लेवी २५:१-५५
२५ यहोवा परमेश्वरले मोसालाई सिनै डाँडामा अझै भन्नुभयो:
२ “इस्राएलीहरूलाई यसो भन्नू, ‘जब तिमीहरू मैले दिन लागेको देशमा पुग्छौ,+ तब तिमीहरूले विश्रामदिनबारे* यहोवा परमेश्वरले दिनुभएको नियम पालन गर्नू र खेतीपाती नगर्नू।+
३ तिमीहरूले छ वर्षसम्म आफ्नो जमिनमा बिउ छर्नू, छ वर्षसम्म आफ्नो अङ्गुर बगान छिमल्नू र फसल बटुल्नू।+
४ तर सातौँ वर्ष भने जमिन बाँझै छोड्नू किनभने यो यहोवा परमेश्वरले तोक्नुभएको विश्रामवर्ष हो, जमिनले पूरै आराम गर्ने वर्ष। तिमीहरूले बिउ नछर्नू वा अङ्गुर बगान नछिमल्नू।
५ तिमीहरूले फसल बटुलिसकेपछि जमिनमा बाँकी भएको दानाबाट आफै उब्जेको अन्न फेरि कटनी नगर्नू अनि नछिमलेको अङ्गुर बगानबाट अङ्गुर नबटुल्नू। सातौँ वर्ष तिमीहरूले जमिन बाँझो छोड्नू।
६ तर विश्रामवर्षमा जे आफै उब्जन्छ, त्यो तिमीहरू, तिमीहरूका दासदासी, ज्यालादारी मजदुर अनि तिमीहरूमाझ बसोबास गर्ने विदेशीहरूले खान सक्छौ।
७ साथै तिमीहरूका घरपालुवा जनावर र तिमीहरूको इलाकामा भएका जङ्गली जनावरहरूले ती खान सक्छन्। जमिनमा जे उब्जनी हुन्छ, त्यो खाए हुन्छ।
८ “‘तिमीहरूले सात वटा विश्रामवर्ष गन्नू अर्थात् सात गुणा सात वर्ष। यसरी जम्मा ४९ वर्ष पूरा भएपछि
९ त्यो ४९ औँ वर्षको सातौँ महिनाको दसौँ दिन अर्थात् प्रायश्चितको दिन*+ ठूलो स्वरले सिङ फुक्न लगाउनू र त्यसको आवाज देशभरि सुनियोस्।
१० तिमीहरूले ५० औँ वर्षलाई पवित्र मान्नू अनि देशका सारा बासिन्दालाई स्वतन्त्रताको घोषणा गर्नू।+ यो तिमीहरूको लागि स्वर्ण वर्ष हुनेछ अनि तिमीहरू प्रत्येकले आफूले बेचेको सम्पत्ति फिर्ता पाउनेछौ र तिमीहरू आ-आफ्नो परिवारकहाँ फर्कन सक्नेछौ।+
११ तिमीहरूले ५० औँ वर्षमा स्वर्ण वर्ष मनाउनू। यो वर्ष तिमीहरूले बिउ नछर्नू वा जमिनमा बाँकी भएको दानाबाट उब्जिएको अन्नको कटनी नगर्नू वा नछिमलेका अङ्गुर बगानबाट अङ्गुर नबटुल्नू।+
१२ यो वर्ष स्वर्ण वर्ष हो। तिमीहरूले यस वर्षलाई पवित्र मान्नू। जमिनमा जे आफै उब्जन्छ, तिमीहरूले त्यो मात्र खानू।+
१३ “‘स्वर्ण वर्षमा तिमीहरू प्रत्येकले आफूले बेचेको सम्पत्ति फिर्ता पाउनेछौ।+
१४ तिमीहरूले आफ्नो छिमेकीसँग किनबेच गर्दा ऊबाट नाजायज फाइदा नउठाउनू।+
१५ आफ्नो छिमेकीसित जमिन किन्दा स्वर्ण वर्ष मनाएको कति वर्ष भयो, त्यो गनेर मात्र किन्नू अनि बेच्नेले पनि अर्को स्वर्ण वर्ष आउन कति वर्ष बाँकी छ र त्यतिन्जेल कति उब्जनी हुन्छ, त्यो हिसाब गरेर मात्र बेच्नू।+
