व्यवस्था ७:१-२६
७ “जब यहोवा तिमीहरूका परमेश्वरले तिमीहरू अधिकार गर्न जान लागेको देशमा तिमीहरूलाई पुऱ्याउनुहुनेछ,+ तब उहाँले त्यहाँ भएका यी ठूलठूला जातिहरूलाई पनि तिमीहरूको सामनेबाट धपाइदिनुहुनेछ:+ हित्ती, गिर्गासी, एमोरी,+ कनानी, परिज्जी, हिव्वी र यबुसी।+ यी सात जाति सङ्ख्यामा तिमीहरूभन्दा धेरै छन् र शक्तिशाली पनि छन्।+
२ तैपनि यहोवा परमेश्वरले तिनीहरूलाई तिमीहरूको हातमा सुम्पिदिनुहुनेछ र तिमीहरूले तिनीहरूलाई हराउनेछौ।+ तिमीहरूले तिनीहरूको नामोनिसान मेटिदिनू।+ तिनीहरूसित कुनै करार नबाँध्नू र तिनीहरूलाई फिटिक्कै दयामाया नदेखाउनू।+
३ तिनीहरूसित बिहाबारी नगर्नू। तिमीहरूका छोरीहरू तिनीहरूका छोराहरूलाई नदिनू र तिनीहरूका छोरीहरू पनि तिमीहरूका छोराहरूको लागि नल्याउनू।+
४ किनभने तिनीहरूले तिमीहरूका छोराहरूलाई अरू देवताहरूको पूजा गर्न लगाउनेछन् र उनीहरूलाई बहकाएर परमेश्वरबाट टाढा लैजानेछन्।+ त्यसपछि यहोवा परमेश्वरको क्रोध तिमीहरूमाथि दन्कनेछ र उहाँले तिमीहरूलाई तुरुन्तै नाश गर्नुहुनेछ।+
५ “बरु तिमीहरूले यसो गर्नू: तिनीहरूका वेदीहरू भत्काइदिनू, तिनीहरूका पवित्र थामहरू* काटेर ढालिदिनू+ र तिनीहरूका पवित्र खामाहरू* टुक्राटुक्रा पारिदिनू।+ तिनीहरूका मूर्तिहरू जलाइदिनू।+
६ किनभने तिमीहरू यहोवा परमेश्वरको निम्ति एक पवित्र जाति हौ। यहोवा तिमीहरूका परमेश्वरले पृथ्वीका सबै जातिमध्ये आफ्नो प्रजा र आफ्नो विशेष* सम्पत्ति बनाउन तिमीहरूलाई रोज्नुभएको छ।+
७ “तिमीहरू अरू जातिको तुलनामा धेरै भएकोले यहोवा परमेश्वरले तिमीहरूलाई माया गर्नुभएको र तिमीहरूलाई छान्नुभएको होइन।+ किनभने त्यसबेला त तिमीहरू अरू जातिभन्दा एकदमै थोरै थियौ।+
८ यहोवा परमेश्वरले आफ्नो शक्तिशाली हात प्रयोग गरेर तिमीहरूलाई दासत्वको घर—मिश्रबाट र फारोको हातबाट छुटाउनुभयो।+ किनकि यहोवा परमेश्वर तिमीहरूलाई माया गर्नुहुन्छ र तिमीहरूका पुर्खाहरूसँग खाएको शपथ उहाँले पूरा गर्नुभएको छ।+
९ तिमीहरूलाई थाहै छ, यहोवा तिमीहरूका परमेश्वर नै साँचो र विश्वासयोग्य परमेश्वर हुनुहुन्छ। उहाँलाई माया गर्ने र उहाँको आज्ञा पालन गर्नेहरूसित बाँधेको करार उहाँ हजारौँ-हजार पुस्तासम्म पूरा गर्नुहुन्छ र तिनीहरूलाई अटल प्रेम देखाइरहनुहुन्छ।+
१० तर जसले उहाँलाई घृणा गर्छ, उहाँले तिनीहरूसित बदला लिनुहुनेछ र तिनीहरूलाई नाश गर्नुहुनेछ।+ उहाँलाई घृणा गर्नेहरूसित बदला लिन उहाँले कहिल्यै ढिला गर्नुहुनेछैन।
११ त्यसैले आज मैले तिमीहरूलाई जुन आज्ञा, नीतिनियम र विधिविधान दिएको छु, ती सबै होसियार भई पालन गर।
१२ “तिमीहरूले ती विधिविधानमा ध्यान दिइरह्यौ र ती पालन गरिरह्यौ भने यहोवा तिमीहरूका परमेश्वरले तिमीहरूका पितापुर्खासित कसम खानुभएझैँ आफ्नो करार पूरा गर्नुहुनेछ र तिमीहरूलाई अटल प्रेम देखाइरहनुहुनेछ।
१३ उहाँले तिमीहरूलाई माया गर्नुहुनेछ, आशिष् दिनुहुनेछ र तिमीहरूको वृद्धि गराउनुहुनेछ। तिमीहरूका पुर्खाहरूलाई दिन्छु भनेर परमेश्वरले कसम खानुभएको देशमा तिमीहरूका थुप्रै सन्तान हुनेछन्,+ त्यहाँको जमिनले प्रशस्त उब्जनी दिनेछ, तिमीहरूसँग प्रशस्त अन्नपात हुनेछ, नयाँ मद्यको छेलोखेलो हुनेछ, तेलको कहिल्यै अभाव हुनेछैन,+ तिमीहरूसँग बथानका बथान भेडाबाख्रा र वस्तुभाउ हुनेछन्।+
