Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 6 2017

 IITOPOLWA YI IKOLELELA KOSHIPALANYOLO SHOKOMBANDA | OMAGANO DHINGI NGOKA TWA PEWA OGENI?

Nkene to vulu okukongela gumwe omagano omawanawa

Nkene to vulu okukongela gumwe omagano omawanawa

Kashi shi oshipu okukongela gumwe omagano omawanawa, oshoka ngoka te ga pewa oye ha mono ongushu yago. Otashi vulika gumwe ngoka te ga pewa e ga tale ko omawanawa, ihe ngele oga pewa gulwe otashi vulika haasho te ga tala ko.

Pashiholelwa, omugundjuka otashi vulika a kale u uvite kutya oshikwaelektronika shoka opo sha kondo osho omagano omawanawa. Ihe omukuluntu otashi vulika a kale a pandula noonkondo omagano ge na ongushu ngoka a pewa, ngaashi uuthiga wezimo lyawo. Momaputuko gamwe, aagundjuka naakuluntu ohaya pewa omagano giimaliwa, opo ya ka lande shoka ya hala.

Kakele komashongo ngoka, aantu oyendji ohaya tsikile okukongela mboka ye hole omagano ngoka taga opalele. Nonando ohashi kala oshidhigu okumona omagano ga tya ngaaka, opu na iinima yontumba mbyoka tatu vulu okukaleka momadhiladhilo, tayi tu kwathele tu pondole. Natu taleni kiinima ine mbyoka tayi vulu okuningitha ngoka te ga pewa a kale e ga nyanyukilwa.

Shoka ngoka to pe omagano a hala. Omulumentu gumwe moshilandopangelo Belfast, shaIreland shokUumbangalantu, okwa ti kutya ombasikela ndjoka a pelwe sho e na omimvo 10 nenge 11, okwa li e yi tala ko yi li omagano omawanawa. Omolwashike mbela? Okwa ti: “Oshoka onda li lela nde yi hala.” Shika otashi ulike kutya shoka omuntu a hala, osho hashi mu ningitha a kale a lenga omagano nenge a kale inee ga lenga. Onkee ano, dhiladhila kombinga yaangoka wa hala okupa omagano. Tseya kutya okwa lenga shike, oshoka olundji shoka omuntu a lenga, osho ha kala a hala. Pashiholelwa, aakulupe ohaya kala ya lenga okukala pamwe noyana naatekulu yawo. Olundji ohaya kala ya halelela oku ya mona. Onkee ano, aakulupe ohaya kala ya pandula unene, ngele taya talelwa po koyana nokaatekulu yawo.

Omukalo omuwanawa gwokutseya kutya gumwe okwa hala shike, ogwo okukala ho pulakene nawa. Ombiimbeli otayi tu ladhipike tu ‘kale hatu pulakene mbala, ihe ohatu ikwata mokupopya.’ (Jakob 1:19) Kehe ethimbo to popi nookuume koye nenge noyaandjeni, pulakena nawa, opo wu tseye kutya oye hole  shike noye tonde shike. Kungeyi, oto ka vula oku ya pa omagano ngoka tage ya nyanyudha.

Shoka ngoka to pe omagano a pumbwa. Omuntu ota vulu okukala a pandula omagano ganathangwa, ngele ogo a pumbwa. Ihe oto vulu ngiini okutseya shoka omuntu a pumbwa?

Otashi vulika wu dhiladhile kutya omukalo omupu gwoku shi ninga, ogwo okupula omuntu kutya okwa pumbwa shike nenge okwa hala shike. Ihe mboka ye hole okugandja omagano omuntu inee shi tegelela, ihaye shi nyanyukilwa okupula omuntu tango. Shimwe ishewe, nonando aantu yamwe otashi vulika haya popi shoka ye hole nenge ye tonde ya manguluka, olundji ihaya popi shoka ya pumbwa.

Onkee ano, kala ho tala to konenene, opo wu mone kutya omuntu oku li monkalo yini. Mbela omugundjuka, omukulupe, ke li mondjokana, oku li mondjokana, okwa hengana, okwa silwa kuume kopandjokana, oku na iilonga nenge okwa penzelwa? Opo nduno dhiladhila shoka tashi vulika a pumbwa.

Opo wu tseye kutya ngoka wa hala okupa omagano okwa pumbwa shike, oto vulu okupula yalwe mboka nayo ya li monkalo ya fa ye. Otaya vulu oku ku lombwelwa oompumbwe dhi ikalekelwa ndhoka kaadhi shiwike kuyalwe. Uuyelele mboka otawu ku kwathele wu gandje omagano ngoka omuntu a pumbwa, ngoka yalwe inaaye ga dhiladhila.

