Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 4 2017

O-Tetragrammaton, edhina lyaKalunga eyapuki, Jehova, lya nyolwa moondanda dhOshihebeli, hadhi leshwa okuza kolulyo wu uka kolumoho

Okandanda kOshihebeli hoka ka simana noonkondo

Okandanda kOshihebeli hoka ka simana noonkondo

Mbela otatu vulu ngaa okukala neinekelo kutya omauvaneko agehe ngoka Kalunga u uvaneka otaga ka gwanithwa? Jesus okwa li e na einekelo kutya otaga ka gwanithwa. Shoka a longo aantu osha li sha koleke eitaalo lyawo. Tala keudhi ndyoka a gandja mEuvitho lye lyokOndundu, tali adhika muMateus 5:18 tali ti: “Ongame tandi mu lombwele: Manga egulu nevi inaaga hula po, mompango itamu zi nando okanyolo kamwe nenge okankwanu kamwe sigo ayihe ya gwanithwa.”

Okandanda hoka okashona lela moalfabeta yOshihebeli oko י (yod). Oko ondanda yotango mo-Tetragrammaton, ndjoka yi lile po edhina lyaKalunga eyapuki, Jehova. * Kakele kiitya noondanda ndhoka dhi li mOmpango yaKalunga, aanongompango nAafarisayi oya li ya tala ko “okankwanu” kehe ka simana noonkondo.

Jesus okwa li ta ti kutya nokuli nonando ando egulu nevi oli hule po, kehe shoka sha nyolwa mOmpango itashi kala inaashi gwanithwa po. Nonando ongawo, Ombiimbeli oye tu shilipaleka kutya egulu nevi lyo lyenelyene otayi kala po sigo aluhe. (Episalomi 78:69) Onkee ano, oohapu ndhoka otadhi ti kutya okanima kehe ke li mOmpango oke na okugwanithwa po thiluthilu.

Mbela Jehova Kalunga oku na ko ngaa nasha nokugwanithwa po kwokanima kehe? Eeno. Pashiholelwa, Aaisraeli yonale oya li ya lombwelwa kutya kaye na okunyanyula nando esipa limwe lyonzigona yOpaasa. (Eksodus 12:46) Otashi vulika elombwelo ndika li kale lya fa kaali na oshilonga. Oya li ngaa ye shi kutya omolwashike kaaye na oku li nyanyula? Otashi vulika haasho. Nonando ongawo, Jehova Kalunga okwa li e shi kutya uuyelele mboka otawu popi pahunganeko kombinga yaMesiasa ngoka omasipa ge ga li itaaga ka teyagulwa, sho ta dhipagelwa komuti gwomahepeko. — Episalomi 34:20; Johannes 19:31-33, 36.

Mbela oohapu dhaJesus ndhoka otadhi tu longo shike? Otatu vulu okukala lela neinekelo kutya kehe shoka Jehova u uvaneka, kutya nduno oshishona shi thike peni, otashi ka gwanithwa. Okandanda hoka kOshihebeli inaka simana tuu!

^ okat. 3 Okandanda hoka okashona lela moalfabeta yOshigreka oko iota noka faathana naahoka kOshihebeli י (yod). Molwaashoka petameko Ompango yaMoses oya li ya nyolwa e tayi gandjwa mOshihebeli, Jesus otashi vulika a li ta popi kombinga yokandanda hoka kOshihebeli.