प्रेषितहरूका कार्य २८:१-३१

  • माल्टाको किनारामा पुग्छन्‌ (१-६)

  • पब्लियसका बुबालाई निको पारिन्छ (७-१०)

  • रोमतर्फको यात्रा (११-१६)

  • पावल रोममा यहुदीहरूसित कुरा गर्छन्‌ (१७-२९)

  • पावल दुई वर्षसम्म साहसका साथ प्रचार गर्छन्‌ (३०, ३१)

२८  हामी किनारामा सकुशल पुगेपछि त्यस टापुलाई माल्टा+ भनिँदो रहेछ भनेर थाह पायौँ। २  त्यस टापुका मानिसहरूले* हामीप्रति असाधारण दया* देखाए। पानी परिरहेको र जाडो भएकोले उनीहरूले आगो बालिदिए अनि हामी सबैलाई न्यानो स्वागत गरे। ३  पावलले झिँजा बटुलेर आगोमा हाल्दा आगोको रापले गर्दा त्यसबाट एउटा विषालु सर्प निस्क्यो र तिनको हातमा बेरियो। ४  तिनको हातमा विषालु सर्प झुन्डिरहेको देखेर अर्कै भाषा बोल्ने ती मानिसहरूले आपसमा यसो भन्‍न थाले: “यो मानिस पक्कै हत्यारा हो। त्यसैले त समुद्रबाट सकुशल निस्के पनि इन्साफबाट* भने उम्कन सकेन।” ५  तर तिनले हात झट्‌कारेर त्यो सर्पलाई आगोमा फ्याँके र तिनलाई केही हानि भएन। ६  तर उनीहरू भने तिनको हात सुनिएर आउँछ होला वा तिनी एक्कासि पछारिएर मर्छन्‌ होला भनेर सोचिरहेका थिए। निकै बेर पर्खँदा पनि तिनलाई केही हानि नभएको देखेर उनीहरूले आफ्नो विचार बदले र तिनी कुनै ईश्‍वर हुनुपर्छ भन्‍न थाले। ७  त्यस ठाउँको नजिकै पब्लियस नाम गरेका मानिसको जग्गा-जमिन थियो, जो त्यस टापुका मुखिया थिए। उनले हामीलाई स्वागत गरे अनि निकै माया गरेर तीन दिनसम्म हाम्रो सत्कार गरे। ८  पब्लियसका बुबा ज्वरो र आउँले थला परेका थिए। त्यसैले पावल उनीकहाँ गएर प्रार्थना गरे अनि त्यसपछि उनीमाथि आफ्नो हात राखेर उनलाई निको पारे।+ ९  यो घटनापछि त्यस टापुका अरू बिरामी मानिसहरू पनि तिनीकहाँ आउन थाले र उनीहरू निको भए।+ १०  हामीलाई थुप्रै उपहार दिएर उनीहरूले हाम्रो सम्मान गरे। साथै हामी समुद्री यात्रामा निस्कन लाग्दा हामीलाई चाहिने सरसामान पनि प्रशस्त ल्याए। ११  तीन महिनापछि हामी एउटा जहाजमा चढ्‌यौँ, जुन जहाज अलेक्जेन्ड्रियाबाट आएर हिउँद काट्‌न त्यो टापुमा रोकिएको थियो र त्यसको अघिल्लो भागमा “ज्युसका छोराहरू”-को प्रतिमा थियो। १२  अनि हामी सिराक्युसको बन्दरगाहमा पुगेर तीन दिन त्यहाँ बस्यौँ १३  र त्यहाँबाट रेगियम पुग्यौँ। त्यसको एक दिनपछि दक्षिणी बतास चल्यो र दोस्रो दिनमा हामी पटिओलि पुग्यौँ। १४  त्यहाँ हामीले भाइहरू भेट्‌यौँ, जसले हामीलाई उनीहरूसँग सात दिन बस्न आग्रह गरे। त्यसपछि हामी रोमतर्फ लाग्यौँ। १५  हामी आउँदै गरेको खबर पाएपछि हामीलाई भेट्‌न त्यहाँका भाइहरू तीन पाटी भन्‍ने ठाउँसम्म आए अनि कोही-कोहीचाहिँ अप्पियसको बजारसम्मै आइपुगे। उनीहरूलाई देखेपछि पावलले परमेश्‍वरलाई धन्यवाद दिए र हौसला पाए।+ १६  अन्तमा हामी रोम पसेपछि पावलले छुट्टै बस्ने अनुमति पाए अनि तिनलाई पहरा दिन एक जना सैनिक खटाइयो। १७  तीन दिनपछि तिनले यहुदीहरूका गण्यमान्य मानिसहरूलाई एकै ठाउँमा बोलाए। उनीहरू भेला भएपछि तिनले यसो भने: “भाइहरू हो, मैले मानिसहरूविरुद्ध वा हाम्रा पुर्खाहरूको रीतिथितिविपरीत केही नगरे तापनि+ मलाई यरुसलेममा कैदी बनाएर रोमीहरूको हातमा सुम्पिइयो।