लेवी ६:१-३०
६ यहोवा परमेश्वरले मोसालाई भन्नुभयो:
२ “यदि कसैले छिमेकीले बन्धकी राख्न दिएको वा जिम्मामा सुम्पेको सामान फेरबदल गरेर+ वा छिमेकीलाई लुटेर वा ठगेर यहोवा परमेश्वरको आज्ञा उल्लङ्घन गर्छ भने उसले पाप गरेको हुन्छ।+
३ अथवा कसैको हराएको चिज भेट्टाउँदा त्यसको विषयमा झूट बोल्छ भने उसले पाप गरेको हुन्छ। यीमध्ये कुनै पनि पाप गरेर आफूले त्यस्तो गरेको छैन भनेर झूटो कसम खान्छ भने+ उसले यसो गरोस्:
४ यदि उसले पाप गरेको हो र ऊ दोषी छ भने आफूले चोरेको, लुटेको, ठगेको, आफूलाई राख्न दिइएको वा आफूले भेट्टाएको सामान फिर्ता गरोस्।
५ अथवा उसले झूटो कसम खाएर आफूसित राखेको जुनसुकै चिज फिर्ता गरोस्। उसले त्यसको पूरा क्षतिपूर्ति तिर्नुका साथै+ त्यसको पाँच भागको एक भाग पनि थपेर देओस्। ऊ जुन दिन दोषी ठहरिन्छ, त्यही दिन त्यो सबै जसको हो, उसैलाई फर्काओस्।
६ अनि उसले तोकिएको मोलबराबरको एउटा निष्खोट थुमा बगालबाट छानोस् र दोषभेटीको रूपमा यहोवा परमेश्वरलाई चढाउन पुजारीकहाँ ल्याओस्।+
७ अनि पुजारीले यहोवा परमेश्वरसामु उसको निम्ति प्रायश्चित गरिदेऊन् र ऊ यीमध्ये जुनसुकै गल्तीको लागि दोषी ठहरिएको भए पनि उसले क्षमा पाउनेछ।”+
८ यहोवा परमेश्वरले मोसालाई अझै यसो भन्नुभयो:
९ “हारुन र तिनका छोराहरूलाई यस्तो आज्ञा दिनू: ‘अग्निभेटीको नियम यो हो:+ अग्निभेटीको जनावर रातभरि अनि बिहानसम्मै वेदीको अगेनुमाथि रहोस् र त्यो आगो ननिभोस्।
१० अनि पुजारीले पुजारीको काम गर्दा लगाउने मलमलको* लुगा+ अनि मलमलको छोटो सुरुवाल* लगाऊन्।+ त्यसपछि तिनले अग्निभेटीस्वरूप चढाइएको जनावरको खरानी* वेदीबाट झिकून्+ र वेदीको छेउतिर राखून्।
११ अनि मलमलको लुगा फुकालेर+ अर्को लुगा लगाऊन् र खरानीलाई छाउनीबाहिर सफा ठाउँमा लैजाऊन्।+
१२ वेदीको आगो बलिरहोस्; त्यो निभ्न नपाओस्। पुजारीले हरेक बिहान त्यहाँ दाउरा थपून् र दाउरामाथि अग्निभेटीको जनावर मिलाएर राखून् अनि त्यसमाथि मेलबलिको बोसो राखेर जलाऊन्।+
१३ वेदीको आगो सधैँ बलिरहोस्; त्यो निभ्न नपाओस्।
१४ “‘अन्नभेटीको नियम यो हो:+ हारुनका छोराहरूले यहोवा परमेश्वरसामु वेदीअगाडि अन्नभेटी चढाऊन्।
१५ तिनीहरूमध्ये एक जनाले अन्नभेटीबाट एक मुठी मसिनो पीठो, अलिकता तेल र सबै सेतो धूप* लिएर सम्पूर्ण भेटीको प्रतीकस्वरूप* वेदीमा जलाऊन्। यस अन्नभेटीबाट निस्केको बास्ना यहोवा परमेश्वरलाई मन पर्ने* मीठो बास्ना हुनेछ।+
१६ अन्नभेटीको बाँकी भागचाहिँ हारुन र तिनका छोराहरूको होस्।+ तिनीहरूले यसमा खमिर* नहाली रोटी बनाऊन् र पवित्र ठाउँमा बसेर खाऊन्; तिनीहरूले भेट हुने पालको* चोकमा यो खाऊन्।+
