प्रेषितहरूका कार्य २५:१-२७

  • फेस्तससामु पावलको पुर्पक्ष (१-१२)

    • “म सिजरलाई अपिल गर्छु!” (११)

  • फेस्तस राजा अग्रिपासित सल्लाह माग्छन्‌ (१३-२२)

  • अग्रिपासामु पावल (२३-२७)

२५  त्यस प्रान्तमा आएर कार्यभार सम्हालेको तीन दिनपछि फेस्तस+ सिजरियाबाट यरुसलेम गए। २  तब मुख्य पुजारीहरू र यहुदीहरूका गण्यमान्य मानिसहरूले पावलको अभियोग उनीसामु पेस गरे।+ अनि तिनीहरूले उनलाई के बिन्ती गर्न थाले भने ३  उनले तिनीहरूको आग्रह सुनेर पावललाई यरुसलेम बोलाऊन्‌। तर तिनीहरूले बाटोमा ढुकेर बस्ने र पावललाई मार्ने षड्‌यन्त्र रचेका थिए।+ ४  तर फेस्तसले तिनीहरूलाई पावल सिजरियामै रहनुपर्छ अनि आफू पनि चाँडै त्यतै फर्कँदै छु भन्‍ने जवाफ दिए। ५  उनले भने: “यहाँ तिमीहरूमध्ये जो-जो उच्च ओहदामा छौ, मसँगै आओ र त्यस मानिसले केही गल्ती गरेको छ भने उसलाई आरोप लगाओ।”+ ६  तिनीहरूसित आठ-दस दिन बिताएपछि उनी सिजरिया ओर्ले अनि त्यसको भोलिपल्ट न्यायासनमा बसे र पावललाई हाजिर गराउने आदेश दिए। ७  पावल आइपुगेपछि यरुसलेमबाट आएका यहुदीहरूले तिनलाई घेरे अनि थुप्रै गम्भीर आरोप लगाउन थाले तर उनीहरूले कुनै प्रमाण भने पेस गर्न सकेनन्‌।+ ८  तब आफ्नो प्रतिवाद गर्दै पावलले यसो भने: “मैले न यहुदीहरूको व्यवस्थाविरुद्ध न मन्दिरविरुद्ध न त सिजरविरुद्ध* नै केही पाप गरेको छु।”+ ९  यहुदीहरूलाई खुसी पार्ने मनसायले+ फेस्तसले पावललाई सोधे: “के तिमी यरुसलेम गएर मसामु यी कुराहरूको फैसला गरिएको चाहन्छौ?” १०  तर पावलले जवाफ दिए: “म सिजरको न्यायासनसामु खडा छु र यहीँ मेरो न्याय हुनुपर्छ। मैले यहुदीहरूको केही खराबी गरेको छैनँ, जुन कुरा हजुरले पनि राम्ररी बुझिरहनुभएको छ। ११  केही गरी यदि मैले गल्ती नै गरेको रहेछु र मृत्युदण्ड पाउन लायकको कुनै काम गरेकै रहेछु+ भने म मर्नदेखि पछि हट्‌दिनँ। तर अर्कोतिर यदि यी मानिसहरूले मलाई जे-जे आरोप लगाएका छन्‌, त्यसको कुनै आधार छैन भने तिनीहरूलाई खुसी पार्न मलाई तिनीहरूको हातमा सुम्पिने अधिकार कसैसित पनि छैन। म सिजरलाई अपिल गर्छु!”+ १२  तब आफ्ना सल्लाहकारहरूको समूहसित छलफल गरेपछि फेस्तसले भने: “तिमीले सिजरलाई अपिल गरेका छौ, त्यसैले तिमी सिजरकहाँ नै जानेछौ।” १३  केही दिनपछि फेस्तससित शिष्टाचार भेट गर्न राजा अग्रिपा र बर्णिस सिजरिया आए। १४  उनीहरू निकै दिन त्यहाँ बस्ने भएकोले फेस्तसले यसो भन्दै राजासामु पावलको मुद्दा पेस गरे: “फेलिक्सले एक जना