Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 6 2017

Jesus okwa li a fa peni naanaa?

Jesus okwa li a fa peni naanaa?

Kapu na nando omuntu e na ethano lyaJesus. Ina thanekwa nando onale nenge a ningilwe oshiyelekelathano. Ihe muule womimvo omathele dha pita, aathaneki oyendji oya kala noku mu thaneka momathano gawo.

Aathaneki mboka inaya tseya kutya Jesus okwa li a fa peni naanaa. Omithigululwakalo, omaitaalo naashoka mboka haya pula ya thanekelwe omathano gaJesus haya kala ya hala, osho hashi utha kutya omuthaneki ota thaneke ngiini Jesus. Ihe omathano gawo otaga vulu okunwetha mo nenge okupukitha etaloko lyaantu li na ko nasha naJesus nomalongo ge.

Aathaneki yamwe oya thaneka Jesus e li omuntu kee na oonkondo, e na omafufu omale noombenzi oonshona nenge a yemata. Momathano galwe, okwa thanekwa e li oshishitwa shopambepo, omutse gwe gwa dhingolokwa kuuyelele nokee na ekwatathano naantu. Mbela omathano ngoka otagu ulike ngaa shili kutya Jesus okwa li a fa peni? Ongiini tatu vulu okutseya kutya okwa li a fa peni? Omokukonakona omautumbulilo gontumba mOmbiimbeli ngoka tage tu kwathele tu tseye kutya otashi vulika a li a fa peni. Otage tu kwathele wo tu kale tu na etaloko lyomondjila li na ko nasha naye.

“OWA LONGEKIDHILE NDJE OLUTU”

Oohapu ndhoka otashi vulika Jesus e dhi popi megalikano, sho a ninginithwa. (Aahebeli 10:5; Mateus 3:13-17) Mbela okwa li e na olutu lwa tya ngiini? Omimvo 30 lwaampono manga inaa ninginithwa, omuyengeli Gabriel okwa li a lombwele Maria a ti: “Oto ka ninga omusimba e to vala okanona okamati, . . . Omuna gwaKalunga.” (Lukas 1:31, 35) Onkee ano, Jesus okwa li omuntu a gwanenena ngaashi Adam sho a shitwa. (Lukas 3:38; 1 Aakorinto 15:45) Jesus oku na okukala a li omulumentu gwondjelo ombwanawa notashi vulika a li a fa yina Omujuda, Maria.

Mepingathano nAaroma mboka ya li kaaye na oombenzi, Jesus okwa li e dhi na ngaashi sha li omukalondjigilile gwAajuda. Oombenzi odha li endhindhiliko lyetumbalo nesimano. Kadha li hadhi kala oonde noinaadhi silwa oshimpwiyu. Osha yela kutya Jesus okwa li ha kulula nawa oombenzi dhe nomafufu ge. Aanasiri, ngaashi Simson, oyo owala ya li ihaaya tete omafufu gawo. — Numeri 6:5; Aatokolihapu 13:5.

Momukokomoko gwomimvo 30, okwa kala ta longo omimvo odhindji e li omuhongi gwiipilangi, noka li e na iilongitho yoshinanena. (Markus 6:3) Onkee ano, okwa li e na okukala e na olutu lwa pama. Sho opo a tameke iilonga ye yokuuvitha, okwa li a “tidha mo ayehe motempeli pamwe noongombe noonzi dhawo. Okwa tilehi iimaliwa, niitaafula yawo okwe yi undulile pevi.” Iinima ayihe mbika okwe yi ningi oye awike, inaa kwathelwa komuntu. (Johannes 2:14-17) Ohashi pula omuntu e na oonkondo, opo a longe iilonga iikumithi ya fa mpoka. Jesus okwa li a longitha olutu ndoka a longekidhilwa kuKalunga, opo a gwanithe po oshilonga shoka a pewa kuYe. Jesus okwa ti: “Elaka etoye lyOshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Lukas 4:43) Osha li tashi pula oonkondo odhindji dhopalutu, opo e ende muPalestina ashihe koompadhi nokuuvitha etumwalaka ndyoka.

‘ILENI KUNGAME NOTANDI MU PE EVULULUKO’

Oshipala shaJesus shombili nomikalo dhe omiwanawa otashi vulika oyo ya ningitha aantu mboka ya ‘vulwa noya humbatekwa uudhigu’ ya taambe ko ehiyo lye ndyoka. (Mateus 11:28-30) Iikala ye yombili nolukeno oya li ya tsu omuthindo euvaneko lye lyokugandja evululuko  kwaamboka ye na ehalo lyokwiilonga kuye. Aagundjuka nayo oya li nokuli ya hala okukala puJesus, oshoka Ombiimbeli otayi ti: ‘Okwa papata aanona momaako ge.’ — Markus 10:13-16.

