Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 2 2016

Mbela Aakriste oye na oku ka galikana komahala ngoka aniwa omayapuki?

Mbela Aakriste oye na oku ka galikana komahala ngoka aniwa omayapuki?

OMUMVO kehe, aantu ye vulithe pomamiliyona gahamano ohaya yi molweendo kehala li ikalekelwa moJapan hali ithanwa Shima Peninsula hoka ku na okuti kwomisendeli. Ohaya yi kehala Ise, hoka ku na oshikalungakiintu shetango shAashinto shedhina Amaterasu Omikami. Oshikalunga shoka osha longelwa kaantu uule womimvo 2 000 lwampoka. Aalongeli yoshikalunga mbaka ohayi iyogo tango kiikaha nokwoopaleka omakana gawo manga inaa tameka oku yi galikana. Ohaya thikama komeho goshinyanga shedhina haiden, opo ihe taya landula omukalondjigilile gwawo gwokutsa oongolo, okuhakela omake nokugalikana oshikalunga shawo. * Oshiyelekela shika ohashi ya pitike ya vulike komikalo dhilwe dheitaalo. Aabuddha yamwe mboka hayi iyithana Aakriste nosho wo yalwe ihaya mono pu na uupyakadhi okukutha ombinga momikalondjigilile dhAashinto, pehala ndyoka eyapuki.

Omaitaalo ogendji muuyuni ngoka aniwa omanene oge na omahala aniwa omayapuki, naantu omamiliyona ogendjigendji ohaya yi ye ke ga talele po. Miilongo moka mu na aantu mboka hayi iyithana Aakriste, omu na oongeleka odhindjidhindji nomahala omayapuki ngoka ga yapulilwa Jesus, Maria nosho wo aayapuki. Omakwawo ngaashi ngoka, oga totwa pomahala mpoka pwa li pwa ningilwa iiningwanima yopaMbiimbeli nenge iikumithalonga aniwa mbyoka ya ningwa omathimbo opo ga ziko nenge mpoka pu na iinima yi na ko nasha nomalongelokalunga. Aantu oyendji ohaya yi komahala ngoka aniwa omayapuki, molwashoka yi itaala kutya omagalikano gawo otaga ka uviwa ko ngele oko ye ke ga ningila. Yo yalwe, ngele oya thiki ko komahala hoka sho ye ende iinano iile oshi li euliko kutya oyi itula mo lela melongelokalunga lyawo.

Aantu ye ya kehala eyapuki lyoshikalunga Ise, moJapani nosho wo lyaGrotto lyoshikalunga Massabielle, moFulaanisa

Mbela omagalikano nomaindilo goye ohagu uvika owala ngele wa yi kehala eyapuki? Mbela Kalunga ota ka kala ngaa a hokwa oku ka longelwa owala komahala omayapuki kwaamboka haya ende iinano iileeleka ye ke mu longele komahala ngoka? Mbela Aakriste nayo oye na okuya komahala ngoka haku tiwa omayapuki ya ka galikane? Omayamukulo komapulo ngoka itage tu lombwele owala nkene tu na okukala twa tala ko omahala ngoka aniwa omayapuki, ihe otage tu kwathele wo tu mone nkene tu na okulongela Kalunga momukalo ngoka a hokwa.

GALIKANA KALUNGA “MOMBEPO NOMOSHILI”

Jesus okwa li a hala okutya shike sho a ti kutya otu na okugalikana ‘mombepo nomoshili’?

Oonkundathana ndhoka dha li pokati kaJesus nomukiintu Omusamaria otadhi ulike kutya Kalunga okwa tala ko ngiini oku ka galikanena ‘komahala omayapuki.’ * Jesus okwa li e li molweendo te ende muSamaria nokwe ya pomuthima gumwe gu li moshilando Sikar, opo a vululukwe po kashona. Okwa yi moonkundathana nomukiintu ngoka a li i ila omeya momuthima. Sho ya tsikile noonkundathana, omukiintu okwa popi omahala omayapuki omanene gopalongelokalunga ngoka ga li ge eta uutondwe pokati kAajuda nAasamaria. Omukiintu okwa ti:  “Ootatekulu Aasamaria oya li haa galikana Kalunga kondundu ndjika, ihe ne Aajuda ohamu ti kutya Jerusalem olyo ehala moka tu na okugalikanena.”—Johannes 4:5-9, 20.

Ondundu ndjoka omukiintu a li ta popi kombinga yayo oya li hayi ithanwa Gerisim noyi li ookilometa 50 kuumbangalantu waJerusalem. Aasamaria oya li haya yi lumwe kondundu ndjoka hoka kwa li ku na otempeli hoka ya li haya ka dhana oshituthi shopaasa. Onkee ano, pehala lyokugandja eitulomo keyooloko ndyoka hali e ta oontamanana pokati kawo, Jesus okwa ti: “Nekulu, itaala ndje. Ethimbo otali ya, uuna ndoka itaamu ka galikana Tate kondundu ndjika nenge muJerusalem.” (Johannes 4:21) Mbela kali shi tuu eyamukulo lya dhenga mbanda ndyoka lya zi kOmujuda! Omolwashike okulongela Kalunga kotempeli yaJerusalem kwa li kwa hulithwa po?

