प्रेषितहरूका कार्य ९:१-४३

  • दमिसक जाने बाटोमा सावल (१-९)

  • सावललाई मदत गर्न हननियालाई पठाइन्छ (१०-१९क)

  • सावल दमिसकमा येसुबारे प्रचार गर्छन्‌ (१९ख-२५)

  • सावल यरुसलेम जान्छन्‌ (२६-३१)

  • पत्रुस एनियासलाई निको पार्छन्‌ (३२-३५)

  • उदार डोरकासलाई फेरि जीवित पारिन्छ (३६-४३)

 तर सावल अझै पनि प्रभुका चेलाहरूलाई धम्काउने र तिनीहरूलाई मार्ने धुनमा थिए।+ त्यसैले तिनी प्रधानपुजारीकहाँ गए २  अनि ‘त्यस मार्ग’-मा* लाग्ने पुरुष र स्त्रीहरू,+ ज-जसलाई भेटिन्छ, तिनीहरू सबैलाई बाँधेर यरुसलेम ल्याउन दमिसकका सभाघरहरूको नाममा पुर्जी मागे। ३  तिनी यात्रा गरेर दमिसक पुग्नै लाग्दा अकस्मात्‌ तिनको चारैतिर आकाशबाट ज्योति चम्कियो+ ४  अनि तिनी भुईँमा पछारिए र तिनले यस्तो आवाज सुने: “सावल, ए सावल, तिमी किन मेरो खेदो गर्दै छौ?” ५  तिनले सोधे: “प्रभु, तपाईँ को हुनुहुन्छ?” उहाँले भन्‍नुभयो: “म येसु हुँ,+ जसको तिमीले खेदो गरिरहेका छौ।+ ६  अब उठ र सहरभित्र पस। तिमीले के गर्नुपर्छ, त्यो तिमीलाई बताइनेछ।” ७  तिनीसँगै यात्रा गरिरहेका मानिसहरू अक्क न बक्क भएर उभिरहेका थिए किनकि कोही बोलेको आवाज त तिनीहरूले सुने तर कसैलाई देखेनन्‌।+ ८  तब सावल भुईँबाट उठे। आँखा खुल्लै भए तापनि तिनले केही देख्न सकिरहेका थिएनन्‌। त्यसैले तिनको हात समातेर डोऱ्‍याउँदै उनीहरूले तिनलाई दमिसकसम्म पुऱ्‍याए। ९  तीन दिनसम्म तिनले केही देखेनन्‌+ अनि खानपिन पनि गरेनन्‌। १०  दमिसकमा हननिया नाम गरेका एक जना चेला थिए।+ दर्शनमा* प्रभुले तिनलाई यसो भन्‍नुभयो: “हननिया!” तिनले जवाफ दिए: “हजुर प्रभु।” ११  प्रभुले तिनलाई भन्‍नुभयो: “उठ र सीधा भन्‍ने मार्गमा जाऊ र यहुदाको घरमा गएर सावल नाम गरेको टार्ससको मानिसलाई+ खोज। किनकि हेर, तिनी प्रार्थना गर्दै छन्‌ १२  अनि हननिया नाम गरेको मानिस भित्र आएर आफूमाथि हात राखिदिएको र आफ्नो दृष्टि फर्केको दर्शन तिनले देखेका छन्‌।”+ १३  तर हननियाले जवाफ दिए: “प्रभु, तिनले यरुसलेममा भएका तपाईँका पवित्र जनहरूको कत्ति हानि गरेका छन्‌ भनेर त्यस मानिसको विषयमा मैले धेरै जनाबाट सुनेको छु। १४  अनि तिनले यहाँ पनि तपाईँको नाम पुकार्नेजति सबैलाई पक्रने* अख्तियार मुख्य पुजारीहरूबाट पाएका छन्‌।”