Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 2 2016

Olye a tula mo oontopolwa noovelise mOmbiimbeli?

Olye a tula mo oontopolwa noovelise mOmbiimbeli?

DHILADHILA andola wu li Omukriste methelemumvo lyotango, ano okuza pomumvo 1-100. Egongalo lyeni opo owala lya tuminwa ontumwafo komuyapostoli Paulus. Sho wa pulakena sho tayi leshwa, owa ndhindhilike kutya Paulus okwa totha lwiikando ‘mOmanyolo omayapuki,’ ano mOmanyolo gOshihebeli. (2 Timoteus 3:15) Owi ipopile to ti: ‘Onda hala okutala kutya okwa totha peni lelalela.’ Mbela osha li oshipu oku shi ninga? Aawe. Omolwashike mbela?

KAMU NA OONTOPOLWA NOOVELISE

Natu taleni kutya iinyolwa mbyoka mwa li mwa nyolwa “Omanyolo omayapuki” oya li ya tya ngiini pethimbo lyaPaulus. Oshintoko shimwe osho shika shu ulikwa mpaka, oshitopolwa shembo lyaJesaja shoka sha adhika mEfuta lya sa. Owu wete mo shike? Oondanda dha kwatathana owala! Kamu na iileshitho. Kamu na nando oontopolwa dhontumba nenge oovelise ngaashi ndhoka hatu longitha kunena.

Aanyoli yOmbiimbeli kaya li ya topola shoka ya nyola moontopolwa nomoovelise. Oya nyola owala etumwalaka ndyoka Kalunga e ya pe, opo aaleshi nayo ya leshe etumwalaka alihe, ihe hawu topolwa owala uushona walyo. Mbela shoka hasho wa hala uuna wa nyolelwa ontumwafo ya simana kugumwe ngoka wu hole? Oho lesha ontumwafo ayihe, ihe hawu topolwa owala uushona wayo nenge iitopolwa yamo.

Oshinyolwa ngele kashi na oontopolwa noovelise, osha li oshidhigu oku shi lesha. Paulus okwa li owala ha tameke noohapu dhe ndhoka a totha ta ti kutya “ongaashi kwa nyolwa” nenge “shika osho shoka Jesaja e shi popi nale.” (Aaroma 3:10; 9:29) Osha li wo oshidhigu okumona kutya okwe dhi totha peni, ongele owala wa li wu shi nawa “Omanyolo omayapuki.”

Shimwe ishewe, “Omanyolo omayapuki” kaga li owala etumwalaka lyanathangwa lya za kuKalunga. Pehulilo lyethelemumvo lyotango E.N., ompwa li pu na iinyolwa yomambo 66 ga topoka! Shoka osho nee hashi nyanyudha aaleshi yOmbiimbeli oyendji sho haye yi lesha yi na oontopolwa noovelise. Shoka ohashi ya kwathele ya mone uuyelele wokondandalunde, ngaashi oohapu odhindji ndhoka Paulus a li a totha dhi li moontumwafo dhe.

Otashi vulika nduno wu pule kutya, ‘Hambaa, olye nduno a tula mo oontopolwa noovelise mOmbiimbeli?’

OLYE A TULA MO OONTOPOLWA MOMBIIMBELI?

Omusita Stephen Langton, ngoka a ka ninga Omumbisofi omukuluntu gwongeleka yaCanterbury, ota pandulwa sho a tula mo oontopolwa mOmbiimbeli. Okwa li e shi ningi lwopetameko lyomumvo 1300 E.N., sho a li omulongi koUniveesiti yaParis moFulaanisa.

Manga Langton kaa li ko, aakonakoni yamwe oya li ya kambadhala momikalo dhi ili nodhi ili ya topole Ombiimbeli muutopolwa uushona nenge moontopolwa, nelalakano lyokumona uuyelele. Dhiladhila owala andola kutya osha li tashi ka kala oshipu shi thike peni kuyo okumona okatendo ngele oya li taya kongo montopolwa yimwe pehala lyokukonga membo alihe, ngaashi membo lyaJesaja ndyoka li na oontopolwa 66.

Nonando ayihe mbyoka ya ningwa, oye e ta po wo omaupyakadhi. Aakonakoni oya li ya nduluka po omikalo odhindji dhi ili nodhi ili noitadhi tsu kumwe. Omukako gumwe, Evaangeli lyaMarkus olya li lya topolwa nale moontopolwa konyala 50, ihe kadha li 16 ngaashi tu dhi shi ngashingeyi. MoParis pethimbo lyaLangton, omwa li mu na aalongwa ya za kiilongo oyindji, noya li ye etelele Oombiimbeli  okuza kiilongo yawo. Aalongi naalongwa kaya li haya vulu okuyelithilathana kutya uuyelele mboka oye wu adha peni. Omolwashike mbela? Omolwashoka etopolo lyoontopolwa mOombiimbeli dhawo kalya tali tsu kumwe.