१६ यदि स्वर्ण वर्ष आउन धेरै वर्ष बाँकी छ भने उसले जमिनको भाउ बढाउन सक्छ तर थोरै वर्ष मात्र बाँकी छ भने उसले जमिनको भाउ घटाउनुपर्छ किनभने उसले बाँकी वर्षमा कति उब्जनी हुन्छ, त्यो हिसाब गरेर जमिन बेच्दै छ।
१७ तिमीहरू कसैले आफ्नो छिमेकीबाट नाजायज फाइदा नउठाउनू+ र तिमीहरूले मेरो डर मान्नू+ किनभने म तिमीहरूका परमेश्वर यहोवा हुँ।+
१८ तिमीहरूले मेरा विधिविधान र फैसला पालन गरिरह्यौ भने त्यस देशमा सुरक्षितसाथ बस्न सक्नेछौ।+
१९ त्यहाँ प्रशस्त उब्जनी हुनेछ;+ तिमीहरूलाई खानेकुराको कुनै अभाव हुनेछैन र तिमीहरू सुरक्षितसाथ बस्न सक्नेछौ।+
२० “‘तर तिमीहरू भनौला: “बिउ छरेनौँ वा फसल बटुलेनौँ भने सातौँ वर्ष हामीले के खाने?”+
२१ चिन्ता नगर, छैटौँ वर्ष म तिमीहरूमाथि आशिष् बर्साउनेछु र जमिनले तीन वर्षसम्म पुग्ने उब्जनी दिनेछ।+
२२ तब तिमीहरूले आठौँ वर्षमा बिउ छर्नेछौ र नवौँ वर्षसम्म पुरानै अन्न खानेछौ। नयाँ बाली नकाटुन्जेल तिमीहरूले पुरानै अन्न खानेछौ।
२३ “‘तिमीहरूले सधैँको लागि जमिन नबेच्नू+ किनभने जमिन मेरै हो।+ तिमीहरू सबै मेरो नजरमा विदेशी र प्रवासीहरू हौ।+
२४ आफ्नो जमिन बेचेको व्यक्तिले त्यो फेरि किन्न चाहन्छ भने उसले त्यो अधिकार पाउनुपर्छ।
२५ “‘यदि तिम्रो छिमेकी गरिब भयो र उसले आफ्नो केही जमिन बेच्नुपऱ्यो भने नजिकको नातेदार आएर मोल तिरिदेओस् र उसको जमिन फिर्ता गरिदेओस्। यसरी त्यो नातेदार उसको निम्ति मोल तिरेर छुटाउने व्यक्ति हुनेछ।+
२६ यदि कसैको मोल तिरेर छुटाउने व्यक्ति छैन तर पछि ऊ धनी भयो र आफूले बेचेको जमिन किन्न सक्ने भयो भने
२७ उसले जमिन बेचेको कति वर्ष भयो र ती वर्षहरूमा कति मूल्यबराबरको उब्जनी भयो, त्यो हिसाब गर्नुपर्छ। अनि यो मूल्यलाई आफूले बेचेको बेलाको मूल्यबाट घटाएर बाँकी मूल्य आफ्नो जमिन किन्ने व्यक्तिलाई फिर्ता गर्नुपर्छ। तब उसले आफ्नो सम्पत्ति फिर्ता पाउनेछ।+
२८ “‘तर ऊसित आफूले बेचेको जमिन फेरि किन्ने औकात छैन भने जमिन जसले किनेको हो, स्वर्ण वर्षसम्म त्यही व्यक्तिको हुनेछ।+ स्वर्ण वर्षमा भने उसले आफूले बेचेको जमिन फिर्ता पाउनेछ।+
२९ “‘यदि कसैले पर्खालले घेरिएको सहरमा भएको आफ्नो घर बेच्यो भने बेचेको समयदेखि एक वर्षभित्र त्यो घर फेरि किन्ने अधिकार ऊसित हुन्छ; आफूले बेचेको घर फेरि किन्ने अधिकार+ ऊसित पूरा एक वर्षसम्म रहन्छ।
