Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 4 2017

Okantuntu kedhina Praslin, moSeychelles, moka ondjayi Gordon ya li ya mono oshikunino shaEden mo 1881

Oparadisa kombanda yevi oko ya li shili notayi ke ya ishewe!

Oparadisa kombanda yevi oko ya li shili notayi ke ya ishewe!

Oshike hashi ya momadhiladhilo goye, uuna wu uvu oshitya oparadisa? Ngele twa mono omathano membo nenge kotiivii tagu ulike omahala omawanawa, ohashi tu ningitha tu kale twa hala okuya ko, tu ka thuwe po, tse tu dhimbwe omikundu dhetu. Ihe sho tatu galuka, omikundu natango opo owala dhi li.

Aantu sigo onena oya hala oparadisa, nomolwaashono olundji hayi ipula taya ti: “Mbela oparadisa ongano owala ombwanawa? Ngele osho, omolwashike aantu ye yi hala? Mbela otayi ke ya ngaa shili?”

OMAHOKOLOLO GONALE GOPARADISA

Uule womimvo omathele ogendji aantu oya kala tayi ipula noparadisa. Omolwashike mbela? Omolwaashoka Ombiimbeli otayi ti: “Kalunga okwa toto eyana muEden, kuuzilo.” Oshike sha li sha ningitha oshikunino shoka shi kale oshiwanawa? Ombiimbeli otayi ti: ‘Kalunga okwa menithile mo omiti dhomaludhi gi ili nogi ili dho opala okutalwa nokuliwa.’ Oshikunino shoka osha li oshiwanawa. Shoka sha li mo oshiwanawa unene, osho ‘omuti gwomwenyo ngoka gwa li pokati kasho.’ — Genesis 2:8, 9.

MuGenesis omwa popiwa kutya moshikunino omwa li iimpanalonga ine ya tondoka mokati kasho. Iyali yomuyo, Tigris (nenge Hiddekel) naEufrat oyi shiwike sigo onena. (Genesis 2:10-14) Iimpanalonga mbyoka ohayi tondokele mEkololo lyaPersia, ya taakana moIrak, shoka sha li oshitopolwa shaPersia shonale.

Oparadisa oya li oshinima sha simana muPersia shonale. Momumvo 1501-1600, mehala lyedhina Philadelphia Museum of Art, moPennsylvania, moAmerika omwa li emate lyaPersia ndyoka lya thanekwa oshikunino shi li molugumbo, shi na omiti noongala. Uutumbulilo wOshipersia “oshikunino shi li molugumbo,” otawu ti wo “oparadisa.” Lyo ethano ndyoka lya thanekwa kemate otali ulike oshikunino oshiwanawa shaEden shoka sha popiwa mOmbiimbeli.

Omahokololo kombinga yoparadisa ohaga popiwa momalaka nomomaputuko ogendji muuyuni awuhe. Sho aantu ya tembukile kiitopolwa yi ili noyi ili kombanda yevi, oya tsikile okwiitaambekidha omahokololo goparadisa ndjoka ya popiwa mOmbiimbeli. Konima yomimvo omathele aantu oya tameke okwiitaala omahokololo ngoka noya kala haye ga hokolola moongano dhawo. Nokuli nokunena aantu shampa ya mono ehala ewanawa, olundji ohaye li ithana oparadisa.

AANTU TAYA KONGO OPARADISA

Aantu mboka haye ende taya konakona iinima oya ti kutya oya mona oparadisa ndjoka ya kana. Pashiholelwa, ondjayi yetangakwiita lyaBritania, Charles Gordon, oya talele po Seychelles momumvo 1881. Oya li ya fuulwa kehala ewanawa hali ithanwa Vallée de Mai, ndyoka ya ti kutya ngiika olyo oshikunino shaEden. Ehala ndyoka oli li limwe lyomomahala omawanawa noga simanekwa muuyuni. Momumvo 1492, omweendifuta Christopher Columbus, Omwiitalia, sho e ya pokantuntu haki ithanwa Hispaniola, okwa li ta dhiladhila kutya okwa mona oshikunino shaEden. Okantuntu hoka ngashingeyi oka topolwa pokati kOrepablika yaDominika naHaiti.

