Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 4 2016

Mbela otashi wapa ngaa okukala muuyuni kaamu na elongithonkondo?

Mbela otashi wapa ngaa okukala muuyuni kaamu na elongithonkondo?

Mbela owa ningilwa nale uuwinayi nenge tashi vulika omupambele gwoye? Mbela owu na etompelo lyokukala wa tila oku wu ningilwa? Elongithonkondo otali popiwa kutya olya “londa pombanda muuyuni awuhe nolya tula uukolele waantu moshiponga.” Tala kiiholelwa tayi landula.

ELONGITHONKONDO LYOMOMAGUMBO NOLYOPAMILALO: Olopota ya za kIingwana ya Hangana oya ti: “Gumwe gwomaakiintu yatatu okwa ninga oshihakanwa shelongithonkondo lyopalutu nenge lyopamilalo okuzilila kukuume ke kopaihole, omathimbo nomathimbo mokukalamwenyo kwe.” Shi yemateka, “otaku tengenekwa kutya muuyuni awuhe, omukiintu gumwe makiintu yatano ota ka ninga oshihakanwa shekwatonkonga nenge shonkambadhala yokukwatwa onkonga.”

OMIYONENA DHOMOMAPANDAANDA: Okwa lopotwa kutya aantu ye vulithe po 30 000 oye li aalongi yomiyonena moAmerika. Muumbugantu waAmerika, konyala omuntu 1 gwomaantu 3, okwa lopotwa a ninga oshihakanwa shomiyonena.

OMADHIPAGO: Otaku tengenekwa kutya konyala etata lyaantu omiliyona oya dhipangwa iipundjamenye muule womumvo gumwe, noye vulithe pwaamboka ya dhipagelwa miita. MuAfrika lyokuumbungantu nomuAmerika lyopokati omo mwa li omwaalu gu li pombanda gwaantu mboka ya dhipangwa iipundjamenye, shi vulithe lwiikando ine yuupokati womwaalu gwaantu muuyuni. Aantu ye vulithe 100 000 oya dhipagwa iipundjamenye muAmerika lyokUumbugantu momumvo gumwe, omanga ye li 50 000 ya dhipagwa moBrazilia. Mbela onapu ka monike ngaa ekandulopo lyomukundu gwelongithonkondo tali kalelele?

MBELA ELONGITHONKONDO ONALI KA HULITHWE PO NGAA?

Omolwashike elongithonkondo li li apuhe muuyuni? Iiyetithi oyindji yomiyonena ongaashi: eindjipalo lyomathiminiko gopankalathano nolyuuhupilo wu vulathane, eihumbato ewinayi lyaanona lya nwethwa mo kiikala yaakuluntu yawo, elongithonayi lyiikolitha niingangamithi, ondhino yuukashike kookantu nokwaahageelwa kwaalongi yomiyonena.

Odhoshili kutya elongithonkondo olya kala tali keelelwa miilongo yimwe. Moshilando São Paulo, shaBrazilia, moka mu na aantu oyendji, omwa lopotwa kutya omadhipago oga shuna pevi noopelesenda 80 lwaampono, muule womimvo omulongo dha ka pita. Nonando ongaaka, omwaalu gwomiyonena dhelongithonkondo lyoludhi kehe ogu li apuhe moshilando moka. Omwaalu gwomadhipago ogu li natango poopelesenda 10 lwaampono dhaakalimo 100 000. Mbela oshike tashi ka hulitha po elongithonkondo palumwe?

Ekandulopo lyahugunina tali kalelele lyelongithonkondo olya kwatela mo aantu, iikala yawo neihumbato lyawo. Opo aalongi yomiyonena ya vule okulundulula, tango oya pumbwa okweetha po uuntsa, olwiiho nokwiiholamwene, e taya kala ye na ohole, esimanekathano nokukala ye na ko nasha nayalwe.

Oshike tashi vulu okwiinyengitha omuntu a ninge omalunduluko ngoka? Dhiladhila kwaashoka Ombiimbeli tayi longo:

  • “Oshoka ohole yokuhola Kalunga oyo okuvulika kiipango ye.” — 1 Johannes 5:3.

  • “EtiloKalunga olyo okutonda uuwinayi.” *Omayeletumbulo 8:13.

 Etilosimaneko nohole yokuhola Kalunga oyo iinima mbyoka tayi vulu okwiinyengitha omuntu noonkondo. Otayi vulu nokuli okukwathela aalongi yomiyonena ya lundulule onkalamwenyo yawo ayihe, ihe hakombanda owala. Mbela shika ohashi ningwa shili?

