Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 3 2016

 NATU HOLELENI EITAALO LYAWO | REBEKKA

“Eeno, onda hala”

“Eeno, onda hala”

REBEKKA okwa li ta talatala ombuga ndjoka yi na iikulundundu, sho etango tali ende tali toko. Konima yiiwike sho a kala molweendo, ngashingeyi okwa li i igilila okukayila oongamelo. Ngashingeyi okwa li kokule noshilongo shaandjawo Haran, shoka sha li kokule ookilometa omathele kuuzilombangalantu. Otashi vulika uukwanegumbo waandjawo ineeke wu mona we. Otashi vulika a li ti ipula iinima oyindji kombinga yonakuyiwa, unene tuu pethimbo ndyoka a li pokuthika.

Osheendo osha piti muKaanan nosha taakana moshilongo kaashi shi okutaagulukwa, shoka shi li muumbugantu waKaanan. (Genesis 24:62) Otashi vulika Rebekka a li a mono oonzi. Oshilongo osha li omuthitu unene nosha li sha kukuta nokulongwa, ihe osha li shi na uulithilo uuwanawa. Omulumentu omukokele ngoka a li ta kwatele komeho osheendo, oshilongo shoka okwa li e shi shi nawa. Okwa li a nyanyukwa omolwonkundana ombwanawa ndjoka a li ta ka lombwela mwene gwe kutya Rebekka okwa li ta ka ninga omukulukadhi gwaIsak! Rebekka otashi vulika a li ti ipula kutya onkalamwenyo ye otayi ka kala ya tya ngiini moshilongo shoka. Isak, omulumentu ngoka te ke mu hokana okwa tya ngiini? Inaya tsakanena nando onale! Mbela ota ka kala ngaa a nyanyukwa ngele e mu mono? Na Rebbeka ota ka kala e mu uvitile ngiini?

Miilongo oyindji kunena, oondjokana dha longekidhwa oshinima shonkulu yonale. Miitopolwa yilwe, okuninga ngaaka oshinima sha ha. Kutya nduno owa za meputuko lini, nangoye otashi vulika wu shi zimine kutya Rebekka okwa li tayi kokuma keehe shi ko nando onale. Okwa li shili omukiintu omulaadhi lela noku na eitaalo. Otwa pumbwa uukwatya awuhe mboka, uuna twa taalela omalunduluko monkalamwenyo. Okwa li wo e na omaukwatya galwe omawanawa noga pumba ge na ko nasha neitaalo lyaRebekka.

“OTANDI HUGILE WO OONGAMELO DHOYE”

Elunduluko enene ndyoka Rebekka a li a ningi monkalamwenyo ye olya li lya holoka momukalo ngoka gwa li tagu monika gu li mondjila kuye. Okwa li a putukile muHaran, oshilando shi li popepi naMesopotamia. Aavali ye oya li ya yooloka ko thiluthilu kaantu oyendji yomuHaran. Kaya li haya galikana oshikalunga shomwedhi Sin. Pehala lyaashono, Jehova oye a li Kalunga kawo. — Genesis 24:50.

Rebekka okwa li omukiintu omugundjuka a shitika, ngoka a li ha longo nuudhiginini nokwa li e na etegameno. Okwa li e na omukumo nokwa yogoka pamikalo. Uukwanegumbo waandjawo owa li wa hepuluka molwashoka owa li wu na aapika, ihe Rebekka ka li a lelwa hedha huka nenge u ungaungwe naye a fa omuna gwokombanda. Okwa li a putudhwa a kale ha longo nuudhiginini. Ngaashi owala aakiintu oyendji yopethimbo ndyoka, Rebekka okwa li ha longo iilonga iidhigu, ngaashi okuteka omeya gomegumbo. Lwokomatango, okwa li hayi komuthima noshuma she e shi humbata kepepe. — Genesis 24:11, 15, 16.

