Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2017

Oyi igandja nehalo ewanawa

Oyi igandja nehalo ewanawa

OONZAPO dhi na uulaadhi ndhoka hadhi ku uvitha onkundana ombwanawa kiilongo hoka ku na ompumbwe onene yaauvithi yUuukwaniilwa, odhindji aamwameme inaaya hokanwa. Yamwe yomuyo oya longa kiilongo yilwe omimvo odhindji. Oshike sha li she ya kwathele momimvo ndhono dha ka pita ya tembukile kiilongo yilwe? Oyi ilongo ko shike kiilongo hoka? Oonkalamwenyo dhawo odha li dha lunduluka ngiini? Otwa pulapula oyendji yomaamwameme mboka ye na iimoniwa yokulonga kondje yiilongo. Ngele owu li omumwameme inaa hokanwa nowu hole okukutha ombinga miilonga yokuuvitha mbyoka hayi nyanyudha noonkondo, otwi inekela kutya oto ka mona mo uuwanawa miimoniwa yawo. Osha yela kutya aapiya yaKalunga ayehe otaya vulu okumona mo uuwanawa mokukonakona iiholelwa yawo.

SINDA OMALIMBILILO

Anita

Mbela oho kala to ipula kutya oto ke shi pondola ngaa oku ka longa kiilongo yilwe wu li omukokolindjila inaa hokana nenge inaa hokanwa? Omumwameme Anita, ngoka e na omimvo 70 nasha okwa li a limbililwa noonkondo ngele ote ke shi vula ngaa. Okwa putukila moEngland, moka a li a tameke okukokola ondjila sho e na omimvo 18. Ota ti: “Ondi hole okulonga aantu kombinga yaJehova, ihe inandi shi dhiladhila nando onale kutya otandi vulu oku ka longela Jehova kiilongo yilwe. Inandi ilonga nando onale elaka lilwe, nondi na uushili kutya itandi vulu oku li ilonga. Sho nda hiwa ndi ye kosikola yaGilead osha li sha halutha ndje, nonda li nda kumwa kutya ongaye ngaa gwokumona ehiyo lya fa mpono. Ihe onda li nda dhiladhila kutya ‘ngele Jehova oku wete kutya otandi shi vulu, nandi shi kambadhale.’ Shika osha li sha ningwa pwa pita ngashingeyi omimvo dha konda po 50 nasha. Okuza kethimbo ndyono, onda kala tandi longo moJapani, ndi li omutumwa.” Anita okwa gwedha ko a ti: “Omathimbo gamwe, onda li handi kala nda nyanyukwa nonda tuntukwa sho tandi ladhipike aamwameme aagundjuka ya holele oshiholelwa shandje shoku ka longa kiilongo yilwe.”

KALA WU NA OMUKUMO

Aamwameme oyendji mboka ya ka longa kiilongo yilwe, petameko oya li taya kakadhala okuya ko. Oshike sha li she ya tsu omukumo?

Maureen

Omumwameme Maureen, ngoka e na omimvo 60 nasha ota ti: “Sho nda koko, onda kala nda hala onkalamwenyo yandje yi kale yi na elalakano lyokukwathela yalwe.” Sho a gwanitha omimvo 20, okwa yi koQuebec shaKanada, hoka kwa li ku na ompumbwe onene yaakokolindjila. Ota ti: “Konima yethimbo onda hiwa ndi ka hite osikola yaGilead, ihe onda li nda tila okuya kehala kaandi shi ko nawa.” Okwa gwedha ko a ti: “Onda li wo tandi ipula nokuthiga po meme ngoka a li ta sile tate oshimpwiyu ngoka a li omunkundi. Onda kala handi lili uusiku awuhe tandi indile Jehova a kwathe ndje moshinina shika. Sho nda popi  naavali yandje kombinga yankene ndu uvite, oya ladhipike ndje ndi taambe ko ehiyo ndyoka. Egongalo olya li wo lya yambidhidha aavali yandje pahole. Okumona nkene Jehova ha sila aantu oshimpwiyu, osha kwathela ndje ndi mone kutya ota ka sila ndje wo oshimpwiyu. Okuza mpoka, onda li ndi ilongekidha okuya.” Okuza mo 1979, Maureen okwa kala ta longo kuAfrika lyokUuninginino uule womimvo dha konda 30 e li omutumwa. Kunena, nonando ota sile yina oshimpwiyu moKanada, natango ota longo e li omukokolindjila i ikalekelwa. Okutala komimvo dha pita ndhoka a kala ta longo kondje yiilonga, ota ti: “Jehova okwa li ha pe ndje aluhe shoka nda pumbwa pethimbo lyo opala.”