Ethimbo ndyoka omagano ge na okugandjwa. Ombiimbeli otayi ti: ‘Ohapu oyo opala ngiini pethimbo lyu uka!’ (Omayeletumbulo 15:23) Enyolo ndika otali ulike kutya oohapu dha popiwa pethimbo lyu uka otadhi vulu okuguma omuntu. Iilonga yetu nayo otayi vulu okuninga sha faathana. Ngaashi owala oohapu dha popiwa pethimbo lyu uka tadhi vulu okunyanyudha ngoka te dhi pulakene, omagano ga gandjwa pethimbo lyu uka nenge pompito tayi opalele otaga vulu okunyanyudha ngoka te ga pewa.

Oompito dhimwe tadhi opalele dhokugandja omagano ongaashi uuna kuume koye e na ohango, omugundjuka e li poku ka pewa onzapo kosikola yopombanda nenge aaihokani yontumba ye li pokumona okanona. Yamwe ohaya mono oshiwanawa okukala ya nyola iiningwanima mbyoka tayi ka ningwa momumvo tagu landula. Kungeyi otaya vulu okulongekidha komeho yethimbo omagano ngoka taga opalele poshiningwanima kehe. *

Odhoshili kutya omuntu ina pumbwa owala okugandja omagano poompito dhi ikalekelwa. Enyanyu ndyoka hali zi mokugandja ohali vulu okumonika kehe ethimbo. Ihe uuna omuntu ta gandja omagano, okwa pumbwa okukotokela oshinima shontumba. Pashiholelwa, ngele omulumentu okwa pe omukiintu omagano kaapu na etompelo lyasha, omukiintu otashi vulika a thike pehulithodhiladhilo kutya omulumentu ngoka okwa hala a ninge po gwe. Ngele elalakano lyomulumentu halyo ndyoka, omagano ga tya ngaaka otashi vulika gu uviwe ko papuko nenge ge ete uupyakadhi. Shoka otashi tsu omuthindo oshinima shilwe sha simana shoka hashi ningitha omuntu a gandje omagano.

Elalakano lyokugandja omagano. Ngaashi shu ulikwa moshiholelwa sha tetekela, oshi li nawa wi ipule ngele ngoka to pe omagano otashi vulika u uve ko papuko elalakano lyoye lyoku ge mu pa. Niishewe oshi li nawa ngoka ta gandja omagano a konakone elalakano lye lyoku ga gandja. Nonando aantu oyendji ohaya kala yu uvite shi li nawa okugandja omagano, oyendji ohaye ga gandja pomathimbo gontumba momumvo, molwaashoka taya thiminikwa ye shi ninge. Omanga yalwe haya gandja netegameno lyokuungaungiwa nayo momukalo gwi ikalekelwa nenge lyokupewa sha kwaangoka ya pa sha.

Oshike to vulu okuninga, opo wu shilipaleke kutya oho gandja omagano netompelo ewanawa? Ombiimbeli otayi ti: “Longeni iilonga yeni ayihe nokupangelwa kohole.” (1 Aakorinto 16:14) Ngele oho gandja to inyengithwa kohole yashili nomolwaasho wu na ko nasha naangoka to pe, omagano goye otaga ka taambwa nenyanyu noto ka mona enyanyu ndyoka hali zi mokugandja tashi zi komutima. Oto ka nyanyudha wo Tate yetu gwomegulu. Omuyapostoli Paulus okwa li a pandula Aakriste yomuKorinto shonale, sho ya ambidhidha nehalo ewanawa nonenyanyu iilonga yokugandja iikwatha kAakriste ooyakwawo muJudea. Paulus okwe  ya lombwele a ti: “Kalunga oku hole ngoka ta gandja nenyanyu.” — 2 Aakorinto 9:7.

Okugandja eitulomo kiinima mbyoka twa kundathana otaku vulu oku ku kwathela lela wu kale ho gandja omagano ngoka taga nyanyudha yalwe. Iinima mbyoka nayilwe ya gwedhwa po, oya li ya dhana onkandangala melongekidho ndyoka Kalunga a ningile aantu, opo ya mone omagano ge na ondilo ya shiga ko. Lesha oshitopolwa tashi landula wu mone kutya omagano ngaka ga simanenena ogeni.

^ okat. 13 Aantu oyendji ohaya gandja wo omagano pomavalo nenge momasiku gomafudho. Ihe olundji piituthi mbyoka ohapu ningwa iinima kaayi li metsokumwe nOmbiimbeli. Tala oshitopolwa moshifo shika: “Aaleshi yoshifo shetu taya pula —  Mbela Aakriste oye na okudhana Okrismesa?