Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 2 2016

 IITOPOLWA YI IKOLELELA KOSHIPALANYOLO SHOKOMBANDA

Omolwashike Jesus a li a hepekwa nokudhipagwa?

Omolwashike Jesus a li a hepekwa nokudhipagwa?

“Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe, oshoka ayehe oya yono.”Aaroma 5:12

Oto katya ngiini uuna wa pulwa kutya, “Mbela owa hala okukala nomwenyo sigo aluhe?” Aantu oyendji otashi vulika ya tye eeno, ihe natango otashi vulika ya kale yu uvite kutya shoka kashi shi shoshili noinatu pumbwa okwiipula kombinga yasho. Eso oli li oshitopolwa shonkalamwenyo, yamwe osho haya ti ngaaka, oli li oshinima shopaunshitwe okuza keshito lyetu.

Natu tye nee, epulo ndyoka olya lundululwa, e tali pulwa taku ti: “Mbela owa hala okusa ngashingeyi?” Shampa we li pulwa wu li monkalo ombwanawa oto ka yamukula kutya aawe, ngaashi naanaa aantu oyendji haya yamukula. Omolwashike haya yamukula ngawo? Omolwashoka otwa shitwa nehalo lyokukala nomwenyo, nonando otwa taalela oonkalo oondhigu. Ombiimbeli otayi tu lombwele kutya Kalunga okwa shita aantu nehalo lyokukala nomwenyo sigo aluhe. Nokuli otayi ti kutya, “[Kalunga] okwa tula uukwaaluhe moomwenyo dhaantu.”—Omuuvithi 3:11.

Kunena aantu ihaya kala nomwenyo sigo aluhe. Mbela uupyakadhi owa zi peni? Mbela Kalunga okwa ninga po elongekidho lyontumba a mangulule mo aantu monkalo ndjoka? Omayamukulo gopaMbiimbeli komapulo ngoka otaga nyanyudha omitima, notaga yelitha nawa kutya omolwashike Jesus a li a hepekwa nokudhipagwa.

MBELA OSHIKE SHA LI SHA PUKA?

Oontopolwa ndatu dhopetameko dhembo lyOmbiimbeli lyotango lyaGenesis, otadhi tu lombwele kutya Kalunga okwa li a pe aaihokani yotango, Adam naEve, etegameno lyokukala nomwenyo sigo aluhe. Okwa li wo e ya lombwele kutya oshike ye na okuninga, opo ya kale ye gu na. Ehokololo otali popi wo nkene ya li inaaya vulika kuKalunga e taya kanitha etegameno ndyoka. Ehokololo olya popiwa momukalo gwanathangwa, naashoka ohashi ningitha aantu ya tye kutya kali shi lyoshili. Ngaashi owala Omavaangeli, Genesis naye oku na ehokololo li li paushili lyondjokonona yaantu. *

Oshizemo osha li shini sho Adam inaa vulika? Ombiimbeli otayi ti: “Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Omolwokwaavulika kuKalunga, Adam okwa yono. Kungawo, Adam okwa kanitha etegameno lyokukala nomwenyo sigo aluhe, nolwahugunina okwa ka sa. Molwashoka tse oyana, otwa thigulula uulunde we. Oshizemo, atuheni ohatu ehama, hatu kulupa nohatu si. Eyelitho kutya omolwashike hatu si otali  tsu kumwe wo naashoka aanongononi kunena ya mona kombinga yankene aanona haya kala ye na uukwatya wa fa waavali yawo. Mbela Kalunga ota ka ninga po sha, opo aantu ya mangululwe mo monkalo ndjoka?

KALUNGA OTA KA NINGA PO SHIKE?

Odhoshili kutya Kalunga okwa ninga po elongekidho, opo a mangulule nenge a futile po shoka sha kanithwa kuAdam omolwoluvalo lwe, ano etegameno lyomwenyo gwaluhe. Ongiini mbela Kalunga ta ka gwanitha po shoka u uvaneka?

Ombiimbeli otayi ti: “Eso olyo ondjambi yuulunde,” Aaroma 6:23. Shika osha hala okutya oshizemo shuulunde osho eso. Adam okwa yono nokonima okwa ka sa. Sha faathana, ohatu yono nohatu si omolwuulunde. Nonando twa valwa aalunde, kashi shi epuko lyetu. Onkee ano, Kalunga okwa tumu pahole Omwana omuholike, Jesus, ‘a se opo etu kulile mo muulunde’ wetu. Shika otashi vulika ngiini?

Eso lyaJesus olye tu egululila ondjila yoku ka mona omwenyo gwaaluhe

Molwashoka Adam okwa li omuntu a gwanenena (kee na uulunde). Okwe tu etela uulunde nosho wo eso omolwokwaavulika kwe, ihe opwa li pwa pumbiwa omuntu a gwanenena ngoka a li omuvuliki sigo omeso lye, opo e tu mangulule mo momutengi ngoka. Ombiimbeli otayi shi yelitha ngeyi: “Ngaashi aantu ayehe ya ningi aalunde omolwokwaavulika kwomuntu gumwe, ano osho tuu oyendji otaa ningwa aayuuki koshipala shaKalunga omolwokuvulika kwomuntu gumwe.” (Aaroma 5:19) Jesus oye ‘omuntu ngoka gumwe.’ Okwa thigi po olukalwa lwe megulu *, e ta ningi omuntu a gwanenena, ngoka a si peha lyetu. Oshizemo, otatu vulu okukala aayuuki koshipala shaKalunga nokukala tu na etegameno lyoku ka mona omwenyo gwaaluhe.

