“ShaKalunga, shi peni Kalunga.” — MATEUS 22:21.

OMAIMBILO: 33, 137

1. Ongiini tatu vulu okuvulika kuKalunga nosho wo kaapangeli?

OMBIIMBELI oye tu longa tu vulike komapangelo, ihe oya ti wo kutya natu vulike aluhe kuKalunga. (Iilonga 5:29; Titus 3:1) Shika otashi vulika ngiini mbela? Jesus okwa yelitha kombinga yekotampango ndyoka tali tu kwathele tu tseye ngoka tu na okuvulika kuye. Okwa ti: “Shono shomupangeli, shi peni omupangeli, naashoka shaKalunga, shi peni Kalunga.” [1] (Tala enyolo lyopehulilo.) (Mateus 22:21) Ohatu gandja ‘shomupangeli komupangeli,’ ngele tatu vulika koompango dhepangelo, tatu ungaunga naakwanepangelo nesimaneko nosho wo ngele tatu futu iifendela. (Aaroma 13:7) Uuna epangelo tali tu lombwele tu ninge oshinima shoka shi li ompinge nehalo lyaKalunga, ihatu shi ningi. Sho tatu tindi oku shi ninga, ohatu shi ningi aluhe momukalo gwesimaneko.

2. Ohatu ulike ngiini kutya ihatu gama ombinga miinima yopapolotika?

2 Omukalo gumwe tatu vulu okugandja shoka ‘shaKalunga, kuKalunga,’ omokukala ihaatu gama ombinga miinima yopapolotika. Otu na okukala kokule niinima mbyono. (Jesaja 2:4) Ihatu kondjitha omapangelo, molwaashoka Jehova oye a pitika ge tu pangele. Tse ihatu kutha wo ombinga mopolotika nenge  moshinima kehe sha pamba uukwashigwana. (Aaroma 13:1, 2) Mbela ohatu kambadhala okuumba omapangelo kiipundi nenge tu hwahwameke aanapolotika? Aawe. Shimwe ishewe, ihatu kutha ombinga momahogololo gopapolotika nenge tu ninge aanapolotika.

3. Omolwashike ihaatu gama ombinga miinima yopapolotika?

3 Opu na omatompelo ogendji kutya omolwashike Kalunga te tu lombwele, kaatu game ombinga miinima yopapolotika. Etompelo limwe, otatu holele Jesus, ngoka kaa li oshitopolwa ‘shuuyuni.’ Ka li nando a kutha ombinga miinima yopapolotika nenge miita. (Johannes 6:15; 17:16) Etompelo ekwawo, tse ohatu ambidhidha Uukwaniilwa waKalunga. Tse ihatu ambidhidha omapangelo. Onkee ohatu kala neiyuvo lya yela sho tatu uvitha kutya Uukwaniilwa waKalunga owo owala tawu ka kandula po omaupyakadhi agehe gaantu. Omalongelokalunga giifundja ohaga gama ombinga ngele tashi ya miinima yopapolotika. Shono ohashi ningitha iilyo yago yi kale ya topoka. Tse otwa hangana, tu li aamwatate naamwameme muuyuni awuhe, molwaashoka katu shi oshitopolwa shuuyuni. — 1 Petrus 2:17.

4. (a) Otu shi shi ngiini kutya onashi ka kale oshidhigu okukala ihaatu gama ombinga miinima yopapolotika? (b) Omolwashike tu na okwiilongekidha ngashingeyi kaatu game ombinga miinima yopapolotika?

4 Otashi vulika tu kale pehala mpoka aantu kaaye na ko nasha naanaa niinima yopapolotika. Mbela otashi ka kala ngaa oshipu kutse, kaatu game ombinga miinima yopapolotika? Hasho naanaa. Otashi ke tu ningila oshidhigu unene tuu sho ehulilo lyonkalelo yiinima yaSatana tali hedha popepi. Aantu oyendji kunena “aayoni yeuvaneno” yo “ihaa yawala.” Shimwe ishewe, otaya ka kala ya topoka shi vulithe nale. (2 Timoteus 3:3, 4, OB-1954) Aamwatate yamwe oya gumwa nale komakuyunguto gopapolotika, ngoka ga holoka miilongo yawo ombaadhilila. Onkee ano, otwa pumbwa okwiilongekidha ngashingeyi, opo kaatu game ombinga miinima yopapolotika, nonando otu kale monkalo ondhigu ya fa peni. Natu kundathaneni iinima ine mbyoka tayi vulu oku tu kwathela tu ilongekidhe.

