Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 6 2016

 IITOPOLWA YI IKOLELELA KOSHIPALANYOLO SHOKOMBANDA | OMAMONIKO NKENE MEGULU MWA TYA

Omamoniko taga popi kombinga yaamboka ye li megulu

Omamoniko taga popi kombinga yaamboka ye li megulu

MOmbiimbeli omwa popiwa omamoniko ogendji omakumithi, ngoka tage tu kwathele tu mone kutya megulu omwa tya ngiini. Hainima ayihe ya popiwa momamoniko ngaka tu na oku yi tala ko ngaashi yi li lelalela. Nonando ongawo, omamoniko ngaka itage tu kwathele owala tu mone kutya mboka ye li mehala moka hamu kala iishitwa yopambepo oya tya ngiini, ihe otu uve ko wo nkene taya vulu oku tu nwetha mo nawa nenge nayi. Natu ga taleni.

JEHOVA OYE OMUKOMBANDAMBANDA

Ombiimbeli otayi ti: “Megulu onda mono mo oshipangelapundi nagumwe a kuutumba ko. Oshipala she sha adhima ongomamanya ge na ondilo gajaspes nakarneli. Oshipangelapundi osha li sha dhingolokwa kuutamvula wolwaala lwa fa emanya lyasmaragdi.” — Ehololo 4:2, 3.

Ombiimbeli otayi ti: “Koombinga adhihe ota tayima uuyelele wo wene. Meadhimo omwa li omalwaala agehe guutamvula. Osho sha li olupe lweadhimo lyOmuwa.” — Hesekiel 1:27, 28.

Omamoniko ngoka oga li ga pewa omuyapostoli Johannes nomupolofeti Hesekiel. Otagu ulike kutya eadhimo lyaKalunga Omukombandambanda, Jehova, olya tya ngiini. Omwa longithwa iinima mbyoka tatu vulu okuthaneka momadhiladhilo ngaashi omamanya gondilo, uutamvula nosho wo eadhimo lyoshipangelapundi she. Omamoniko ngoka otage tu lombwele kutya Jehova oku na eholokopo lyi ikalekelwa newanawa noonkondo nonokutya omuhokithi nomunambili.

Omukalo moka Kalunga a hokololwa otagu tsu kumwe noohapu dhomupisalomi, ngoka a nyola a ti: “Omuwa oye omunene noku na okusimanekwa; oku na okutumbalekwa e vule iikalunga ayihe. Iikalunga yiigwana ayihe yilwe oyo iimenka yowala, ihe Omuwa oye a shiti omagulu. Esimano neadhimo olye mu kunduka; oonkondo neopalo oli li motempeli ye.” —  Episalomi 96:4-6.

Nonando Jehova oye Omukombandambanda, ote tu lombwele tu popye naye megalikano note tu shilipaleke kutya oha pulakene kutse. (Episalomi 65:2) Oku tu hole noonkondo noku na ko nasha natse, nomolwaashono omuyapostoli Johannes a nyola a ti: “Kalunga oye ohole.” — 1 Johannes 4:8.

JESUS OKWA THIKAMA KOLULYO LWAKALUNGA

Ombiimbeli otayi ti: “Stefanus, ngoka a li u udha Ombepo Ondjapuki, okwa ligamene pombanda kegulu nokwa mono ko eadhimo lyaKalunga naJesus a thikama kolulyo lwaKalunga. Oye okwa lombwele aatokoli a ti: ‘Taleni, ondi wete egulu lye eguluka nOmuna gwOmuntu a thikama kolulyo lwaKalunga.’” — Iilonga 7:55, 56.

Manga Stefanus inaa mona emoniko ndika, Jesus opo a adhika a dhipagithwa kaawiliki Aajuda mboka Stefanus a li ta popi nayo. Emoniko ndika olya koleke kutya Jesus oku na omwenyo nonokutya okwa yumudhwa nokwa tumbalekwa. Omuyapostoli Paulus okwa nyola kombinga yaashoka a ti: ‘Jehova okwa yumudha  Jesus Kristus kuusi nokwe mu kuutumbike kolulyo lwe megulu. Oko nkoka Kristus ta pangele aapangeli ayehe yomegulu, aaleli aanankondo naawa. Oye oku vule aanamadhina ayehe aanankondo yomuuyuni mbuka naambwiyaka tawu ya.’ — Aaefeso 1:20, 21.