Jesus okwa tsikile ko ta ti: “Ethimbo otali ya noli li po ngashingeyi, uuna aagalikani yashili taa ka galikana Tate mOmbepo nomoshili. Oshoka aagalikani ya tya ngaaka oyo naanaa mboka Tate e ya hala.” (Johannes 4:23) Uule womimvo omathele, Aajuda oya kala ya tala ko otempeli ombwanawa ndjoka ya li muJerusalem yi li ondingandinga yelongelokalunga lyashili. Oya li haya yi ko iikando itatu momumvo kehe ya ka ningile Kalunga kawo, Jehova, omafikiloyambo. (Eksodus 23:14-17) Jesus okwa popi kutya shoka osha li tashi ka lunduluka ‘naagalikani yashili’ otaya ka galikana ‘mombepo nomoshili.’

Otempeli yAajuda oya li etungo li iwetikile ndyoka lya li pehala lyontumba. Ombepo noshili kayi shi iinima mbyoka hayi kala yi wetike, nenge hayi kala owala pehala limwe. Onkee ano, Jesus okwa li ta yelitha kutya elongelokalunga lyashili itali ka kala hali ningwa li ikolelela ketungo nenge kehala lyontumba, kutya nduno okondundu yaGerisim, okotempeli muJerusalem, nenge okehala lilwe eyapuki.

Moonkundathana dhe ndhoka a ningi nomukiintu Omusamaria, Jesus okwa li a tumbula kutya “ethimbo” lyelunduluko ndyoka melongelokalunga olya li ‘tali ya.’ Olya li tali ke ya uunake? Ethimbo ndyoka olye ya sho Jesus, okupitila meso lye lyeiyambo, a hulitha po elengelokalunga lyOshiyuda ndyoka lya li lyi ikolelela kOmpango yaMoses. (Aaroma 10:4) Jesus okwa ti ishewe: ‘Ethimbo oli li po ngashingeyi.’ Omolwashike a tile ngawo? Omolwashoka Mesiasa okwa li ta gongele nale aalongwa mboka taya ka vulika kelombwelo ndyoka a ka popya ishewe a ti: ‘Kalunga oye ombepo, onkee naamboka taye mu galikana, oye na okugalikana mombepo nomoshili.’ (Johannes 4:24) Okugalikana mombepo nomoshili, osha hala nduno okutya shike?

Sho Jesus a tumbula okugalikana mombepo, ka li ta popi kutya oshi na okuningwa mombepo yontumba, nenge okuninga omainyengo gontumba. Pehala lyaashono, okwa li ta popi kombinga yokuwilikwa kombepo ondjapuki yaKalunga, ndjoka oyo hayi tu kwathele tu uve ko Ombiimbeli. (1 Aakorinto 2:9-12) Oshili ndjoka  Jesus a popi oyo ontseyo yashili yomalongo gOmbiimbeli. Onkee ano, pehala lyokulongela Kalunga shi ikolelela kehala lyontumba, elongelokalunga lyetu otali ka kala owala lya hokiwa kuKalunga ngele oli ikolelela komalongo gOmbiimbeli notali wilikwa kombepo ondjapuki.

NKENE AAKRISTE YA TALA KO OMAHALA NGOKA ANIWA OMAYAPUKI

Aakriste oye na okukala ya tala ko ngiini okuya momalweendo ya ka galikane komahala aniwa omayapuki? Ngele otwa dhiladhila kelombwelo ndyoka Jesus a popi kutya aalongelikalunga yashili ohaya galikana Kalunga mombepo nomoshili, osha yela kutya elongelokalunga ndyoka hali ningwa li ikolelela kehala kehe eyapuki kali na nando ongushu yasha kuTate yetu gwomegulu. Ombiimbeli otayi tu lombwele kombinga yankene Kalunga a tala ko okusimaneka iikalunga melongelokalunga. Otayi ti: “Inamu simaneka iikalunga” nosho wo kutya “yandeni iikalunga.” (1 Aakorinto 10:14; 1 Johannes 5:21) Onkee ano, Aakritse yashili kaye na oku ka longela Kalunga kehala ndyoka lya tali ka ko eyapuki nenge hali humitha komeho iikalunga. Molwashoka ngele otwa tala kwaashoka hashi ningwa komahala ngoka, Aakritse yashili ihaya ka galikana kugo.

Shika itashi ti kutya Ombiimbeli oya keelela okukala wu na ehala mpoka ho galikanene, ho konakonene Ombiimbeli nosho wo lyokutedhatedhela. Ehala ndyoka ewanawa li li melandulathano notali simanekitha Kalunga, olyo tali ka kala ewanawa okukonakonena Ombiimbeli nokukundathanenwa iinima yopakalunga. Inashi puka wo okuninga endhindhiliko kombila, ngaashi okutula ko emanya. Shika oshi li owala okudhimbulukwa nenge okuulika kutya otu hole omuntu ngoka a sa. Ihe ngele otwa tala ko omahala ngoka kutya omayapuki nenge tu simanekele ko iikalunga, itashi ka kala metsokumwe noohapu dhaJesus.

Onkee ano, ino pumbwa okuya komahala omayapuki neinekelo kutya Kalunga ota ka pulakena komagalikano goye. Nenge kutya Kalunga ota ka kala e ku hokwa nenge e ku yambeke ngele owa yi molweendo lwokehala eyapuki. Ombiimbeli otayi ti kutya Jehova Kalunga, “oye Omuwa gwegulu nogwevi. Oye iha kala mootempeli dha tungwa kaantu.” Shika itashi ti kutya Kalunga oku li kokule natse. Otatu vulu okugalikana kuye note tu uvu kehe pamwe molwashoka “ke li kokule nomuntu nando ogumwe.”—Iilonga 17:24-27.

^ okat. 2 Omikalondjigilile odha yoolokathana dhokugalikana komahala goshikalunga shaShinto.