Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 6 2016

 ONDJOKONONA

Onda tseya oshili yOmbiimbeli, nonando kandi na omaako niikaha

Onda tseya oshili yOmbiimbeli, nonando kandi na omaako niikaha

Uuna omuntu ta hala okupunduka, ohi ikwatelele kusha. Ngame itandi vulu oku shi ninga, oshoka kandi na omaako niikaha. Onda li ndi na omimvo heyali, sho omaako gandje ga tetwa ko, opo omwenyo gwandje gu hupithwe.

Onda valwa momumvo 1960, sho meme e na omimvo 17. Tate okwa thigi po egumbo, manga inaandi valwa. Okuza mpono ngame nameme otwa yi tu ka kale koBurg, okandoolopa ke li muNdowishi lyokUuzilo. Otwa kala pamwe naavali yameme. Aantu oyendji kaya li yi itaala muKalunga mwa kwatelwa yaandjetu. Kalunga ka li omuntu gwolela kutse.

Sho tandi koko, onda li ndi hole okukala natatekulu. Okwa li e hole okutuma ndje olundji, ngaashi okulonda komiti, opo ndi tete ko iitayi. Onda li ndi hole okuninga iinima mbyoka, sho ndi li okanona. Onkalamwenyo yandje kaya li yi na uupyakadhi nonda li nda nyanyukwa.

OSHIPONGA SHOKA SHA LUNDULULA ONKALAMWENYO YANDJE

Sho ndi na omimvo heyali, opwa holoka oshinima oshitilithi. Ethimbo ndyoka onda adhika ndi li momumvo omutiyali kosikola (mondondo ontiyali). Esiku limwe manga tandi zi kosikola, onda londo ketenda lyolusheno. Sho nda londo oometa 8 okuza pevi, onda li nda tyokwa kolusheno e tandi kambuka. Sho nda ka penduka ondi li nale moshipangelo, nomaako gandje oga li ga sa. Onda tyokwa shinyanyalitha, noshiponga shika osha li oshinene. Omaako gandje agehe oga li taga ka tetwa ko, opo ku keelelwe oombakiteli kaadhi ye mombinzi. Meme, kuku natatekulu oya li ya dhengwa pomutima koshinima shoka. Molwaashono onda li okanona, oshinima shoka kanda li ndi shi lela nkene tashi ka guma onkalamwenyo yandje.

Konima sho nda zi moshipangelo, onda shuna kosikola. Uunona owa li tawu yolo ndje, tawu undula ndje nokudhenga ndje niinima, oshoka kanda li tandi vulu okwiigamena. Eihumbato lyawo ewinayi noohapu dhawo ndhoka dha honga odha li dhe ehameke ndje noonkondo. Konima onda tuminwa kosikola yiilema yedhina Birkenwerder, ndjoka yi na omuhandjo gwaanona mboka ya lemana. Osikola oya li kokule negumbo, onkee ano, meme, kuku natatekulu kaya li taya vulu okuya ko, ya talele ndje po. Onda kala handi ya mono owala pomafudho. Uule womimvo omulongo dha ka landula ko inandi kala pamwe nayo.

TE KOKO, IHE KANDI NA OMAAKO NIIKAHA

Onda tameke okwiilonga okuninga iinima noompadhi. Dhiladhila owala omuntu omukweni ta litha okafoloko nenge okasindo nominwe dhokoompadhi. Mbela sho to tala oshipu ngaa? Ngame onde shi ilongo. Ondi ilongo wo okwiikusha nokwiikamula noompadhi. Onda tameke nokuli okuudhika noompadhi, sho tandi popi naantu. Kungeyi, oompadhi dhandje odho dha ningi iikaha yandje.

Sho ndi na omimvo omulongo nasha, onda li ndi hole  okulesha omitotolombo kombinga yuunongononi. Omathimbo gamwe ohandi dhiladhila ando ndi na omaako goopulastika, ngoka te vulu okulonga nago kehe shimwe. Sho ndi na omimvo 14, onda tameke okuhila omakaya. Onda li ndu uvite kutya otaku ningitha ndje ndi kale ofule nondu uvite nda fa aantu ayehe. Onda fa nda li te ti: ‘Eeno, nangame otandi vulu okuninga kehe shimwe. Aakuluntu ohaya hili omakaya kutya nduno oye na omaako nenge kaye ga na.’