TALA KO OMAPANGELO NGAASHI JEHOVA

5. Jehova okwa tala ko ngiini omapangelo agehe?

5 Omukalo gumwe tatu vulu okwiilongekidha ngashingeyi kaatu game ombinga, ogwo okutala ko omapangelo agehe ngaashi Jehova he ga tala ko. Jehova ina shita aantu oyo ya kale taya pangele ooyakwawo. (Jeremia 10:23) Ayehe okwe ya tala ko ye li egumbo limwe. Omapangelo kunena oga topola aantu, mokupopya kutya oshigwana shago oshi vule iigwana yilwe. Gamwe otaga monika ga fa tage she enditha nawa, ihe itaga vulu okukandula po omaupyakadhi agehe. Shimwe ishewe, omapangelo oge tonde Uukwaniilwa waKalunga, mbono wa tameke okupangela momumvo 1914. Uukwaniilwa mboka otawu ka hulitha po masiku omapangelo agehe. — Lesha Episalomi 2:2, 7-9.

Ilongekidha ngashingeyi kuu game ombinga miinima yopapolotika, nonando owu li moonkalo oondhigu

6. Otu na okuungaunga ngiini naamboka ye na oonkondopangelo mepangelo?

6 Kalunga okwe etha omapangelo ga kale po, molwaashono otaga vulu ngaa okukaleka po ombili nelandulathano. Shika oshe tu kwathela tu uvithe onkundana ombwanawa yUukwaniilwa waKalunga. (Aaroma 13:3, 4) Kalunga okwe tu lombwela tu kwatele momagalikano  getu mboka ye na oonkondopangelo. Omolwashike mbela? Opo tu vule okulongela Kalunga nombili. (1 Timoteus 2:1, 2) Uuna tatu ningwa nayi, ohatu pula ekwatho kwaamboka ye na oonkondopangelo. Omuyapostoli Paulus osho a li a ningi. (Iilonga 25:11) Eeno, Ombiimbeli otayi ti kutya omapangelo agehe otaga wilikwa kuSatana, ihe inayi popya kutya oye ota pangele omuntu kehe ngoka e na oonkondopangelo. (Lukas 4:5, 6) Onkee ano, inatu lombwela nando ogumwe kutya omuntu gwontumba ngoka e na oonkondopangelo oku liwe konima kOndiyapoli. Ombiimbeli otayi ti kutya inatu popila nando yalwe muuwinayi. — Titus 3:1, 2.

7. Iinima yini tu na okuyanda?

7 Ohatu vulika kuKalunga sho ihaatu ambidhidha aanapolotika nenge ongundu yopapolotika, nonando shoka taya popi otashi vulu oku tu etela uuwanawa. Omathimbo gamwe, shika ihashi kala oshipu kutse. Pashiholelwa, dhiladhila owala ando aakwashigwana ya tukulila epangelo oshipotha ndyoka lya monitha nayi aantu iihuna, mwa kwatelwa nOonzapo dhaJehova nokuli. Odhoshili kutya ito ka ambidhidha mboka ya tukula oshipotha. Mbela oto ka dhiladhila kutya aantu mbono otaya ningi nawa? Mbela oto ka kala wa halelela ya sindane? (Aaefeso 2:2) Ngele ihatu gama ombinga moopolotika, katu na okukala tu uvite kutya ongundu yimwe oyi li mondjila yi vule onkwawo. Shika otashi ka monika mwaashoka tatu popi nomiilonga yetu.

KALA WA “KOTOKA” WAA NA “OKANTONGO”

8. Ongiini tatu vulu okukala twa “kotoka” notwaa na “okantongo,” uuna tatu thiminikwa tu game ombinga miinima yopapolotika?

8 Omukalo omutiyali gwokwaagama ombinga mopolotika ogo okukala twa ‘kotoka ngomayoka noonguti twaa na okantongo.’ (Lesha Mateus 10:16, 17.) Ohatu ulike kutya otwa “kotoka” mokukala tatu dhiladhila komaupyakadhi ngoka tashi vulika ge tu adhe komeho. Otatu ka kala kaatu na “okantongo,” ngele ihatu gama ombinga miinima yopapolotika, nonando otatu thiminikwa. Natu kundathaneni dhimwe dhomoonkalo nosho wo shoka tatu vulu okuninga, opo kaatu game ombinga miinima yopapolotika. 