Kakele kokupopya kombinga yondondo yopombanda ndjoka Jesus e na, Omanyolo otagu ulike kutya oku na ko nasha lela naantu, ngaashi Jehova. Pethimbo a li tu uvitha kombanda yevi, Jesus okwa li a aludha aavu niilema nokwa yumudha aasi. Sho a yamba po omwenyo gwe, oku ulike kutya okuhole noonkondo Jehova nosho wo aantu. (Aaefeso 2:4, 5) Ngashingeyi Jesus okwa thikama kolulyo lwaKalunga. Ota ka longitha oonkondopangelo dhe masiku, opo e etele aantu ayehe aavuliki omalaleko nuuyamba.

AAYENGELI OHAYA YAKULA KALUNGA

Omupolofeti Daniel okwa nyola a ti: “Manga nda li nda tala, iipangelapundi oya tulwa peha lyayo. Ngoka ta kala e na omwenyo aluhe sigo aluhe [Jehova] okwa kuutumba kushimwe shomiipangelapundi. . . . Okwa li ku na aantu omayuvi ogendji taye mu yakula, naantu oomiliyona ya thikama koshipala she.” — Daniel 7:9, 10.

Memoniko ndika li na ko nasha negulu, Daniel ka li owala a mono omuyengeli gumwe, ihe okwa li a mono oyendji. Ndika kalya li tuu emoniko ekumithi! Aayengeli oyo iishitwa yopambepo iikumithi, iinandunge niinankondo. Oondondo dhawo odha kwatela mo aaserafi naakerubi. Aayengeli oya popiwa mOmbiimbeli lwiikando yi vulithe 250.

Aayengeli kaye shi aantu mboka ya li nale kombanda yevi. Kalunga okwa kala nale a shita aayengeli, manga aantu inaaya shitwa. Sho evi tali shitwa, aayengeli opo ya li taya tala notaya ligola kenyanyu. — Job 38:4-7.

Omukalo gumwe moka aayengeli haya yakula Kalunga, omokukutha ombinga miilonga ya simanenena mbyoka tayi longwa kombanda yevi. Ano iilonga yokuuvitha onkundana ombwanawa kombinga yUukwaniilwa waKalunga. (Mateus 24:14) Okukutha ombinga kwawo miilonga mbika, okwa li kwa hololelwa omuyapostoli Johannes memoniko. Okwa nyola a ti: “Nena onda mono omuyengeli gulwe e na oohapu dhelaka etoye lyaaluhe, a tuka mombanda muule, a ka uvithile aantu yokombanda yevi, omihoko adhihe, omaludhi agehe, omalaka agehe niigwana ayihe.” (Ehololo 14:6) Nonando aayengeli ihaya popi naantu pethimbo lyetu ngaashi ya li haya ningi pethimbo lyonale,  ohaya wilike mboka taya uvitha onkundana ombwanawa, yu uvithile aanamitima omiwanawa.

SATANA OKWA PUKITHA AAYENGELI OYENDJI

Ombiimbeli otayi ti: “Megulu omwa tukuluka olugodhi. Mikael [Jesus Kristus] naayengeli ye oya kondjitha oshikoko pamwe naayengeli yasho. Oshikoko naayengeli yasho oya sindika yo inaa pitikwa we okukala megulu. Oshikoko oshinene oshu umbwa mo megulu. Osho eyoka ndyoka hali ithanwa omuhindadhi nenge Satana, ngoka ta pukitha uuyuni auhe. Oshu umbilwa kombanda yevi pamwe naayengeli yasho ayehe.” — Ehololo 12:7-9.

Megulu inamu kala aluhe mu na ombili. Okuza ngaa petameko lyondjokonona yaantu, omuyengeli gumwe okwa kokeke ehalo lyokukala a hala okulongelwa e ta tsu ondumbo naJehova. Kungeyi, okwa ningi Satana, ndyoka tali ti “Omupataneki.” Konima yethimbo aayengeli yalwe nayo oya tsu ondumbo naJehova noya ningi oompwidhuli. Molwaashoka oye li aakolokoshi, ohaya pataneke Jehova noonkondo noya pukitha aantu oyendji ya landule ondjila ndjoka kaayi li metsokumwe newiliko lyaJehova lyopahole.

