Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 2 2017

Mona uuwanawa mboka hawu zi mokugandja

Mona uuwanawa mboka hawu zi mokugandja

“OMBESA otayi vulu okuya, ihe omulumentu nguka Omuchiina ota kala po!” Omukiintu gwedhina Alexandra osho a li u uvu, manga a kuutumba mombesa a tegelela ya pite poongamba, ndhoka dhi li pokati kiilongo iyali mUumbugantu waAmerika. Okwa londoloka a ka tale kutya oshike tashi ningwa po. Okwa adha omugundjuka Omuchiina ta popi Oshispania, ihe ke shi shi nawa. Okwa li ta kambadhala okuyelithila omupolisi gwopoongamba uupyakadhi we. Molwaashoka Alexandra okwa li ha gongala kegongalo lyOshichiina lyOonzapo dhaJehova, okwa li i iyamba a fatulule.

Omulumentu okwa ti kutya oku na uuthemba wokukala moshilongo, ihe okwe wu yugwa koombotsotso pamwe niimaliwa ye. Petameko omupolisi ka li a hala okwiitaala ehokololo ndika nokwa li nokuli ta dhiladhila kutya Alexandra ote eta omulumentu ngoka moshilongo, opo e ke mu landithe po. Konima osho ngaa e ki itaala shoka omulumentu ta popi, ihe okwa li e na okufutithwa, oshoka ke na oondokumende dhi li mondjila. Molwaashoka ka li e na oshimaliwa, Alexandra okwe mu pe oodola dhaAmerika 20. Omulumentu ngoka okwa li a pandula noonkondo nokwa ti kutya ote ke mu futa shi vulithe poodola 20. Alexandra okwa yelitha kutya ine shi ninga, opo a futwe. Okwa li a hala okukwathela, shaashi oku wete kutya oshu uka. Okwa pe omulumentu ngoka iileshomwa yopaMbiimbeli nokwe mu ladhipike a konakone Ombiimbeli nOonzapo.

Ohashi nyanyudha okuuva gumwe a ningila omuntu kee mu shi uuwanawa wu thike mpoka. Nopwaahe na omalimbililo, oshinima sha tya ngaaka ohashi ningwa kaantu yomomalongelokalunga ga yoolokathana naamboka kaaye li momalongelokalunga. Mbela ando ongoye, ando owa katuka ngaa momukalo gwa tya ngaaka tagu ulike kutya owu na ko nasha? Epulo ndyoka olya simana, molwaashoka Jesus okwa ti: “Okugandja oku na elago ku vule okutaamba.” (Iilonga 20:35) Aanongononi oye shi mona kutya okugandja ohaku etele omuntu uuwanawa paumwene. Natu ka tale kutya omomikalo dhini.

NGOKA HA “GANDJA NENYANYU”

Osha monika kutya olundji okugandja nokukala wu na enyanyu ohaku endele pamwe. Omuyapostoli Paulus okwa nyola kutya “Kalunga oku hole ngoka ta gandja nenyanyu.” Okwa li ta popi Aakriste mboka ya li ya gandja omayambidhidho nehalo ewanawa, opo ya kwathele ooitaali ooyakwawo mboka ya li moluhepo. (2 Aakorinto 8:4; 9:7) Paulus ina tya oya gandja, oshoka oya li ya nyanyukwa, ihe oya li ya nyanyukwa, molwaashoka ya gandja sha kuyalwe.

Omakonakono gamwe ogu ulike kutya okugandja “ohaku pendutha oshitopolwa shuuluyi shoka sha kwatathana nokwiinyanyudha, nomakwatathano gopankalathano nosho wo nokwiinekelathana hoka haku ningitha omuntu a kale e na enyanyu ndyoka hali zi mokugandja.” Omakonakono galwe ogu ulike kutya “okupa gulwe oshimaliwa ohaku ningitha ngoka te shi gandja a kale a nyanyukwa, shi vulithe uuna te shi longitha ye mwene.”

