Nge kore ekonejeu ni Jefetha du Iehova?

Kacene me ushiwa du bon, tei Jefetha hna aiuni ko o re ekonejeu ni ceceni bon

Bo ci ule o re wacenewe ri wangom?— Bone tenen’ o re cahman yelene Jefetha. Deko ma ie kei Tusi Hmijoc o re yeleni bon, roidi eje ha ule ko bone hna aopodoneni ceceni bone ne Iehova. Eje dai acidano bone lo ne ceceni bon.

Jefetha ngome me roi ci iara etha nata ne tei bone ri poni Iehova. Ka bone ngome joko me engetac ka toaeate me thawalan. Ri se ran, si Iseraela hna sibo bone co necene ni buice ri irue ne nodei icuhma ne buic.

Jefetha ci hmi du Iehova co konekatu bone thu co tace ke bone ri pon’ o re icuhma. Ile bone me ie ko: “Iehovango ke, ngei inu ma tace ri pon’ o re icuhma, ile inu ha co kanon’o re ngome me hnadan ma co dedebut sere ri hnamenenge inu ri eziene  o re inu co yewe yawe.” Ci ie ko, o re ngom’ omelei ha co iara menenge ne ruace ri ‘ma hmijoce punuma ri nodei ran’ o re ci roi ni bon. O re ‘ma hmijoc punuma kore guhne re hmi du Iehova. Ha tace kei Jefetha! Bo ha ule ko la ko hna okonedabut sere ri hnameneng bone ma yewe yawe?—

Ka oni tei bone cenew, tei bone me sa so. Onome Jefetha ha ekowe co ie du bone co hue jeu’ o re ‘ma hmijoc punuma. Bone ci sheusheu. Bo uanelo: Bone ha hna kanon’ o re enengoco. Ilei tei bone me canga ie ko: “Bua ha hna kanon’ o re enengoco du Iehova. Bua co aiuni.”

Nodei kenereken, mocenew me ta kani tei Jefetha hna iara pina co iule ne bon

Se ci sheusheu joko kei tei Jefetha. Ri ‘ma hmijoc punuma, thathuniko ke bone co numu cahman ne co numu tenen. Bone ci nidi alane co hmijocon’ o re enengoco ni ceceni bon, ne ci nidi alane co aopodoneni Iehova. Du bon, nidi ace komelei ri pon’ o re co numu cahman ca co numu tenen. Ile bone me pucalo sere ri hnamenenge ni cecene ni bon thu co menenge di ri ‘ma hmijoc punuma ri nodei ran’ o re ci roi ni bon.

Ilo, bo ci uane ko bone hna aopodoneni ceceni bone ne Iehova?— E, nidi opodon! Ngei bo ma ci ninen ne ci ala Iehova, bo co inome i tei Jefetha. Bo joko, bo co nidi aopodoneni ceceni bo ne hmani bo ne Iehova.

IEIELO RI TUSI HMIJOC NI BO

  • Deuteronomi 6:4-6

  • Thu Hnengon 11:30-40

  • 1 Korinito 7:37, 38