OMOLWASHIKE JESUS A HEPEKWA SIGO OMESO?

Omolwashike nduno sha li sha pumbiwa Jesus a se, opo shika shi vule okugwanithwa? Omolwashike Kalunga Omunankondoawike ngoka e li omupangeli inaa keelela uupyakadhi mbuka wu ye sigo okoluvalo lwaAdam, opo lu kale nomwenyo sigo aluhe? Odhoshili kutya oku na oonkondo oku shi ninga. Shoka kasha li tashi ka simanekitha oshipango she shoka tashi ti ondjambi yuulunde oyo eso. Ompango ndjoka kaya li oshinima shanathangwa shoka tashi vulu okuhulithwa po nenge okulundululwa inaashi tegelelwa. Oya li oshinima shoka shi na omakankameno okukaleka po uuyuki washili.—Episalomi 37:28.

Kalunga okwa tula po uuyuki moshinima shika, naantu otashi vulika ya kale ya kumwa ngele ote ke shi ninga  miinima yilwe ishewe. Pashiholelwa, mbela ota ka tokola ngaa shili pauyuuki sho ta ka tala kutya oolye yomoyana yaAdam ya gwana okupewa omwenyo gwaaluhe? Mbela otatu vulu ngaa okwiinekela muye kutya ota ka gwanitha po omauvaneko ge? Okuvulika kuye nokulonga uuyuki we omolwehupitho lyetu, Kalunga ote tu shilipaleke kutya aluhe oha ningi shoka shu uka.  

Omolweyambo lyeso lyaJesus, Kalunga okwe tu pe etegameno lyomwenyo gwaaluhe mOparadisa kombanda yevi. Ndhindhilika oohapu dhaJesus ndhoka dhi li muJohannes 3:16 tadhi ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” Eso lyaJesus otali popi oshindji kaashi shi owala kombinga yuuyuki waKalunga wa dhenga mbanda, ihe ope na wo oshindji unene tuu, ohole ye yokuhola aantu.

Omolwashike Jesus a li a hepekwa nokudhipagwa momukalo gu nyanyalitha ngaashi gwa hokololwa mOmavaangeli? Sho Jesus i idhidhimikile omamakelo noonkalo ondhigu oku ulike kutya Satana omuniifundja sho a ti kutya aantu itaya vulu okukala adhiginini kuKalunga uuna ye li momamakelo. (Job 2:4, 5) Omapopyo ngoka otashi vulika ga monike ga fa ge li mondjila konima sho Satana a ningitha Adam ngoka a li a gwanenena a yone. Jesus oku thike pamwe nAdam ngoka naye a li a gwanenena, ihe Jesus okwa kala omudhiginini, nonando okwa li ta monithwa iihuna noonkondo. (1 Aakorinto 15:45) Jesus oku ulike kutya Adam okwa li ta vulu okuhogolola okukala omudhiginini kuKalunga, molwaashoka okwa li ta vulu oku shi ninga. Mokwiidhidhimikila omahepeko, Jesus okwe tu tulila po oshinkoti shoka tu na okulandula. (1 Petrus 2:21) omolwevuliko lye Kalunga okwe mu pe ondjambi yomwenyo gwa gwanenena megulu moka itaa ka sa.

MONA UUWANAWA MESO LYAJESUS

Jesus okwa li shili a dhipagwa. Ondjila ndjoka tayi fala komwenyo gwaaluhe ngashingeyi oye tu egulukila. Mbela owa hala oku ka kala nomwenyo sigo aluhe? Jesus okwe tu lombwela shoka tu na okuninga sho a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.”—Johannes 17:3.

Aanyanyangidhi yoshifo shika otaye ku indile wu ilonge oshindji kombinga yaJehova, Kalunga kashili nosho wo kombinga yOmwana, Jesus Kristus. Oonzapo dhaJehova dhomoshitopolwa sheni otadhi ka kala dha nyanyukwa oku ku kwathela. Oto vulu wo natango okumona uuyelele wulwe ngele wa yi kepandja lyetu lyokointaneta, www.jw.org/ng.

^ okat. 8 Tala oshitopolwa “The Historical Character of Genesis,” membo Insight on the Scriptures,” epandja 922, lya nyanyangidhwa kOonzapo dhaJehova.

^ okat. 13 Kalunga sho a lundululile omwenyo gwOmwana moshivalelo shomukadhona Maria, okwa ningi omusimba, nombepo yaKalunga oya li ya gamene Jesus, opo kaathigulule uulunde washa kuMaria.—Lukas 1:31, 35.

Tseya oshindji

EDHIMBULUKO

Edhimbuluko lyeso lyaJesus

Otatu ku hiya wu ye wu gongale pamwe natse poshiningwanima shika sha simananena. Oto ki ilonga po nkene onkalamwenyo neso lyaJesus otayi vulu oku ku etela uuwanawa.

Omalongo gashili gOmbiimbeli ogeni naanaa?

Ekulilo olyo omagano ge li dhingi ga za kuKalunga

Ekulilo oshike? Ongiini to vulu okumona mo uuwanawa mulyo?