Canga ule o re ta hna ie ri site

Canga ulelo o re table des matières

Nodei Thu Asesekoni Iehova

Select language Nengone

 Yeno 10

Co Korione Ke Buhnij Co Acikacen’ o Re Hmi Me Seseko?

Co Korione Ke Buhnij Co Acikacen’ o Re Hmi Me Seseko?

“Ule ke buhnij o re nodei perofeta thu cihmug.”—MATAIO 7:15.

“Buic ci ie, ko, buic ha ule Madaru; ka ci pudo Nubonengo di hnen’ o re nodei ruac.”—TITO 1:16.

1. Ilo, saso kore hmi me seseko?

Sa so kore hmi, hmi me nidi seseko hnei Iesu hna yenon’ o re nodei kokonieni Nubonengo. Iesu hna aekoweni o re hmi me seseko inom’ o re lene me ci hue jeu’ o re waruma thathu aseko. Iesu hna beredone: “Wakaredo so ke buic ci uni” o re len’ omelei. (Mataio 7:14) Madaru ci kedi so o re hmi me hna ceden ri Tusi Hmijoc. O re nodei thu nidi hne ci sa so kore ci un.Ieielo Ioane 4:23, 24; 14:6; Efeso 4:4, 5.

2. Nge kore hnei Iesu hna beredone ri pon’ o re nodei ngome ci hne me cihmug?

Iesu ha hna auaneni ko o re nodei perofeta me cihmug co amenuni o re hmi me seseko. Buice ci inom’ o re nodei ci nidi hne. O re nodei hmi buic ci urati ko buice ci hueleu Iesu. Roidi, buhnije thuni co ule kaceni buic hnen’ o re ta lata ni buic. Me nge ko? Inomelei o re hmi me seseko so kore numu nodei wawen me roi, ci ahnga ri nodei singene ne nodei lata.Ieielo Mataio 7:13-23.

3. Co korione ke buhnije co acikacen’ o re nodei nidi thu hne?

Ulelu faive kore nodei kacen:

  • Nodei nidi thu hne ci hmegigion’ o re Tusi Hmijoc, du buic melei Eberedo ni Madaru. Buice ci tacebut co hue lewe o re nodei hna anetitini. Koiko hmi me seseko deko ma ekowe sese ne il’ o re nodei hmi me ci yenon’ o re nodei wathebo ni ngom. (Mataio 15:7-9) O re nodei nidi thu hne deko ma ci pulon’ o se ac ka ci rue di o se ac.Ieielo Ioane 17:17; 2 Timothi 3:16, 17.

  •   Nodei nidi sinemenenge ni Iesu ci ahmani o re acekini Madaru, Iehova. Iesu hna ahmani ne hna aehngeni o re acekini Madaru. Nubonengo hna konekatu nodei ngome ha thu aceno Madaru ne hna yeno buice co hne ha thu ahmijoceni o re acekiwaieni Nubonengo. (Mataio 6:9) Melei buhnije ci menenge il, la kore hmi ci rue inomelei?Ieielo Ioane 17:26; Rome 10:13, 14.

  • Ore nodei nidi thu hne ci pulon’ o re Baselaia ni Madaru. Madaru hna siato Iesu co pulon’ o re nata me roi nore Baselaia. O re Baselaia omelei so kore eje co uroi jewe. Iesu hna pulon’ omelei ca pina ri ran Nubonengo hna taeto. (Luke 4:43; 8:1; 23:42, 43) Nubonengo hna beredone ko nodei sinemenenge ni Nubonengo co pulon’ omelei. Ngei o se ngome me ci aceno buhnij ka ci pulon’ o re Baselaia ni Madaru, nge kore Hmi ni bon?Ieielo Mataio 24:14.

  • O re nodei sinemenenge ni Iesu deko ci kan’ o re ta laelawatan’ o re ten’ o re awe me nia. Buhnij thuni co ulekaceni buic, wen’ o re buic ci sere ithuan’ o re politik ne nodei isoiso. (Ioane 17:16; 18:36) Ome joko ko buic deko ci rue lewe o re nodei uane ne nodei lata me kogo.Ieielo Iakobo 4:4.

  • O re nodei nidi thu hne numu o re ci era me hmaiai. Tusi Hmijoc ci yeno buic ko deko co hnethon’ o se si ac ca se si ac. Ke ono re hmi me cihmug ci konekatuon’ o re ta irue nore nodei conod, ka nodei sinemenenge ni Madaru ci kuca ke. (Mika 4:1-3) Omete ko, o re nodei nidi thu hne ci kanu gupan’ o re engetace ne il’ o re nodei ace ni buic bane konekatu ne eamon’ o soten.Ieielo Ioane 13:34, 35; 1 Ioane 4:20.

4. Ilo, buhnij thuni co ie ko la kore hmi me nidi seseko?

Nge kore hmi hna lae ceden ri Tusi Hmijoc, ci ahmani o re acekini Madaru, ci pulon’ o re Baselaia ni Madaru uroi me sa so son’ o re ngom? Nge kore hmi me deko ci hnethon’ o se si ac ne si ac, ne deko ci kane te re irue? Nge kore uane buhnij?Ieielo Ioane 3:10-12.