Ongulohi yimwe, sho u udha oshuma she, omulumentu omukokele okwe ya kuye ta matuka e mu tsakaneke. Okwe mu lombwele a ti: “Kwatha ndje ndi nwe mo moshuma shoye.” Ka li tuu e mu indile nesimaneko nonombili! Rebekka okwa li e shi wete kutya omulumentu ngoka okwa za kokule. Onkee okwi itsikulula nziya oshuma she kepepe e te mu pe a nwe mo, e ta kumwa, nomeya ngoka oga li ga talala nawa. Okwa li a mono kutya oku na oongamelo omulongo dha lala popepi, netemba lyokunwina kalya li lya tekelwa omeya oongamelo dhi nwe. Okwa li a mono nkene e mu tala nawa nohenda, nokwa li a hala a gandje ngaashi ta vulu. Onkee okwa ti: “Otandi hugile wo oongamelo dhoye dhi kumwe.” — Genesis 24:17-19.

 Ndhindhilika kutya Rebekka ina tya owala ota hugile oongamelo adhihe omulongo, ihe okwa ti ote dhi hugile sigo dha kumwa. Ongamelo yimwe ya sa enota, ohayi nu oolita 95! Ngele oongamelo adhihe omulongo odha li dha sa enota, Rebekka okwa li a longo ethimbo olindji iilonga iidhigu. Oshi li ngeyi kutya, oongamelo odha fa dha li inaadhi sa lela enota. * Ihe mbela Rebekka okwa li ngaa e shi shi sho a gandja ekwatho? Aawe. Okwa li a halelela okulonga nuudhiginini ngaashi sha pumbiwa a yakule omulumentu ngoka omukokele keehe shi nando onale. Okwa li a taamba ko ekwatho lye. Okwa kala nduno te mu tala nawa sho ta tutu omeya, ha ningi a teke oshuma she ye omeya tega tile metemba lyokunwina. — Genesis 24:20, 21.

Rebekka okwa li ha longo nuudhiginini noha yakula aayenda

Oshiholelwa shaRebekka otashi ti sha lela kutse kunena. Otu li pethimbo ndyoka aantu yi ihole yoyene unene. Ngaashi sha hunganekwa, aantu oyi ‘ihole,’ kaye hole okukwathela yakwawo. (2 Timoteus 3:1-5) Aakriste mboka haya kambadhala okukondjitha iikala yi li ngaaka oshi li nawa ya dhiladhile koshiholelwa shomOmbiimbeli shomukiintu omugundjuka, ngoka a li a tutu omeya momuthima.

Rebekka okwa li shili a mono nkene omulumentu ngoka omukokele temu tala nawa. Ka li andola e mu tala nayi, ihe okwa li tu ulike kutya okwe mu kuminwa nokwe mu nyanyukilwa. Sho Rebekka a mana, okwe mu pe omagano giikwamalyenge yondilo! Nokwe mu pula a ti: “Kwatha ndje u lombwele ndje, ongoye lye? Maandjeni omu na tuu ehala lyaayenda, tse naantu yandje tu ka lale mo?” Sho Rebekka e mu lombwele kombinga yoyaandjawo, okwa nyanyukwa nomoshipala. Tashi vulika nokuli omolwehwamo ndyoka a li e na, okwa gwedha ko a ti: “Maandjetu omu na omwiidhi [ogundji], omu na wo ehala lyokulala,” ano eyakulo lyagwana, molwaashoka Eliaser okwa li e ya naalumentu yalwe aakokele. Opo nduno okwa zi po puyo ta tondoka a ka lombwele yina kutya oshike sha ningwa po. — Genesis 24:22-28, 32.

