Canga ule o re ta hna ie ri site

Canga ulelo te ri se menu

Canga ulelo o re table des matières

Nodei Thu Asesekoni Iehova

Nengone

Zi Yenon o Re Re Tei Buhnij

 YENO 12

Anueni Paulo Hna Hnore Tace

Anueni Paulo Hna Hnore Tace

Eje dai etha nata ti lo o re pengen’ o se waicahmane hna awarumani o re ci roi no re hmihmini bon. Paulo aposetolo kore yelen’ o re hmihmini bon. Eje tha ule ko o re yelen’ o re waicahman’ omelei, ke eje ha ule o se ace hnei bone hna rue. Bo ci alane co taedehngi o re wanata ni bon?—

Paulo ile ri kalabuse i Jerusalema. Hna ane bone ri kalabus wen’ o re bone ci pulo Iesu. O re nodei ngome me tho ci keco bon, ile buice me ekote co cori bon: “Eje ielo jeu’ o re komadran thu ie ke bone du ehna shoja ni bone co hue te Paulo jeu’ o Tribunal. Eje co raba bone ri len, ka ngei bone ma huelo, ile eje me atangoni bon!”

Anueni Paulo hna ie du bone ne du komadran o re ace me nia co rue du Paulo

Ka anueni Paulo hna taedengi o re ekote buic. Hale bone me nge? Ile bone me canga hue jeu’ o re kalabus ne ci ie du Paulo o re ekote buic. Ilei Paulo me ie du bone co canga auaneni o re komadran. Nge kore uane bo, bone hna pareu co nengoce du komadran?— Deko, wen’ o re komadran se ngome me hma. Ke roidi, tace re hnore kore anueni Paulo: ile bone me canga hue co nengoce du komadran.

Komadran ha cara jewe o re ace co rue. Ile bone me asanilo bathu 500 kore shoja thu co cumo Paulo ma co hue te bone ri ridri jeu’o Kaiserea. Paulo ha waruma?— E, ka nodei ngome hna alane co nia ngomo bone deko hna aiuni o re uane buic.

Nge kore yeno so bo ri pon’ o re wanata omelei?— Bo joko thuni co hnore tace inomei anueni Paulo. Roi ke eje co hnore tace ma ci pulo Iehova jeu’ osoten. Ilo, bo co hnore tac co iara pulo Iehova?— Ka ngei ko e, ile bo co awarumani o re ci roi no se ngom.

IEIELO RI TUSI HMIJOC NI BO

  • Ta Ruace 23:12-24

  • Mataio 24:14; 28:18-20

  • 1 Timothi 4:16