Membo lyondjokonona hali ithanwa Mapping Paradise, omu na uualita wonale wa konda 190, nowundji otawu ulike Adam naEva ye li muEden. Muwo omu na kamwe ke na omimvo 800 lwaampono, ka thanekwa kutatekulu Beatus, a za kehala hali ithanwa Liébana, moSpania. Pombanda yako opu na okampungu ka thanekwa oparadisa pokati, moka mwa za iimpanalonga ine. Omadhina gayo ogo “Tigris,” “Eufrat,” “Pishon” nosho wo “Geon.” Oshimpanalonga kehe otashi kunguluka shu uka kombinga yi ili, noombinga adhihe aniwa otadhi thaneke sho Uukriste tawu taandele koombinga ne dhevi. Shono otashi ulike kutya nonando aantu kaya li ye shi kutya Oparadisa ndjoka ya popiwa mOmbiimbeli oya li peni, natango ohaya dhimbulukwa nkene ya li ombwanawa.

 Omutoti gwiitewo Omwiingilisa, John Milton, ngoka a li ko omimvo dhi vulithe 400 dha ka pita, okwa tseyikila nawa okatewo ke, Paradise Lost (Oparadisa ya kana). Oka kankamena kehokololo lyaGenesis kombinga yokuyona kwaAdam naasho a tidhwa muEden. Muko okwa tsu omuthindo kutya aantu otaya ka kala ishewe nomwenyo sigo aluhe kombanda yevi, a ti: “Evi alihe otali ka kala oparadisa.” Konima yethimbo, okwa toto po ishewe kamwe, Paradise Regained (Oparadisa ya monika ishewe).

ETALOKO LYOPARADISA TALI LUNDULUKA

Mondjokonona aantu oya kala nokwiipula noparadisa ndjoka ya kana kombanda yevi. Omolwashike aantu ihaayi ipula we kombinga yayo? Embo lyedhina Mapping Paradise olya ti kutya “aateolohi . . . oye etha po okupopya kutya oparadisa oko ya li.”

Aantu moongeleka odhindji ohaya longwa kutya itaya ka kala nomwenyo kombanda yevi moparadisa, ihe otaya yi megulu. Ombiimbeli mEpisalomi 37:29 otayi ti: “Aayuuki otaa ka thigulula evi e taa kala mo sigo aluhe.” Ngele uuyuni mbuka tu li kunena kawu shi oparadisa, oshike tashi tu kwathele tu kale nuushili kutya euvaneko ndika otali ka gwanithwa? *

EVI OTALI KA NINGA SHILI OPARADISA

Jehova Kalunga ngoka a shita Oparadisa ndjoka ya popiwa muGenesis, oku uvaneka kutya ote ke yi eta ishewe. Ote ke shi ninga ngiini? Dhimbulukwa kutya Jesus okwe tu longa tu galikane tatu ti: “Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” (Mateus 6:10) Oshilongo nenge Uukwaniilwa owo epangelo ndyoka tali ka pangela uuyuni li li miikaha yaJesus Kristus notali ka pingena po omapangelo agehe gopantu. (Daniel 2:44) Uukwaniilwa shampa wa tameke okupangela, ehalo lyaKalunga lyokuninga evi oparadisa otali ka ‘gwanithwa.’

Omuhunganeki Jesaja okwa li a wilikwa kuKalunga a popye nkene onkalo tayi ka kala mOparadisa ndjoka yu uvanekwa, moka itaamu ka kala we omahilathano noontamanana. (Jesaja 11:6-9; 35:5-7; 65:21-23) Otatu ku ladhipike wu leshe oovelise ndhoka dhaJesaja mOmbiimbeli yoye. Uuna we dhi lesha, oto ka kala nuushili waashoka Kalunga ta ka ningila mboka haya vulika kuye. Otaya ka nyanyukilwa Oparadisa, notaya ka kala ya hokiwa kuYe, iinima mbyoka Adam a kanitha. — Ehololo 21:3.

Omolwashike tu na uushili kutya kombanda yevi otaku ka kala ishewe Oparadisa? Ombiimbeli otayi ti: “Egulu lyokombandambanda olyo ehala lyOmuwa mwene, ihe evi okwe li pe aana yaantu.” Otu na etegameno kutya kombanda yevi otaku ka kala oparadisa ndjoka ‘Kalunga ngoka ihaa fundju, e tu uvanekela.’ (Episalomi 115:16; Titus 1:2) Ombiimbeli itayi tu pe tuu etegameno ewanawa lyoku ka kala mOparadisa sigo aluhe!

^ okat. 15 Oshihokithi sho mOkoran, membo Al-Anbiya’ ontopolwa 21, ovelise 105 tayi ti: “Aapiya yandje aayuuki otaya ka thigulula evi.”