+ १५  तर प्रभुले तिनलाई भन्‍नुभयो: “जाऊ! किनकि यी मानिस जातिजातिका मानिसहरूलाई,+ राजाहरूलाई+ अनि इस्राएलका सन्तानलाई मेरो नामको साक्षी दिन मैले रोजेको पात्र हुन्‌।+ १६  मेरो नामको खातिर तिनले कत्ति धेरै दुःख भोग्नुपर्नेछ, त्यो म तिनलाई राम्ररी देखाउनेछु।”+ १७  त्यसैले हननिया गए र त्यस घरभित्र पसे अनि सावलमाथि आफ्नो हात राखेर उनले भने: “भाइ सावल, तपाईँको दृष्टि फर्कोस्‌ र तपाईँ पवित्र शक्‍तिले भरिनुहोस्‌+ भनेर प्रभु येसुले मलाई पठाउनुभएको हो, जो तपाईँ आउँदै गर्दा बाटोमा देखा पर्नुभएको थियो।” १८  अनि उत्तिखेरै तिनको आँखाबाट पाप्राजस्तो केही चिज झऱ्‍यो र तिनले फेरि दृष्टि पाए। त्यसपछि तिनी उठे अनि बप्तिस्मा गरे १९  र खानेकुरा खाएर बल पाए। तिनले दमिसकका+ चेलाहरूसित केही दिन बिताए २०  र येसु नै परमेश्‍वरको छोरा हुनुहुन्छ भनेर तुरुन्तै त्यहाँका सभाघरहरूमा प्रचार गर्न थाले। २१  तर तिनको कुरा सुन्‍नेजति सबै जना छक्क पर्दै यसो भनिरहेका थिए: “के यो त्यही मानिस होइन, जसले यरुसलेममा यो नाम पुकार्नेहरूको संहार गर्थ्यो?+ अनि यो मानिस यहाँ पनि तिनीहरूलाई पक्रेर* मुख्य पुजारीहरूकहाँ लैजाने उद्देश्‍यले आएको होइन?”+ २२  तर सावल झन्‌-झन्‌ प्रभावशाली बन्दै गए अनि तिनले येसु नै ख्रिष्ट हुनुहुन्छ भनेर तर्कसङ्‌गत ढङ्‌गमा प्रमाणित गर्दै+ दमिसकमा बस्ने यहुदीहरूको मुख टालिदिए। २३  यसरी निकै दिन बितेपछि यहुदीहरूले तिनलाई मार्ने मतो गरे।+ २४  तर सावलले तिनीहरूको षड्‌यन्त्रबारे चाल पाए। तिनलाई मार्न तिनीहरू दिनरात सहरको मूलढोकामा ढुकेर पनि बस्थे। २५  त्यसैले तिनका चेलाहरूले तिनलाई एउटा टोकरीमा राखेर राती सहरको पर्खालको झ्यालबाट तल ओराले।+ २६  यरुसलेम पुगेपछि+ तिनले चेलाहरूलाई भेट्‌ने कोसिस गरे तर उनीहरू सबै जना तिनीसित डराए किनकि तिनी चेला बनिसके भनेर उनीहरूलाई पत्यारै लागेन। २७  त्यसैले बर्णाबास+ तिनलाई मदत गर्न अघि सरे; उनले तिनलाई प्रेषितहरूकहाँ लगे अनि तिनले बाटोमा प्रभुलाई देखेको,+ उहाँले तिनीसित कुरा गर्नुभएको र दमिसकमा तिनले येसुको नाममा साहसका साथ बोलेको विषयमा सविस्तार सुनाए।+ २८  त्यसैले सावल उनीहरूसित यरुसलेममै बस्न थाले। तिनी खुलेआम हिँडडुल गर्थे र प्रभुको नाममा साहसका साथ बोल्थे। २९  तिनी ग्रीकभाषी यहुदीहरूसित कुराकानी र बहस गर्थे। तर यिनीहरूले तिनलाई मार्ने कोसिस गरे।