  tu kwathele tu pulakene kekumagidho ndyoka tali ti: “Longeni ayihe nokusimaneka Kalunga. —  Gal. 5:13; 1 Kor. 10:31.

14. Okwiinekela muJehova oku na ekwatathano lini nokulongitha emanguluko lyokuninga omatokolo?

14 Omukalo gulwe moka tatu vulu okugamena emanguluko lyetu lyokuninga omatokolo, ogwo okukala twi inekela muJehova nokweetha e tu wilike meni lyomangambeko ngoka e tu tulila po. Oye awike ‘te tu longo shoka she tu opalela noku tu ulukila ondjila ndjoka tu na okweenda nayo.’ (Jes. 48:17) Otu na okuzimina neifupipiko uushili woohapu dha nwethwa mo ndhoka tadhi ti: “Omuntu iha vulu okupangela shoka u uthilwa; kaku na omuntu hu utha okukalamwenyo kwe.” (Jer. 10:23) Inatu gwila nando momwigo gwokuhogolola okukala twi inekela moondunge dhetu yene, ngaashi Adam nAaisraeli mboka inaaya vulika. Pehala lyaashono, natu ‘inekele Omuwa nomutima gwetu aguhe.’ —  Omayel. 3:5.

SIMANEKA EMANGULUKO LYAYALWE LYOKUNINGA OMATOKOLO

15. Oshike tatu ilongo mekotampango ndyoka tali adhika mAagalati 6:5?

15 Otu na wo okusimaneka emanguluko lyayalwe lyokuninga omatokolo. Omolwashike mbela? Molwaashoka atuheni otu na omagano gemanguluko lyokuninga omatokolo, haaluhe Aakriste yaali haya vulu okuninga etokolo lya faathana naanaa. Shika osho shi li ngaaka shi na ko nasha niinima ya pamba eihumbato lyetu nosho wo nokulongela Kalunga kwetu. Dhimbulukwa ekotampango ndyoka tali adhika mAagalati 6:5. (Lesha.) Uuna tu shi kutya Omukriste kehe oku na “okuhumbata ye mwene omutenge gwe,” otashi ke tu kwathela tu simaneke uuthembahenda wayalwe wokulongitha emanguluko lyawo lyokuninga omatokolo.

Otatu vulu okuninga omatokolo kutse yene inaatu tegelela yalwe oyo ye ge tu ningile (Tala okatendo 15)

16, 17. (a) Ongiini emanguluko lyokuninga omatokolo lya li oshinima sha kwata miiti muKorinto? (b) Paulus okwa li a kandula po uupyakadhi mboka ngiini, naashika otashi tu longo shike shi na ko nasha nemanguluko lyayalwe lyokuninga omatokolo?

16 Natu taleni oshiholelwa shomOmbiimbeli shoka tashi ulike kutya omolwashike tu na okusimaneka emanguluko lyaamwatate lyokuninga omatokolo miinima yi na ko nasha nomaiyuvo. Aakriste yomuKorinto oya li kaaye na we ekwatathano, omolwokulya onyama ya yambelwa iikalunga ndjoka konima yethimbo ya ka landithwa pomatala. Yamwe oya li ya ti: ‘Molwaashoka iikalunga ihayi kwatha sha, otatu vulu okulya onyama neiyuvo lya yela.’ Ihe yalwe mboka ya li nale haya longele iikalunga mbyoka, oya li ye uvite kutya okulya onyama ndjoka owa fa to galikana iikalunga. (1 Kor. 8:4, 7) Oshinima shika osha li sha kwata miiti, noshe etitha omatopoko megongalo. Paulus okwa li a kwathele ngiini Aakriste yomuKorinto ya kale ye na etaloko lya fa lyaKalunga moshinima shono?

17 Tango, Paulus okwe ya dhimbulukitha kutya iikulya itayi vulu nando oku ya hedhitha popepi naKalunga. (1 Kor. 8:8) Olutiyali, okwe ya ladhipike wo yaa ethe ‘emanguluko lyawo lyokuninga omatokolo’ li fale ‘aantu mboka ya li aankundi muulunde.’ (1 Kor. 8:9) Hugunina, okwa li a pe omayele mboka aankundi, kutya kaye na okupangula mboka ya hala okulya onyama. (1 Kor. 10:25, 29, 30) Moshinima shika sha simana shi na ko nasha nokulongela Kalunga, Omukriste kehe okwa li a pumbwa okuninga etokolo lye kuye mwene. Onkee ano, mbela natse katu na okusimaneka emanguluko lyaamwatate lyokuninga omatokolo nomiinima mbyoka inaayi simana lela? 1 —  Kor. 10:32, 33.

18. Oto ku ulika ngiini kutya owa lenga omagano goye gokuninga omatokolo?

18 Jehova okwe tu pa omagano gemanguluko lyashili lyokuninga omatokolo. (2 Kor. 3:17) Omagano ngoka otwe ga lenga, molwaashoka ohage tu pitika tu ninge omatokolo ngoka tagu ulikile Jehova kutya otu mu hole shi thike peni. Ano natu tsikileni okuulika kutya otwa pandula omagano ngoka ge na ondilo moku ga longitha momukalo ngoka tagu simanekitha Kalunga nosho wo mokusimaneka omukalo moka yalwe haye ga longitha.