१४ सारा मानिसमध्ये तिमीहरूले धेरै आशिष् पाउनेछौ।+ तिमीहरूका कुनै पनि पुरुष वा स्त्री निस्सन्तान हुनुपर्नेछैन, तिमीहरूको कुनै पनि पशु थारो हुनेछैन।+
१५ यहोवा परमेश्वरले तिमीहरूका सबै रोगबिमार हटाइदिनुहुनेछ। मिश्रमा तिमीहरूले देखेका कुनै पनि भयानक रोग तिमीहरूलाई लाग्नेछैन।+ बरु तिमीहरूलाई घृणा गर्नेहरूलाई उहाँले ती रोगबिमारले सताउनुहुनेछ।
१६ यहोवा तिमीहरूका परमेश्वरले तिमीहरूको हातमा सुम्पिदिनुभएका सबै जातिलाई तिमीहरूले नाश गर्नू;+ तिनीहरूलाई रतीभर दया नदेखाउनू।+ तिमीहरूले तिनीहरूका देवीदेवतालाई नपुज्नू+ किनभने त्यो तिमीहरूको लागि पासो हुन सक्छ।+
१७ “तिमीहरूले मनमनै यसो भनौला, ‘यी जातिहरू त हामीभन्दा धेरै छन्। हामी यिनीहरूलाई कहाँ धपाउन सक्छौँ र?’+
१८ तर तिमीहरू तिनीहरूसित पटक्कै नडराओ।+ यहोवा तिमीहरूका परमेश्वरले फारोलाई र मिश्रलाई के गर्नुभयो, त्यो सम्झ।+
१९ यहोवा तिमीहरूका परमेश्वरले तिनीहरूमाथि ल्याउनुभएका ठूलठूला विपत्ति* तिमीहरूले आफ्नै आँखाले देख्यौ।+ तिमीहरूले विभिन्न चिन्ह र चमत्कारहरू पनि देख्यौ। अनि यहोवा तिमीहरूका परमेश्वरले आफ्नो पराक्रमी र शक्तिशाली हात प्रयोग गरेर तिमीहरूलाई मिश्रबाट छुटाउनुभयो।+ अहिले तिमीहरू जुन जातिहरूसित डराउँछौ, उहाँले तिनीहरूको हालत पनि ती मिश्रीहरूको जस्तै बनाइदिनुहुनेछ।+
२० तिनीहरूमध्ये जो-जो बाँकी रहन्छन् अनि जो-जो लुकेर बस्छन्, तिमीहरूले तिनीहरूको विनाश नगरेसम्म यहोवा परमेश्वरले तिनीहरूलाई हतोत्साहित तुल्याइदिनुहुनेछ।*+
२१ तिनीहरूसित नडराओ किनभने यहोवा तिमीहरूका परमेश्वर, जो महान् र भययोग्य हुनुहुन्छ,+ उहाँ तिमीहरूका साथमा हुनुहुन्छ।+
२२ “यहोवा तिमीहरूका परमेश्वरले ती जातिहरूलाई तिमीहरूको सामनेबाट अलिअलि गरेर धपाउनुहुनेछ।+ तिमीहरूले तिनीहरू सबैलाई एकैचोटि नाश गर्न पाउनेछैनौ नत्र त जङ्गली जनावरको बिगबिगी भएर तिमीहरूलाई खतरा हुनेछ।
२३ यहोवा तिमीहरूका परमेश्वरले ती जातिहरूलाई तिमीहरूको हातमा सुम्पिदिनुहुनेछ। तिनीहरूको नामोनिसान नमेटिएसम्म तिमीहरूले तिनीहरूलाई हराउनेछौ।+
२४ उहाँले तिनीहरूका राजालाई तिमीहरूको हातमा सुम्पिदिनुहुनेछ+ र तिमीहरूले यस धर्तीबाट तिनीहरूको नाम मेटिदिनेछौ।+ तिमीहरूविरुद्ध कोही पनि खडा हुन सक्नेछैन;+ तिमीहरूले तिनीहरू सबैलाई नाश गर्नेछौ।+
२५ तिनीहरूका मूर्तिहरू जलाइदिनू।+ मूर्तिमा भएको सुनचाँदीको लोभ नगर्नू र नलिनू।+ यो सबै तिमीहरूको लागि पासो हुन सक्छ। किनभने त्यस्ता कुराहरूलाई यहोवा तिमीहरूका परमेश्वर घृणा गर्नुहुन्छ।+
२६ तिमीहरूले आफ्नो घरमा कुनै पनि घृणित कुरा नल्याउनू। यदि ल्यायौ भने तिमीहरू पनि नाश गर्नुपर्ने घृणित कुराहरूसरह विनाशको निम्ति छुट्ट्याइनेछौ। तिमीहरूले त्यस्ता कुराहरूलाई तिरस्कार गर्नू र तुच्छ ठान्नू किनभने ती विनाशको लागि छुट्ट्याइएका हुन्।
