Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Apilili 2016

Kalunga ota ka kala e ku hokwa uuna wu li omudhiginini kuye

Kalunga ota ka kala e ku hokwa uuna wu li omudhiginini kuye

“Holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.” — AAHEBELI 6:12.

OMAIMBILO: 86, 54

1, 2. Jefta nomwanakadhona oya li ya taalelwa keshongo lini?

KALA ando wa fa wu wete omwanakadhona gwaJefta ta matuka a ka tsakaneke he. Okwa li a nyanyukwa noonkondo okumona he sho a galuka kiita nombili. Okwi imbi ta tanta a nyanyukwa, molwaashono he okwa sindana. Ohaluka he okwa ningi oshinima nokwa popi oohapu ndhoka tashi vulika dhe mu kumitha. Jefta okwa tuula oonguwo dhe moluhodhi, e ta ti: “O, mumwandje! Owa tatula omutima gwandje!” Opo nduno okwa lombwele omwanakadhona kutya oku uvanekela Jehova oshinima shoka tashi ka lundulula onkalamwenyo ye sigo aluhe. Euvaneko ndyoka olyo kutya omwanakadhona ke na siku a hokanwe nenge a mone aanona. Omwanakadhona okwe mu yamukula nziyanziya momukalo omwaanawa, tagu kumike he a dhiginine euvaneko ndyoka u uvanekela Jehova. Shoka omwanakadhona a yamukula oshu ulike kutya okwi inekela kutya kehe shimwe Jehova te mu pula a ninge oshiwanawa. (Aatokolihapu 11:34-37) Shono osha ningitha Jefta a mone kutya omwanakadhona oku na eitaalo nokwa li  e mu pandula. Okwa li e shi shi kutya momukalo mono omwanakadhona i inyenge ogwa hokiwa kuJehova.

2 Jefta nomwanakadhona oya kala yi inekela thiluthilu muJehova nosho wo omukalo moka ha ningi iinima. Oya li wo aadhiginini nomoonkalo oondhigu. Oya li ya hala okuhokiwa kuJehova. Shoka osha li tashi pula eiyambo.

3. Omolwashike oshiholelwa shaJefta nomwanakadhona tashi vulu oku tu kwathela kunena?

3 Haaluhe oshipu okukala omudhiginini kuJehova. Otwa pumbwa “okukondjela eitaalo.” (Judas 3) Opo tu shi ninge, natu tale nkene Jefta nomwanakadhona ya kondjele eitaalo, sho yi idhidhimikile omashongo monkalamwenyo yawo. Oshike sha kwathele Jefta nomwanakadhona ya kale aadhiginini kuJehova?

KALA OMUDHIGININI NONANDO MUUYUNI OMU NA OMANWETHOMO

4, 5. (a) Elombwelo lini Jehova a li a pe Aaisraeli sho ya yi mEvi lyEuvaneko? (b) Oshike sha ningilwa oshigwana shaIsraeli sho inaashi vulika, ngaashi sha popiwa mEpisalomi 106?

4 Jefta nomwanakadhona otashi vulika ya li haya dhimbulukithwa esiku kehe kombinga yiizemo iiwinayi mbyono Aaisraeli ya li ya mono, sho inaaya vulika kuJehova. Omimvo 300 lwaampono dha tetekele, Jehova okwa li a lombwele Aaisraeli ya dhipage aalongelikalunga yiifundja ayehe mboka ye li mEvi lyEuvaneko, ihe inaye shi ninga. (Deuteronomium 7:1-4) Aaisraeli oyendji oya li ya tameke okuholela Aakaanana, mboka ya kala taya hondele nokulongela iikalunga. — Lesha Episalomi 106:34-39.

5 Jehova ina gamena Aaisraeli kaatondi yawo, molwaashono inaya vulika kuye. (Aatokolihapu 2:1-3, 11-15; Episalomi 106:40-43) Oshi na okukala sha li oshidhigu noonkondo kaantu mboka ya li ye hole Jehova, ya kale aadhiginini kuye muule womimvo ndhoka uuwinayi wa li wa vuka. Nonando ongawo, Ombiimbeli oya popya aantu aadhiginini ngaashi Jefta, omwanakadhona, Elkana, Hanna naSamuel. Ayehe mboka oya li ya tokola toko ya nyanyudhe Jehova. — 1 Samuel 1:20-28; 2:26.