Onda kala ndi ipyakidhila monkalamwenyo yandje nonda li ndi hole omainyanyudho. Onda ningi oshilyo shewawa lyaagundjuka hali ithanwa Free German Youth, ndyoka hali ambidhidhwa kepangelo. Onda li amushanga gwongundu ndjoka, oshinakugwanithwa sha simana mokati kiilyo yongundu. Onda li wo mongundulwiimbo yimwe. Onda li wo handi hokololele aantu uutewo nokukutha ombinga momaudhano giilema. Konima sho nda dheulwa, onda tameke okulonga mehangano limwe li li mondoolopa moka he kala. Sho te koko, onda kala handi itula omaako goopulastika olundji. Onda li nda hala okukala nda fa ndi na iilyo ayihe yolutu.

NKENE NDA TSEYA OSHILI YOMBIIMBELI

Esiku limwe sho nda tegelela eshina lyokolutenda ndi ye kiilonga, pungame opwe ya omusamane gumwe. Okwa pula ndje ngele sho te tala Kalunga ona ka pe ndje ngaa ishewe omaako gandje agehe. Onda li nda kumwa shili. Onda li nda hala omaako gandje, ihe kungame osha li oshidhigu okwiitaala noitashi vulika. Kanda li ndi itaala muKalunga, nonda tompwa kutya ke ko. Onkee ano, okuza ngaa kesiku ndyoka, onda kala handi henuka omusamane ngoka.

Esiku limwe omuniilonga pamwe nangame okwa pula ndje tu ka talele po yaandjawo. Manga tatu nu okoothiwa, aavali ye oya tameke okupopya kombinga yaJehova Kalunga. Shoka osho sha li oshikando shandje shotango tandi uvu kutya Kalunga oku na edhina. (Eksodus 15:3, OB-1954) Ondi ipopile momutima gwandje nda ti: ‘Kaku na Kalunga kutya nduno edhina lye olye. Aantu mbaka ondi na oku ya tompa kutya oya puka.’ Onda li ndi itaala kutya Kalunga ke ko. Onda zimine tu kundathane Ombiimbeli, ihe shoka sha li sha kumitha ndje osho kutya inandi vula oku ya tompa kutya Kalunga ke ko.

Sho twa konakona omahunganeko gOmbiimbeli, omadhiladhilo gandje gokukala inaandi itaala muKalunga oge ende taga lunduluka. Omahunganeko ogendji gaKalunga oga gwanithwa, nonando oga nyolwa pwa pita omimvo omayuvi. Esiku limwe sho twa li tatu kundathana kombinga yOmbiimbeli, otwa yelekanitha oonkalo dhokunena nomahunganeko ngoka taga adhika muMateus ontopolwa 24, muLukas ontopolwa 21 nomuTimoteus omutiyali ontopolwa 3. Uuna omuvu ta hokololele ndohotola shoka u uvite, otashi ka kwathela ndohotola a mone kutya omuvu ote ehama shike. Sha fathaana, iiningwanima mbyoka ya popiwa momahunganeko ngoka oya kwathela ndje ndi mone kutya otu li ‘momasiku’ gahugunina ngoka taga popiwa mOmbiimbeli. * Onda li nda kumwa noonkondo. Omahunganeko ngoka oga kala nokugwanithwa montaneho yandje.

Onda li nda tompwa kutya shoka tandi ilongo oshili. Onda tameke okugalikana kuJehova Kalunga nonde etha po okuhila omakaya, nonando onda kala noku ga hila uule womimvo dhi vulithe pomulongo. Onda tsikile okukonakona Ombiimbeli konyala uule womumvo gumwe. Mo 27 Apilili 1986, onda ninginithwa meholamo metemba  lyokwiiyogela, oshoka pethimbo mpono iilonga yOonzapo muNdowishi lyokUuzilo oya li yi indikwa.

ONDA TAMEKE OKUUVITHILA YALWE

Molwaashono iilonga yetu oya li yi indikwa, otwa li hatu gongala momagumbo tu li muungundu uushona nokanda li ndi shi ooitaali oyendji. Ohaluka aakwanepangelo oya pitike ndje ndi ye kuNdowishi lyokUuninginino, hoka iilonga yOonzapo inaayi indikwa. Osha li oshikando shandje shotango monkalamwenyo okukala he yi kiigongi yOonzapo nokumona aamwatate naamwameme omayuvi. Shoka osha li oshinima oshiwanawa lela.

Konima sho ekuma ndyoka lya li lya topola oshilongo shaNdowishi pokati lya teka po, Oonzapo dhaJehova odha tameke okuuvitha dha manguluka. Hugunina, otwa kala tatu longele Jehova Kalunga, twa manguluka. Onda kala nda hala okuninga oshindji miilonga yokuuvitha, ihe onda li handi tila okupopya naantu mboka kaandi shi. Onda kala ndi idhina nondi uvite kaandi na oshilonga, omolwuulema wandje nosho wo sho nda kala ethimbo ele megumbo, pethimbo sho te putuka. Momumvo 1992, onda kambadhala okuuvitha oowili 60 momwedhi gumwe. Onda li nde shi enditha nawa noshe etele ndje enyanyu. Onda tokola oku shi ninga omwedhi kehe, nonda tsikile konyala uule womimvo ndatu.