Osha yela kutya Rebekka okwa li a tekulilwa okuyakula aayenda. Mpaka opu na oshinima shimwe ishewe sha simana shoka ihaashi ningwa naanaa, netompelo kutya omolwashike tu na okulandula oshiholelwa shomukiintu nguka omugundjuka nomunalukeno. Eitaalo muKalunga oli na oku tu inyengitha tu kale hatu yakula aayenda. Jehova oha yakula ayehe, molwaashoka oha gandja kaantu ayehe, nokwa hala aapiya ye ya ninge sha faathana. Ngele ohatu yakula aantu nokuli naamboka itaaye tu ningile sha faathana, otatu  nyanyudha Tate yetu gwomegulu. — Mateus 5:44-46; 1 Petrus 4:9.  

“KE MU KONGELE OMUKIINTU”

Omulumentu omukokele ngono a li pomuthima olye? Okwa li omupiya gwaAbraham, omumwayina gwahekulu yaRebekka. Sho osho a li a yakulwa nawa megumbo lyaBetuel, he yaRebekka. Edhina lye otashi vulika lya li Eliaser.  * Yaandja Betuel oye mu pe iikulya, ihe okwa li a tindi okulya sigo a popi shoka e endela. (Genesis 24:31-33) Dhiladhila owala ta popi nenyanyu, molwaashoka a mono uunzapo wa kola kutya Kalunga ke, Jehova, okwa li te mu yambeke moshinakugwanithwa she shika sha simana. Ngiini mbela?

Dhiladhila owala Eliaser ta hokolola sho he yaRebekka, Betuel, nomumwayina Laban ya shoka omakutsi. Okwe ya lombwele kutya Jehova okwa yambeka Abraham noonkondo muKanaan nokutya Abraham naSara oye na omwana omumati, Isak, ngoka a li ta ka thigulula iinima ayihe. Abraham okwa li a pe omupiya gwe oshilonga sha simana noonkondo shoku ka kongela omwanamati omukiintu kaakwanezimo yAbraham muHaran. — Genesis 24:34-38.

Abraham okwa li a ganitha Eliaser kutya ita ka kongela Isak omukiintu muKaanan. Omolwashike mbela? Omolwaashoka Aakaanan kaya li ya simaneka nenge haya longele Jehova Kalunga. Abraham okwa li e shi kutya Jehova ota ka hanagula po aantu mboka pethimbo lyo opala, omolwuukolokoshi wawo. Abraham ka li a hala omwanamati omuholike, Isak, a kwatathane naantu mboka nosho wo eihumbato lyawo lyopamikalo ewinayi. Okwa li wo e shi kutya omwanamati oku na oshinakugwanithwa sha simana mokugwanitha po omauvaneko gaKalunga. — Genesis 15:16; 17:19; 24:2-4.

Eliaser okwa lombwele mboka taye mu yakula kutya sho a thiki pomuthima popepi naHaran, okwa li a galikana kuJehova Kalunga. Okwa li a pula Jehova a hogolole omukiintu omugundjuka a ka hokanwe kuIsak. Okwa galikana ngiini? Eliaser okwa pula Kalunga a shilipaleke kutya omukadhona ngoka Kalunga a hala a hokanwe kuIsak neye komuthima. Ngele okwa pulwa omeya gokunwa, ka li owala te ki iyamba e ga pe Eliaser, ihe okwa li wo ta ka hugila oongamelo dhe. (Genesis 24:12-14) Olye a li e ya pomuthima e ta ningi naanaa ngaaka? ORebekka! Dhiladhila owala kutya andola okwi inyenge ngiini ngele okwa li u uvu sho Eliaser ta hokololele yaandjawo ehokololo ndyoka!

Betuel naLaban oya li ya kuminwa ehokololo lyaEliaser. Oya ti: “Oshinima shika osha zi kOmuwa.” Ngaashi sha li hashi ningwa, oya li ya ningi ehangano lyopandjokana, ano ya zimine Rebekka a hokanwe kuIsak. (Genesis 24:50-54) Mbela shoka osha li tashi ti kutya Rebekka ita ka tya sha kombinga yaashoka?