9. Oshike tu na okukala twa kotokela uuna tatu popi nayalwe?

9 Oonkundathana. Natu kale lela twa kotoka uuna aantu taya kundathana iinima yi na ko nasha nopolotika. Pashiholelwa, uuna tatu popi nomuntu kombinga yUukwaniilwa waKalunga, itatu ka popya kutya otatu tsu kumwe nenge itatu tsu kumwe nedhiladhilo lyongundu yontumba yopapolotika nenge lyomuwiliki gwontumba. Pehala lyokukundathana shoka aantu ya hala okuninga, opo ya kandule po omaupyakadhi, onawa wu mu ulukile mOmbiimbeli nkene Uukwaniilwa waKalunga tawu ke ga hulitha po sigo aluhe. Oto ka ninga po shike uuna aantu ya hala okupopya kombinga yondjokana pokati komashenge nenge yokwiikutha omala? Ya lombwela shoka Ombiimbeli tayi ti nosho wo nkene ho kambadhala okwiiyutha kuyo monkalamwenyo yoye. Ongiini ngele opu na omuntu ta ti kutya oompango dhontumba nadhi kuthwe po nenge dhi lundululwe? Tse katu na okugama ombinga nenge tu kondjithe omuntu ngoka a lundulule edhiladhilo lye.

Yelekanitha shoka wu uvu ‘noohapu dhoshili’ ndhoka tadhi adhika mOmbiimbeli

10. Ongiini tatu vulu okukala nuushili kutya shoka tatu tala nenge tatu lesha miikundaneki itashi tu nwetha mo tu game ombinga miinima yopapolotika?

10 Iikundaneki. Omathimbo gamwe oonkundana ohadhi kundanekwa momukalo ngoka tagu ulike lela kutya odha gama ombinga. Shika ohashi ningwa unene miilongo mbyoka oonkundana hadhi wilikwa kepangelo. Ngele aakundaneki nenge omahangano  gokukundaneka oga gama ombinga, tseni natu kale twa kotoka twaa tameke okudhiladhila ngaashi yo. Pashiholelwa, ipula to ti: ‘Mbela ohandi nyanyukilwa okupulakena shoka tashi kundanekwa, molwaashono tandi tsu kumwe naashoka tashi popiwa kombinga yopolotika?’ Opo waa game ombinga, yanda okutala nenge okulesha iikundaneki oyindji mbyoka hayi kundaneke kombinga yiinima yopapolotika. Kambadhala okutala nenge okulesha iikundaneki mbyoka inaayi gama ombinga. Yelekanitha aluhe shoka tu uvu ‘noohapu dhoshili,’ ndhoka tadhi adhika mOmbiimbeli. — 2 Timoteus 1:13.

11. Omolwashike tashi ka kala oshipu kutse tu game ombinga miinima yopapolotika, ngele otwa lenga iiniwe yetu?

11 Ohole yomaliko. Ngele otwa lenga iimaliwa niiniwe yetu, otashi vulika shi kale oshipu kutse tu game ombinga. Konima yomumvo 1970, Oonzapo odhindji moMalawi odha li dha thigi po iiniwe yadho ayihe, sho dha tindi okwaambidhidha ongundu yopapolotika. Shi nikitha oluhodhi, Oonzapo dhimwe odhi igandja. Omumwameme Ruth, ota ti: “Yamwe oya li ya yi muupongekwa pamwe natse, ihe lwanima oya ka ambidhidha ongundu yopapolotika noya galukile komagumbo, molwaashono kaya li ya hala okukala mokamba yoontauki.” Aapiya yaKalunga oyendji oya kala aadhiginini. Inaya gama ombinga, nonando oya kanitha iimaliwa yawo nenge iiniwe yawo ayihe. — Aahebeli 10:34.

12, 13. (a) Jehova okwa tala ko ngiini aantu? (b) Oshike tashi ku ulika kutya otu uvitile oshilongo shetu uuntsa wa pitilila?