Satana noompwidhuli dhe oya pilaala, yo aakwanyanya. Oye li aatondi yaantu noye etitha okumona iihuna okundji hoka ku li kombanda yevi. Pashiholelwa, Satana okwa dhipaga po iimuna nosho wo aapiya yomulumentu omudhiginini, Job. Konima okwa dhipaga oyana yaJob omulongo, mokweetitha “ombepo yoshikungulu” ndjoka ya hanagula po egumbo moka ya li. Opo nduno, oku umbu Job “iitumbuka molutu aluhe.” — Job 1:7-19; 2:7.

Satana masiku ota ka hanagulwa po. Okuza ngaa kesiku u umbilwa kombanda yevi, okwa kala e shi shi kutya “oku na ko ashike okathimbo okafupi kowala.” (Ehololo 12:12) Satana okwa tokolelwa nale ehanagulo lyaaluhe. Ndjoka kayi shi tuu onkundana ombwanawa!

MBOKA YA KULILWA KO KEVI

Ombiimbeli otayi ti: ‘Jesus okwe eta aantu kuKalunga, oomboka ya za momaludhi agehe, momalaka agehe, miigwana ayihe nomomihoko adhihe. Okwe ya ningi ombala yaayambi okulongela Kalunga ketu, oyo notaa ka pangela kombanda yevi.’ — Ehololo 5:9, 10.

Ngaashi Jesus a li a yumudhwa a ka kale nomwenyo megulu, opu na yalwe mboka taye ke shi ningilwa wo. Jesus okwa lombwele aayapostoli ye aadhiginini a ti: ‘Otandi ke mu longekidhila ehala notandi ka galuka ishewe, ndi mu ile, opo mu ka kale wo nkoka ndi li.’ —  Johannes 14:2, 3.

Mboka haya yi megulu, ohaya yi mo nelalakano. Otaya ka pangela pamwe naJesus mUukwaniilwa  waKalunga, mboka tawu ka pangela aantu ayehe kombanda yevi noku ye etela omalaleko nuuyamba. Jesus okwa lombwele aalanduli ye ya galikane kombinga yUukwaniilwa mboka, megalikano lyOmuwa. Okwa ti: “Tate yetu, ngu u li megulu: Edhina lyoye nali yapulwe, Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” — Mateus 6:9, 10.

SHOKA TASHI KA LONGWA KWAAMBOKA TAYA YI MEGULU

Omuyapostoli Johannes okwa nyola a ti: “Ondu uvu ewi enene lya popi mokule tali zi moshipangelapundi lya ti: ‘Ngashingeyi egumbo lyaKalunga oli li paantu! Oye ota ka theta omahodhi agehe momeho gawo. Oko noitaku ka kala we eso, oluhodhi, elilo nenge uuwehame. Oshoka iikulu oya hula po.’” — Ehololo 21:3, 4.

Emoniko ndika lyopahunganeko otali ulike kethimbo ndyoka Uukwaniilwa waKalunga tawu ka hulitha po epangelo lyaSatana nokuninga evi Oparadisa. Jesus pamwe naamboka ya yumudhwa ya ka kale megulu, oyo taya ka pangela mUukwaniilwa mboka. Iinima mbyoka hayi etele aantu uuwehame noluhodhi, itayi ka kala po we. Eso nalyo itali ka kala po we.

Oshike tashi ka ningilwa aantu omabiliyona mboka ya sa noitaya ka yumudhwa ya ka kale megulu? Otaya ka yumudhwa monakuyiwa, ye na etegameno lyoku ka kala mOparadisa kombanda yevi sigo aluhe. — Lukas 23:43.

Omamoniko ngoka otage tu shilipaleke kutya Jehova Kalunga, Omwana, Jesus Kristus, aayengeli aadhiginini nosho wo mboka ya kulilwa ko kevi, ayehe oye na ko nasha natse noonkondo noye tu halela onkalamwenyo ombwanawa. Opo wu ilonge oshindji kombinga yaashoka taya ka ninga monakuyiwa, kwatathana nOonzapo dhaJehova nenge wu ye kepandja lyetu lyokointaneta, www.jw.org/ng e to tapa ko embo Ombiimbeli otayi tu longo shike?