Konima yiiwike, Eliaser okwa li a popi oshinima shoka naAbraham. Okwe e mu pula a ti: “Otashi ningwa ngiini, omukadhona ngele ina hala okuza kaandjawo, e ye huka?” Abraham okwa li e mu yamukula a ti: “Nena owa manguluka megano ndika.” (Genesis 24:39, 41) Megumbo lyaBetuel, omukiintu ngoka Rebekka, omugundjuka, etaloko lye olya li wo li na oshilonga. Eliaser okwa li a nyanyukwa lela sho a pondola moshilonga she, naasho kwa shi okwa li a pula ngele ota vulu okushuna kuKaanan naRebekka nziya ngaashi tashi vulika. Ihe uukwanegumbo waBetuel owa li wa hala wu kale po naye ishewe omasiku omulongo lwaampoka. Hugunina, oya li ya tokola ya ti: “Natu ithane omukadhona, tu pulakene shoka ta ti.” — Genesis 24:57.

Shino osha li nduno oshinima sha simana monkalamwenyo yaRebekka. Okwa li ta ka tya ngiini? Mbela okwa li itee ke shi ninga molwaashoka he nomumwayinamati ye mu etela ohenda, te ke yi indila kutya ye ita ka ya molweendo lwokuya kehala hoka keehe shi ko? Nenge okwa li te ke shi tala ko shili uuthembahenda wokukala e na ombinga miiningwanima mbyoka tayi wilikwa kuJehova? Sho a yamukula oku ulike kutya oku uvite ngiini kombinga yelunduluko lyombaadhilila monkalamwenyo ye, notashi vulika lya li etilithi. Okwa yamukula a ti: “Eeno, onda hala.” — Genesis 24:58.

Ka li tuu u ulike ombepo ombwanawa lela! Kunena, shoka hatu ningi shi na ko nasha nondjokana otashi vulika shi kale sha yooloka ko kwaashoka, ihe otatu vulu okwiilonga oshindji kuRebekka. Shoka sha li sha simana unene kuye, kashi shi etaloko lye, ihe oondyoka lyaKalunga ke, Jehova. Kunena, ngele tashi ya poondjokana, Oohapu dhaKalunga otadhi gandja natango omayele ga dhenga mbanda shi na ko nasha naangoka wu na okuhogolola nankene to vulu okuninga omusamane nenge omukulukadhi e li nawa. (2 Aakorinto 6:14, 15; Aaefeso 5:28-33) Oshili nawa tu landule oshiholelwa shaRebekka nokuninga iinima metsokumwe nehalo lyaKalunga.

 ‘OMULUMENTU NGONO TE YA, OLYE?’

Yaandja Betuel oya li ya laleke omuholike gwawo Rebekka. Opo nduno Rebekka naDebora ngoka a li e mu lele okuza kuunona, naapiya yamwe aakadhona oya yi pamwe naEliaser naalumentu mboka a li nayo. (Genesis 24:59-61; 35:8) Sho opo ya yi molweendo, Haran osha li shi li kokule nayo. Olweendo olwa li olule, lwookilometa 800 nenge dhi vulithe po, notashi vulika lwa li lwe ya pula iiwike itatu. Otashi vulika kaalwa li olupu. Rebekka okwa li a mona oongamelo iikando oyindji monkalamwenyo ye, ihe katu shi ngele okwa li e shi oku dhi kayila. Ombiimbeli otayi popi kutya yaandjawo oya li aalithi yoonzi, ihe kaya li aalandithi haye ende noongamelo. (Genesis 29:10) Mboka opo tayi ilongo okukayila oongamelo, olundji ohaya ti kutya ohashi kala oshidhigu, nokuli nongele we dhi kayile owala oshinano oshifupi!