12 Uuntsa. Aantu oyendji ohaya kala yu uvite uuntsa nohayi itangele omihoko dhawo, eputuko, oshilando nenge oshilongo shawo. Jehova iha tala ko omuntu gwontumba nenge ongundu yaantu yontumba yi vule onkwawo. Atuhe otu thike pamwe koshipala she. Odhoshili kutya Jehova okwe tu shita twa yoolokathana. Shika otwe shi nyanyukilwa notwe shi lenga. Jehova ina hala tu kale twi isa uunye omolwomuhoko gwetu, ye ina hala ishewe tu dhiladhile kutya tse aawanawa tu vule yalwe. — Aaroma 10:12.

13 Inatu kala nando tu uvitile oshilongo nenge oshigwana shetu uuntsa wa pitilila, mokudhiladhila kutya oshiwanawa shi vule yilwe. Ngele otwa kala tu uvite ngawo, nena otashi vulika tu ka game ombinga. Shika osha ningilwe omimvo 2000 nasha dha ka pita. Aamwatate Aahebeli yamwe oya li yu ungaunga naaselekadhi Aagreka nonyanya. (Iilonga 6:1) Ongiini tatu vulu oku shi ndhindhilika mo kutya mutse otamu iyakele iikala yuuntsa? Ngele omumwatate nenge omumwameme a za kehala lilwe okwe ku lombwele eetopo lye, mbela oho thiki pehulithodhiladhilo nziya kutya ‘omukalo moka ho ningi iinima ogu li nale nawa,’ e to ekelehi eetopo lye? Ngele osho, dhimbulukwa omayele ga simana ngoka ge li mOmbiimbeli taga ti: “Ifupipikeni kiipala yayakweni, ne mwaa dhiladhile kutya one aawanawa mu ya vule.” — Aafilippi 2:3.

JEHOVA OTE KE KU KWATHELA

14. Egalikano ohali tu kwathele ngiini, nOmbiimbeli oye shi koleka ngiini?

14 Omukalo omutitatu tagu tu kwathele kaatu game ombinga, okukala twi inekela muJehova. Galikana kuye e ku pe ombepo ondjapuki wu kale neidhidhimiko nosho wo neipangelo. Omaukwatya ngaka otage ke ku  kwathela, uuna epangelo lya ninga sha shoka kaashi li pauyuuki. Pula Jehova e ku pe uunongo wu dhimbulule mo onkalo ndjoka tashi vulika yi ku ningithe wu game ombinga. Mu pula wo e ku kwathele wu lundulule iikala mbyoka. (Jakob 1:5) Otashi vulika wu tulwe mondjedhililo nenge wu geelwe momukalo gulwe, molwaashono wu li omudhiginini kuJehova. Ngele owe shi ningilwa, galikana kuJehova e ku pe uunongo, opo wu vule okuyelithila yalwe nawa kutya omolwashike ihoo gama ombinga. Oto vulu okukala nuushili kutya Jehova ote ke ku kwathela wi idhidhimike. — Lesha Iilonga 4:27-31.

Hogolola oovelise ndhoka tadhi ke ku kwathela kuu game ombinga miinima yopapolotika naandhoka tadhi yelitha iinima mbyoka wa hala oku ka nyanyukilwa muuyuni uupe

15. Ombiimbeli otayi vulu ngiini oku tu kwathela twaa game ombinga miinima yopapolotika? (Tala wo oshimpungu: “Ombiimbeli oye ya kwathela ya kale ye na eitaalo lya kola.”)

15 Jehova okwe tu pa Ombiimbeli, opo yi tu tse omukumo. Tedhatedha koovelise ndhoka tadhi ke ku kwathela wu kale ihoo gama ombinga. Kambadhala oku dhi ilonga nokukala to dhi dhimbulukwa. Otadhi ke ku kwathela nopoompito ndhono to ka kala kuu na Ombiimbeli. Otayi vulu wo okukoleka etegameno lyoye kombinga yonakuyiwa. Otwa pumbwa etegameno ndyoka, opo tu idhidhimikile omahepeko. (Aaroma 8:25) Hogolola oovelise ndhoka dha yelitha iinima mbyoka wa hala oku ka nyanyukilwa muuyuni uupe, nokukala wu iwete wa fa omo wu li.

MONA UUWANAWA MIIHOLELWA YAAPIYA YAJEHOVA AADHIGININI

16, 17. Oshike tatu ilongo miiholelwa yaapiya aadhiginini yaKalunga, mboka inaaya gama ombinga miinima yopapolotika? (Tala kethano lyopetameko.)