Langton okwa li a toto po omukalo gumwe gwokutopola oontopolwa. Omukalo gwe ogwa li “gwa hokiwa kaaleshi oyendji nokaasita, nogwa li gwa taandele neendelelo muEuropa alihe,” embo The Book—A History of the Bible, osho lya ti ngaaka. Oye a tula mo oontopolwa ndhoka dhi li mOombiimbeli odhindji kunena.

OLYE A TULA MO OOVELISE MOMBIIMBELI?

Konima yomimvo 300, okuza momumvo 1501-1600, omunyanyangidhi nomulongwantu a tseyika nawa Omufulaanisa, Robert Estienne okwa li e shi ningi oshipu ishewe. Elalakano lye olya li okwiindjipaleka elongombiimbeli. Okwa mono nkene tashi ka kala oshiwanawa okukala tu na omukalo gumwe owala gwoontopolwa noovelise dha tulwa oonomola.

Estienne ine ya po nedhiladhilo lyokutopola omanyolo gOmbiimbeli moovelise. Ooyakwawo yalwe oya adhikile nale ye shi ninga. Pashiholelwa, omimvo omathele dha ka pita, omunyoli gumwe Omujuda, okwa li a topola Ombiimbeli ayihe yOshihebeli, nenge iitopolwa yawo mbyoka haku tiwa Etestamendi Ekulu, moovelise ihe hamoontopolwa. Shimwe ishewe, shi na ko nasha netoto po lyoontopolwa, kapwa li omukalo gumwe gwoku dhi topola.

Estienne okwa li a topola Omanyolo gopaKriste gOshigreka, nenge ngoka haku tiwa Etestamendi Epe, moovelise e dhi tula oonomola e te dhi tula mumwe naandhoka dha adhika nale mOmbiimbeli yOshihebeli. Momumvo 1553, okwa li a nyanyangidha Ombiimbeli yotango yi ihwapo (mOshifulaanisa) ndjoka ya li yi na oontopolwa noovelise ngaashi Oombiimbeli odhindji ndhoka hadhi longithwa kunena. Aantu yamwe oya li taye shi shokonona noya ti kutya oovelise odha topola oohapu dhOmbiimbeli muuntoko, shoka she yi ningitha yi kale owala yi na omusholondondo gwoohapu dha topoka. Aanyanyangidhi yalwe oya li ya tameke okulongitha omukalo gwe ngoka meendelelo.

OMUKALO NGOKA OGWA KWATHELE AAKONAKONIMBIIMBELI

Omukalo ngoka otagu monika gwanathangwa, gwoontopolwa noovelise dha tulwa oonomola. Shika osha gandja eyooloko kovelise kehe mOmbiimbeli lya fa ngaashi onomola yondjukithi. Uushili owo kutya, etopolo lyoontopolwa noovelise inali nwethwa mo kuKalunga, nomathimbo gamwe omanyolo gomOmbiimbeli oga topolwa pomahala taga limbilike. Kakele kaashono, ogwe shi ningitha oshipu kutse tu vule okutotha nokundhindhilika nenge tu popye oovelise kooyimwe ndhoka tadhi tu kwathele, ngaashi owala hatu ndhindhilike omautumbulilo ngoka twa halelela okudhimbulukwa mondokumende yontumba nenge membo.

Nonando otashi kwathele okukala tu na Ombiimbeli ya topolwa moontopolwa nomoovelise, dhimbulukwa aluhe kutya osha simana okutseya nawa etumwalaka alihe lyaKalunga ndyoka e tu pa. Kala wu na omukalondjigilile gwokulesha Ombiimbeli, pehala owala lyoovelise kooyimwe nooyimwe. Ngele owe shi ningi otashi ke ku kwathela wu endele ko to tseya nawa ‘Omanyolo omayapuki ngoka taga vulu oku ku pa oondunge ndhoka tadhi ku thikitha mehupitho.’—2 Timoteus 3:15.

Tseya oshindji

ONKUNDANA OMBWANAWA YA ZA KUKALUNGA

Ongiini tatu vulu okukala nuushili kutya shoka shi li mOmbiimbeli oshoshili?

Ngele Ombiimbeli oya nyolithwa kuKalunga, nena itayi vulu okuyelekanithwa nando onembo limwe.