प्रेषितहरूका कार्य ३:१-२६

  • पत्रुस लङ्‌गडो माग्नेलाई निको पार्छन्‌ (१-१०)

  • सुलेमान दलानमा पत्रुसको भाषण (११-२६)

    • “सबै कुरा पुनर्स्थापित हुने” (२१)

    • मोसाजस्तै भविष्यवक्‍ता (२२)

 अब पत्रुस र युहन्‍ना प्रार्थनाको समयमा अर्थात्‌ नवौँ घडीमा* मन्दिरमा उक्लिरहेका थिए। २  अनि त्यहाँ मानिसहरूले जन्मैदेखिको लङ्‌गडो मानिसलाई बोकेर ल्याउँदै थिए। तिनीहरूले दिनहुँ उसलाई मन्दिरको ‘सुन्दर’ भनिने ढोकानजिकै लगेर राखिदिन्थे। त्यहाँ बसेर उसले मन्दिरभित्र जानेहरूसित भीख माग्थ्यो। ३  जब उसले पत्रुस र युहन्‍नालाई मन्दिरभित्र छिर्न लागेको देख्यो, तब उसले तिनीहरूसित भीख माग्न थाल्यो। ४  तर पत्रुस र युहन्‍ना दुवैले उसलाई सीधै हेरेर यसो भने: “हामीलाई हेर।” ५  त्यसैले तिनीहरूबाट केही पाउने आशा गरेर उसले तिनीहरूलाई टुलुटुलु हेऱ्‍यो। ६  तर पत्रुसले भने: “मसित सुनचाँदी त छैन तर जे छ, त्यही म तिमीलाई दिन्छु। नासरी येसु ख्रिष्टको नाममा म तिमीलाई भन्छु, उठेर हिँड!”+ ७  यति भनेपछि पत्रुसले उसको दाहिने हात समाएर उसलाई उठाए।+ अनि उत्तिखेरै उसको पैताला र गोलीगाँठोमा तागत आयो+ ८  अनि बुर्लुक्क उफ्रेर+ ऊ उभियो र हिँड्‌न थाल्यो। त्यसपछि हिँड्‌दै, उफ्रँदै र परमेश्‍वरको प्रशंसा गर्दै ऊ तिनीहरूसँगै मन्दिरभित्र पस्यो। ९  अनि सबै मानिसले ऊ हिँडेको र उसले परमेश्‍वरको प्रशंसा गरिरहेको देखे। १०  साथै मन्दिरको सुन्दर-ढोकामा+ बसेर भीख माग्ने मानिस यही हो भनेर पनि तिनीहरूले चिने र उसलाई जे भएको थियो, त्यो देखेर तिनीहरू तीनछक परे अनि हर्षित भए। ११  त्यो मानिस पत्रुस र युहन्‍नालाई समात्दै पछिपछि लागिरहेको बेला सबै जना छक्क पर्दै सुलेमान दलान+ भनिने ठाउँमा दौडेर आए। १२  यो देखेर पत्रुसले मानिसहरूलाई भने: “इस्राएलका मानिसहरू हो, तपाईँहरू किन यस कुरामा अचम्म मान्‍नुहुन्छ अथवा हामीले आफ्नै शक्‍तिले वा परमेश्‍वरप्रतिको भक्‍तिले गर्दा उसलाई हिँड्‌न सक्ने बनाएका हौँ जस्तो गरी हामीलाई टुलुटुलु हेरिरहनुहुन्छ? १३  अब्राहाम, इसहाक र याकुबका+ परमेश्‍वर अर्थात्‌ हाम्रा पुर्खाहरूका परमेश्‍वरले आफ्नो सेवक+ येसुलाई+ महिमित पार्नुभएको छ, जसलाई तपाईँहरूले पक्रेर+ शत्रुहरूको हातमा सुम्पिदिनुभयो अनि पिलातसले उहाँलाई मुक्‍त गरिदिने निर्णय गर्दा समेत तपाईँहरूले तिनकै अगाडि इन्कार गर्नुभयो। १४  हो, तपाईँहरूले ती पवित्र अनि धर्मी मानिसलाई इन्कार गर्नुभयो र उहाँको सट्टामा एक जना हत्यारालाई मुक्‍त गरिदिने माग गर्नुभयो+ १५  जबकि जीवनको मुख्य माध्यमलाई+ भने तपाईँहरूले मार्नुभयो। तर परमेश्‍वरले उहाँलाई मृत्युबाट ब्युँताउनुभयो, जसको साक्षी हामी छौँ।