Mbela owu na esiku wa li wu uvite kutya omolwonkalo yoye ito vulu okugandja sha? Uushili owo kutya kehe gumwe ota vulu okumona enyanyu ndyoka hali zi mokukala ha “gandja nenyanyu.”  Uuna omuntu ta gandja netompelo ewanawa, shoka sha simana kashi shi uuwindji woshimaliwa. Omukiintu gumwe Onzapo yaJehova, okwa li a nyolele kaanyanyangidhi yoshifo shika pamwe nomayambidhidho ge a ti: “Omimvo adhihe ndhika inandi vula okugandja oshimaliwa oshindji kOshinyanga shUukwaniilwa, ihe onda vulu owala okugandja oshishona.” Okwa gwedha ko a ti: “Jehova Kalunga okwa pa ndje oshindji shi vulithe pwaashoka nda gandja. . . . Tangi sho wa kwathela ndje ndi vule okugandja omagano ngaka, ohashi hekeleke ndje lela.”

Okugandja inaku ngambekelwa owala poshimaliwa, ihe opu na omikalo dhilwe odhindji dhokugandja.

OKUGANDJA OHAKU KU KWATHELE WU KALE NUUKOLELE

Okugandja ohaku ku etele uuwanawa nosho wo yalwe

Ombiimbeli oya ti: “Omulumentu omunamikalo ota kala nawa, ihe omulumentu omugeyentu ota kwishike olutu lwe mwene.” (Omayeletumbulo 11:17) Aanahenda ohaya gandja, oyi ilongekidha okuyamba po ethimbo noonkondo dhawo, ohaya sile yalwe oshimpwiyu nokuninga iinima yilwe ya gwedhwa po. Okuninga ngaaka ohaku ya etele uuwanawa momikalo odhindji, ngaashi oku ya kwathela ya kale nuukolele.

Omakonakono ogu ulike kutya mboka hayi iyamba ya kwathele yalwe ihaya kwatwa unene komauwehame nokepolimano. Ohaya kala ye na uukolele wu li nawa. Okugandja ohaku hwepopaleke nokuli uukolele wayalwe mboka tashi vulika ye na uuvu woshinamenena, ngaashi o-HIV nenge o-multiple sclerosis mboka hawu yonagula oonelive dholutu. Okwa ndhindhilikwa wo kutya mboka taya kambadhala okweetha po iikolitha notaya kwathele yakwawo, ihaya kala ya gwilililwa po unene pamaiyuvo nohashi ya kwathele wo kaaya shune komalovu.

Kutya nduno omolwashike shika shi li ngeyi, “okuulukila yalwe olukeno nohenda ohaku ku kwathele kuu kale nomadhiladhilo omawinayi.” Okugandja otaku vulu nokuli ku shunithe pevi omaipulo nosho wo ombinzi ya londa. Mboka ya silwa ookuume kawo kopandjokana ihaya kala we ya polimana, ngele oya kambadhala okukwathela yalwe.

Osha yela kutya okugandja ohaku etele omuntu uuwanawa.

OMULONGELO OHAGU KUTHA OMUKWAWO KELIMBA

Jesus okwa li a ladhipike aalanduli ye a ti: “Gandjeni, Kalunga ote mu pe oshiyelekitho shoka tashi holola iilonga yeni iiwanawa, shu udha, sha thindwa, sha huwa, tashi tika e tashi tulwa mekolo lyeni. Oshoka oshiyelekitho shoka tamu shi yelekitha yakweni, osho Kalunga te ke mu yelekitha.” (Lukas 6:38) Uuna wa pe yalwe sha, olundji ohaya pandula nohaya tameke wo okugandja. Kungawo, okugandja ohaku ningitha aantu ya kale ye na elongelokumwe nuukuume.

Okugandja ohaku ningitha aantu ya kale ye na elongelokumwe nuukuume

Mboka haya konakona onkalathano yaantu oya ti kutya “aantu mboka aluhe ye na ko nasha nayakwawo, ohayi inyengitha yalwe ye shi ninge wo.” Nokuli, “okulesha owala kombinga yankene yalwe yu ulukila yalwe ohenda, ohaku ningitha yalwe ya kale wo haya gandja.” Omakonakono gamwe ogu ulike kutya “omuntu kehe ota vulu okunwetha mo aantu oyendji nenge nokuli omathele, tashi vulika nokuli naantu mboka inaa mona nale nenge kee shi.” Oku shi popya niitya yilwe, okugandja otaku vulu okuguma  aantu moshitopolwa e taya nwetha mo yakwawo. Mbela ino hala okukala mehala lya tya ngaaka? Otashi ke etela aantu uuwanawa owundji, ngele oyendji oya tameke okugandja.