Wendy

Omumwameme Wendy, ngoka ngashingeyi e na omimvo 60 nasha, okwa li a tameke okukokola ondjila moAustralia sho e na omimvo omulongo nasha. Ota ti: “Onda li omumbanda nosha li oshidhigu kungaye okupopya naantu kaandi ya shi. Ihe okukokola ondjila okwa kwathele ndje ndi kale he kundathana nomuntu kehe nokwa kwathela ndje ndi kale ndi na omukumo. Konima onda ka mona kutya uumbanda kungaye kawu shi we uupyakadhi. Uukokolindjila owa longo ndje okukala ndi inekela muJehova, nonda li nda tameke okukala nda manguluka oku ka longa kombanda yomafuta. Natango, onda li nda hiwa komumwameme gumwe inaa hokanwa ngoka a li a longo uule womimvo 30 nasha e li omutumwa koJapani tu ka uvithe uule woomwedhi ndatu koJapani. Okulonga pamwe naye okwa hwameke ehalo lyandje lyoku ka longa kondje yiilongo.” Momimvo dho 1980 nasha, omumwameme Wendy okwa tembukile koVanuatu, okatuntu ke li uule wookilometa 1 770 kuuzilo waAustralia.

Omumwameme Wendy oku li natango moVanuatu, ta longo kombelewa yokutoloka. Ota ti: “Ohashi nyanyudha ndje noonkondo, okutala nkene oongundu nomagongalo taga totwa miitopolwa. Oshi li uuthembahenda itaawu vulu okuyelekwa nasha okukutha ombinga miilonga yaJehova mokatuntu haka.”

Kumiko (pokati)

Omumwameme Kumiko, ngoka ngashingeyi e na omimvo 60 nasha, okwa li ha longo e li omukokolindjila gwondjigilile moJapani, ihe omukokolindjila omukwawo okwa li e mu pula ya tembukile koNepal. Kumiko ota ti: “Okwa kala ha pula ndje iikando niikando, ihe onda tindi ko. Onda kala tandi ipula nokwiilonga elaka epe nosho wo nokutaamba ko omikalo omipe. Opwa li wo uupyakadhi wulwe wu na ko nasha nokumona oshimaliwa shokuya ko. Sho nda li tandi kondjo noshinima shino, onda mono oshiponga sho epakapaka lyandje lya pumwa kohauto, e tandi yi moshipangelo. Sho ndi li moshipangelo ondi ipula kutya ‘olye e shi wo shoka tashi ka ningilwa ndje ishewe? Otashi vulika ndi ka kwatwe kuuvu wa kwata miiti e tandi kala inaandi mona ompito yoku ka kokola ondjila kombanda yomafuta. Mbela itandi vulu oku ka longa kondje yiilongo, nando omvula ngaa yimwe?’ Onda galikana kuJehova nda mana mo a kwathele ndje ndi shi ninge.” Sho Kumiko a zi mo moshipangelo, okwa ka talela po koNepal, nokonima, ye nomukokolindjila omukwawo oya tembukile hoka.