१७ तिनीहरूले पीठोमा अलिकति पनि खमिर नमिसाई रोटी बनाऊन्।+ आगोमा चढाइने भेटीको बाँकी भाग मैले तिनीहरूलाई दिएको छु।+ यो पापभेटी र दोषभेटीजस्तै महापवित्र छ।+
१८ हारुनका सबै पुरुष सन्तानले यो खाऊन्।+ यहोवा परमेश्वरलाई आगोमा चढाइने भेटीको यो भाग पुस्तौँपुस्तासम्म तिनीहरूकै हुनेछ।+ भेटीलाई छोएको सबै थोक पवित्र हुनेछ।’”
१९ यहोवा परमेश्वरले मोसालाई फेरि भन्नुभयो:
२० “जुन दिन हारुनलाई अभिषेक गरिन्छ, त्यही दिन तिनी र तिनका छोराहरूले यहोवा परमेश्वरलाई नियमित रूपमा चढाइने अन्नभेटीस्वरूप एपाको दस भागको एक भाग*+ मसिनो पीठो चढाऊन्,+ आधा बिहान र आधा साँझ।
२१ यो पीठो तेलमा मुछेर तावामा पकाइयोस्।+ रोटीलाई टुक्राटुक्रा पारेर त्यसमाथि तेल खन्याइयोस् अनि यहोवा परमेश्वरलाई चढाइयोस्। यो अन्नभेटीबाट निस्केको बास्ना परमेश्वरलाई मन पर्ने मीठो बास्ना हुनेछ।
२२ हारुनका छोराहरूमध्ये जो तिनको ठाउँमा पुजारी अभिषेक हुन्छन्,+ तिनले नै यो भेटी तयार पारून्। पुस्तौँपुस्तासम्म यो नियम लागू हुनेछ: यहोवा परमेश्वरलाई चढाउने यो अन्नभेटीको पूरै भाग आगोमा जलाइयोस्।
२३ पुजारीले अन्नभेटी चढाउँदा त्यो भेटी पूरै जलाइयोस्। यो खानु हुँदैन।”
२४ यहोवा परमेश्वरले मोसालाई फेरि भन्नुभयो:
२५ “हारुन र तिनका छोराहरूलाई यसो भन्नू, ‘पापभेटीको नियम यो हो:+ अग्निभेटीको जनावर जहाँ काटिन्छ,+ त्यहीँ पापभेटीको जनावर पनि यहोवा परमेश्वरसामु काटियोस्। यो महापवित्र कुरा हो।
२६ पापको प्रायश्चित गर्न जुन पुजारीले भेटी चढाउँछन्, तिनैले त्यो भेटी खाऊन्।+ तिनले त्यो पवित्र ठाउँमा अर्थात् भेट हुने पालको चोकमा बसेर खाऊन्।+
२७ “‘भेटीको मासुलाई छोएको सबै थोक पवित्र हुनेछ। यदि कसैको लुगामा यसको रगतको छिटा लाग्यो भने उसले पवित्र ठाउँमा आफ्नो लुगा धोओस्।
२८ मासु माटोको भाँडामा उसिनेको हो भने त्यो भाँडो फुटाइयोस्। तर तामाको भाँडोमा उसिनेको हो भने त्यो भाँडो मस्काएर पानीले राम्ररी पखालियोस्।
२९ “‘सबै पुरुष जो पुजारी हुन्, तिनीहरूले त्यो खाऊन्।+ यो महापवित्र कुरा हो।+
३० तर पवित्र ठाउँमा पापको प्रायश्चित गर्न पापभेटीको अलिकति रगत भेट हुने पालभित्र लगिन्छ भने त्यो पापभेटी नखाइयोस्।+ त्यसलाई आगोमा जलाइयोस्।
फुटनोटहरू
^ वा “बोसो मिसिएको खरानी।” यसले बलि चढाइएका जनावरहरूको बोसो मिसिएको खरानीलाई जनाउँछ।
^ वा “भित्री वस्त्र।”
^ यसले आलसको डाँठबाट बनेको कपडालाई जनाउँछ।
^ शा., “शान्त पार्ने।”
^ वा “सम्झनास्वरूप।”
^ एपाको दस भागको एक भाग भनेको २.२ लिटरको भाँडोमा अटाउने जतिको परिमाण हो। अतिरिक्त लेख ख१४ हेर्नुहोस्।