+ ३०  जब भाइहरूले यो कुरा चाल पाए, तब उनीहरूले तिनलाई तल सिजरिया ल्याए र टार्ससतिर पठाए।+ ३१  तब सारा यहुदिया, गालिल र सामरियाको+ मण्डलीमा शान्ति छायो र मण्डली सुदृढ हुँदै गयो। यहोवा* परमेश्‍वरको डर अनि पवित्र शक्‍तिबाट+ पाएको प्रोत्साहनअनुसार हिँड्‌दा मण्डलीको वृद्धि हुँदै गयो। ३२  विभिन्‍न ठाउँको भ्रमण गर्ने क्रममा पत्रुस लिड्डामा भएका पवित्र जनहरूकहाँ पनि गए।+ ३३  त्यहाँ तिनले एनियास नाम गरेको एक जना मानिसलाई भेटे। पक्षाघातले गर्दा उनी थला परेको आठ वर्ष भइसकेको थियो। ३४  पत्रुसले उनलाई भने: “एनियास, येसु ख्रिष्टले तिमीलाई निको पार्नुहुन्छ।+ त्यसैले उठ, आफ्नो ओछ्यान मिलाऊ।”+ अनि उत्तिखेरै उनी उठे। ३५  उनलाई देखेपछि लिड्डामा र सारोन बेँसीमा बस्नेहरू सबैले प्रभुमा विश्‍वास गर्न थाले। ३६  जोप्पामा तबिता नाम गरेकी एक जना चेला थिइन्‌, जसको नामको अनुवाद गर्दा अर्थ हुन्छ, “डोरकास।”* उनी थुप्रै असल काम र दानपुण्य गर्थिन्‌। ३७  पत्रुस लिड्डामै छँदा उनी बिरामी परिन्‌ र मरिन्‌। त्यसैले तिनीहरूले उनलाई नुहाइदिएर माथिल्लो तलाको कोठामा लगेर राखे। ३८  लिड्डा जोप्पाबाट नजिकै थियो। त्यसैले पत्रुस लिड्डामा छन्‌ भन्‍ने सुनेपछि चेलाहरूले दुई जना मानिसलाई यस्तो बिन्ती गर्न पठाए: “कृपया, तुरुन्तै हामीकहाँ आउनुहोस्‌।” ३९  तब पत्रुस उठेर उनीहरूसित गए। त्यहाँ पुगेपछि तिनीहरूले पत्रुसलाई माथिल्लो तलाको कोठामा लगे। तब सबै विधवा रुँदै तिनीकहाँ आए। अनि तिनीहरूले पत्रुसलाई डोरकासले जीवित हुँदा बनाएका लुगाहरू देखाए। ४०  तब पत्रुसले सबैलाई बाहिर पठाए+ अनि घुँडा टेकेर प्रार्थना गरे। त्यसपछि तिनले लासतिर फर्कँदै यसो भने: “तबिता, उठ!” उनले आफ्नो आँखा उघारिन्‌ र पत्रुसलाई देखेपछि उठेर बसिन्‌।+ ४१  तब तिनले आफ्नो हात दिएर उनलाई उठाए अनि पवित्र जन र विधवाहरूलाई बोलाएर जीवित भइसकेकी तबिता तिनीहरूलाई जिम्मा लगाए।+ ४२  यो कुरा जोप्पाभरि फैलियो र धेरै जनाले प्रभुमा विश्‍वास गरे।+ ४३  तिनी केही दिनसम्म जोप्पामै सिमोन नाम गरेको चर्मकारकहाँ बसे।+

फुटनोटहरू

अर्थात्‌, ख्रिष्टियन मार्गमा।
शब्दावली हेर्नुहोस्‌।
शा., “बाँध्ने; झ्यालखानामा हाल्ने।”
शा., “बाँधेर।”
अतिरिक्‍त लेख क५ हेर्नुहोस्‌।
ग्रीक नाम डोरकास अनि अरामी नाम तबिता दुवैको अर्थ “हरिणी” हो।