३० तर एक वर्षको अन्तसम्ममा पनि उसले किनेन भने पर्खालले घेरिएको सहरमा भएको त्यो घर जसलाई बेचेको हो, सधैँको लागि अर्थात् पुस्तौँपुस्तासम्म त्यस व्यक्तिकै सम्पत्ति हुनेछ। स्वर्ण वर्षमा पनि त्यो घर उसलाई फिर्ता गरिनेछैन।
३१ पर्खालले नघेरिएका सहरमा भएका घरहरूलाई भने खुला ठाउँमा भएको जग्गा-जमिनसरह ठान्नू। त्यस्तो ठाउँमा भएका घरहरू फेरि किन्ने अधिकार बेच्ने व्यक्तिसित रहनेछ अनि त्यो घर जसको हो, उसलाई स्वर्ण वर्षमा फिर्ता गरियोस्।
३२ “‘लेवीहरूले भने आफूलाई दिइएको सहरमा भएका घरहरू+ बेच्दा जुनसुकै बेला पनि त्यो फेरि किन्न सक्छन्; यो अधिकार उनीहरूसित सधैँ रहनेछ।
३३ आफूलाई दिइएको सहरमा भएको घर बेचेपछि लेवीहरूले फेरि किन्न सकेनन् भने स्वर्ण वर्षमा त्यो उनीहरूलाई फिर्ता गरिनेछ+ किनभने इस्राएलीहरूमाझ आफूले पाएको सहरमा भएका घरहरू लेवीहरूकै सम्पत्ति हुन्।+
३४ तर उनीहरूको सहरवरपर भएका चरनहरू+ भने बेच्नु हुँदैन किनभने यो सदाका लागि उनीहरूकै सम्पत्ति हो।
३५ “‘तिमीहरूको नजिकै बस्ने कोही इस्राएली गरिब भयो र आफ्नो जीवन धान्न नसक्ने भयो भने तिमीहरूमाझ बस्ने विदेशी र प्रवासीलाई जस्तै+ उसलाई मदत गर।+ यसो गऱ्यौ भने तिमीहरूमाझ रहेर उसले आफ्नो गुजारा चलाउन सक्नेछ।
३६ तिमीहरूले ऊसित ब्याज नलेओ वा ऊबाट फाइदा* नलेओ।+ तिमीहरूले आफ्नो परमेश्वरको डर मान्नू।+ यसो गऱ्यौ भने तिमीहरूमाझ रहेर उसले आफ्नो जीविका चलाउन सक्नेछ।
३७ तिमीहरूले उसलाई पैसा सापटी दिँदा ब्याज नलिनू+ वा नाफा कमाउने लोभले खानेकुरा नदिनू।
३८ म तिमीहरूका परमेश्वर हुँ भनी देखाउन तिमीहरूलाई मिश्र देशबाट छुटाएर कनान देशमा ल्याउने+ तिमीहरूका परमेश्वर यहोवा मै हुँ।+
३९ “‘तिमीहरूको नजिकै बस्ने कोही इस्राएली गरिब भयो र उसले आफूलाई तिम्रो हातमा बेच्यो भने+ दासलाई जसरी उसलाई नजोताउनू।+
४० ज्यालादारी मजदुर वा प्रवासीलाई जस्तो व्यवहार गर्छौ, ऊसित पनि त्यस्तै व्यवहार गर्नू।+ उसले तिमीकहाँ स्वर्ण वर्षसम्म काम गरोस्।
४१ त्यसपछि ऊ र उसको बालबच्चा तिमीलाई छोडेर आफ्नो आफन्तकहाँ जानेछ। ऊ आफ्ना पुर्खाहरूको सम्पत्ति अधिकार गर्न फर्कोस्।+
४२ तिनीहरू मैले मिश्र देशबाट छुटाएर ल्याएका मेरा दासहरू हुन्।+ तिनीहरूले आफूलाई दासको रूपमा अरूको हातमा नबेचून्।
४३ तिमीहरूले ऊसित क्रूर व्यवहार नगर्नू;+ तिमीहरूले आफ्नो परमेश्वरको डर मान्नू।+