 Okutala komimvo tadhi ihilile pomulongo ndhoka a kala ta longo koNepale, Kumiko ota ti: “Uupyakadhi mboka nda li ndi na owa zi po, ngaashi Efuta Etiligane lya topoka pokati. Onda nyanyukwa sho nda tokola ndi ka longe kiilongo hoka ku na ompumbwe onene. Olundji uuna tandi kundathana Ombiimbeli naanegumbo yontumba, aashiinda ya adha puyatano nenge yahamano ohaye ya okupulakena. Nokuli nuunona uushona ohawu indile ndje nesimaneko, uufo mboka tawu popi kombinga yOmbiimbeli. Ohashi nyanyudha ndje noonkondo okuuvitha miitopolwa moka mu na aantu haya pulakene.”

SINDA OMASHONGO

Itashi kumitha sho aamwameme aalaadhi mboka ya pulwapulwa ya li ya taalela omashongo. Oya li yu ungaunga nago ngiini?

Diane

Omumwameme Diane a za koKanada, ngoka ngashingeyi e na omimvo 60 nasha, okwa li a longo uule womimvo 20 e li omutumwa moIvory Coast (shoka ngashingeyi hashi ithanwa Côte d’Ivoire.) Okwa ti: “Petameko onda li ndi wete oshidhigu okukala kokule noyaandjetu. Ondi indile Jehova a kwathele ndje ndi kale ndi hole aantu mboka handi uvithile. Gumwe gwomaalongi yandje kosikola yaGilead, omumwatate Jack Redford, okwe tu lombwele kutya petameko otashi vulika tu kale tu uvithwa nayi nenge twa gumwa koonkalo dhomiitopolwa moka hatu longele, unene tuu shi na ko nasha noluhepo lwamo lwa yaga kegonga. Okwe tu ladhipike a ti: ‘Inamu tala koluhepo lwaantu yamo, ihe ya taleni momeho, mu mone nkene tayi inyenge sho taya pulakene oshili yOmbiimbeli.’ Shono osho nda li nda ningi noshe etele ndje omayambeko ogendji. Uuna tandi kundathana naantu etumwalaka lyUukwaniilwa tali hekeleke, onda li handi mono aantu sho ye na omeho gu udha enyanyu.” Oshike ishewe sha li sha kwathele omumwameme Diane a ninge omalunduluko, opo e ku uvithe kiilongo yilwe? Ota ti: “Onda kala ndi na ekwatathano naakonakonimbiimbeli yandje nonda kala nda nyanyukwa lela sho ndi ya wete taya ningi aalongeli yaJehova aadhiginini. Oshitopolwa shoka handi longele osha ningi egumbo lyandje. Onda mona oomeme nootate, aamwameme aalumentu naakiintu, ngaashi Jesus a hunganeka.” —  Mark. 10:29, 30.

Omumwameme Anne, ngoka e na omimvo 40 nasha, oha longele koAsia hoka iilonga yetu yi indikwa. Ota ti: “Uule womimvo dha ka pita sho nda li tandi longele miitopolwa ya yoolokathana kondje yiilongo, onda li nda kala naamwameme mboka ye na eputuko nuukwatya wa yooloka ko thiluthilu kuwandje. Omathimbo gamwe onda li handi kala kaandi shi uvite ko nosha li hashi uvitha ndje nayi. Uuna shoka sha ningwa, onda li handi kambadhala ndi koleke ekwatathano lyandje nayo nokuuva ko nawa eputuko lyawo. Onda li wo nda longo nuudhiginini mokukala ndi na ohole nokukala ndi na ondjele nayo. Onda li nda nyanyukwa sho oonkambadhala ndhoka dhe etela ndje iizemo iiwanawa mokukoleka uukuume wetu wopothingo  notawu kalelele. Shoka osha kwathela ndje ndi idhidhimikile okulonga moshitopolwa moka.”