Nonando Jesus okwa li u uvite uuwehame komwenyo manga inaa sa, ka li ha kala a nika oluhodhi. Pashiholelwa, okwa li a kutha ombinga moshituthihango shoka sha ningilwe muKana, sho a shitukitha omeya ga ninge omaviinu omatoye. (Johannes 2:1-11) Piituthi yilwe, okwa li a longo aantu iiyilongomwa kaayi shi kudhimbiwa. — Mateus 9:9-13; Johannes 12:1-8.

Komeho gaayihe, Jesus okwa li u uvitha momukalo tagu pe kehe gumwe etegameno lyoku ka mona omwenyo gwaaluhe. (Johannes 11:25, 26; 17:3) Sho aalongwa ye 70 ye mu hokololele nkene iilonga yawo yokuuvitha ye ende, Jesus “oku udhithwa enyanyu” e ta ti: “Nyanyukilweni, omadhina geni sho ga nyolelwa membo lyomegulu.” — Lukas 10:20, 21.

“IHE NE INAMU KALA NGAAKA”

Aawiliki yomalongelokalunga yopethimbo lyaJesus oya li ya ningitha aantu ya kale taya gandja unene eitulomo kuyo nokoonkondopangelo dhawo. (Numeri 15:38-40; Mateus 23:5-7) Ihe Jesus okwa li a lombwele aayapostoli ye ya kale ya yooloka ko kuyo mokukala ihaaya “pangele” aantu ooyakwawo. (Lukas 22:25, 26) Okwa li e ya londodha a ti: “Angaleni aalongimpango mboka ye hole okweenda ya zala oonguwo oondeendeka nokukundilwa pokuma hapu gongala aantu.” — Markus 12:38.

Jesus ka li a fa aalongimpango mboka. Okwa li owala a fa aantu ooyakwawo, poompito dhimwe aantu kaya li haye mu dhimbulula nokuli. (Johannes 7:10, 11) Nokuli nuuna e li mokati kaayapostoli ye 11, ka li ha kala a yooloka ko kuyo. Omugwaaleki Judas okwa li a “tsu enyala” ongundu yaantu mboka e ya nayo, nokwa thipi Jesus komilungu, opo e ya ulukile kutya Jesus oye guni. — Markus 14:44, 45.

Nonando katu na lela uuyelele awuhe, osha yela kutya Jesus ka li ngaashi ha thanekwa olundji. Shoka sha simanenena hankene a li naanaa a tya, ihe onkene tu na oku mu tala ko ngashingeyi.

“NGELE PWA PITI OKATHIMBO OKAFUPI KOWALA, UUYUNI ITAU MONO NDJE WE”

Oowili dhontumba konima yokupopya oohapu ndhoka, Jesus okwa si e ta fumvikwa. (Johannes 14:19) Okwa gandja omwenyo gwe gu li iikulila, opo a “hupithe oyendji.” (Mateus 20:28) Mesiku etitatu, Kalunga okwe mu yumudha “pambepo” nokwe mu pitike i ‘ihololele’ yamwe yomaalongwa ye. (1 Petrus 3:18; Iilonga 10:40) Jesus okwa li a fa peni, sho i ihololele aalongwa ye? Anuwa okwa li a lunduluka thiluthilu, ka li ngaashi a li manga inaa sa. Aalongwa ye kaya li nokuli ye mu dhimbulula nziya. Maria Magdalena okwa li ta dhiladhila kutya ngiika Jesus omwene gweyana, omanga aalongwa Ye yaali mboka yu uka kuEmmaus ya li taya dhiladhila kutya Jesus omukwiilongo. — Lukas 24:13-18; Johannes 20:1, 14, 15.

Jesus otu na oku mu tala ko ngiini kunena? Omimvo dhi vulithe 60 konima yokusa kwe, omuyapostoli Johannes ngoka a li e holike unene kuJesus okwe mu mono momamoniko. Johannes ka li a mono Jesus a sa, a alelwa komushigakano. Ihe okwa mono “Omukwaniilwa gwaakwaniilwa nOmuwa gwaawa,” ano Omukwaniilwa gwUukwaniilwa waKalunga, ngoka masiku ta ka sinda aatondi yaKalunga, kutya nduno oompwidhuli nenge aantu, note ke etela aantu omalaleko nuuyamba taga kalelele. — Ehololo 19:16; 21:3, 4.