Ohandi dhimbulukwa oohapu ndhoka dhi li mOmbiimbeli tadhi ti: “Olye ngoka omunkundi, ngame ndaa kale ando omunkundi pamwe naye?” (2 Aakorinto 11:29) Nonando ngame oshilema otandi vulu okuninga sha, molwaashoka ohandi dhiladhila nondi na ewi. Onkee ano, otandi kambadhala okuninga ngaashi tandi vulu ndi kwathele yalwe. Molwaashoka kandi na omaako, ohandi kala ndu uvitile mboka ye na omangambeko uukwawo wanankali. Ondi shi nkene omuntu ha kala u uvite, uuna a hala okuninga sha, ihe ita vulu. Ohandi kambadhala okuladhipika mboka haya kala yu uvite ngawo. Okukwathela yalwe momukalo gwa tya ngawo, ohaku nyanyudha ndje.

Okuuvithila yalwe evaangeli, ohaku nyanyudha ndje

JEHOVA OHA KWATHELE NDJE ESIKU KEHE

Odhoshili kutya omathimbo gamwe ohandi kala nda polimana, molwaashoka onda hala okukala ndi na iilyo yandje ayihe yolutu. Ohandi longo iilonga yandje yesiku kehe ngame mwene, nonando ohashi pula ethimbo olindji, oonkambadhala nosho wo oonkondo, shi vulithe pomuntu ngoka kee shi oshilema. Esiku kehe ohandi itsu omukumo noohapu ndhika: “Ngame otandi vulu shaa shoka, oshoka [Kalunga] ota koleke ndje.” (Aafilippi 4:13) Esiku kehe, Jehova oha pe ndje oonkondo, ndi vule okulonga iilonga yandje “yakehe esiku.” Onda mona kutya Jehova ine etha okukwatha ndje, nomolwaashono inandi hala okweetha po oku mu longela.

Jehova okwa yambeka ndje nomukulukadhi nonaanona mboka haya nyanyudha ndje. Oshinima shoka inandi ningilwa okuza kuunona nokuugundjuka wandje. Omukulukadhi gwandje Elke, oku hole ndje noku na olukeno. Shimwe ishewe, Oozapo dhaJehova omamiliyona odha ninga aamwatate naamwameme, tu li uukwanegumbo wumwe muuyuni awuhe.

Ndi li nomuholike gwandje, meme Elke

Euvaneko lyaKalunga lyOparadisa, sho ta ka ninga ‘iinima ayihe iipe,’ moka mwa kwatelwa nomaako gandje, olya hekeleka ndje wo. (Ehololo 21:5) Uuna tandi dhiladhila kwaashoka Jesus a ningi manga a li kombanda yevi, ohandi kala ndu uvite ko nawa euvaneko ndika. Okwa li a aludha mboka ya lemena nokwa shunitha ko nokuli okutsi kwomumati hoka kwa li kwa fegulwa ko. (Mateus 12:13; Lukas 22:50, 51) Omauvaneko gaJehova nosho wo iikumithalonga mbyoka Jesus a longo, oya tompa ndje lela ndu uve ko kutya masiku nangame otandi ka kala ndi na iilyo yolutu yi ihwa po.

Okutseya Jehova Kalunga oko eyambeko enene ndyoka nda ningilwa monkalamwenyo yandje. Ngashingeyi Jehova oye tate, kuume kandje, omuhekeleki gwandje nomugameni gwandje. Ondu uvite ngaashi Omukwaniilwa David ngoka a nyola a ti: “Omuwa ota gamene ndje. . . Oye ta kwatha ndje e ta nyanyudha ndje.” (Episalomi 28:7) Oshili yOmbiimbeli ndjika ya dhenga mbanda, onda hala oku yi dhiginina mokukalamwenyo kwandje akuhe. Onkee ano, onda tseya oshili yOmbiimbeli, nonando kandi na omaako niikaha.

^ okat. 17 Opo wu mone uuyelele wa gwedhwa po kombinga yomandhindhiliko gomasiku gahugunina, tala ontopolwa 9: Mbela ehulilo oli li popepi?” membo Ombiimbeli otayi tu longo shike? lya nyanyangidhwa kOonzapo dhaJehova noli li kepandja lyetu lyokointaneta www.jw.org/ng.