Ute

Mo 1993 omumwameme Ute, e na omimvo 50 nasha, a za koNdowishi, okwa li a tumwa a ka longe e li omutumwa koMadagascar. Ota ti: “Petameko onda li te kambadhala okwiilonga elaka lyomoshitopolwa moka, okwiigilila onkalombepo yamo ya pupyala noyi na oshimuke, okwiidhidhidhimikila uuvu womalaria nomahundju. Ihe nonando ongawo, onda mona ekwatho enene. Aamwameme yomoshitopolwa, oyana naakonakonimbiimbeli yandje oya kwathela ndje neidhidhimiko ndi ilonge elaka. Omulongi pamwe nangame moshilonga shuutumwa okwa li a sile ndje oshimpwiyu sho nda li tandi ehama. Ihe ngoka a kwathela ndje unene, oJehova. Onda li handi mu mbumbulile iimpwiyu yandje ayihe megalikano. Nonda li handi tegelele neidhidhimiko, poompito dhimwe ohandi tegelele uule womasiku, woomwedhi, opo omagalikano gandje ga yamukulwe. Jehova oha kandula po uupyakadhi kehe.” Ngashingeyi Ute ota longo moMadagascar uule womimvo 23.

ONKALAMWENYO YA LALEKWA NUUYAMBA

Ngaashi yalwe mboka haya ka longa kiilongo hoka ku na ompumbwe onene ya mona omayambeko, naamwameme mboka inaaya hokanwa ya kala kiilongo yilwe, olundji nayo ohaya popi kutya oku ka longa kiilongo hoka, okwe ye etela omayambeko. Mbela omayambeko gamwe geni ya mona?

Heidi

Omumwameme Heidi ngoka e na omimvo 70 nasha, a za koNdowishi, okuza mo 1968, okwa kala ta longo e li omutumwa moIvory Coast (shoka ngashingeyi hashi ithanwa Côte d’Ivoire). Ota ti: “Ohandi kala nda nyanyukwa noonkondo okumona aamwandje yopambepo ‘taya humu nawa komeho moshili.’ Yamwe yomaakonakonimbiimbeli yandje ngashingeyi aakokolindjila nayamwe aakuluntugongalo. Oyendji yomuyo ohayi ithana ndje Meme nenge Kuku. Gumwe gwoomakuluntugongalo mboka, omukadhi noyana oya tala ndje ko ndi li omupambele gwawo. Onkee ano, Jehova okwa pa ndje omumwandjemati, oshitenya naatekulu yandje yatatu.” —  3 Joh. 4.

Karen (pokati)

Omumwameme Karen gwokoKanada, ngoka ngashingeyi e na omimvo 70 nasha, okwa longa omimvo dhi vulithe po 20 muAfrika lyokUuninginino. Ota ti: “Onkalamwenyo yuutumwa oya longa ndje ndi kale ndi na ombepo yokwiiyamba, ndi na ohole neidhidhimiko. Oshikwawo okulonga pamwe naantu oyendji ya za kiilongo yi ili noyi ili osha lundulula etaloko lyandje. Ondi ilonga kutya opu na omikalo dha yoolokathana dhokuninga iinima. Kali shi tuu eyambeko enene okukala wu na ookuume muuyuni awuhe! Nonando oonkalamwenyo dhetu niinakugwanithwa yetu oya lunduluka, uukuume wetu inawu lunduluka.”

Omumwameme Margaret a za koEngland, ngoka ngashingeyi e na omimvo 70 nasha, oha longo e li omutumwa moLaos. Ota ti: “Oku ka longa kondje yiilongo osha kwathela ndje ndi mone nkene Jehova ha nanene aantu yomihoko adhihe noyomaputuko agehe kehangano lye. Iimoniwa mbyono oya nkondopaleka eitaalo lyandje. Oya pa ndje einekelo lya kola kutya Jehova ota wilike ehangano lye, nelalakano lye otali ka gwanithwa po.”

Odhoshili kutya aamwameme inaaya hokanwa mboka ya ka longa kiilongo yilwe oya dhana onkandangala onene miilonga yokuuvitha. Oya gwana okupandulwa lela. (Aatok. 11:40) Shimwe ishewe, omwaalu gwawo otagu indjipala. (Eps. 68:11) Mbela oto vulu okutala oonkalo dhoye, opo wu landule oshiholelwa shaamwameme aalaadhi mboka ya pulapulwa moshitopolwa muno? Ngele oto vulu, osha yela kutya oto ka mona mwene “nkene Omuwa omwaanawa.” —  Eps. 34:8.