6. Iinima yini muuyuni kunena tayi vulu oku tu nwetha mo, noshike tu na okuninga?

6 Pethimbo lyetu, aantu ohaya dhiladhila nokukatuka ngaashi Aakaanana. Oye hole iipala, omiyonena niimaliwa, ihe tse Jehova okwe tu pa omalondodho ga yela nawa. Okwa hala oku tu gamena ngaashi naanaa a li a hala okugamena Aaisraeli kiinima iiwinayi. Mbela momapuko gawo otatu ilongo mo sha ngaa? (1 Aakorinto 10:6-11) Otu na okuninga ngaashi tatu vulu, tu yande okudhiladhila ngaashi uuyuni. (Aaroma 12:2) Mbela otatu ka kambadhala ngaa twa mana mo tu shi ninge?

JEFTA OKWA KALA OMUDHIGININI, NONANDO OKWA LI TA NINGWA NAYI

7. (a) Oshigwana shaIsraeli osha li shu ungaunga ngiini naJefta? (b) Jefta okwa li i inyenge ngiini sho oshigwana she ya okupula ekwatho kuye?

7 Pethimbo lyaJefta, Aaisraeli oya li taya thiminikwa kAafilisti nokAayammoni. Omolwashike mbela? Aaisraeli kaya li haya vulika kuJehova. (Aatokolihapu 10:7, 8) Shimwe ishewe, Jefta ka li u uvitathane naamwayinamati nosho wo naawiliki yaIsraeli. Oya li ye mu sila ondumbo noye mu tonde. Shono oshe ya ningitha ye mu tidhe mo mepya moka a li e na uuthemba okukala mo. (Aatokolihapu 11:1-3) Jefta ine etha a nwethwe mo kiikala yawo. Otu shi shi ngiini? Sho aawiliki  yoshigwana shaIsraeli ya pula ekwatho kuye, okwe ya kwathele. (Aatokolihapu 11:4-11) Oshike tashi vulika sha ningitha Jefta i inyenge momukalo ngono?

8, 9. (a) Omakotampango geni mOmpango yaMoses ga li ga kwathele Jefta? (b) Oshike sha li sha simanenena kuJefta?

8 Jefta okwa li ependafule. Okwa li wo e shi nawa ondjokonona yoshigwana shaIsraeli nosho wo Ompango yaMoses. Sho a tala nkene Jehova a kala noshigwana she, oshe mu longo omithikampango dhe dhaashoka sha puka naashoka shi li mondjila. (Aatokolihapu 11:12-27) Jefta okwa longitha ontseyo ndjoka sho ta ningi omatokolo monkalamwenyo ye. Okwa li e shi nkene Jehova a tala ko ongeyo nonkone. Okwa li wo e shi kutya Kalunga okwa hala aapiya ye ya kale ye holathane. Kakele kaashono, okwa li wo i ilonga mOmpango nkene e na okuungaunga naantu, mwa kwatelwa naamboka ye mu tonde. — Lesha Eksodus 23:5; Levitikus 19:17, 18.

9 Otashi vulika Jefta a li a tseya nkene Josef a sile aamwahe ohenda, nonando oya li ye mu tonde. Oshiholelwa shoka otashi vulika sha li she mu kwathele. (Genesis 37:4; 45:4, 5) Sho e shi dhiladhila otashi vulika she mu kwathele a katuke momukalo ngoka tagu nyanyudha Jehova. Shoka a ningilwa kaamwayina osha li she mu uvitha nayi unene, ihe omaiyuvo ge hago ga li ga simana. Shoka sha li sha simana kuye, okukondjela edhina lyaJehova noshigwana she. (Aatokolihapu 11:9) Jefta okwa li a tokola okukala omudhiginini kuJehova, na Jehova okwe mu laleke nuuyamba pamwe noshigwana shaIsraeli. — Aahebeli 11:32, 33.

Inatu etha shoka she tu yemateka shi tu ethithe po okulongela Jehova

10. Omithikampango dhaKalunga otadhi kwathele ngiini Aakriste kunena?

10 Mbela otatu i ilongo mo sha moshiholelwa shaJefta? Ongiini ngele aamwatate oye tu yemateka nenge tu wete haye tu ningi nayi? Inatu etha oshinima shoka shi tu ethithe po okulongela Jehova. Ino etha po okugongala nenge okweendathana negongalo. Onkee ano, natu holeleni Jefta nokuvulika kuJehova. Shika otashi ke tu kwathela tu pite moonkalo oondhigu nokutula po oshiholelwa oshiwanawa. — Aaroma 12:20, 21; Aakolossa 3:13.