+ १६  उहाँको नामले गर्दा र हामीले उहाँको नाममा राखेको विश्‍वासले गर्दा यो मानिस बलियो भएको छ, जसलाई तपाईँहरू देख्दै हुनुहुन्छ र चिन्‍नु पनि हुन्छ। उहाँमाथिको हाम्रो विश्‍वासले गर्दा नै यो मानिस तपाईँहरू सबैको अगाडि पूर्णतया तन्दुरुस्त भएको छ। १७  अब ए भाइहरू हो, मलाई थाह छ, तपाईँहरूका शासकहरूले* जस्तै+ तपाईँहरूले पनि अनजानमै+ त्यसो गर्नुभयो। १८  तर ख्रिष्टले दुःख भोग्नुहुनेछ+ भनेर सबै भविष्यवक्‍ताद्वारा पहिल्यै घोषणा गरिएका कुराहरू परमेश्‍वरले यसरी पूरा गर्नुभएको छ। १९  “त्यसैले पश्‍चात्ताप गर्नुहोस्‌+ अनि फर्केर परमेश्‍वरकहाँ आउनुहोस्‌+ ताकि तपाईँहरूको पाप मेटियोस्‌+ अनि तपाईँहरूलाई स्वयम्‌ यहोवा* परमेश्‍वरबाट स्फूर्ति प्राप्त होस्‌। २०  अनि तपाईँहरूका लागि नियुक्‍त गरिनुभएका ख्रिष्ट अर्थात्‌ येसुलाई उहाँले पठाइदेऊन्‌। २१  तथापि उहाँ तबसम्म स्वर्गमा रहनै पर्छ, जबसम्म परमेश्‍वरले विगतमा आफ्ना पवित्र भविष्यवक्‍ताहरूद्वारा भन्‍नुभएका सबै कुरा पुनर्स्थापित हुने समय आउँदैन। २२  वास्तवमा मोसाले भनेका थिए: ‘यहोवा* तिमीहरूका परमेश्‍वरले तिमीहरूमध्येबाट मजस्तै एक जना भविष्यवक्‍ता नियुक्‍त गर्नुहुनेछ।+ तिनले तिमीहरूलाई जे-जे भन्छन्‌, तिमीहरूले ती सबै सुन्‍नू।+ २३  वास्तवमा जसले त्यस भविष्यवक्‍ताको कुरा सुन्दैन, उसलाई परमेश्‍वरले पूर्णतया नाश गर्नुहुनेछ।’+ २४  भनौँ भने समुएल अनि तिनीपछि ज-जसले भविष्यवाणी गरे, ती सबै भविष्यवक्‍ताले यी दिनहरूको विषयमा प्रस्ट घोषणा गरेका छन्‌।+ २५  तपाईँहरू भविष्यवक्‍ताहरूका र तपाईँहरूका पुर्खाहरूसित परमेश्‍वरले गर्नुभएको त्यस करारका+ सन्तान हुनुहुन्छ, जुन करार गर्दा उहाँले अब्राहामलाई यसो भन्‍नुभएको थियो, ‘तिम्रै सन्तानमार्फत पृथ्वीका सबै परिवारले आशिष्‌ पाउनेछन्‌।’+ २६  तपाईँहरूलाई आ-आफ्ना दुष्ट कामहरूबाट फर्काएर आशिष्‌ दिन सकियोस्‌ भनी परमेश्‍वरले आफ्नो सेवकलाई ब्युँताउनुभएपछि उहाँलाई सबैभन्दा पहिला तपाईँहरूकहाँ पठाउनुभयो।”+

फुटनोटहरू

अर्थात्‌, दिउँसो तीन बजेतिर।
वा “यहुदी न्यायपरिषद्‌का सदस्यहरूले।”
अतिरिक्‍त लेख क५ हेर्नुहोस्‌।
अतिरिक्‍त लेख क५ हेर्नुहोस्‌।