मानिसलाई कैदमा राखेर गएका रहेछन्‌। १५  म यरुसलेममा छँदा मुख्य पुजारीहरू र यहुदीहरूका धर्मगुरुहरूले ऊमाथि लगाइएको अभियोग मसामु पेस गरे+ अनि उसलाई सजाय दिन माग गरे। १६  तर आरोप लागेको व्यक्‍तिले आरोप लगाउनेहरूलाई आमनेसामने भेटेर आफ्नो प्रतिवाद नगरेसम्म कसैलाई खुसी पार्नकै लागि उसलाई सजाय दिन रोमी कानुनले दिँदैन भनेर मैले जवाफ दिएँ।+ १७  त्यसैले तिनीहरू यहाँ आएपछि कुनै अलमल नगरी भोलिपल्टै म न्यायासनमा बसेँ र त्यस मानिसलाई हाजिर गराउने आदेश दिएँ। १८  आरोप लगाउनेहरू खडा भए तर उसले जे-जस्तो दुष्कर्महरू गरेको होला भनेर मैले सोचेको थिएँ, त्यस्तो कुनै दुष्कर्मको आरोप तिनीहरूले लगाएनन्‌।+ १९  तिनीहरूको आफ्नै देवताको उपासनाको* विषयमा+ र येसु भन्‍ने एक जना मानिसको विषयमा मतभेद भएको मात्र रहेछ। हुनत त्यस मानिसको मृत्यु भइसक्यो तर पावल भने ऊ जिउँदै छ भनेर जिद्दी गर्न छोड्‌दैन।+ २०  यो मतभेद कसरी सुल्झाउने भनेर रनभुल्लमा परेकोले मैले उसलाई यरुसलेम गएर त्यहीँ यी कुराहरूको फैसला गरिएको चाहन्छौ कि भनेर सोधेँ।+ २१  तर उसले मौसुफबाट+ निर्णय नआउन्जेल यहीँ कैदमा रहन पाऊँ भनी अपिल गरेको हुनाले मैले उसलाई सिजरकहाँ नपठाउन्जेल यहीँ राख्ने आदेश दिएँ।” २२  तब अग्रिपाले फेस्तसलाई भने: “म आफै त्यस मानिसको कुरा सुन्‍न चाहन्छु।”+ उनले जवाफ दिए: “हजुरले भोलि उसको कुरा सुन्‍नुहोला।” २३  त्यसकारण भोलिपल्ट अग्रिपा र बर्णिस आफ्ना सेनापतिहरू र सहरका प्रतिष्ठित मानिसहरूसहित बडो धूमधामका साथ सभाकक्षमा प्रवेश गरे। अनि फेस्तसले आदेश दिएपछि पावललाई भित्र ल्याइयो। २४  तब फेस्तसले भने: “हे राजा अग्रिपा तथा उपस्थित सज्जनवृन्द, तपाईँहरूले देखिरहनुभएको यस मानिसलाई जिउँदो छोड्‌नुहुन्‍न+ भनेर सबै यहुदीले यरुसलेममा र यहाँ ठूलठूलो स्वरमा कराउँदै मलाई बिन्ती गरेका छन्‌। २५  तर मृत्युदण्ड पाउन लायकको कुनै काम यसले गरेको छ जस्तो मलाई लागेन।+ त्यसैले यस मानिस आफैले मौसुफलाई अपिल गर्दा मैले यसलाई पठाउने निर्णय गरेँ। २६  तर यस मानिसको विषयमा मौसुफसामु जाहेर गर्न मिल्ने खासै केही कुरा मसित छैन। त्यसैले मैले यसलाई तपाईँहरूसामु, अझ विशेष गरी, हे राजा अग्रिपा, हजुरसामु हाजिर गराएको छु ताकि तपाईँहरूले न्यायिक छानबिन गर्नुभएपछि मसित लेख्न लायक केही कुरा होस्‌। २७  किनकि आरोपै नखुलाई कैदीलाई त्यहाँ पठाउनु मलाई मनासिब लागेन।”

फुटनोटहरू

शब्दावली हेर्नुहोस्‌।
वा “आफ्नै धर्मको।”