OMAYAMBO TAGA ZI KOMUTIMA OTAGA HOLOLA EITAALO LYETU

11, 12. Egano lini Jefta a ningi, nolya li lya kwatela mo shike?

11 Jefta okwa li e shi shi kutya okwa pumbwa ekwatho lyaKalunga, opo a mangulule oshigwana shaIsraeli muupika wAayammoni. Oku uvanekele Jehova kutya ngele okwa sindana, sho ta shuna kegumbo, ota ka gandja po omuntu ngoka ta zi megumbo lye tango “efikilondjambo.” (Aatokolihapu 11:30, 31) Shoka otashi ti shike?

12 Otu shi shi kutya Jefta ka li ta ka fika po omuntu lelalela, molwaashoka Jehova oku tonde omayambo goludhi ndoka. (Deuteronomium 18:9, 10) Ompango  yaMoses oya popya kutya efikilondjambo olya li omagano gi ikalekelwa ngoka omuntu ta vulu okupa Jehova. Osha yela kutya Jefta okwa li ta dhiladhila omuntu ngoka e mu gandje a ka longele Jehova ketsalihangano onkalamwenyo ye ayihe. Jehova okwa pulakene kuJefta, e te mu pe esindano. (Aatokolihapu 11:32, 33) Mbela Jefta okwa li ta ka gandja lye kuJehova?

13, 14. Oohapu dhaJefta mAatokolihapu 11:35 otadhi holola shike kombinga yeitaalo lye?

13 Dhiladhila ishewe kehokololo lyaJefta ndyoka lya popiwa petameko lyoshitopolwa shika. Sho a galuka kiita, omuntu ngoka a zi megumbo lye tango e ya oku mu tsakaneka, omwanakadhona, epona lye. Mbela Jefta okwa li ngaa ta ka gwanitha po euvaneko lye? Ota ka hala ngaa okugandja omwanakadhona a ka longele Jehova ketsalihangano onkalamwenyo ye ayihe?

14 Osha yela kutya omakotampango ngoka taga adhika mOmpango yaKalunga oge mu kwathele ishewe a ninge etokolo lyomondjila. Otashi vulika a dhimbulukwa oohapu ndhoka dhi li muEksodus 23:19, ndhoka tadhi lombwele aapiya yaKalunga ya gandje nomwenyo aguhe shoka oshiwanawelela kuye. Ompango oya ti wo kutya ngele omuntu okwa ganene Jehova, “ina yona tuu euvaneko lye, ihe na gwanithe shoka a popi.” (Numeri 30:2) Jefta okwa li e shi shi kutya euvaneko lye ka li shi epu kuye nokomwanakadhona, ihe okwa li e na oku li gwanitha po. Hanna ngoka a li ko pethimbo lye naye okwa li a gwanitha po euvaneko lye. Omwanakadhona gwaJefta ka li ta ka kala e na aanona, oshoka ota ka longa ketsalihangano. Onkee ano, Jefta ka li ta ka kala e na omuthigululi. (Aatokolihapu 11:34) Jefta okwa ti: “Onda ninga euvaneko nde li uvanekele Omuwa, noite vulu oku li lundulula.” (Aatokolihapu 11:35) Jehova okwa taamba eyambo lyaJefta  nokwe mu yambeke. Mbela nangoye ando owa kala ngaa omudhiginini ngaashi Jefta?

15. Euvaneko lini oyendji yomutse twa ninga, nongiini tatu vulu oku li gwanitha po?

15 Sho twi iyapulile Jehova, otwa gana kutya otatu ka longa ehalo lye kutya nduno otashi pula shike. Otwa li tu shi shi kutya haaluhe tashi ka kala oshipu okudhiginina euvaneko ndyoka. Mbela ohatu inyenge ngiini ngele otwa pulwa tu ninge oshinima shoka kaatu hole? Ngele otwa sindi omahalo getu e tatu vulika kuKalunga nomutima aguhe, otatu ulike kutya otatu gwanitha po euvaneko lyetu. Okugandja omayambo otashi vulika ku kale okudhigu, ihe uudhigu mboka itawu vulu okuyelekwa nomayambeko ngoka haga zi kuJehova. (Maleaki 3:10) Ongiini kombinga yomwanakadhona gwaJefta? Okwa li u uvitile ngiini euvaneko ndyoka lya ningwa kuhe?