४४ तिमीहरूका दासदासीहरू वरपरका राष्ट्रका होऊन्; तिमीहरूले तिनीहरूमध्येबाट दास वा दासी किन्न सक्छौ।
४५ साथै तिमीहरूसित बसोबास गरिरहेका विदेशीका सन्तानबाट+ र तिमीहरूको देशमा जन्मिएका तिनीहरूको परिवारबाट दासदासीहरू किन्न सक्छौ र उनीहरू तिमीहरूको सम्पत्ति हुनेछन्।
४६ तिमीहरूले यी दासदासीहरू पैतृक सम्पत्तिको रूपमा आफ्नो सन्तानलाई दिन सक्छौ र उनीहरूले तिम्रो सन्तानको दासदासीको रूपमा सधैँभरि काम गर्नेछन्। तिमीहरूले उनीहरूलाई दासदासीको रूपमा काममा लगाउन सक्छौ। तर आफ्ना इस्राएली दाजुभाइसित भने क्रूर व्यवहार नगर्नू।+
४७ “‘तर तिमीहरूसित बसोबास गर्ने कुनै विदेशी वा प्रवासी धनी भयो र उसको नजिकै बस्ने कोही इस्राएली भने गरिब भयो र उसले आफूलाई त्यस विदेशी वा प्रवासीको हातमा वा त्यस विदेशीको परिवारको हातमा बेच्नुपऱ्यो भने
४८ ऊसित मोल तिरेर आफूलाई फेरि छुटाउने अधिकार हुन्छ। उसको कुनै दाजुभाइले मोल तिरेर उसलाई छुटाउन सक्छ।+
४९ अथवा उसको ठूलोबुबा वा काका वा उनीहरूको छोरा वा उसको घरानाका कुनै नजिकको नातेदारले* मोल तिरेर उसलाई छुटाउन सक्छ।
“‘अथवा पछि ऊ धनी भयो भने आफैले मोल तिरेर आफूलाई छुटाउन सक्छ।+
५० उसलाई किन्ने मानिससँगै बसेर उसले आफूलाई बेचेको समयदेखि स्वर्ण वर्ष आउन कति वर्ष बाँकी छ, त्यो हिसाब गरोस्+ र ती वर्षहरूको लागि जति मोल तिर्नुपर्छ, त्यति तिरेर आफूलाई छुटाओस्।+ एक जना ज्यालादारी मजदुरलाई जति ज्याला दिइन्छ, उसलाई पनि त्यति नै दिइयोस्।+
५१ स्वर्ण वर्ष आउन धेरै वर्ष बाँकी छ भने उसले जति वर्ष बाँकी छ, त्यसको हिसाब गरेर मोल तिरोस्।
५२ तर स्वर्ण वर्ष आउन थोरै वर्ष मात्र बाँकी छ भने उसले जति वर्ष बाँकी छ, त्यसको हिसाब गरेर मोल तिरोस्।
५३ हरेक वर्ष उसले ज्यालादारी मजदुरले जस्तै काम गरोस् अनि तिमीहरूले यस कुराको ध्यान राख्नू कि उसको मालिकले ऊसित क्रूर व्यवहार गर्न नपाओस्।+
५४ तर यीमध्ये कुनै पनि उपायबाट आफूलाई छुटाउने औकात ऊसित छैन भने ऊ स्वर्ण वर्षमा स्वतन्त्र हुनेछ;+ ऊ र उसका छोराछोरी सबै स्वतन्त्र हुनेछन्।
५५ “‘किनकि इस्राएलीहरू मैले मिश्रबाट छुटाएर ल्याएका मेरा दासहरू हुन्। तिनीहरू मेरै दास हुन्।+ म तिमीहरूका परमेश्वर यहोवा हुँ।
फुटनोटहरू
^ हिब्रू भाषामा सबाथ। शब्दावलीमा “विश्रामदिन” हेर्नुहोस्।
^ वा “चर्को ब्याज।”
^ वा “रगतको नाता पर्ने व्यक्तिले।”