+ १८  केरकार गरेपछि+ उनीहरूले मलाई छोड्‌न चाहेका थिए किनकि मैले मृत्युदण्ड पाउन लायकको केही काम गरेको थिइनँ।+ १९  तैपनि यहुदीहरूले आपत्ति जनाएको हुनाले सिजरलाई* अपिल गर्न+ म बाध्य भएँ तर यसरी आफ्नै जातिलाई दोष लगाउन खोजेको त होइनँ। २०  त्यसैले तपाईँहरूसित भेट्‌न र कुरा गर्न पाऊँ भनेर मैले बिन्ती गरेको थिएँ किनकि इस्राएलको आशाको खातिर म साङ्‌लाले बाँधिएको छु।”+ २१  उनीहरूले तिनलाई भने: “तपाईँको विषयमा हामीले यहुदियाबाट कुनै पत्र पाएका छैनौँ, न त यहाँ आइपुगेका भाइहरूमध्ये कसैले तपाईँको विषयमा खबर गरेको वा केही नराम्रो कुरा बताएको छ। २२  तर हामीलाई लाग्छ, तपाईँको विचार के छ, सो तपाईँबाटै सुन्‍नु उचित हुन्छ किनकि हामीलाई थाह भएसम्म जताततै+ मानिसहरू यस गुटविरुद्ध+ बोल्छन्‌।” २३  उनीहरूले तिनलाई भेट्‌न एक दिन तोके र तिनको डेरामा पहिलेभन्दा धेरै जना भेला भए। तिनले उनीहरूलाई परमेश्‍वरको राज्यको विषयमा राम्ररी साक्षी दिए अनि मोसाको व्यवस्था+ र भविष्यवक्‍ताहरूको पुस्तकबाट+ येसुको विषयमा चित्तबुझ्दो तर्क दिएर+ उनीहरूलाई मनाए। तिनले बिहानदेखि बेलुकीसम्मै उनीहरूसित कुरा गरे। २४  तिनले भनेका कुराहरूमा कतिपयले विश्‍वास गर्न थाले तर अरूले भने गरेनन्‌। २५  आपसमा कुरा बाझिएकोले उनीहरू त्यहाँबाट जान थाले। तब पावलले अझै यो एउटा कुरा भने: “पवित्र शक्‍तिले भविष्यवक्‍ता यसैयामार्फत तपाईँहरूका पुर्खाहरूलाई यसरी ठीकै भनेको थियो, २६  ‘यी मानिसहरूकहाँ गएर भन: “सुनेर पनि तिमीहरूले कुनै हालतमा बुझ्नेछैनौ अनि हेरेर पनि तिमीहरूले कुनै हालतमा देख्नेछैनौ।+ २७  किनकि यी मानिसहरूको हृदय बोधो भएको छ र तिनीहरूका कान बाक्लो भएका छन्‌ अनि तिनीहरूले आफ्ना आँखा चिम्लिएका छन्‌ नत्र त तिनीहरूले आफ्ना आँखाले देख्ने थिए, कानले सुन्‍ने थिए, बुझेर हृदयमा लिने थिए र मकहाँ फर्केर आउने थिए अनि म तिनीहरूलाई निको पार्ने थिएँ।”’+ २८  त्यसैले तपाईँहरूलाई यो कुरा थाह होस्‌, परमेश्‍वरले गर्नुहुने उद्धारसम्बन्धी यो सन्देश अन्यजातिहरूकहाँ पठाइएको छ+ र तिनीहरूले त्यो पक्कै सुन्‍नेछन्‌।”+ २९  * ३०  तब तिनले पूरा दुई वर्ष आफ्नै डेरामा बिताए।+ तिनी आफूकहाँ आउनेजति सबैलाई न्यानो स्वागत गर्थे ३१  अनि उनीहरूलाई परमेश्‍वरको राज्यको विषयमा प्रचार गर्थे र निर्धक्क भई साहसका साथ+ प्रभु येसु ख्रिष्टको विषयमा विनारोकटोक सिकाउँथे।

फुटनोटहरू

वा “अर्कै भाषा बोल्ने मानिसहरूले।”
वा “मानवताको नाताले असाधारण दया।”
ग्रीक भाषामा डाइकी। यस शब्दले बदला लिएर इन्साफ गर्ने देवीलाई जनाएको हुन सक्छ वा यहाँ इन्साफको विषयमा कुरा गरिएको हुन सक्छ।
शब्दावली हेर्नुहोस्‌।
अतिरिक्‍त लेख क३ हेर्नुहोस्‌।