16 Oshinima oshitine shoka tashi ke tu kwathela tu kale ihaatu gama ombinga, osho okudhiladhila kombinga yiiholelwa yaapiya yaJehova aadhiginini. Aantu oyendji pethimbo lyOmbiimbeli oya kala ye na omukumo. Oya li wo ya ningi omatokolo gopandunge ngoka ge ya kwatha ya kale inaaya gama ombinga. Dhiladhila kuShadrak, Meshak naAbednego mbono ya tindi okugalikana oshikalunga shono sha li shi lile po epangelo lyaBabilonia. (Lesha Daniel 3:16-18.) Ehokololo ndyoka lyOmbiimbeli olya kwathela Oonzapo odhindji kunena dhi kale nomukumo nodhi tinde okwiinyongamena epandela lyoshilongo moka dhi li. Jesus naye ka li a kutha ombinga miinima yopapolotika naambyoka hayi topola aantu. Okwa li e shi shi  kutya oshiholelwa she oshiwanawa otashi ka kwathela aalongwa ye. Okwa ti: “Inamu tila, ngame onda sinda uuyuni!” — Johannes 16:33.

17 Oonzapo odhindji pethimbo lyetu ihadhi gama ombinga miinima yopapolotika. Dhimwe dhomudho odha kala tadhi hepekwa, dha tulwa mondjedhililo nadhimwe odha dhipagwa nokuli, omolwuudhiginini wadho muJehova. Iiholelwa yadho otayi vulu oku tu kwathela tu kale nomukumo. Omumwatate gumwe a za koTurkey, okwa ti: “Omumwatate omugundjuka, Franz Reiter, okwa dhipagwa sho a tindi okuya metangakwiita lyaHitler. Ongulohi manga Franz inaa dhipagwa okwa nyolele yina ontumwafo, ndjoka yu ulike kutya oku na eitaalo lya kola lela nokwa li i inekela muJehova. Onda kala nda hala okulandula oshiholelwa she, uuna ndi iyadha monkalo ya fa ye.” [2] — Tala enyolo lyopehulilo.

18, 19. (a) Iilyo yegongalo lyeni otayi vulu ngiini oku ku kwathela kuu game ombinga mopolotika? (b) Owa tokola toko okuninga shike?

18 Aamwatate naamwameme megongalo lyeni otaya vulu oku ku kwathela kuu game ombinga miinima yopapolotika. Uuna wu li muupyakadhi wontumba, tseyithila aakuluntugongalo. Otaya vulu oku ku pa omayele omawanawa okuza mOmbiimbeli. Shimwe ishewe, ngele aantu megongalo oye shi kutya owu li monkalo yini, otaya vulu oku ku ladhipika. Ya pula ye ku kwatele momagalikano gawo. Ongiini kombinga yetu? Oshi li nawa tu kale tatu ambidhidha aamwatate noku ya kwatela wo momagalikano getu. (Mateus 7:12) Opo wu mone omusholondondo gwomadhina gaamwatate mboka ye li mondjedhililo, tala moshitopolwa shi li kepandja lyokointaneta, jw.org, hashi ithanwa: “Jehovah’s Witnesses Imprisoned for Their Faith — By Location.” Oshitopolwa oshi li mpoka pwa nyolwa NEWSROOM > LEGAL DEVELOPMENTS. Hogolola po omadhina omashona, e to pula Jehova a kwathele aamwatate naamwameme mboka ya kale ye na omukumo naadhiginini kuye. — Aaefeso 6:19, 20.

19 Sho ehulilo tali hedha popepi, otwa tegelela omapangelo ge tu thiminike noonkondo tu game ombinga miinima yopapolotika. Onkee ano, osha simana tu ilongekidhe ngashingeyi kaatu game ombinga muuyuni mbuka wa topoka.

^ [1] (okatendo 1) Jesus okwa li ta popi kombinga yOmupangeli Omuroma ngoka a li hi ithanwa Omukesari. Pethimbo ndyoka Omukesari oye a li omupangeli noku na oonkondopangelo e vule aantu ayehe.

^ [2] (okatendo 17) Tala embo Jehovah’s Witnesses — Proclaimers of God’s Kingdom, epandja 665 nosho wo oshimpungu “Okwa si opo a simanekithe Kalunga,” montopolwa 14 membo Uukwaniilwa waKalunga otawu pangele!