Tala kuAlex, * ngoka a kala mondjedhililo yaBrazilia uule womimvo 19, omolwuukolokoshi. Okwa ningi Onzapo yaJehova mo 2000, konima sho a konakona Ombiimbeli nOonzapo. Mbela okwa li ngaa shili a lundulula omikalo dhe? Eeno. Alex okwa li i ipe uusama lela, omolwiinima iiwinayi mbyoka a ninga. Okwa ti: “Onda tameke okukala ndi hole Kalunga sho a pitike ndje ndi kale ndu uvite shili kutya okwa dhimina ndje po. Olupandu nohole yokuhola Jehova oya kwathela ndje ndi lundulule omikalo dhandje.”

Omulumentu gumwe gwokuBrazilia, César, okwa li ha yaka nokuyuga aantu a homata, uule womimvo 15. Oshike sha li she mu ningitha a lundulule onkalamwenyo ye? Pethimbo a li mondjedhililo, Oonzapo dhaJehova odha kwatathana naye, nokwa tameke okukonakona Ombiimbeli. César okwa ti: “Osho oshikando shandje shotango okutseya elalakano lyonkalamwenyo. Ondi ilongo okukala ndi hole Kalunga. Ondi ilongo wo okukala ndi na etilosimaneko, ano okukala ndi na uumbanda wokuninga shoka tashi yemateke Jehova. Onda pandula Jehova, omolwolukeno lwe. Ohole netilosimaneko oyi inyengitha ndje ndi lundulule onkalamwenyo yandje.”

Ilonga shoka wu na okuninga, opo wu vule oku ka kala muuyuni mboka kaamu na uukolokoshi

Mbela iiholelwa mbika otayi tu longo shike? Otayi tu longo kutya Ombiimbeli oyi na oonkondo dhokulundulula oonkalamwenyo dhaantu lela, mwa kwatelwa okudhiladhila kwawo. (Aaefeso 4:23) Alex ngoka a tumbulwa metetekelo okwa gwedha ko a ti: “Shoka ndi ilongo mOmbiimbeli osha fa omeya omayelele nde ga tilwa, kashona nakashona oga yogola ndje mokukutha po omadhiladhilo gandje omawinayi. Iinima mbyoka kakwa li ndi shi ngele onandi ke yi ethe po sikulimwe!” Odhoshili kutya uuna tu na momadhiladhilo etumwalaka lyOmbiimbeli, otali ka kutha mo iinima iiwinayi. Oohapu dhaKalunga odhi na lela oonkondo. (Aaefeso 5:26) Oshizemo osho kutya aantu mboka aakwanyanya naamboka yi ihole yoyene otaya vulu okulundulula omikalo dhawo, nokukala aanalukeno naanambili. (Aaroma 12:18) Ohaya kala ye na ombili moonkalamwenyo dhawo, sho taya tula miilonga omakotampango gOmbiimbeli. — Jesaja 48:18.

Oonzapo dhaJehova dhi vulithe poomiliyona hetatu miilongo 240, odha mona omukalo dhingi gwokukandula po elongithonkondo. Aantu yomomihoko adhihe, yomomaputuko ga yoolokathana noyoondondo dhi ili nodhi ili, oyi ilonga okukala ye hole Kalunga noku mu simaneka. Oye hole wo aantu ooyakwawo noye na ombili muuyuni awuhe onga uukwanegumbo wumwe. (1 Petrus 4:8) Okunkalamwenyo kwawo okuulika kutya muuyuni otamu vulu okukala kaamu na uukolokoshi.

UUYUNI MBOKA KAAMU NA UUKOLOKOSHI OWU LI POPEPI!

Ombiimbeli oyu uvaneka kutya masiku Kalunga ota ka kutha po uukolokoshi awuhe kombanda yevi. Uuyuni wonena welongithonkondo owa tegelela esiku lyaKalunga moka “aakeenakonashanakalunga taa ka pangulwa notaa ka yonagulwa po.” (2 Petrus 3:5-7) Itaku ka kala we aakolokoshi. Ongiini tatu vulu okukala nuushili kutya Kalunga ota ka katuka onkatu nokuhulitha po elongithonkondo?

Ombiimbeli otayi ti kutya Kalunga “oku tonde unene kehe ngoka e hole elongitho lyoonkondo.” (Episalomi 11:5, NW) Omushiti okuhole ombili nuuyuuki. (Episalomi 33:5; 37:28) Nomolwaashoka ite ki idhidhimikila aakolokoshi ya tsikile nelongithonkondo.

Eeno, otwa tegelela shili uuyuni uupe wombili wu ye. (Episalomi 37:11; 72:14) Omolwashike itoo ningi oonkambadhala wu ilonge shoka wu na okuninga, opo wu vule oku ka kala muuyuni mboka kaamu na uukolokoshi?

^ okat. 12 Jehova olyo edhina lyaKalunga ngaashi tali adhika mOmbiimbeli. Yelekanitha nOmbiimbeli yo-NW.

^ okat. 14 Ngoka hago omadhina gawo.