Ongiini tatu vulu okuulika kutya otu na eitaalo ngaashi Jefta nomwanakadhona? (Tala okatendo 16, 17)

16. Omwanakadhona gwaJefta okwa li i inyenge ngiini kwaashoka he u uvaneka? (Tala kethano lyopetameko.)

16 Egano ndyoka Jefta a ningi inali faathana nolyaHanna. Eyooloko oli li peni mbela? Hanna okwa gana kutya ota gandja omwanamati, Samuel, a ka ninge Omunasiri ketsalihangano. (1 Samuel 1:11) Aanasiri oya li ya pitikwa okuhokana nenge okuhokanwa nokumona uunona. Omwanakadhona gwaJefta okwa li a gandjwa po “efikilolondjambo.” Onkee ano, ka li e na uuthembahenda wokuhokanwa nenge wokuninga omuvali. (Aatokolihapu 11:37-40) Dhiladhila owala kutya okwa li ta vulu okuhokanwa komulumentu dhingi moshilongo, molwaashono he, Jefta, okwa li omuwiliki muIsraeli. Pehala lyaashono, okwa ningi omupiya ketsalihangano. Mbela omwanakadhona gwaJefta okwa li a ningi po shike? Oku ulike kutya iilonga yaJehova oyo tayi ya tango monkalamwenyo ye, sho a ti: “Ninga sho wa ti, u shi ningile ndje.” (Aatokolihapu 11:36) Peha lyokukala i ihalela omusamane nosho wo aanona, okwa tokola a ninge shoka a pulwa, opo a longele Jehova. Ongiini tatu vulu okuholela omwanakadhona gwaJefta?

Omwanakadhona gwaJefta peha lyokukala i ihalela omusamane nosho wo aanona, okwa tokola a ninge shoka a pulwa, opo a longele Jehova

17. (a) Ongiini tatu vulu okuholela eitaalo lyaJefta nomwanakadhona? (b) Oohapu ndhoka dhi li mAahebeli 6:10-12 otadhi tu ladhipike ngiini tu kale hatu iyamba?

 17 Aamati naakadhona oyendji oya tokola kaaya hokanwe nenge kaaya hokane. Omanga yalwe ya tokola kaaya mone manga aanona. Omolwashike mbela? Omolwaashono oya hala okugandja eitulomo olindji mokulongela Jehova. Shimwe ishewe, aakokele yetu oyendji ihaya kala ethimbo olindji noyana nenge naatekulu yawo. Pehala lyaashono, ohaya longitha ethimbo ndyoka noonkondo dhawo ya longele Jehova. Yamwe yomuyo ohaya longo miilonga yokutunga. Yalwe ohaya yi kOsikola yAauvithi yUukwaniilwa, e taya tuminwa komagongalo hoka ku na ompumbwe yaauvithi. Yalwe ohaya ningi ondungedhiladhilo ya longele Jehova pethimbo lyoomwedhi dhEdhimbuluko shi vulithe nale. Jehova ke na siku a dhimbwe omaiyambo omawanawa gaantu ayehe mboka aadhiginini. (Lesha Aahebeli 6:10-12.) Ongiini kombinga yoye? Mbela oto ka vula ngaa okulongela Jehova shi vulithe nale?

OTWI ILONGO SHIKE MOSHITOPOLWA SHINO?

18, 19. Otwi ilongo mo shike mehokololo lyaJefta nomwanakadhona, nongiini tatu vulu oku ya holela?

18 Oshike sha kwathele Jefta a sinde omashongo ogendji ngoka a li a taalela? Okwe etha Jehova e mu wilike sho ta ningi omatokolo monkalamwenyo ye. Jefta ine etha a nwethwe mo kaantu yopomudhingoloko gwawo. Pehala lyaashono, okwa kala omudhiginini nopoompito mpono a kala ta yematekwa kuyalwe. Jehova okwa yambeke Jefta nomwanakadhona, sho yi iyamba nomwenyo aguhe. Jehova okwe ya longitha ya humithe komeho elongelokalunga lyashili. Aantu yamwe pethimbo lyawo oya li ye etha po okulonga shoka shu uka, ihe Jefta nomwanakadhona oya kala aadhiginini kuJehova.

19 Ombiimbeli otayi ti: “Holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.” (Aahebeli 6:12) Onkee ano, natu holeleni Jefta nomwanakadhona, nokukala tu shi shi kutya ngele otwa kala aadhiginini, Jehova ote ke tu yambeka.