Oshimoniwa shimwe oshiwanawa osho koFlorida, moAmerika. Ongundu yOonzapo dhaJehova oya li yi iyamba ya kwathele mboka ya dhengwa koshikungulu. Manga ya li ya tegelela iilongitho pegumbo ndyoka ye na okuninga nawa, oya mono olugumbo lwondhalate yopuushiinda lwa ninga nayi, e taye lu ningi nawa. Konima yethimbo, omushiinda ngoka okwa nyolele koshitayimbelewa shOonzapo dhaJehova a ti: “Onda pandula noonkondo. Inandi tsakaneka nale aantu ye na oombepo oombwanawa ya fa mbaka.” Olupandu olwa li lwe mu inyengitha a gandje omayambidhidho ga ka longithwe miilonga mbyoka i ithana kutya iilonga iinene yOonzapo.

LANDULA OSHIHOLELWA SHA SHIGA KO SHOKUGANDJA

Omakonakono gamwe gaanongononi ogu ulike kutya “opu na oshinima shimwe oshinene hashi ningitha aantu ya kwathele yalwe.” Oga gwedha ko kutya aanona “ohayu ulike okunakonasha nokuli nomanga inaaya tameka okupopya.” Omolwashike mbela? Ombiimbeli oya gandja eyamukulo ya ti kutya aantu oya shitwa ‘oshifetha shaKalunga,’ ano ye na omaukwatya ga tongomana ga fa ge. —  Genesis 1:27.

Wumwe womomaukwatya gOmushiti gwetu, Jehova Kalunga, owo okugandja. Okwe tu pe omwenyo naashihe shoka twa pumbwa, opo tu kale twa nyanyukwa. (Iilonga 14:17; 17:26-28) Otatu vulu okutseya Tate yetu gwomegulu nomalalakano ge gopahole mokukonakona Ombiimbeli. Oya popya wo kutya okwe tu ningila sha, opo tu kale nonakuyiwa ombwanawa. * (1 Johannes 4:9, 10) Molwaashoka Jehova Kalunga oye onzo yokugandja nowa shitwa oshifetha she, inashi ku kumitha sho okugandja taku ku etele uuwanawa notaku ku ningitha wu kale wa hokiwa kuye. —  Aahebeli 13:16.

Oto dhimbulukwa Alexandra ngoka a popiwa petameko lyoshitopolwa shika? Oshe ke enda ngiini pehulilo? Nonando omweendi pamwe naye mombesa okwa ti kutya okwe ekelahi oshimaliwa she momeya, omulumentu ngoka a li a kwathele, okwa kwatathana nookuume ke moshilando moka ombesa ya li ya kankama, nokwa shunithile Alexandra oodola dhe 20 dhaAmerika. Omulumentu okwa li a ningi ngaashi Alexandra e mu ladhipike nokwa tameke okukonakona Ombiimbeli. Alexandra okwa li a nyanyukwa sho a tsakanene naye ishewe poshigongi oshinene shOshichiina shOonzapo dhaJehova moPeru. Opo u ulike olupandu lwe omolwaashihe shoka Alexandra e mu ningila, omulumentu ngoka okwe mu hiya korestolanda ye. Okwa hiya Alexandra a ye ko pamwe naamboka e ya nayo koshigongi mosheenditho shimwe.

Okugandja nokukwathela yalwe ohaku eta enyanyu enene. Mokuninga ngaaka, oto vulu okukwathela aantu ya tseye Omugandji gwomagano agehe omawanawa, Jehova Kalunga! (Jakob 1:17) Mbela oto nyanyukilwa ngaa uuwanawa mboka hawu zi mokugandja kwa tya ngaaka?

^ okat. 21 Opo wu mone uuyelele wa gwedhwa po, tala membo Ombiimbeli otayi tu longo shike? lya nyanyangidhwa kOonzapo dhaJehova noli li kepandja lyetu lyokointaneta, www.jw.org/ng. Tala mpoka pwa nyolwa IILESHOMWA > OMAMBO NUUMBO.