Kutya nduno osha li tashi pula shike, Rebekka okwa li a halelela, nokee na omalimbililo u uve kuEliaser kombinga yaIsak nuukwanegumbo waandjawo. Kala ando wa fa wu wete omulumentu ngoka omukokele ta popi naye uusiku pomulilo, te mu lombwele kombinga yomauvaneko gaJehova ngoka u uvanekele kuume Ke Abraham. Kalunga okwa li ta ka kutha mezimo lyaAbraham oluvalo ndwoka lwa li talu ka etela aantu ayehe omalaleko nuuyamba. Dhiladhila owala kenyanyu ndyoka Rebekka a li e na sho a mono kutya euvaneko lyaJehova otali ka gwanithwa po okupitila mwaangoka a li ta ka ninga omusamane gwe, Isak, nosho wo muye! — Genesis 22:15-18.

Rebekka okwa li u ulike eifupipiko lya pumba noli na ongushu

Lwahugunina, esiku osho lya thiki ndyoka twa popi petameko lyoshitopolwa shika. Sho oongamelo dha taaguluka Kaanan, lyo etango otali ka pa oyana, Rebekka okwa mono omulumentu te ende melundu. Okwa li ta monika ta dhiladhila muule. Otatu lesha mOmbiimbeli kutya: “Okwa londoloka ko kongamelo,” tashi vulika nokuli inaa tegelela yi lale, nokwa pula omupiya a ti: “Omulumentu ngono te ya e tu tsakaneke melundu, olye?” Sho u uvu kutya oIsak, okwi isiikile koshipala noshisaali she. (Genesis 24:62-65) Omolwashike? Anuwa okuninga ngaaka osha li tashi ulike kutya Rebekka okwa simaneka omulumentu ngoka a li ta ka ninga omusamane gwe. Okuulika esimaneko momukalo gwolukeno gu li ngaaka otashi vulika aantu yamwe ye gu tale ko gu li oshinima shonkuluyonale. Ihe uushili owo kutya aantu ayehe, aalumentu naakiintu otaya vulu okwiilonga mo sha meifupipiko lyaRebekka, molwaashoka olye mbela gwomutse inaa hala okukala e na uukwatya mboka uuwanawa?

Isak, omulumentu gwomimvo 40 lwaampono, okwa li natango a sa oluhodhi omolweso lyayina, Sara, ngoka a li a si konima yomimvo ndatu. Onkee otatu vulu okutya Isak okwa li omulumentu omunalukeno nomunahole. Omulumentu ngoka ka li tuu a yambekwa sho a pewa omukiintu omulaadhi, ha yakula aayenda, nomwiifupipiki! Mbela oya ka kala ye li ngiini? Ombiimbeli otayi ti: “Isak okwa li e hole Rebekka.” — Genesis 24:67; 26:8.

Nokuli nonando opwa pita ngashingeyi omimvo 3 900, oshipu okukala tu hole Rebekka. Katu na we shoka tatu vulu okutya, ihe okuholela uukwatya waRebekka wuulaadhi, wokulonga kwe nuudhiginini, wokuyakula aayenda noweifupipiko. Atuheni, kutya nduno aagundjuka nenge aakokele, aasamane nenge aakulukadhi, tu li moondjokana nenge hasho, oshi li nawa tu holele eitaalo lye!

^ okat. 10 Okwa li nokuli kwa toka. Ehokololo itali ti kutya Rebekka okwa li a kala pomuthima ethimbo ele. Itali popi wo kutya yaandjawo oya li ya kotha pethimbo a mana nenge pu na gumwe i ile e mu tale kutya omolwashike iilonga ye tayi kwata ethimbo.

^ okat. 15 Eliaser ina tumbulwa mo mehokololo ndika, ihe otashi vulika oye a li omupiya ngoka. Oshikando shimwe Abraham okwa li a hala a gandje iinima ye ayihe kuEliaser ngele kapu na ngoka a li te yi thigulula po. Onkee otashi vulika oye a li omupiya omukuluntu nomwiinekelwa lela gwaAbraham. Omupiya ngoka osho a popiwa ngaaka mehokololo ndika. — Genesis 15:2; 24:2-4.